Di Twelv Spai

Di Izrelaits lef Mongt Sainai ahn dehn chravl chroo di dezert da Payran tu wahn plays weh naym Kaydesh. Rait deh Jehoava mi tel Moaziz: ‘Sen 12 man, wan fahn eech chraib, fi chek owt Kaynan, di lan weh Ah wahn giv tu di Izrelaits.ʼ Soh Moaziz mi chooz 12 man an ih tel dehn: ‘Goh da Kaynan, ahn fain owt if food ku groa pahn di lan. Si if di peepl weh liv deh week er schrang ahn weda dehn liv eena tent er eena siti.ʼ Di 12 spai, inkloodin Jashwa ahn Kayleb, gaahn da Kaynan.

Afta 40 dayz, di spai dehn gaahn bak ahn dehn kehr bak sohn fig, pomegranet, ahn grayp. Dis da weh dehn tel Moaziz: ‘Da wahn gud lan, bot di peepl weh liv deh schrang ahn di waal rong di siti big.ʼ Den Kayleb mi seh: ‘Mek wi goh rait now! Wi ku kanka dehn!ʼ Yoo noa wai Kayleb mi seh dat? Bikaaz hihn ahn Jashwa mi chros eena Jehoava. Bot di ada ten spai mi seh: ‘No! Di peepl dehn da laik jaiyant! Wen wi mi kompyaa wiself tu dehn, wee da-mi laik graashapa.ʼ

Di Izrelait dehn mi sad. Dehn mi staat tu komplayn ahn seh tu wan anada: ‘Mek wi chooz wahn difrent leeda ahn goh bak da Eejip. Wai wi shuda goh da Kaynan, fi mek dehn kil wi?ʼ Jashwa ahn Kayleb mi seh: ‘Noh goh gens Jehoava, ahn noh frayd fi di peepl. Jehoava wahn protek wi.ʼ Bot di Izrelait dehn neva lisn. Dehn mi eevn waahn kil Jashwa ahn Kayleb!

Weh Jehoava mi du? Hihn mi tel Moaziz: ‘Ah don du lata gud tingz fi di Izrelaits ahn dehn stil noh obay mi. Soh dehn wahn stay ya eena di wildanes fi 40 yaaz, ahn da ya dehn wahn ded. Onli dehn chiljren ahn Jashwa ahn Kayleb wahn liv eena di lan weh Ah mi pramis fi gi dehn.ʼ