Si Yuself di Way Jehoava Si Yu

1-2. (a) Wat da sohn tingz wi mait wanda bowt? (b) Weh wi wahn taak bowt eena dis aatikl?

WEDA wi yong er oal, sohntaim wi mait wanda bowt sertn tingz. Fi egzampl, wahn yong brada mait wanda if Jehoava reeli kay bowt ahn, an soh ih noh shoar if ih shuda geh baptaiz. Er tink bowt wahn brada weh mi chooz fi put Jehoava fers eena ih laif wen ih mi yonga insteda di chrai mek moa moni. Now dat ih lee bit oalda an ih si how ih famili bayli di mek it, ih mait wanda if ih mi mek di rait disizhan. Er wahn oalda sista weh noh ga di schrent weh ih yoostu ga mait feel diskorij bikaaz ih kyaahn du tingz weh ih yoostu du. Yoo eva aks yuself kweschanz laik: ‘Jehoava reeli kay bowt mi? Di sakrifais dehn weh Ah mi mek fi Jehoava eena di paas mi reeli wert it? Ai ku stil du eniting fi Jehoava?ʼ

² If wi noh fain ansaz tu dehndeh kweschanz, wi fayt ku geh week ahn wi ku eevn stap serv Jehoava. Soh eena dis aatikl, wi wahn taak bowt how di Baibl ku help wi if wi noh shoar dat (1) Jehoava kay bowt wi, (2) wi mi mek gud disizhanz eena di paas, ahn (3) wi di du inof fi Jehoava.

HOW WI KU FAIN ANSAZ TU WI KWESCHANZ?

3. Weh wi ku du if wi di wanda bowt sohnting?

³ Wan way wi ku geh ansaz tu wi kweschanz da wen wi stodi di Baibl. If wi du dis, wi frenship wid Jehoava wahn geh schranga, wi wahn bee moa machoar Kristyanz, ahn wi wahn ku “stan op schrang eena di fayt.”—1 Kor. 16:13.

4. How wi ku “chek evriting fi mek shoar ih karek”? (1 Tesaloanyanz 5:21)

⁴ Reed 1 Tesaloanyanz 5:21. Di Baibl inkorij wi fi “chek evriting fi mek shoar ih karek.” Bot how wi ku du dat? Wen wi di wanda bowt sohnting, wi shuda chek ahn si weh di Baibl seh bowt it. Fi egzampl, tink bowt di yong poblisha weh noh shoar if Jehoava reeli kay bowt ahn. Yu tink ih shuda bileev dat jos bikaaz dat da how ih di feel? No! Ih need fi “chek” if di way ih di feel da reeli di way how Jehoava feel bowt ahn.

5. How Jehoava ansa wi kweschanz?

⁵ Wen wi reed di Baibl, da laik Jehoava di taak tu wi. Bot if sohnting di bada wi, wi haftu du moa dan jos reed di Baibl. Wi need fi luk fi skripchaz weh wahn ansa wi kweschanz, ahn wi need fi stodi dehn. Wi ku pray tu Jehoava soh dat ih help wi fain ansaz tu wi kweschanz. Ahn wi ku yooz di poblikayshan dehn fahn Jehoava aaganaizayshan fi help wi fain di ansaz weh wi need. (Prav. 2:​3-6) Den wi ku luk fi Baibl prinsiplz an infamayshan weh ku help wi andastan weh Jehoava tink. Ahn wi ku reed egzamplz a Jehoava faytful servants eena di Baibl weh gaahn chroo som a di saym tingz weh wee di goh chroo.

6. How meetinz help wi fi ansa wi kweschanz?

⁶ Jehoava taak tu wi da di meetinz tu. Wen wi goh da meetin, wi mait hyaa sohnting eena wahn taak er wahn koment weh ansa di kweschan weh wi mi-di wanda bowt. (Prav. 27:17) Mek wi diskos di chree kweschanz weh wi mi aks da di biginin a dis aatikl.

WEN YU NOH SHOAR IF JEHOAVA KAY BOWT YU

7. Weh som a wi mait wanda?

⁷ Yoo eva wanda if Jehoava reeli kay bowt yoo? If yu feel laik yu noh impoatant, yu mait tink ih noh pasabl fi bee frenz wid Jehoava, di wan weh mek di hoal yoonivers. King Dayvid mi praabli feel laik dis tu. Ih mi amayzin tu hihn dat Jehoava eevn kay bowt peepl. Hihn mi aks: “Oa Jehoava, da hoo wee soh dat yu noatis wi? Ahn da wai yoo eevn pay atenshan tu di son a wahn man?” (Saa. 144:3) Mek wi fain di ansa.

