Jaykob an Eesaa Mek Pees Wid Eech Ada

Jehoava mi pramis Jaykob dat ih mi wahn protek ahn jos laik how ih mi protek Aybraham an Aizak. Jaykob mi chooz fi liv da wahn plays weh naym Hayran. Rait deh ih mi geh marid, ih mi ga wahn big famili, an ih mi geh fi bee veri rich.

Afta wahn wail, Jehoava mi tel Jaykob: ‘Goh bak tu di lan wehpaat yu famili liv.ʼ Soh Jaykob an ih famili staat dehn lang jerni tu Kaynan. Di mesinja dehn weh Jaykob mi sen owt mi kohn bak ahn seh: ‘Yu breda Eesaa di kohn wid 400 man fi meet yu!ʼ Jaykob mi frayd dat Eesaa wuda waahn hert hihn an ih famili. Soh ih pray tu Jehoava ahn tel ahn: ‘Pleez sayv mi fahn mi breda.ʼ Di neks day Jaykob mi sen Eesaa wahn gif. Ih sen wahn lata sheep, goat, kow, kyamil, ahn dongki.

Da sayhn nait, wail Jaykob mi deh bai ihself, ih si wahn aynjel! Di aynjel mi staat tu resl wid ahn til erli eena di maanin. Eevn doa Jaykob mi geh hert, ih neva giv op. Di aynjel tel ahn: “Let mi goh.” Bot Jaykob ansa ahn: ‘No, Ah noh wahn let yu goh til yu bles mi.ʼ

Fainali, di aynjel mi bles Jaykob. Den Jaykob mi noa dat Jehoava wudn mek Eesaa hert ahn.

Da sayhn maanin, Jaykob mi si Eesaa ahn di 400 man fahn faar. Jaykob ron heda ih famili ahn bow dong fronta ih breda sevn taimz. Den Eesaa ron tuwaadz Jaykob fi hog ahn. Di too a dehn staat tu krai ahn dehn mek pees. How yu tink Jehoava mi feel bowt weh Jaykob mi du fi mek pees wid ih breda?

Afta dat, Eesaa gaahn bak da ih hows, ahn Jaykob mi kantinyu ih jerni. Jaykob mi ga 12 son. Dehn naym da-mi Rooben, Simiyan, Leevai, Jooda, Dan, Naftalai, Gad, Asher, Isakar, Zebyulon, Joazef, ahn Benjamin. Jehoava mi yooz wan a Jaykob son—Joazef—fi sayv Ih peepl. Yoo noa how dat mi hapm? Mek wi fain owt.