How Yoo Ku Shoa Dat Jehoava Naym Impoatant?

1-2. How wi noa dat Jehoava naym impoatant tu Jeezas?

Notn moa impoatant tu Jeezas dan Jehoava naym. Hihn da di mayn persn weh proov dat Jehoava naym hoali ahn dat Jehoava du evriting rait. Eena di laas aatikl wi laan dat Jeezas mi eevn wilin fi ded fi Jehoava naym. (Maak 14:36; Heeb. 10:​7-9) An afta ih don rool fi wahn towzn yaaz, hihn wahn wilin fi giv aal ih atariti tu Jehoava bikaaz ih lov ahn, an ih waahn Jehoava geh di aana. (1 Kor. 15:​26-28) Evriting weh Jeezas du shoa dat hihn lov Jehoava wahn lat.

² Jeezas mi kohn pahn ert fi reprizent Jehoava ahn fi taak tu peepl bowt ih naym. (Jan 5:43; 12:13) Hihn mi teech dehn weh kaina persn Jehoava. (Jan 17:​6, 26) Wen hihn mi teech peepl ahn wen hihn mi du miraklz, hihn mi mek it klyaa dat Jehoava da di wan weh mi giv ahn di wizdom ahn di powa fi du dehndeh tingz. (Jan 10:25) Jeezas mi eevn aks Jehoava fi “protek [ih disaipl] dehn fi di sayk a [fi hihn] naym.” (Jan 17:11) Dat shoa dat Jehoava naym mi reeli impoatant tu Jeezas fi chroo. Soh how sohnbadi kuda klaym seh dat dehn da wan a Jeezas falowaz if dehn noh noa er yooz fi hihn Pa naym? Dat noh mek no sens, noh chroo?

3. Weh wi wahn diskos eena dis aatikl?

³ Wee da Kristyanz ahn wi du wi bes fi fala Jeezas egzampl ahn shoa lov ahn rispek fi Jehoava naym. (1 Peet. 2:21) Eena dis aatikl, wi wahn si wai Jehoava put fi hihn naym pahn di peepl weh preech “di gud nyooz bowt di Kingdom.” (Mach. 24:14) Wi wahn aalso taak bowt wai Jehoava naym shuda bee impoatant tu eech wan a wi.

“DI PEEPL WEH AI KAAL BAI MAI NAYM”

4. (a) Weh Jeezas mi tel ih disaipl dehn bifoa ih gaahn bak da hevn? (b) Weh kweschan wi wahn diskos?

⁴ Rait bifoa Jeezas gaahn bak da hevn ih mi tel ih disaipl dehn: “Unu wahn geh powa wen di hoali spirit kohn pahn unu, an unu wahn gi wahn witnis bowt mee da Jeroosalem, eena aala Judeeya ahn Samayrya, an aal oava di ert.” (Aks 1:8) Soh di disaipl dehn wuda preech di gud nyooz evriway, noh onli eena Izrel. Peepl fahn aal oava di werl wuda geh di chaans fi bee wan a Jeezas falowaz. (Mach. 28:​19, 20) Bot Jeezas mi seh: “Unu wahn gi wahn witnis bowt mee.” Yu tink dehnya nyoo disaipl wuda mi onli gi wahn witnis bowt Jeezas, er dehn wuda mi haftu geh fi noa Jehoava ahn gi wahn witnis bowt hihn tu? Aks chapta 15 wahn gi wi di ansa tu da kweschan.

