Yu Noh Deh Bai Yuself

1-2. (a) Wai wi ku seh dat wi noh goh chroo chraiyalz bai wiself? (b) Weh wi wahn diskos eena dis aatikl?

WEN wi goh chroo seeryos chraiyalz, wi mait feel laas, laik wi deh way bakabush ahn kyaahn fain wi way owt. Bot memba dat wi noh haftu goh chroo chraiyalz bai wiself. Wi lovin Pa si weh wi goh chroo an ih pramis wi: “Ai wahn help yu.”—Isa. 41:10.

² Eena dis aatikl, wi wahn taak bowt foa wayz how Jehoava help wi. Ih (1) gaid wi, (2) gi wi weh wi need, (3) protek wi, ahn (4) komfert wi. Jehoava pramis wi dat noh mata weh wi goh chroo eena laif, hihn noh wahn ferget wi an ih noh wahn abandan wi. Soh yu wahn neva deh bai yuself.

JEHOAVA GAID WI

3-4. How Jehoava gaid wi? (Saam 48:14)

³ Reed Saam 48:14. Jehoava noa dat wi kyaahn gaid wiself ahn dat wi need hihn fi gaid wi. How hihn gaid fi hihn peepl tudeh? Wan way da chroo di Baibl. (Saa. 119:105) Jehoava yooz di Baibl fi teech wi how fi mek gud disizhanz ahn fi shoa gud kwalitiz. Fi egzampl, ih teech wi fi fergiv peepl ahn noh stay beks wid dehn, fi bee aanis eena evriting weh wi du, ahn fi ga deep lov fi wan anada. (Saa. 37:8; Heeb. 13:18; 1 Peet. 1:22) Wen wi laan fi shoa dehnya kwalitiz, wi wahn bee beta payrents, hozban, waif, ahn fren. Soh wi wahn liv wahn hapiya laif now ahn wi wahn ga di hoap fi liv fareva eena di fyoocha.a

⁴ Eena di Baibl, Jehoava tel wi bowt peepl weh gaahn chroo chraiyalz ahn weh deel wid feelinz simila tu wee. (1 Kor. 10:13; Jay. 5:17) Wen wi reed bowt dehndeh peepl ahn laan fahn weh dehn gaahn chroo eena laif, wi benifit eena lata wayz. Fi egzampl, wi laan dat wee da noh di onli wanz weh goh chroo chraiyalz. Adaz gaahn chroo chraiyalz simila tu weh wee goh chroo, ahn dehn mi aybl fi bayr op. (1 Peet. 5:9) Ahn wi laan how wee ku bayr op chroo wi chraiyalz tu.—Roam. 15:4.

5. Hoo Jehoava yooz fi gaid wi?

⁵ Jehoava yooz wi bradaz ahn sistaz fi gaid wi tu.b Fi egzampl, wi serkit oavaseeya vizit wi kangrigayshan regyula fi inkorij wi. Di taak dehn weh ih gi wi help wi fi schrentn wi fayt ahn fi stay yoonaitid. (Aks 15:40–16:5) Di eldaz eena di kangrigayshan werk haad fi help eech wan a wi fi stay kloas tu Jehoava. (1 Peet. 5:​2, 3) Payrents teech dehn chiljren fi lov Jehoava, fi mek gud disizhanz, ahn fi ga gud spirichwal habits. (Prav. 22:6) Ahn spirichwali machoar sistaz set wahn gud egzampl fi yonga sistaz, gi dehn gud advais, an inkorij dehn.—Tai. 2:​3-5.

6. Weh wi need fi du fi benifit fahn Jehoava gaidans?

⁶ Jehoava gi wi gaidans fi help wi mek gud disizhanz ahn liv wahn hapi laif, ahn wi benifit wahn lat wen wi fala ih gaidans. Weh wi ku du fi shoa dat wi tankful fi aal di help an advais weh ih gi wi? Praverbz 3:​5, 6 seh: “Chros Jehoava wid aala yu haat, ahn noh pen pahn yu oan wizdom.” Wen wi du dat, “hihn wahn gaid [wi] eena di rait way.” Dat meenz dat ih wahn help wi fi avoid lata prablemz an injai wahn hapiya laif. Wi soh tankful dat Jehoava noa wi soh gud ahn lov wi soh moch dat ih giv eech wan a wi di advais weh wi need.—Saa. 32:8.

