Jehoava Neva Ferget Joazef

Wen Joazef mi deh eena prizn, Fayro, di king a Eejip, mi ga sohn jreem weh nobadi kuda andastan. Wan a ih servant tel ahn dat Joazef kuda eksplayn weh ih jreem dehn meenz. Kwik-wan, Fayro mi sen fi Joazef.

Den Fayro mi aks Joazef: ‘Yoo ku tel mi weh mi jreem dehn meen?ʼ Joazef tel ahn: ‘Eejip wahn ga lata food fi sevn yaaz. Bot afta dat, dehn wahn ga wahn famin fi sevn yaaz. Soh chooz sohnbadi weh ku gyada food now soh dat di peepl noh ded fahn honga layta.ʼ Fayro ansa ahn: ‘Ai wahn put yoo in chaaj! Ai da di moas powaful man eena Eejip, bot yoo wahn bee di sekant moas powaful man!ʼ How Joazef mi noa weh Fayro jreem dehn mi meen? Bikaaz Jehoava mi help ahn.

Joazef mi spen sevn yaaz di put op food. Afta dat, di sevn yaaz a famin mi staat, jos laik weh Joazef mi seh. Peepl fahn ada konchriz gaahn da Eejip fi bai food fahn Joazef. Wen ih pa, Jaykob, fain owt dat Eejip mi ga food, ih sen ten a ih son fi goh bai som.

Jaykob son dehn gaahn da Joazef, ahn hihn rekonaiz dehn. Bot Joazef breda dehn neva did rekonaiz ahn. Dehn bow dong fronta ahn, jos laik weh Joazef mi jreem wen ih mi yonga. Joazef mi waahn noa if dehn stil hayt ahn. Soh ih tel dehn: ‘Unu da spai. Unu kohn ya fi si wichpaat a wi konchri noh ga protekshan.ʼ Dehn tel ahn: ‘No! Wee da 12 breda, ahn wi kohn fahn Kaynan. Wan a wi breda ded, ahn di yongis wan stay wid wi pa.ʼ Joazef ansa dehn: ‘Bring unu yongis breda tu mi, den Ah wahn bileev unu.ʼ Soh dehn gaahn hoam tu dehn pa.

Wen aala di food weh dehn mi kehr mi ron owt, Jaykob mi sen ih son dehn bak da Eejip. Bot dis taim dehn kehr dehn yongis breda, Benjamin, wid dehn. Joazef mi tes dehn agen. Hihn mi haid ih silva kop eena Benjamin sak an ih akyooz ih breda dehn dat dehn teef it. Wen Joazef servants mi fain di kop eena Benjamin sak, ih breda dehn kudn bileev it. Dehn beg Joazef fi ponish dehn insteda Benjamin.

Now Joazef kuda mi si dat ih breda dehn atichood mi chaynj. Hihn kudn kanchroal ih feelinz nohmoh. Hihn staat tu krai ahn seh: ‘Da mee, Joazef, unu breda. Mai pa stil alaiv?ʼ Ih breda dehn mi sopraiz. Hihn tel dehn: ‘Noh feel bad fi weh unu du tu mi. Da Gaad sen mi ya soh dat unu noh ded fahn honga. Now unu hori bring mi pa.ʼ

Dehn gaahn hoam fi tel dehn pa di gud nyooz ahn dehn kehr ahn da Eejip. Afta soh moch yaaz, Joazef an ih pa mi fainali deh tugeda agen.