5. How di apaslz ahn di eldaz mi shoa dat da aal kaina peepl mi need fi noa bowt Jehoava naym? (Koment pahn di picha.)

⁵ Eena 49 C.E., di apaslz ahn di eldaz mi meet tugeda fi diskos if peepl weh da noh Jooz wuda need fi geh serkomsaiz soh dat dehn ku bee wahn Kristyan. Tuwaadz di en a da diskoshan, Jeezas haaf breda Jaymz mi seh: “[Peeta] jos tel wi dat now Gaad di aksep peepl a di nayshanz ahn kaal dehn bai fi hihn naym.” Den Jaymz mi ripeet weh di prafit Aymos seh: “Soh dat di peepl weh servaiv ku serv Jehoava lang wid di peepl a di nayshanz. Dehnya da di peepl weh Ai kaal bai mai naym, Jehoava seh.” (Aks 15:​14-18) Soh dehnya nyoo disaipl neva onli mi wahn laan bowt Jehoava bot hihn mi wahn aalso “kaal dehn bai fi hihn naym.” Dis meen dat dehn mi wahn tel adaz bowt Jehoava naym, ahn dat adaz mi wahn noa dehn az peepl weh reprizent Jehoava.

6-7. (a) Wai Jeezas mi pay di ransom fi hyoomanz? (b) Wat da di moas impoatant reezn wai Jeezas mi kohn pahn di ert?

⁶ Jeezas naym meen “Salvayshan Kohn Fahn Jehoava.” Jehoava mi yooz Jeezas fi sayv evribadi weh shoa fayt eena hihn ahn fi hihn son. Jeezas kohn pahn di ert fi giv ih laif fi hyoomanz. (Mach. 20:28) Wen ih mi du dat, hihn mi mek it pasabl fi mek hyoomanz ku geh fergivnis fi dehn sin ahn geh evalastin laif.—Jan 3:16.

⁷ Wai hyoomanz mi need di ransom fi geh sayv? Laik weh wi mi diskos eena di laas aatikl, Adam ahn Eev mi disobay Jehoava an en op di looz owt pahn di apachooniti fi liv fareva. (Jen. 3:​6, 24) Sayka dat, hyoomanz mi need fi geh sayv. Bot wen Jeezas mi kohn pahn di ert hihn mi kohn fi du sohnting weh moa impoatant dan fi sayv hyoomanz. Saytan mi lai bowt Jehoava. (Jen. 3:​4, 5) Hyoomanz mi need fi noa dat Jehoava aalwayz du weh rait ahn dat fi hihn naym hoali. Jeezas da-mi di bes persn weh kuda mi du dis, bikaaz hihn mi reprizent Jehoava eena wahn perfek way an ih mi aalwayz du weh Jehoava mi tel ahn fi du.

8. Weh aal Kristyanz need fi aksep?

⁸ Aal Kristyanz need fi aksep dat Jehoava, hoo da Jeezas Pa, sayv dehn. (Jan 17:3) Ahn jos laik Jeezas, Jehoava wuda kaal dehn bai fi hihn naym. Dehn mi wahn need fi andastan dat ih impoatant fi mek dehn kip Jehoava naym hoali. Ahn dehn mi wahn need fi du dat soh dat dehn ku geh sayv. (Aks 2:​21, 22) Soh aal faytful Kristyanz need fi laan bowt Jehoava an ih Son, Jeezas, tu. Wi ku si wai, da di en a Jeezas pryaa eena Jan 17, ih seh: “Ah teech dehn bowt yu naym, an Ah wahn kantinyu fi teech dehn, soh dat dehn ku shoa lov tu ada peepl jos laik how yoo shoa lov tu mee, ahn soh dat Ah ku bee yoonaitid wid dehn.”—Jan 17:26.

‘UNU DA MAI WITNISIZʼ

9. How wi ku shoa dat Jehoava naym impoatant tu wee?

⁹ Fahn weh wi don diskos soh faar, wi si dat if wi waahn kapi Jeezas egzampl wi need fi kip Jehoava naym hoali. (Mach. 6:​9, 10) Wi waahn Jehoava naym bee di moas impoatant ting eena wi laif. Wi ku shoa dat bai di tingz weh wi du. Soh da weh wi ku du fi kip Jehoava naym hoali ahn fi proov dat weh Saytan seh bowt Jehoava da noh chroo?