JEHOAVA GI WI WEH WI NEED

7. Wat da sohn wayz how Jehoava gi wi weh wi need? (Filipiyanz 4:19)

⁷ Reed Filipiyanz 4:19. Jehoava aalso bles wi wen wi werk haad fi geh di food ahn kloaz weh wi need ahn wahn plays fi liv. (Mach. 6:33; 2 Tes. 3:12) Ih naamal fi wori bowt di tingz weh wi need, bot Jehoava noh waahn wi wori tu moch bowt it. (Reed di noat pahn Machyu 6:25 eena di Study Bible.) Wai? Bikaaz fi wee Pa noh wahn lef wi wen wi need help. (Mach. 6:8; Heeb. 13:5) Wi ku reeli chros ahn wen ih pramis dat ih wahn gi wi weh wi need.

8. Weh Jehoava mi du fi Dayvid?

⁸ Tink bowt how Jehoava mi help Dayvid joorin di taim wen ih mi-di ron weh fahn King Saal. Jehoava mi gi Dayvid an ih soalja dehn weh dehn mi need fi servaiv. Wen Dayvid mi tink bak pahn how Jehoava mi tek kayr a ahn joorin dehndeh haad taimz, ih seh: “Ah yoostu bee yong ahn now Ah oal, bot Ah neva si Gaad abandan enibadi weh raichos, an Ah neva yet si non a ih pikni di bayg fi bred.” (Saa. 37:25) Jos laik Dayvid, yu praabli si how Jehoava gi yoo er yu bradaz ahn sistaz weh unu mi need joorin haad taimz.

9. How Jehoava giv ih peepl weh dehn need wen wahn dizaasta hapm? (Koment pahn di picha dehn.)

⁹ Jehoava giv ih peepl weh dehn need wen wahn dizaasta hapm. Fi egzampl, wen dehn mi ga wahn famin da Jeroosalem eena di fers senchri, bradaz ahn sistaz fahn ada ayryaz mi sen tingz fi di bradaz ahn sistaz weh mi liv deh. (Aks 11:​27-30; Roam. 15:​25, 26) Jehoava peepl du di saym ting tudeh. Wen wahn dizaasta hapm, Jehoava moov ih peepl fi gi dehn bradaz ahn sistaz weh dehn need, fi egzampl, food, waata, kloaz, ahn medisn. Som a dehn goh fi help fiks bak dehn bradaz ahn sistaz hows ahn di Kingdom Haal dehn weh geh damij. Ahn wat els Jehoava du fi dehn wan weh di sofa bikaaz sohnbadi weh dehn lov ded er dehn looz tingz weh dehn oan? Hihn moov wi bradaz fi hori mek araynjments fi gi dehn komfert an inkorijment fahn di Baibl.c

10-11. Weh yu laan fahn Borys ekspeeryens?

¹⁰ Jehoava jenaros an ih gi peepl weh dehn need, eevn if dehn noh di wership ahn yet. Wee kapi Jehoava egzampl ahn luk fi wayz how wi ku bee kain tu dehn wan weh noh serv Jehoava. (Gal. 6:10) Wen wi du dis, wi wahn ku help dehn fi laan moa bowt Jehoava ahn weh wi bileev. Mek wi si di egzampl a Borys, wahn skool prinsipal weh liv da Ukraine. Eevn doa Borys da neva wan a Jehoava Witnisiz, hihn mi aalwayz chreet ih Witnis styoodents eena wahn kain way an ih mi rispek weh dehn bileev. Sayka di waar, Borys mi disaid fi lef di vilij weh ih mi liv ahn goh da wahn sayfa paat a di konchri, ahn wi bradaz ahn sistaz mi help ahn. Da yaa, Borys gaahn da di Memoaryal. Wen hihn tink bak bowt weh aal di bradaz mi du far ahn, ih seh: “Di Witnisiz mi soh kain wid mi ahn dehn tek kayr a mi. Ah soh tankful fi weh di Witnisiz du fi mi.”

