Chros Dat Jehoava Wahn Aalwayz Help Yu

1. How Moaziz mi shoa dat ih chros eena Jehoava wen ih kehr di Izrelait dehn owt fahn Eejip?

DI BUK a Heebrooz taak bowt lata peepl weh mi ga fayt eena Jehoava, ahn Moaziz da wan a di bes egzampl. (Heeb. 3:​2-5; 11:​23-25) Hihn mi shoa fayt wen ih leed di Izrelait dehn owt fahn Eejip. Wen Fayro an ih aami mi-di chays afta dehn, da mi praabli wahn fraitnin sichuwayshan, bot Moaziz neva mek dat stap ahn. Ih mi chros Jehoava ahn kehr di Izrelaits chroo di Red See ahn den chroo di wildanes. (Heeb. 11:​27-29) Moas a di Izrelaits mi-di staat tu dowt weda er nat Jehoava kuda tek kayr a dehn, bot Moaziz mi kantinyu chros eena Jehoava. Ahn Jehoava mi did gi dehn food ahn waata. Ih mi eevn du miraklz fi provaid fi dehn mek dehn ku servaiv di wildanes.a—Eks. 15:​22-25; Saa. 78:​23-25.

2. Wai Gaad mi aks Moaziz: “Yu tink Ai, Jehoava, kyaahn du dis?” (Nombaz 11:​21-23)

² Bowt wahn yaa afta Jehoava sayv di Izrelait dehn, dehn mi staat komplayn bowt weh dehn ga fi eet. Ahn soh Jehoava mi pramis fi feed dehn wid meet. Eevn doa Moaziz mi ga schrang fayt, hihn mi dowt if Jehoava kuda provaid meet fi soh moch peepl eena di wildanes. Soh Jehoava aks Moaziz: “Yu tink Ai, Jehoava, kyaahn du dis?” (Reed Nombaz 11:​21-23.) Eena Heebroo, di kweschan weh Jehoava aks Moaziz da: “Jehoava han tu shaat?” “Jehoava han” meenz ih hoali spirit.

3. Wai ih gud fi tink bowt di kweschan weh Jehoava aks Moaziz?

³ Yoo eva wanda if Jehoava wahn provaid weh yoo ahn yu famili need fi liv? Weda yu aks yuself da kweschan er nat, mek wi si wai Moaziz ahn di Izrelaits neva chros dat Jehoava mi wahn provaid fi dehn. Wi wahn aalso si sohn skripchaz weh wahn help wi schrentn wi chros dat Jehoava wahn aalwayz help wi.

LAAN FAHN MOAZIZ AHN DI IZRELAITS

4. Wai lata Izrelaits mi staat tu dowt dat Jehoava ku provaid fi dehn?

⁴ Wai lata di Izrelaits neva bileev dat Jehoava kuda mi provaid fi dehn? Wen di Izrelait dehn mi lef Eejip fi goh da di Pramis Lan, “wahn big groop a aal kaina peepl” mi gaahn wid dehn. (Eks. 12:38) Dehn mi deh eena di wildanes fi wahn lang taim. (Deut. 8:15) Di peepl weh mi-di chravl wid di Izrelaits mi taiyad a eet loan mana, soh dehn staat tu komplayn. Lata di Izrelait dehn staat tu komplayn bowt di mana tu. (Nom. 11:​4-6) Dehn stay mi-di tink bowt di food weh dehn mi ga da Eejip ahn dehn wish dehn ku get it agen. Dehn mi-di komplayn soh moch dat Moaziz mosi mi tink dat hihn mi wahn haftu provaid meet fi dehn. Bot hihn neva noa wehpaat hihn kuda fain da amonk a meet.—Nom. 11:​13, 14.

5-6. Weh wi ku laan fahn weh mi hapm wid di Izrelaits wen dehn fala di peepl weh mi chravl wid dehn?

