Jehoava Taak tu Samwel

Hai Prees Eelai mi ga too son weh mi serv az prees da di tabernakl. Dehn da-mi Hofnai ahn Finiyas. Dehn neva obay Jehoava laa dehn, ahn dehn mi chreet di peepl bad. Wen di Izrelaits mi bring dehn sakrifais tu Jehoava, Hofnai ahn Finiyas wuda tek di bes pees a meet fi dehnself. Eelai mi hyaa bowt weh ih son dehn mi-di du, bot hihn neva du notn bowt it. How bowt Jehoava? Yu tink Hihn mi du sohnting bowt it?

Eevn doa Samwel mi moch yonga dan Hofnai ahn Finiyas, hihn neva kapi fi dehn bad egzampl. Dat da wai Jehoava mi hapi wid Samwel. Wahn nait wail Samwel mi-di sleep, ih hyaa wahn vais di kaal owt ih naym. Ih get op ahn ron gaahn da Eelai, an ih tel ahn: ‘Si mi ya!ʼ Bot Eelai tel ahn: ‘Ai neva mi-di kaal yu. Goh bak goh sleep.ʼ Soh Samwel gaahn bak da ih bed. Den di saym ting hapm agen. Wen Samwel mi hyaa di vais fi di terd taim, Eelai riyalaiz dat Jehoava mi-di kaal ahn. Soh Eelai tel Samwel dat if ih hyaa di vais agen, ih fi seh: ‘Jehoava, pleez taak tu mi. Ah di lisn tu yu.ʼ

Samwel gaahn bak gaahn sleep. Den ih hyaa di vais seh: ‘Samwel! Samwel!ʼ Hihn mi ansa: ‘Jehoava, pleez taak tu mi. Ah di lisn.ʼ Jehoava mi tel ahn: ‘Tel Eelai dat Ah wahn ponish hihn an ih famili. Hihn noa dat ih son dehn di du bad tingz eena mai tabernakl, bot hihn noh du notn bowt it.ʼ Di neks maanin, Samwel mi oapm di doa dehn fahn di tabernakl, laik weh ih mi aalwayz du. Hihn mi frayd fi tel Hai Prees Eelai bowt weh Jehoava mi seh. Bot Eelai kaal ahn, an ih aks ahn: ‘Samwel, mi son, weh Jehoava tel yu? Tel mi evriting.ʼ Soh Samwel mi tel Eelai evriting.

Az Samwel mi geh oalda, Jehoava mi kantinyu deh wid ahn. Di Izrelaits fahn aal oava di lan mi noa dat Jehoava mi chooz Samwel fi serv az wahn prafit ahn joj.