8. Bays pahn 1 Samwel 16:​6, 7, 10-12, weh Jehoava si eena wahn persn?

⁸ Di Baibl teech wi dat Jehoava reeli kay bowt peepl weda er nat enibadi els kay bowt dehn. Fi egzampl, wen Jehoava mi sen Samwel da Jesi hows fi anoint wan a ih son dehn fi bee di neks king a Izrel, Jesi mi bring aala ih son dehn eksep ih yongis son, Dayvid.a Eevn doa Jesi neva inchrojoos Dayvid tu Samwel, Jehoava mi pik Dayvid fi bee king. (Reed 1 Samwel 16:​6, 7, 10-12.) Jehoava mi noa Dayvid gud ahn hihn kuda mi si humoch Dayvid mi reeli lov ahn.

9. Wai yu ku bee shoar dat Jehoava reeli kay bowt yu? (Koment pahn di picha.)

⁹ Tink bowt how Jehoava don shoa dat ih reeli kay bowt yoo. Jehoava gi yu di bes advais fi weh yu di goh chroo. (Saa. 32:8) Hihn ku onli du dat bikaaz ih noa yu gud. (Saa. 139:1) Wen yu fala Jehoava advais ahn si how ih help yu, yu wahn kanvins yuself dat ih reeli kay bowt yu. (1 Chron. 28:9; Aks 17:​26, 27) Jehoava si aal weh yu du far ahn. Hihn si yu gud kwalitiz an ih waahn bee yu fren. (Jer. 17:10) Ahn yu mek hihn reeli hapi wen yoo waahn bee ih fren tu.—1 Jan 4:19.

WEN YU NOH SHOAR IF YU MEK DI RAIT DISIZHAN

10. Wen wi tink bowt di disizhanz weh wi mek eena di paas, weh wi mait wanda?

¹⁰ Dehn mait ga taimz wen wi tink bowt di disizhanz weh wi mek eena di paas ahn wanda if da mi di rait disizhan wi mek. Maybi eena di paas yu mi paas op wahn gud jab er wahn nada way fi mek moa moni soh dat yu ku du moa fi Jehoava. Bot now yu staat tu wanda if dat da-mi wahn gud disizhan, bikaaz ih luk laik ada peepl weh mi put moni fers ga wahn gud laif. Dis mait mek yu tink: ‘Di sakrifais weh Ah mek fi serv Jehoava mi reeli wert it? Maybi Ah neva shuda paas op di chaans fi mek moa moni!ʼ

11. Wai di man weh mi rait Saam 73 mi feel diskorij?

¹¹ If yoo wanda bowt tingz laik dat, den tink bowt how di man weh rait Saam 73 mi feel. Hihn mi si how peepl weh neva di serv Jehoava mi luk helti, rich, ahn laik dehn neva ga no prablemz. (Saa. 73:​3-5, 12) Wen hihn si evriting di goh gud fi dehn, hihn mi feel laik hihn mi-di werk soh haad fi Jehoava ahn noh di get no way. Hihn mi feel laik ih mi-di ga “prablemz aal day lang.” (Saa. 73:​13, 14) How hihn mi deel wid dat?

12. Bays pahn Saam 73:​16-18, weh mi help di saamis fi noh feel diskorij?

¹² Reed Saam 73:​16-18. Di saamis mi gaahn da Jehoava hoali plays. Wen ih mi dehdeh, ih kuda mi tink schrayt. Hihn riyalaiz dat eevn doa ih luk laik di peepl weh neva mi-di serv Gaad mi ga tingz gud, dehn neva ga wahn hoap fi di fyoocha laik hihn. Afta dat, hihn mi feel hapi, bikaaz ih mi noa dat ih beta fi serv Jehoava. Soh hihn mi mek op ih main fi kantinyu serv Jehoava.—Saa. 73:​23-28.

