Jeezas Da di Mesaiya

Dis da di mesij weh Jan mi-di preech: ‘Sohnbadi weh moa powaful dan mee wahn soon kohn.ʼ Wen Jeezas mi bowt 30 yaaz oal, ih gaahn fahn Gyalilee tu di Jaadn Riva, wehpaat Jan mi-di baptaiz peepl. Jeezas mi waahn Jan baptaiz ahn, bot Jan tel ahn: ‘Ai noh fi baptaiz yoo. Da yoo shuda di baptaiz mee.ʼ Jeezas tel ahn: ‘Jehoava waahn yu baptaiz mi.ʼ Soh dehn gaan eena di Jaadn Riva ahn Jan dip ahn anda di waata.

Afta Jeezas kom op fahn di waata, ih mi pray. Da saym taim, di hevn oapm op, ahn Gaad spirit kohn dong laik wahn dov. Den Jehoava seh fahn hevn: “Yoo da mi Son, di wan weh Ah onli lov. Ah pleez wid yu.”

Wen Jehoava spirit mi kohn pahn Jeezas, dat da how hihn kohn fi bee di Krais, er Mesaiya. Now ih kuda mi staat di werk weh Jehoava sen ahn fi du pahn di ert.

Rait afta Jeezas geh baptaiz, ih gaahn spen 40 dayz da di wildanes. Afta dat, ih gaahn luk fi Jan. Wen Jan si Jeezas di kohn tuwaadz ahn, ih seh: ‘Hihn da di Lam a Gaad weh wahn tek weh di sin a di werl.ʼ Jan mi seh dat fi mek peepl noa dat Jeezas da di Mesaiya. Yoo noa weh mi hapm tu Jeezas wail ih mi deh eena di wildanes? Mek wi fain owt.