⁵ Di krowd a peepl weh gaahn wid di Izrelait dehn neva graytful fi weh Jehoava gi dehn. Ahn di Izrelait dehn mi staat tu tink laik dehn. Di saym ting ku hapm tu wee. Wen adaz rong wi noh tankful, wi ku staat goh aan laik dat tu ahn noh bee tankful fi weh Jehoava gi wi. Maybi wi staat tu tink how tingz mi stan fi wee eena di paas ahn wi wuda waahn goh bak tu dat. Er maybi wi staat tu jelos ada peepl fi weh dehn gat. Bot wi wahn bee hapiya if wi laan fi bee kantentid wid weh wi gat, noh mata if da lat er lee bit.

⁶ Di Izrelait dehn shuda mi memba weh Jehoava mi pramis dehn. Hihn mi tel dehn dat ih wuda gi dehn lata gud tingz wen dehn reech di Pramis Lan, noh wen dehn mi deh eena di wildanes. If wi foakos pahn weh wi noh ga rait now, wi ku en op laik di Izrelaits. Rada, wi wahn bee hapiya if wi foakos pahn di tingz weh Jehoava pramis wi fi di fyoocha. Ahn wi ku meditayt pahn sohn skripchaz weh ku help wi chros Jehoava moa.

7. Wai wi ku bee shoar dat Jehoava ku help wi noh mata wehpaat wi deh?

⁷ Wen Jehoava mi aks Moaziz di kweschan da Nombaz 11:​23, ih praabli mi waahn help Moaziz fi tink bowt too tingz: Dat ih powa noh ga no limits ahn dat ih ku yooz it eniway, noh mata how faar. Soh eevn doa di Izrelaits mi deh da di midl a di wildanes, Jehoava mi stil aybl fi gi dehn moa dan inof meet fi eet. Gaad mi “yooz ih grayt ahn maiti powa” fi shoa dehn dat hihn ku help dehn noh mata wehpaat dehn deh. (Saa. 136:​11, 12) Soh wen wee di goh chroo wahn tof sichuwayshan, wi waahn chros dat Jehoava ku help eech an evri wan a wi noh mata wehpaat wi deh.—Saa. 138:​6, 7.

8. Weh wahn help wi fi noh mek di saym mistayk weh di Izrelait dehn mi mek? (Koment pahn di picha.)

⁸ Jehoava mi kip ih pramis an ih provaid lata lee berd fi dehn. Bot di Izrelaits neva tankful fi di mirakl weh Gaad du. Insteda dat, lata dehn mi greedi op di berd dehn. Jos imajin, dehn spen wahn hoal day an a haaf widowt sleep di kalek di lee berd dehn laik meet gwehn owta stail. Jehoava mi geh soh beks wid dehn wan “weh mi greedi fi food” dat ih ponish dehn. (Nom. 11:​31-34) Wi ku laan fahn fi dehn egzampl. Noh mata if wi rich er poa, wi need fi werk haad fi geh kloasa tu Jehoava ahn Jeezas. Eena da way, wi wahn di sayv op “chrezhaz da hevn.” (Mach. 6:​19, 20; Look 16:9) Den wi ku bee shoar dat Jehoava wahn provaid fi wi.

9. Weh wi ku bee shoar Jehoava wahn du fi wi?

⁹ Jehoava redi fi help ih peepl tudeh. Bot dis noh meenz dat wi wahn neva shaat a moni er food.b Stilyet, wi ku chros dat Jehoava wahn aalwayz dehdeh fi sopoat wi. Hihn wahn gi wi di schrent weh wi need noh mata weh chraiyalz wi di fays. Wai wi ku bee shoar a dat? Mek wi luk pahn too sichuwayshan weh wi ku shoa dat wi chros dat Jehoava wahn dehdeh fi wi: (1) Wen wi di luk fi werk fi sopoat wi famili ahn (2) wen wi wori if wi wahn ga weh wi need wen wi geh oalda.

