Izrel Fers King

Jehoava mi gi di Izrelaits sohn joj fi gaid dehn, bot dehn mi waahn wahn king. Soh dehn tel Samwel: ‘Aala di nayshan dehn rong wi ga wahn king. Wee waahn wahn king tu.ʼ Samwel mi feel laik weh dehn di aks fa mi rang, soh ih pray tu Jehoava bowt it. Jehoava mi tel ahn: ‘Di peepl dehn noh di rijek yoo, dehn di rijek mee. Tel dehn dat dehn ku ga wahn king, bot di king weh rool oava dehn wahn diman lata ting fahn dehn.ʼ Eevn doa hihn mi tel dehn dat, dehn tel ahn: ‘Wee noh kay. Wee waahn wahn king!ʼ

Jehoava mi tel Samwel dat wahn man weh naym Saal wahn bee di fers king. Wen Saal gaahn vizit Samwel da Rayma, Samwel poar ail oava Saal hed fi shoa dat ih di anoint ahn az king.

Layta, Samwel gyada di Izrelaits tugeda fi shoa dehn hoo da dehn nyoo king. Bot dehn kudn fain Saal no way. Yu waahn noa wai? Bikaaz ih mi-di haid monks di logij. Wen dehn fainali fain Saal, dehn bring ahn, an mek ih stan op midl a di krowd. Hihn mi taala dan evribadi els, an ih mi veri hansom. Samwel mi seh: ‘Luk pahn di wan hoo Jehoava pik.ʼ Den di peepl staat tu hala: ‘Lang liv di king!ʼ

At fers, King Saal mi lisn tu Samwel an ih mi obay Jehoava. Bot den hihn mi chaynj. Fi egzampl, di king neva sopoas tu aafa sakrifais. Wahn taim, Samwel mi tel Saal fi wayt far ahn soh dat hihn ku aafa sakrifais. Bot Samwel mi tek lang fi reech, soh Saal gaahn hed ahn bon di sakrifais ihself. Weh Samwel mi du? Ih tel Saal: ‘Yu shuda mi obay Jehoava, bot yu neva du it.ʼ Yu tink Saal mi laan fan ih mistayk?

Layta, Saal gaahn fait di Amalekait dehn, ahn Samwel tel Saal fi noh mek non a dehn stay alaiv. Bot Saal mi disaid fi noh kil King Aygag. Soh Jehoava tel Samwel: ‘Saal lef mi, an ih noh lisn tu mi.ʼ Samwel mi veri sad, an ih tel Saal: ‘Bikaaz yu mi stap obay Jehoava, hihn wahn chooz wahn nada king.ʼ Wen Samwel mi ton fi lef, Saal grab ahn bai di ej a ih koat an ih tayr. Den Samwel tel Saal: ‘Saym way soh, Jehoava wahn grab di kingdom fahn yu.ʼ Jehoava mi wahn gi di kingdom tu sohnbadi weh lov an obay ahn.