How Jeezas Shoa Dat Jehoava Naym Impoatant?

1-2. (a) Weh Jeezas mi du di nait bifoa ih ded? (b) Weh kweschanz wi wahn ansa eena dis aatikl?

PAHN Terzdeh nait, Naisan 14, 33 C.E., Jeezas mi selibrayt Krais Eevnin Meel wid ih faytful apasl dehn. Hihn mi noa dat soon, Joodas mi wahn bichray ahn, an ih enimi dehn mi wahn taacha ahn an kil ahn. Soh afta di meel, ih mi tel ih apasl dehn wahn lata inkorijin tingz. Ahn wen da mi taim fi mek dehn lef fahn deh, Jeezas mi seh wahn impoatant pryaa. Di apasl Jan mi rait dong da pryaa, ahn wi ku reed it eena Jan chapta 17.

² Eena dis aatikl, wi wahn si weh wi ku laan fahn Jeezas pryaa. Weh hihn mi-di wori bowt jos bifoa ih ded? Weh mi impoatant tu hihn wen ih mi deh ya pahn di ert? Mek wi ansa dehndeh kweschanz.

“AH TEECH DEHN BOWT YU NAYM”

3. Weh Jeezas mi seh bowt Jehoava naym, ahn weh ih mi meen? (Jan 17:​6, 26)

³ Eena ih pryaa, Jeezas mi seh: “Ah teech dehn bowt yu naym.” Wi noa dat mi impoatant tu hihn bikaaz too taimz ih mi seh dat ih mek peepl noa Gaad naym. (Reed Jan 17:​6, 26.) Weh hihn mi meen? Yu tink ih mi haftu eksplayn tu ih disaipl dehn dat Gaad naym Jehoava? No, bikaaz Jeezas disaipl dehn da-mi Jooz, soh dehn mi don noa dat. Gaad naym deh eena di Heebroo Skripchaz towznz a taimz. Soh wen Jeezas mi seh, “Ah teech dehn bowt yu naym,” ih neva meen dat ih mi-di teech dehn how Gaad naym. Rada, ih mi-di teech dehn weh kaina persn Jehoava. Jeezas mi help ih disaipl dehn fi noa Jehoava beta. Ih mi help dehn fi andastan Jehoava perpos, di tingz weh ih du, ahn di kwalitiz weh ih shoa. Jeezas da di onli persn weh noa Jehoava soh gud.

4-5. (a) How sohnbadi naym ku bee moa impoatant tu yu? Yooz di egzampl eena di paragraaf. (b) How Jeezas disaipl dehn mi geh fi noa Jehoava beta?

⁴ Imajin wahn elda eena yu kangrigayshan naym Dayvid, an ih da wahn dakta. Yu noa da brada fi yaaz. Bot den wan day yu ga wahn medikal imerjensi ahn yu goh da di haaspital wehpaat hihn werk. Hihn yooz ih skilz az wahn dakta fi sayv yu laif. Yu mi don lov di brada aredi, bot now yu lov ahn eevn moa, noh chroo? Ahn weh yu tink bowt wen yu hyaa ih naym? Now yu noh onli si ahn az wahn elda, yu aalso si ahn az di dakta weh sayv yu laif.

⁵ Jos laik dat, Jeezas disaipl dehn mi don noa Jehoava naym. Wen Jeezas mi kohn pahn di ert, hihn mi kapi ih Pa egzampl eena evriting weh ih seh ahn du. Soh Jeezas apasl dehn mi geh fi “noa” Jehoava beta wen dehn lisn tu how Jeezas teech dehn ahn wen dehn si how ih chreet peepl. (Jan 14:9; 17:3) Den Jehoava naym mi geh eevn moa impoatant tu dehn.

“DI NAYM WEH AH MI SHOA DEHN”

6. Weh Jeezas mi meen wen ih seh dat ih shoa ih disaiplz Jehoava naym? (Jan 17:​11, 12)

⁶ Jeezas mi pray fi ih disaipl dehn an aks Jehoava: “Pleez protek dehn fi di sayk a yu naym, di naym weh Ah mi shoa dehn.” (Reed Jan 17:​11, 12.) Wahn nada way fi chranslayt “di naym weh Ah mi shoa dehn” da “di naym weh yu gi mi.” Yu tink dat meenz dat peepl mi fi staat kaal Jeezas Jehoava? No. Noatis dat wen Jeezas mi taak tu Jehoava bowt Ih naym, ih seh “yu naym.” Soh Jeezas neva tek Jehoava naym. Da weh Jeezas mi meen, den, wen ih seh dat Jehoava giv ahn ih naym? Fers, Jehoava mi sen Jeezas fi reprizent ahn an taak far ahn. Soh Jeezas mi kom eena ih Pa naym ahn du lata amayzin miraklz eena da naym. (Jan 5:43; 10:25) Sekant, Jeezas naym meenz “Salvayshan Kohn Fahn Jehoava.” Soh di meenin a Jeezas naym inklood Jehoava naym.

