Di Fers Chree Ponishment

Di Ijipshan dehn mi foas di Izrelaits fi werk haad az slayvz. Jehoava mi sen Moaziz an Ayron wid dis mesij: ‘Let goh mi peepl soh dat dehn ku goh wership mee da di wildanes.ʼ Fayro mi soh prowd dat ih seh: ‘Ai noh kay weh dis Jehoava ga fi seh. Ai noh wahn mek di Izrelait dehn goh.ʼ Den Fayro mi foas dehn fi werk haada dan bifoa. Jehoava mi wahn teech Fayro wahn lesn. Yoo noa how hihn du dat? Eejip mi geh ten ponishment. Jehoava mi tel Moaziz: ‘Fayro noh di lisn tu mi. Eena di maanin, hihn gwehn da di Nail Riva. Goh tu ahn an tel ahn dat bikaaz ih noh let goh mi peepl, aala di waata eena di Nail Riva wahn ton intu blod.ʼ Moaziz mi obay Jehoava an ih gaahn si Fayro. Fayro mi-di wach wen Ayron nak di Nail Riva wid ih stik, ahn di waata mi ton intu blod. Di riva mi staat tu stink, di fish dehn ded, ahn dehn neva ga no fresh waata fi jrink fahn di Nail. Bot Fayro stil neva let dehn goh.

Sevn dayz layta, Jehoava mi sen Moaziz bak tu Fayro wid dis mesij: ‘If yu noh let dehn goh, Ah wahn mek Eejip geh ful a frag.ʼ Ayron mi rayz ih stik, ahn di hoal a Eejip mi ful op a frag. Di peepl mi fain frag eena dehn hows, pahn dehn bed, an eena dehn bowl. Dehn mi ga frag noh mata wehpaat dehn ton! Fayro mi mek Moaziz beg Jehoava fi stap da ponishment an ih pramis fi let goh di Izrelaits. Soh Jehoava mi stap da ponishment, ahn di Ijipshan dehn staat tu pail op di ded frag dehn. Di hoal a Eejip mi staat tu stink. Bot Fayro stil neva let dehn goh.

Den Jehoava tel Moaziz: ‘Tel Ayron fi nak di grong wid ih stik, ahn di dos wahn ton intu sohn smaal lee flai weh bait.ʼ Dat da egzakli weh hapm, dehn mi ga sohn smaal lee flai evriway. Sohn Ijipshan mi tel Fayro: ‘Dis ponishment da fahn Gaad.ʼ Bot, agen, Fayro neva let goh di Izrelaits.