Jan Pripyaa di Way fi di Mesaiya

Jan hoo da Zakaraiya an Ilizabet son, mi geh fi bee wahn prafit wen ih groa op. Jehoava mi yooz Jan fi teech di peepl dat di Mesaiya wahn soon kohn. Bot insteda teech eena di sinagag ahn tong dehn, Jan mi-di preech eena di wildanes. Peepl mi kohn fahn Jeroosalem an aal oava Judeeya fi laan fahn Jan. Hihn mi teech dehn dat if dehn waahn pleez Gaad, dehn mi need fi stap du weh bad. Afta dehn mi lisn tu Jan, wahn lata dehn mi ripent, an ih baptaiz dehn eena di Jaadn Riva.

Jan mi liv wahn simpl laif. Fi hihn kloaz mi mek owta kyamil hyaa an ih mi eet loakos ahn wail honi. Di peepl mi waahn noa moa bowt Jan. Eevn di prowd Farisee ahn Sadyusee dehn gaahn si ahn. Jan mi tel dehn: ‘Unu need fi chaynj unu wayz ahn ripent. Noh tink dat unu speshal jos bikaaz unu seh dat unu da Aybraham chiljren. Dat noh meenz dat unu da Gaad chiljren.ʼ

Wahn lata peepl gaahn si Jan an aks ahn: ‘Weh wi shuda du fi pleez Gaad?ʼ Jan tel di Jooz: ‘If sombadi ga too shert, ih fi gi wan tu wahn persn weh need it.ʼ Yoo noa wai hihn seh dat? Ih mi waahn ih disaipl dehn noa dat if dehn waahn pleez Gaad, dehn haftu lov peepl.

Jan mi tel di taks kalekta dehn: ‘Bee aanis ahn noh di teef peepl moni.ʼ An ih tel di soalja dehn: ‘Noh aksep wahn braib er tel lai.ʼ

Di prees ahn Leevait dehn mi aalso gaahn si Jan an aks ahn: ‘Da hoo yoo? Evribadi waahn noa.ʼ Jan tel dehn: ‘Ai da di vais weh deh eena di wildanes, weh di leed peepl tu Jehoava, jos laik weh Aizaiya mi seh.ʼ

Peepl mi lov weh Jan mi-di teech dehn. Ahn wahn lata dehn mi tink dat Jan da-mi di Mesaiya. Bot Jan tel dehn: ‘Sombadi di kohn weh moa powaful dan mee. An Ai noh eevn gud inof fi loos di laysn fan ih sandalz. Ai baptaiz peepl wid waata, bot hihn wahn baptaiz peepl wid hoali spirit.ʼ