Wahn Slayv Weh Mi Obay Gaad

Joazef da-mi wan a Jaykob yongis son. Ih oalda breda dehn mi noatis dat Joazef da-mi dehn pa fayvrit son. How yu tink dehn mi feel bowt dat? Dehn mi hayt Joazef ahn dehn mi jelos ahn. Wen Joazef mi ga sohn schraynj jreem, ih mi tel ih breda dehn bowt it. Dehndeh jreem mi meen dat wan day dehn wuda bow dong tu ahn. Dat mek dehn hayt ahn eevn moa!

Wahn day, Joazef breda dehn mi-di tek kayr a dehn pa sheep kloas tu di siti a Sheekem. Jaykob mi sen Joazef fi chek if ih breda dehn aarait. Fahn faar dehn si Joazef di kom ahn dehn seh tu eech ada: ‘Luk pahn da wan weh laik jreem di kohn deh. Mek wi kil ahn!ʼ Dehn grab ahn an chroa ahn eena wahn jrai wel. Bot Jooda, wan a ih breda, mi seh: ‘Noh kil ahn! Mek wi sel ahn insted.ʼ Soh dehn gaahn hed ahn sel Joazef fi 20 pees a silva tu sohn biznizman weh mi-di goh tu Eejip.

Den Joazef breda dehn tek ih koat ahn dip it eena goat blod ahn dehn sen di koat lang wid wahn mesij tu dehn pa. Dehn seh: ‘Dis da noh yu son koat?ʼ Jaykob mi tink dat wahn wail animal mi kil ahn. Hihn mi kyaahn stap krai fi Joazef. Nobadi kuda mi kaam ahn dong.

Da Eejip, dehn mi sel Joazef az wahn slayv tu wahn impoatant man weh naym Potifa. Bot Jehoava mi deh wid Joazef. Potifa mi noatis dat Joazef mi du gud werk ahn dat ih kuda chros ahn. Soh Potifa mi put Joazef in chaaj a evriting weh mi bilangz tu ahn.

Potifa waif mi noatis dat Joazef mi hansom ahn schrang. Evri day shee mi aks Joazef fi ga seks wid ahn. Weh Joazef mi du? Evri taim hihn mi seh: ‘No! Dat noh rait. Mi maasta chros mi, ahn yoo da ih waif. If Ah du dat, Ah wahn di sin gens Gaad!ʼ

Wahn day Potifa waif mi chrai foas Joazef fi ga seks wid ahn. Shee grab ahn bai ih kloaz, bot hihn ron owtsaid. Wen Potifa kohn hoam, shee lai ahn tel ahn dat Joazef mi chrai ga seks wid ahn. Potifa mi beks bad an ih chroa Joazef eena prizn. Bot Jehoava neva ferget Joazef.