7. How Jeezas kuda mi taak fi Jehoava? Yooz di egzampl eena di paragraaf.

⁷ Fi andastan how Jeezas kuda mi taak fi Jehoava, tink bowt dis egzampl. Wahn praim minista ku sen wahn ambasada fi taak tu ada peepl far ahn. Soh wen di ambasada taak, ih ga di saym atariti laik di praim minista. Jos laik dat, Jeezas reprizent Jehoava ahn taak tu peepl eena Jehoava naym.—Mach. 21:9; Look 13:35.

8. Wai Jehoava mi seh dat Jeezas kohn eena fi hihn naym eevn bifoa Jeezas kohn da ert? (Eksodos 23:​20, 21)

⁸ Di Baibl kaal Jeezas di Werd bikaaz Jehoava yooz ahn fi paas aan mesij tu di aynjelz ahn tu peepl fi tel dehn weh ih waahn deh noa ahn weh ih waahn dehn du. (Jan 1:​1-3) Jeezas da-mi praabli di aynjel weh Jehoava mi sen fi tek kayr a di Izrelait dehn wen dehn mi deh eena di wildanes. Wen Jehoava tel di Izrelaits wai dehn fi obay da aynjel, ih tel dehn: “Hihn di kohn eena mai naym.”a (Reed Eksodos 23:​20, 21.) Jehoava seh dat bikaaz Jeezas taak far ahn, an hihn da di mayn persn weh proov dat Jehoava naym hoali ahn dat Jehoava du evriting rait.

“FAADA, AANA YU NAYM”

9. How impoatant Jehoava naym tu Jeezas? Pleez eksplayn yu ansa.

⁹ Soh eevn bifoa Jeezas kohn da ert, Jehoava naym da-mi di moas impoatant ting tu hihn. Ahn wen ih mi deh pahn ert, evriting weh ih mi du shoa how impoatant Jehoava naym tu hihn. Wen ih minischri mi wahn soon kohn tu wahn en, Jeezas mi seh: “Faada, aana yu naym.” Az ih seh dat, ih Pa ansa wid wahn lowd vais fahn hevn: “Ai don aana it an Ai wahn aana it agen.”—Jan 12:28.

10-11. (a) How Jeezas mi aana Jehoava naym? (Koment pahn di picha.) (b) Wai Jeezas mi need fi proov dat Jehoava naym hoali ahn dat Jehoava du evriting rait?

¹⁰ How Jeezas mi aana ih Pa naym? Wan way da wen ih tel ada peepl bowt how wandaful Jehoava ahn bowt aala di amayzin tingz weh Jehoava du. Bot hihn mi du moa dan dat. Jeezas mi need fi proov dat Jehoava aalwayz du evriting rait ahn dat Jehoava naym hoali. Jeezas mi shoa dat dis impoatant wen ih teech ih disaiplz how fi pray. Ih mi seh: “Hevnli Faada, wi waahn yu naym bee hoali.”—Mach. 6:9.

¹¹ Wai Jeezas mi need fi proov dat Jehoava naym hoali ahn dat ih du evriting rait? Bikaaz eena di gyaadn da Eedn, Saytan mi tel lai bowt Jehoava. Saytan mi seh dat Jehoava laiyad ahn dat ih mi-di hoal bak sohnting gud fahn Adam ahn Eev. (Jen. 3:​1-5) Wen Saytan seh dat, da laik ih mi-di seh dat di way how Jehoava du tingz neva rait. Bikaaz Saytan tel lai bowt Jehoava, peepl mait tink dat Jehoava da wahn bad persn. Laytaraan, eena Joab dayz, Saytan seh dat peepl onli serv Jehoava fi weh dehn ku get fan ahn. Ih seh dat nobadi lov Jehoava inof fi kip di serv ahn eevn wen dehn di goh chroo chraiyalz. (Joab 1:​9-11; 2:4) Ih wuda tek taim fi proov if da mi Jehoava er Saytan di tel lai.

“AH WAHN GIV OP MI LAIF”

12. Weh Jeezas mi wilin fi du bikaaz ih lov Jehoava naym?

¹² Jeezas lov Jehoava soh moch dat ih mi waahn du aal weh ih kud fi proov dat Jehoava naym hoali ahn dat Jehoava du evriting rait. Hihn mi eevn wilin fi ded fi Jehoava naym; ih mi seh: “Ah wahn giv op mi laif.”b (Jan 10:​17, 18) Di fers too perfek peepl, Adam ahn Eev, mi ton dehn bak pahn Jehoava ahn tek said wid Saytan. Bot Jeezas da neva laik dat. Hihn mi wilin fi kohn da ert ahn proov humoch ih lov Jehoava. Hihn mi du dat wen ih obay Jehoava eena evriting weh ih seh ahn du. (Heeb. 4:15; 5:​7-10) Hihn mi stay faytful tu Jehoava eevn til ih ded. (Heeb. 12:2) Eena da way, hihn mi shoa humoch hihn lov Jehoava ahn Fi Hihn naym.