¹¹ Aala wi ku kapi Jehoava lovin egzampl wen wi help peepl weh need it, noh mata if dehn da wi bradaz er nat. (Look 6:​31, 36) Wi hoap dat di lov wi shoa dehn wahn moov dehn fi waahn laan moa bowt Jehoava ahn mek dehn waahn staat serv ahn langsaid wi. (1 Peet. 2:12) Weda dehn chooz fi serv Jehoava er nat, wi wahn bee hapi bikaaz “wi feel moa hapinis wen wi giv tu adaz.”—Aks 20:35.

JEHOAVA PROTEK WI

12. Weh kaina protekshan Jehoava pramis fi giv ih peepl? (Saam 91:​1, 2, 14)

¹² Reed Saam 91:​1, 2, 14. Jehoava pramis fi protek wi fahn eniting weh ku hert wi frenship wid hihn. Hihn wahn neva alow Saytan fi stap Ih peepl fahn wership ahn eena di rait way. (Jan 17:15) Ahn Jehoava pramis wi dat wen “di grayt chribyulayshan” kohn, ih wahn help wi kip wi fayt schrang an ih wahn sayv wi.—Rev. 7:​9, 14.

13. How Jehoava protek eech wan a wi?

¹³ Ahn how Jehoava protek eech wan a wi? Hihn gi wi di Baibl soh dat wi ku noa weh rait ahn weh rang. (Heeb. 5:14) Wen wi obay Baibl prinsiplz, wi protek wi rilayshanship wid Jehoava ahn wi mek gud disizhanz weh help wi fi bee heltiya ahn hapiya. (Saa. 91:4) Ahn Jehoava gi wi di kangrigayshan fi help protek wi tu. (Isa. 32:​1, 2) Wi bradaz ahn sistaz lov Jehoava an obay ahn. Wen wi spen taim wid dehn da meetin, pahn feel servis, ahn di du ada tingz tugeda, dehn ku inkorij wi fi noh du bad tingz.—Prav. 13:20.

14. (a) Wai Jehoava noh protek wi fahn aala wi chraiyalz? (b) Weh Saam 9:10 pramis wi? (Koment pahn di futnoat.)

¹⁴ Eena di paas, sohntaim Jehoava mi protek ih peepl mek nobadi hert dehn er kil dehn. Bot ih neva du dat evri taim. Di Baibl teech wi dat “tingz weh [wi] noh ekspek” ku hapm tu eni wan a wi. (Ikl. 9:11) Ahn Jehoava mi alow som a ih servants fi goh chroo persikyooshan er eevn ded fi proov dat Saytan laiyad. (Joab 2:​4-6; Mach. 23:34) Da kaina ting mi hapm eena di paas, an ih ku hapm tu wee tudeh tu. Jehoava mait noh tek weh aala di chraiyalz weh wi goh chroo, bot wi ku bee shoar dat ih wahn neva abandan enibadi weh lov ahn.d—Saa. 9:10.

JEHOAVA KOMFERT WI

15. How Jehoava yooz pryaa, di Baibl, ahn wi bradaz ahn sistaz fi gi wi komfert? (2 Korintyanz 1:​3, 4)

¹⁵ Reed 2 Korintyanz 1:​3, 4. Sohntaim, aala wi feel sad er angshos. Maybi yoo di goh chroo sohnting rait now weh mek yu feel laik yu deh pahn yu oan. Yu mait feel laik nobadi andastan how yu feel ahn weh yu di deel wid. Bot Jehoava andastan. Hihn feel fi yu an ih komfert yu eena aala yu chraiyalz. How hihn du dat fi wi? Wen wi pray ahn poar owt wi haat tu Jehoava, hihn gi wi “wahn kaina pees weh peepl kyaahn andastan.” (Fil. 4:​6, 7) Wen wi reed di Baibl, wi geh lata komfert fahn Jehoava. Een deh, hihn tel wi humoch ih lov wi, ih teech wi how fi bee waiz, an ih gi wi hoap. Ahn wen wi deh da meetin wid wi bradaz ahn sistaz, wi laan inkorijin tingz fahn di Baibl ahn wi si humoch dehn kay bowt wi.