10. Weh wi reed bowt eena Aizaiya chapta 42 tu 44? (Aizaiya 43:9; 44:​7-9) (Koment pahn di picha.)

¹⁰ Eena Aizaiya chapta 42 tu 44 wi laan weh wi ku du fi kip Jehoava naym hoali. Eena dehndeh chapta, Jehoava aks di peepl weh noh wership ahn fi proov dat fi dehn gaad da gaad fi chroo. Ahn da laik wahn koat kays weh Jehoava di aks fi witnisiz weh ku proov dat weh dehn di seh da chroo. Bot nobadi kyaahn proov dat!—Reed Aizaiya 43:9; 44:​7-9.

11. Da weh Jehoava seh tu ih peepl da Aizaiya 43:​10-12?

¹¹ Reed Aizaiya 43:​10-12. Jehoava tel ih peepl: “Yoo da mai witnisiz, . . . an Ai da Gaad.” Den Jehoava mi aks dehn dis kweschan: “Dehn ga eni Gaad ada dan mee?” (Aiz. 44:8) Wee ga di privilij fi ansa da kweschan. Di tingz weh wi seh ahn du proov dat Jehoava da di onli chroo Gaad ahn dat fi hihn naym faar grayta dan aal ada naym. Di way wi liv wi laif wahn shoa dat wi reeli lov Jehoava ahn dat wi laayal tu ahn eevn wen Saytan noh mek it eezi fi wi. Dis gi wi wahn apachooniti fi help kip Jehoava naym hoali.

12. How di prafesi da Aizaiya 40:​3, 5 mi kohn chroo?

¹² Wi fala Jeezas egzampl wen wi sopoat Jehoava naym, er ih repyutayshan. Aizaiya mi prafesai dat sohnbadi mi wahn “pripyaa di way a Jehoava.” (Aiz. 40:3) How da prafesi mi kohn chroo? Jan di Baptis mi pripyaa di way fi Jeezas, bot da mi akchwali di way a Jehoava, bikaaz Jeezas mi kohn fi reprizent Jehoava ahn fi taak eena ih naym. (Mach. 3:3; Maak 1:​2-4; Look 3:​3-6) Di saym prafesi mi seh: “Evribadi wahn si Jehoava gloari.” (Aiz. 40:5) Dehn mi geh fi si Jehoava gloari eena di way how Jeezas mi reprizent Jehoava eena wahn perfek way wen ih mi kohn pahn ert. Da mi laik if Jehoava ihself mi kohn dong pahn di ert.—Jan 12:45.

13. How wi ku fala Jeezas egzampl?

¹³ Laik Jeezas, wee da witnisiz fi Jehoava. Bot fi gi wahn gud witnis, wi need fi tel ada peepl aal weh Jeezas du fi mek Jehoava naym hoali. (Aks 1:8) Wahn lata peepl gi wahn gud witnis bowt Jehoava, bot Jeezas da-mi di bes wan, soh wi du wi bes fi fala fi hihn egzampl. (Rev. 1:5) Weh wi ku du fi shoa dat Jehoava naym impoatant tu wi?

ADA WAYZ WI KU SHOA DAT JEHOAVA NAYM IMPOATANT TU WI

14. Laik weh Saam 105:3 seh, how wi feel bowt Jehoava naym?

¹⁴ Wi prowd a Jehoava naym. (Reed Saam 105:3.) Jehoava hapi wen wi boas bowt ih naym. (Jer. 9:​23, 24; 1 Kor. 1:31; 2 Kor. 10:17) Fi “boas bowt Jehoava” meenz dat wi prowd dat Jehoava da wi Gaad. Ahn fi wee, da wahn privilij fi aana ahn difen fi hihn gud naym. Soh wi shuda neva feel shaym fi tel adaz weh wi werk wid, wi klaasmayt dehn, wi naybaz, er enibadi els dat wi da wan a Jehoava Witnisiz! Saytan waahn wi stap tel adaz bowt Jehoava naym. (Jer. 11:21; Rev. 12:17) Hihn ahn dehn wan weh tel lai bowt Gaad waahn mek evribadi ferget Jehoava naym. (Jer. 23:​26, 27) Bikaaz wi lov Jehoava naym, wi waahn prayz ahn aal di taim.—Saa. 5:11; 89:16.