WEN WI NEED WAHN JAB

10. Weh kaina moni prablemz wi mait fays?

¹⁰ Di kloasa wi kohn tu di en a dis werl, di moa prablemz wi wahn ga. Fi egzampl, di govament eena di konchri weh wi liv mait chaynj sodn-wan, waar mait brok owt, wi mait goh chroo nachral dizaasta, er wi mait fays nyoo pandemiks. Sayka dat, wi mait looz wi jab, tingz weh wi oan, er eevn wi hows. Wi mait haftu fain wahn nyoo jab rong wehpaat wi liv er tink bowt moov sohnweh els fi fain werk fi sopoat wi famili. Weh ku help wi mek disizhanz weh shoa dat wi chros eena Jehoava?

11. Weh ku help yu deel wid yu moni prablemz? (Look 12:​29-31)

¹¹ Di bes ting fi du da fi tel Jehoava weh di wori yu. Dat wahn help yu wahn lat. (Prav. 16:3) Aks Jehoava fi wizdom fi mek gud disizhanz ahn fi help yu kip kaam ahn noh schres owt. (Reed Look 12:​29-31.) Kip di aks ahn fi help yu bee kantentid wid di baysik tingz weh yu need fi liv. (1 Tim. 6:​7, 8) Fain aatiklz weh ga gud sojeshanz pahn how fi deel wid moni prablemz. Lata peepl seh dat di veedyo an aatikl dehn pahn jw.org help dehn fi deel wid moni prablemz.

12. Weh kweschanz ku help wahn persn soh dat ih mek di bes disizhan fi ih famili?

¹² Sohn peepl en op di moov sohnweh faar fahn dehn famili fi geh wahn jab, bot lata dehn fain owt laytaraan dat da mi wahn bad disizhan. Bifoa yu geh wahn nyoo jab, noh jos tink bowt di moni weh yu wahn mek, tink bowt weda er nat yoo ahn yu famili wahn ku stay kloas tu Jehoava. (Look 14:28) Aks yuself: ‘Weh ku hapm tu mi marij if mee ahn mi mayt deh faar fahn eech ada? Ah wahn ku stil goh da aala mi meetin dehn, goh pahn feel servis, ahn spen taim wid mi bradaz ahn sistaz?ʼ If yu ga chiljren, yu aalso need fi aks yuself dis impoatant kweschan: ‘How Ah wahn rayz mi chiljren ahn “disiplin dehn akaadn tu di gaidans weh kohn fahn Jehoava” if Ah noh deh wid dehn?ʼ (Ifee. 6:4) Wen yu ga da kaina disizhan fi mek, lata peepl wahn tel yu weh dehn tink yu shuda du, inkloodin frenz ahn famili weh noh bileev eena di Baibl. Bot insteda lisn tu dehn, mek shoar yu lisn tu weh Jehoava seh.c Tony, fahn western Asia, mi geh lata jab aafa fi goh werk da wahn neks konchri. Di jab dehn mi pay gud. Bot afta hihn an ih waif pray ahn taak bowt it, hihn disaid fi noh tek non a dehndeh jab. Insted, dehn mi tink bowt weh dehn ku du fi spen les moni. Dis da weh Tony seh: “Bikaaz wi mek da disizhan, Ah kuda mi help lata peepl fi noa Jehoava ahn wi chiljren lov Jehoava wahn lat. Wi famili laan dat az lang az wi chros weh Jeezas seh da Machyu 6:​33, Jehoava wahn aalwayz tek kayr a wi.”

WEN WI DI PLAN FI WEN WI GEH OALDA

13. Weh wi ku du now soh dat wi ga weh wi need wen wi geh oalda?

¹³ Wi ku shoa humoch wi chros Jehoava wen wi di mek planz fi wen wi geh oalda. Di Baibl inkorij wi fi werk haad fi put op sohnting fi di fyoocha. (Prav. 6:​6-11) Ih gud fi du dat, bikaaz moni ku bee wahn protekshan fi wen haad taimz kohn. (Ikl. 7:12) Bot moni kyaahn sayv wi laif, soh wi noh waahn moni bee di moas impoatant ting eena wi laif.

