Jeezas Rezorek Lazaros

Jeezas mi ga chree kloas frenz weh mi liv da Betani. Dehn da-mi Lazaros an ih too sista, Mayri ahn Marta. Wahn day, wen Jeezas mi deh pahn di ada said a di Jaadn, Mayri ahn Marta mi sen ahn wahn impoatant mesij: ‘Lazaros sik bad. Pleez kohn kwik!ʼ Bot Jeezas neva gaahn rait away. Hihn mi stay fi too moa dayz ahn den ih tel ih disaipl dehn: ‘Mek wi goh da Betani. Lazaros di sleep, an Ah gwehn goh wayk ahn op.ʼ Di apasl dehn seh: ‘If Lazaros di sleep, den dat wahn help ahn fi geh beta.ʼ Soh Jeezas tel dehn playn-wan: ‘Lazaros don ded.ʼ

Wen Jeezas mi reech da Betani, dehn mi don beri Lazaros fi foa dayz. Wahn lata peepl gaahn komfert Marta ahn Mayri. Wen Marta hyaa dat Jeezas mi dehdeh, shee hori gaahn meet ahn. Ih tel ahn: “Laad, mai breda neva mi wahn ded if yoo mi deh ya.” Jeezas tel ahn: ‘Yu breda wahn liv agen. Yoo bileev dis, Marta?ʼ Shee tel ahn: ‘Ai bileev dat ih wahn rayz op bak eena di rezorekshan.ʼ Jeezas tel ahn: “Ai da di rezorekshan an Ai da di wan weh wahn gi peepl laif.”

Den Marta gaahn tu Mayri ahn tel ahn: ‘Jeezas deh ya.ʼ Mayri ron gaahn meet Jeezas, ahn di krowd fala ahn. Shee neel dong fronta Jeezas, an ih kudn stap krai. Shee tel ahn: ‘Laad, if yoo mi deh ya, mi breda wuda mi stil bee alaiv!ʼ Wen Jeezas si how moch shee mi-di sofa, hihn staat tu krai anaal. Wen di peepl si Jeezas di krai, dehn seh: ‘Si how Jeezas mi lov Lazaros soh moch.ʼ Bot sohn peepl mi-di wanda: ‘Wai ih neva du notn fi help ih fren?ʼ Weh Jeezas mi du afta dat?

Jeezas gaahn da di toom. Wahn big stoan mi-di kova di enchrans. Den Jeezas tel dehn: ‘Roal di stoan wan said.ʼ Marta tel ahn: ‘Bot da don foa dayz sins ih ded! Ih mosi stink bai now.ʼ Bot dehn stil roal weh di stoan, ahn Jeezas staat tu pray: ‘Faada, tank yu fi lisn tu mi. Ai noa dat yu aalwayz lisn tu mi, bot Ah di seh dis soh dat di peepl weh deh ya noa dat da yoo sen mi.ʼ Afta dat, ih hala owt wid wahn lowd vais: “Lazaros, kom owt!” Sohnting amayzin mi hapm: Lazaros mi kom owta di toom, an ih mi stil ga klaat rap op pan ahn. Jeezas mi seh: “Unu loos ahn an mek ih goh.”

Wahn lata peepl mi si weh hapm ahn dehn staat tu ga fayt eena Jeezas. Bot som mi gaahn tu di Farisee dehn fi tel dehn weh hapm. Fahn da day, di Farisee dehn mi waahn kil Lazaros ahn Jeezas. Wan a di 12 apasl weh naym Joodas Iskariyat gaahn meet di Farisee dehn eena seekrit an aks dehn: ‘Humoch moni unu wahn gi mi if Ah help unu fain Jeezas?ʼ Dehn pramis ahn 30 pees a silva, an afta dat Joodas mi staat tu luk fi wahn apachooniti fi han oava Jeezas tu di Farisee dehn.