Moaziz Chooz fi Wership Jehoava

Wail dehn mi stil liv da Eejip, peepl mi staat tu kaal evribadi weh da paat a Jaykob famili wahn Izrelait. Afta Jaykob ahn Joazef mi ded, wahn nyoo Fayro mi staat tu rool. Dis Fayro mi frayd bikaaz di Izrelaits mi-di staat tu bee moa powaful dan di Ijipshan dehn. Soh hihn mek dehn bee slayv. Hihn foas dehn fi werk wid briks ahn fi du haad werk eena di feel. Eevn doa di Ijipshan dehn mi chreet dehn bad, di Izrelait dehn mi-di ga moa ahn moa pikni. Fayro neva laik dat, soh hihn mi koman fi mek dehn kil aala di nyoobaan Izrelait baybi bwai dehn. Yoo ku imajin how fraitn di Izrelait dehn mi fraitn?

Wahn Izrelait laydi weh naym Jokebed mi ga wahn byootiful baybi bwai. Fi protek ahn, shee put ahn eena wahn baaskit ahn haid ahn eena sohn taal graas weh mi deh saida di Nail Riva. Miryam, di baybi bwai sista, mi stay kloas bai fi si weh wuda hapm.

Fayro daata gaahn bayd bai di riva an ih si di baaskit. Wen ih oapm it, ih si wahn baybi weh mi-di krai, an ih mi feel sari far ahn. Miryam aks ahn: ‘Yu waahnt Ah goh fain wahn laydi weh ku bresfeed di baybi fi yu?ʼ Fayro daata seh yes, ahn Miryam bring bak ih oan ma, Jokebed. Fayro daata tel ahn: ‘Kehr dis baybi wid yu, ahn bresfeed ahn fi mi, an Ah wahn pay yu.ʼ

Wen di lee bwai geh biga, Jokebed kehr ahn da Fayro daata, ahn shee naym ahn Moaziz an ih tek ahn az ih oan son. Moaziz mi groa op az wahn prins an ih kuda geh eniting weh ih waahnt. Bot Moaziz neva did ferget Jehoava. Hihn mi noa dat hihn da-mi wahn Izrelait, noh wahn Ijipshan. Ahn hihn mi chooz fi serv Jehoava.

Moaziz mi 40 yaaz oal wen ih mi disaid fi help ih peepl. Wen hihn mi si wahn Ijipshan di beet wahn Izrelait slayv, ih beet di Ijipshan man soh haad dat ih en op di kil ahn. Den Moaziz mi haid di badi eena di san. Wen Fayro mi fain owt, hihn mi chrai kil Moaziz, bot Moaziz mi ron weh ahn gaahn da Midiyan. Rait deh, Jehoava mi kip di luk afta ahn.