14. How Heebrooz 13:5 ku help wi fi noh wori tu moch wen wi di pripyaa fi di fyoocha?

¹⁴ Jeezas mi yooz wahn iloschrayshan fi shoa dat ih wuda bee foolish fi sohnbadi goh afta moni, bikaaz if ih du dat Jehoava wahn si ahn az “wahn poa man.” (Look 12:​16-21) Nobadi noa weh dehn laif wahn bee laik tumaaro. (Prav. 23:​4, 5; Jay. 4:​13-15) Jeezas seh dat if wi waahn bee fi hihn disaiplz, wi need fi bee redi fi “waak weh” fahn evriting weh wi gat. (Look 14:33) Eena di fers senchri, di Kristyanz da Judeeya mi haftu du dat, bot dehn mi wilin fi giv op eniting fi fala Jeezas. (Heeb. 10:34) Eena fi wee taim, lata bradaz looz dehn jab er di tingz weh dehn oan bikaaz dehn noh sopoat wahn politikal paati. (Rev. 13:​16, 17) Weh help dehn fi du dat? Dehn ga ful chros eena Jehoava pramis weh seh: “Ai wahn neva lef unu, an Ai wahn neva stap help unu.” (Reed Heebrooz 13:5.) Soh wi du weh wi kud fi pripyaa fi di fyoocha, bot if sohnting goh rang, wi chros dat Jehoava wahn help wi.

15. How Kristyan payrents ku ga di prapa vyoo a dehn chiljren? (Koment pahn di picha.)

¹⁵ Eena sohn kolcha, di mayn reezn wai sohn peepl ga pikni da fi mek dehn ga sohnbadi fi tek kayr a dehn wen dehn geh oalda. Bot di Baibl seh dat da payrents fi tek kayr a dehn chiljren. (2 Kor. 12:14) Af koars, wen payrents geh oalda, dehn mait need dehn chiljren fi help dehn, ahn dehn chiljren hapi fi help eni way dehn kud. (1 Tim. 5:4) Bot Kristyan payrents noh fi rayz dehn chiljren jos fi tek kayr a dehn wen dehn geh oalda. Dehn mayn goal da fi rayz dehn fi serv Jehoava. Notn wuda mek wahn Kristyan payrent hapiya dan dat.—3 Jan 4.

16. How payrents ku chrayn dehn chiljren fi sopoat dehnself? (Ifeezhanz 4:28)

¹⁶ Staat chrayn yu chiljren fahn dehn yong. Wail yu di teech dehn fi sopoat dehnself, shoa dehn dat yu chros Jehoava. Teech dehn dat ih gud fi werk haad. (Prav. 29:21; reed Ifeezhanz 4:28.) Help dehn fi du gud da skool. Kristyan payrents ku du risaach ahn fain Baibl prinsiplz fi help dehn chiljren mek waiz disizhanz bowt humoch ejukayshan dehn wahn get. Di goal da fi help dehn chiljren fi sopoat dehnself ahn stil mek taim fi preech, maybi eevn painyaa.

17. Weh wi ku chros Jehoava wahn du fi wi noh mata weh hapm?

¹⁷ Enibadi weh chros Jehoava ku bee shoar dat hihn waahn tek kayr a wi ahn dat ih ga di powa fi du it. Di kloasa wi get tu di en a dis sistem, wi wahn fays moa chraiyalz weh tes wi fayt eena Jehoava. Bot noh mata weh hapm, wi waahn mek shoar dat wi kantinyu fi chros dat Jehoava wahn yooz ih powa fi tek kayr a wi. Wi ku bee shoar dat Jehoava wahn aalwayz help wi noh mata wehpaat wi deh ahn noh mata weh wi di goh chroo.