Jehoava Mi Chooz Jashwa

Afta Moaziz mi leed di nayshan a Izrel fi lata yaaz, hihn mi jos ga lee bit a taim lef fi liv. Jehoava mi tel ahn: ‘Yoo da noh di wan weh wahn kehr di Izrelait dehn eena di Pramis Lan. Bot Ah wahn mek yu si di lan.ʼ Den Moaziz mi aks Jehoava fi chooz wahn nyoo leeda fi tek kayr a di peepl. Jehoava tel ahn: ‘Goh da Jashwa ahn tel ahn dat Ai chooz hihn.ʼ

Moaziz mi tel di nayshan a Izrel dat hihn wahn soon ded ahn dat Jehoava mi chooz Jashwa fi leed dehn tu di Pramis Lan. Soh Moaziz mi tel Jashwa: ‘Noh bee frayd. Jehoava wahn help yu.ʼ Lee bit afta dat, Moaziz gaahn da di tap a Mongt Neebo. Fahn deh, Jehoava mi shoa ahn di lan weh Hihn mi pramis tu Aybraham, Aizak, ahn Jaykob. Moaziz mi 120 yaaz oal wen ih ded.

Jehoava mi tel Jashwa: ‘Kraas di Jaadn Riva, ahn goh da Kaynan. Ah wahn help yu jos laik how Ah mi help Moaziz. Mek shoar yu reed mi Laa evri day. Noh bee frayd. Ga korij. An obay weh Ah koman yu fi du.ʼ

Jashwa mi sen too spai fi chek owt di siti a Jeriko. Eena di neks stoari, wi wahn laan moa bowt weh mi hapm eena da siti. Wen di spai dehn kohn bak, dehn mi seh da wahn gud taim fi goh da Kaynan. Di neks day, Jashwa mi tel di nayshan a Izrel fi pak op di kyamp. Den ih sen di prees dehn weh mi-di kehr di aak a di kovenant fi goh heda di peepl tu di Jaadn Riva. Di riva mi hai, bot az soon az di prees dehn toch di waata wid dehn fut, di waata stap floa an ih geh jrai. Di prees dehn mi stan op pahn jrai grong midl a di Jaadn Riva wail di Izrelait dehn kraas tu di ada said. Yu tink dis mirakl mi rimain dehn bowt weh Jehoava mi du fi dehn da di Red See?

Afta aala dehndeh yaaz, di Izrelait dehn fainali reech di Pramis Lan. Dehn kuda mi bil hows ahn siti, plaant seed eena dehn feel ahn grayp aachad, ahn groa difrent froot chree. Da lan mi soh gud dat da mi laik ih ful op wid milk ahn honi.