16. Weh yu laan fahn Nathan ahn Priscilla egzampl?

¹⁶ Mek wi luk pahn di egzampl a Nathan ahn Priscilla fi si how Jehoava yooz di Baibl fi gi wi komfert an inkorijment. Sohn yaaz agoa, dehn mi disaid fi goh serv sohnweh weh need moa poblishaz. Nathan seh, “Wi mi chros dat Jehoava wuda mek tingz goh gud fi wi.” Bot wen dehn reech, dehn mi en op di fays moni prablemz ahn helt prablemz. Afta wahn wail dehn mi haftu gaahn bak hoam, ahn dehn mi stil ga moni prablemz. Nathan seh: “Ah mi waahn noa wai Gaad neva bles wi di way wi mi ekspek. Ah mi eevn staat wanda if Ah mi du sohnting rang.” Bot laytaraan, Nathan ahn Priscilla riyalaiz dat Gaad neva did abandan dehn. Nathan seh: “Joorin dehndeh haad taimz, wi Baibl reedin gi wi lata inkorijment ahn gaidans. Wi laan fi noh foakos tu moch pahn di prablem. Rada, wi foakos pahn how Jehoava help wi fi mek it chroo dehndeh haad taimz. Dat help wi bee shoar dat Jehoava wahn help wi eena di fyoocha.”

17. How wahn sista weh naym Helga mi geh di komfert weh ih mi need? (Koment pahn di picha.)

¹⁷ Wi bradaz ahn sistaz ku gi wi komfert tu. Tek, fi egzampl, Sista Helga, weh liv da Hungary. Fi yaaz, shee mi deel wid lata prablemz weh mek ih feel schres owt ahn laik nobadi kay bowt ahn. Bot wen ih luk bak pahn dehndeh taimz, shee riyalaiz dat Jehoava mi-di yooz di bradaz ahn sistaz eena ih kangrigayshan fi giv ahn di komfert weh ih mi need. Shee seh: “Jehoava mi aalwayz help mi wen ih si dat Ah mi feel week bikaaz a werk, bikaaz Ah mi-di tek kayr a mi son weh mi sik, ahn bikaaz a ada prablemz. Fi di laas 30 yaaz, nat wan day paas weh Jehoava noh kip ih pramis fi gi mi di komfert weh Ah need. Lata taim, hihn yooz adaz fi inkorij mi wid dehn kain ahn lovin werdz. An aafn dehn wuda sen mi wahn teks mesij er wahn kyaad, er sohnbadi wuda komen mi rait wen Ah mi need it di moas.”

18. How wi ku komfert adaz?

¹⁸ Aala wi ga di privilij fi kapi Gaad egzampl ahn komfert adaz. How wi ku du dat? Wi ku bee payshent ahn lisn tu dehn, taak tu dehn eena wahn kain way, ahn fain ada wayz how wi ku help dehn. (Prav. 3:27) Wi du wi bes fi komfert enibadi weh di sofa, inkloodin peepl weh noh di serv Jehoava yet. Weneva wi si peepl sad, sik, er angshos, wi vizit dehn, lisn tu dehn, ahn reed inkorijin skripchaz fi dehn. Wen wi kapi Jehoava, “di Gaad weh aal komfert kohn fram,” wi ku help wi bradaz ahn sistaz fi bayr op chroo dehn chraiyalz, ahn wi mait eevn ku help peepl weh noh di serv Jehoava fi waahn geh fi noa ahn.—Mach. 5:16.

JEHOAVA AALWAYZ DEHDEH FI WI

19. Weh Jehoava du fi wi, ahn how wi ku kapi fi hihn egzampl?

¹⁹ Jehoava kay wahn lat bowt evribadi weh lov ahn. Hihn noh wahn abandan wi wen wi di goh chroo chraiyalz. Jos laik how wahn payrent lov ih pikni ahn tek kayr a ahn, da soh Jehoava lov peepl weh laayal tu ahn, an ih tek kayr a dehn. Ih gaid wi, gi wi weh wi need, protek wi, ahn komfert wi. Wi kapi fi hihn egzampl wen wi sopoat an inkorij adaz wen dehn di goh chroo chraiyalz. Noh mata weh wi goh chroo eena dis werl, wi ku bee shoar dat Jehoava wahn aalwayz deh bai wi said. Hihn pramis wi: “Noh bee frayd, kaaz Ai deh wid yu.” (Isa. 41:10) Ih soh komfertin fi noa dat wans wi ga Jehoava bai wi said, wi wahn neva deh bai wiself.