15. Weh ih meen fi kaal pahn di naym a Jehoava?

¹⁵ Wi kantinyu kaal pahn di naym a Jehoava. (Joel 2:32; Roam. 10:​13, 14) Wi need fi noa Jehoava naym ahn yooz it, bot dehnya vers di tel wi dat wi need fi du moa dan dat. Fi kaal pahn Jehoava naym, wi need fi geh fi noa Jehoava az wahn persn, laan fi chros ahn, an goh tu ahn fi help. (Saa. 20:7; 99:6; 116:4; 145:18) Fi kaal pahn Jehoava naym aalso meen dat wi wahn tel adaz bowt ih naym ahn bowt ih wandaful kwalitiz. Wi aalso waahn help dehn fi mek chaynjiz soh dat dehn ku pleez Jehoava ahn geh evalastin laif.—Aiz. 12:4; Aks 2:​21, 38.

16. How wi ku proov dat Saytan laiyad?

¹⁶ Wi wilin fi sofa fi bring aana tu Jehoava naym. (Jay. 5:​10, 11) Wi stay laayal tu Jehoava eevn if wi haftu sofa, soh dat wi ku proov dat Saytan laiyad. Wen Joab mi alaiv, Saytan mi tel Jehoava dat “wahn persn wahn giv evriting weh ih ga fi sayv ih laif.” (Joab 2:4) Saytan seh dat peepl onli wahn serv Jehoava wen tingz di goh gud fi dehn, bot az soon az laif geh haad dehn wahn stap serv ahn. Joab mi stay laayal ahn proov dat weh Saytan seh da noh chroo. Laik Joab, wee aalso ga di privilij fi proov dat ih noh mata weh wi goh chroo er weh Saytan mait du fi diskorij wi, wi noh wahn stap serv Jehoava. Wi ku bee shoar dat Jehoava wahn protek wi fi di sayk a ih naym.—Jan 17:11.

17. Laik weh 1 Peeta 2:12 seh, how wi ku mek Jehoava naym hoali?

¹⁷ Wi du aal weh wi kud fi shoa rispek fi Jehoava naym. (Prav. 30:9; Jer. 7:​8-11) Bikaaz peepl noa dat wee da Jehoava Witnisiz, wi ku eeda mek Jehoava naym hoali er bring shaym pan it. (Reed 1 Peeta 2:12.) Soh den, wi waahn du evriting wi kud fi mek Jehoava naym hoali wid weh wi seh ahn du. Wen wi du dat, wi ku stil bring aana tu Jehoava naym eevn doa wi noh perfek.

18. Wat da wahn nada way wi ku shoa dat Jehoava naym impoatant tu wi? (Koment pahn di futnoat.)

¹⁸ Wi prayz Jehoava naym noh mata weh peepl tink bowt wi. (Saa. 138:2) Wai dat impoatant? Ih impoatant bikaaz wen wi du tingz weh pleez Jehoava, adaz mait noh laik it ahn dehn mait eevn seh bad tingz bowt wi.a Wen Jeezas mi ded, peepl neva laik ahn, an dehn mi si ahn az wahn kriminal. Bot hihn mi stil wilin fi ded da way soh dat ih kuda mi bring aana tu Jehoava naym. Hihn neva wori bowt weh adaz mi tink bowt ahn. (Heeb. 12:​2-4) Hihn mi moa foakos pahn di du weh Jehoava waahn.—Mach. 26:39.

19. How yu feel bowt Jehoava naym, ahn wai?

¹⁹ Wi prowd dat wi di serv Jehoava ahn da wahn aana fi mek ih kaal wi bai fi hihn naym. Ahn wi kip aan di prayz Jehoava naym eevn if adaz noh laik wi sayka dat. Jehoava naym moa impoatant tu wi dan weh adaz tink bowt wi. Soh mek wi mek op wi main fi kantinyu prayz Jehoava, eevn if Saytan chrai stap wi. Wen wi du dat, wi wahn di fala Jeezas egzampl, ahn wi wahn di shoa dat Jehoava naym da di moas impoatant ting tu wee.