13. Wai Jeezas da di bes persn fi proov dat Saytan laiyad? (Koment pahn di picha.)

¹³ Evriting weh Jeezas du proov dat Saytan da di wan weh laiyad, noh Jehoava! (Jan 8:44) Jeezas noa Jehoava beta dan enibadi els weh eva liv. Soh if eniting weh Saytan mi seh bowt Jehoava da-mi chroo, Jeezas mi wahn noa bowt it. Bot Jeezas mi stan op fi Jehoava ahn difen ih gud naym noh mata wat. Eevn wen ih mi luk laik Jehoava abandan ahn, Jeezas mi wilin fi ded rada dan fi ton gens ih lovin Pa.—Mach. 27:46.c

“AI DON FINISH DI WERK WEH YOO GI MEE FI DU”

14. How Jehoava mi bles Jeezas bikaaz ih mi stay faytful?

¹⁴ Eena di pryaa weh Jeezas mi seh bifoa ih ded, hihn kuda mi seh: “Ai don finish di werk weh yoo gi mee fi du.” Jeezas mi noa dat if ih mi stay faytful, Jehoava wuda bles ahn. (Jan 17:​4, 5) Jehoava neva let ahn dong. Hihn mi rezorek Jeezas ahn giv ahn wahn haiya pozishan da hevn. (Aks 2:​23, 24; Fil. 2:​8, 9) Laytaraan, Jeezas mi eevn staat rool az King a Gaad Kingdom. Soh weh aal da Kingdom wahn du? Jeezas ansa da kweschan wen ih teech ih disaiplz how fi pray; ih seh: “Wi waahn yu Kingdom kom. Wi waahn yu [Jehoava] wil tek plays pahn di ert, di saym way ih di tek plays da hevn.”—Mach. 6:10.

15. Wat els Jeezas wahn du?

¹⁵ Soon, Jeezas wahn waar gens Gaad enimi dehn ahn dischrai dehn joorin Armagedon. (Rev. 16:​14, 16; 19:​11-16) Lee bit afta dat ih wahn hib Saytan eena “di abis,” wehpaat Saytan wahn kyaahn du notn tu nobadi. (Rev. 20:​1-3) Den Jeezas wahn rool fi wahn towzn yaaz, an ih wahn bring bak pees, ih wahn help peepl fi bee perfek, ih wahn bring ded peepl bak tu laif, an ih wahn mek di hoal ert wahn paradais. Evriting wahn fainali bee di way Jehoava waahn ih bee!—Rev. 21:​1-4.

16. Weh laif wahn bee laik afta Jeezas rool fi wahn towzn yaaz?

¹⁶ Afta Jeezas rool fi wahn towzn yaaz, how laif wahn stan? Peepl noh wahn sin nohmoh, bikaaz dehn wahn bee perfek. Wi noh wahn need di ransom nohmoh. Wi noh wahn need di 144,000 fi bee wi prees ner Jeezas fi bee wi Hai Prees fi mek wi ku ga wahn rilayshanship wid Jehoava. Aal di ded peepl wahn don geh rezorek, ahn det wahn don geh dischrai. Evribadi pahn ert wahn bee perfek.—1 Kor. 15:​25, 26.

17-18. (a) Weh wahn hapm da di en a di Towzn Yaa Rool? (b) Weh Jeezas wahn du afta ih finish rool fi di towzn yaaz? (1 Korintyanz 15:​24, 28) (Koment pahn di picha.)

¹⁷ Eena di biginin Saytan mi seh dat Jehoava laiyad ahn dat hihn da noh wahn lovin Gaad. Sins den, oava an oava agen, evribadi weh lov ahn rispek Jehoava naym du aal weh dehn kud fi proov dat fi hihn naym hoali. Da di en a di Towzn Yaa Rool, evribadi wahn noa dat Saytan da di wan weh laiyad. Evribadi wahn noa dat Jehoava naym kleen ahn dat Jehoava du evriting eena di rait way. Nobadi wahn eva dowt Jehoava agen.

¹⁸ Weh Jeezas wahn du afta ih finish rool fi di towzn yaaz an afta Saytan geh proov rang? Yu tink hihn wahn fala Saytan ahn ribel gens Jehoava? No! (Reed 1 Korintyanz 15:​24, 28.) Jeezas wahn han oava bak di Kingdom tu ih Pa. Hihn wahn bee wilin fi giv aal ih atariti tu Jehoava bikaaz ih lov ahn.

19. How Jeezas feel bowt Jehoava naym?

¹⁹ Jeezas reprizent Jehoava eena wahn perfek way. Jehoava naym da di moas impoatant ting fi hihn. Hihn mi eevn wilin fi ded fi da naym. An afta hihn finish rool fi wahn towzn yaaz, ih wahn wilin fi giv bak evriting tu Jehoava. Noh wanda Jehoava mi wilin fi sen Jeezas eena fi hihn naym. Soh how wi ku kapi Jeezas egzampl? Wi wahn ansa da kweschan eena di neks aatikl.