13. Weh yu ku du if yu rigret som a di disizhan weh yu mek eena di paas? (Koment pahn di picha.)

¹³ Di Baibl ku help wi wen wi feel diskorij. How? Tink bowt di gud tingz weh yu gat. Tink bowt aal di wayz Jehoava bles yu, ahn memba dat peepl weh noh serv hihn noh ga dat. Dehn wan weh noh serv Jehoava di werk haad fi ga wahn komfatabl laif now kaaz dehn noh ga wahn hoap fi di fyoocha. Bot Jehoava di gi wi wahn lata gud tingz now, ahn hihn wahn gi wi beta tingz eena di fyoocha. (Saa. 145:16) Wi kuda neva noa fi shoar dat tingz mi wahn ton owt beta if wi mi mek wahn difrent disizhan. Wan ting wi noa fi shoar da dat wen wi mek wahn disizhan weh bays pahn lov fi Jehoava ahn fi peepl, wi wahn neva mis owt pahn eniting gud.

WEN YU NOH SHOAR IF YU STIL YOOSFUL TU JEHOAVA

14. Weh sichuwayshan som a wi deh eena, ahn weh wi mait wanda?

¹⁴ Som a Jehoava peepl di sofa bikaaz a oal ayj er helt prablemz. Sayka dat, dehn mait feel laik dehn noh az impoatant tu Jehoava. Dehn mait wanda if dehn ku stil bee yoosful tu Jehoava sins dehn kyaahn du az moch az bifoa.

15. Weh di man weh rait Saam 71 mi shoar a?

¹⁵ Di man weh rait Saam 71 mi feel laik dat. Hihn pray: “Noh dash mi wan said wen Ah get oal.” (Saa. 71:​9, 18) Hihn mi kanvins dat if ih stay laayal, Jehoava wahn tek kayr a ahn. Jehoava hapi wid wi wen wi du wi bes fi serv ahn noh mata wat da wi sichuwayshan.—Saa. 37:​23-25.

16. Weh oalda wanz ku du fi Jehoava? (Saam 92:​12-15)

¹⁶ If yoo di geh oalda, chrai tink bowt how Jehoava feel bowt yu. Hihn ku help yu stay faytful eevn doa yu mait di deel wid helt prablemz. (Reed Saam 92:​12-15.) Noh wori bowt weh yu kyaahn du. Jos kip di du weh yu kud. Fi egzampl, yu faytful egzampl ku schrentn adaz ahn yu ku inkorij dehn wen yu shoa dat yu kay bowt dehn. Yu ku tel dehn how Jehoava mi tek kayr a yu oava di yaaz ahn how yu luk faawod fi si wen aala di pramis eena di Baibl kohn chroo. Ahn memba, wen yu pray fi adaz, dat ku help dehn wahn lat. (1 Peet. 3:12) Noh mata wat da yu sichuwayshan, aala wi ku giv Jehoava sohnting ahn help adaz.

17. Wai wee noh kompyaa weh wee ku du wid weh adaz ku du?

¹⁷ Maybi yu kyaahn du weh yu yoostu du, ahn sayka dat yu feel foschraytid. Memba dat Jehoava wahn hapi if yu du weh yu kud du. Noh kompyaa yuself wid adaz, bikaaz Jehoava noh kompyaa weh yoo ku du wid weh adaz du. (Gal. 6:4) Mayri mi gi Jeezas wahn ekspensiv perfyoom, wail wahn poa wido mi giv too smaal koin da di templ. (Look 21:​1-4; Jan 12:​3-5) Jeezas neva kompyaa dehndeh too laydi, bikaaz too a dehn mi shoa fayt. Jehoava hapi wen yu du weh yu ku du bikaaz yu lov ahn, eevn if yu feel laik weh yu di du da lee bit.

18. Weh ku help wi if dehn ga tingz weh wi wanda bowt? (Si di baks weh naym “How Jehoava Werd Ku Help Wi Wen Wi Feel Laik Wi Noh Mata tu Hihn.”)

¹⁸ Sohntaim wi wahn wanda bowt sertn tingz. Bot wi don laan dat di Baibl ku help wen wi feel laik dat. Soh chrai haad fi fain di ansaz tu dehndeh kweschanz. Ahn memba dat Jehoava noa yu gud. Hihn apreeshiayt aala di sakrifais weh yu mek fi put ahn fers eena yu laif, ahn hihn pramis dat ih wahn bles yu. Yu ku bee shoar dat Jehoava lov ahn kay bowt eech wan a fi hihn laayal servant dehn.