Yu Don Laan fi Bee Satisfai Wid Weh Yu Gat?

1. Weh ih meenz fi bee satisfai wid weh wi gat, ahn weh ih noh meen?

YOO satisfai wid weh yu gat? Peepl weh satisfai wid weh dehn gat feel da way bikaaz dehn tankful fi di gud tingz weh Jehoava gi dehn. Sayka dat, dehn feel hapi ahn dehn liv eena pees. Dehn noh geh beks er feel bad bikaaz a weh dehn noh gat. Bot jos bikaaz wi feel satisfai wid weh wi gat, noh meenz wi noh wahn kay bowt how wi liv wi laif. Fi egzampl, ih noh rang fi waahn du moa fi Jehoava. (Roam. 12:1; 1 Tim. 3:1) Bot if wi reeli satisfai wid weh wi gat, wi ku stil bee hapi eevn if wi noh geh wahn asainment weh wi mi reeli waahn.

2. Weh wi ku en op di du if wi noh satisfai wid weh wi gat?

² Wen wi noh satisfai wid weh wi gat, wi ku staat mek bad disizhanz weh ku mek wi en op di du sohnting weh Jehoava noh laik. Fi egzampl, peepl weh noh satisfai wid weh dehn gat mait werk lang owaz fi mek moni fi bai tingz weh dehn noh eevn need. Eevn sohn Kristyanz teef moni er ada tingz weh dehn waahn. Dehn mait eevn tink dat dehn dizerv it, er dat dehn kyaahn wayt nohmoh, er dat dehn ku tek it now ahn pay it bak layta. Bot noh mata how dehn luk pan it, dehn stil di teef, ahn Jehoava noh laik dat. If wan a Jehoava peepl teef, dehn bring shaym pahn Jehoava naym. (Prav. 30:9) Ada bradaz ahn sistaz geh soh diskorij wen dehn noh geh wahn privilij dat dehn stap serv Jehoava. (Gal. 6:9) Wai sohnbadi weh serv Jehoava wuda eva tink fi du sohnting laik dat? Ih ku bee dat di persn noh satisfai wid weh ih gat.

3. Weh impoatant lesn wi laan fahn Filipiyanz 4:​11, 12?

³ Aala wi ku laan fi bee satisfai. Paal mi seh: “Ah don laan how fi bee satisfai, noh mata wat da mi sichuwayshan.” (Reed Filipiyanz 4:​11, 12.) Hihn mi rait dat wen ih mi deh da prizn. Eevn soh, ih mi stil hapi bikaaz ih mi ‘laan fi bee satisfaiʼ wid weh ih gat. If wi di schrogl fi bee satisfai, Paal ekspeeryens proov dat wi kud bee satisfai noh mata weh sichuwayshan wi deh eena. Ih noh wahn bee eezi fi du dat. Bot wi ku laan fi bee satisfai wid weh wi gat. Dis aatikl wahn taak bowt sohn kwalitiz weh wahn help wi fi laan fi bee satisfai.

BEE TANKFUL

4. Wen wi tankful how dat help wi fi bee satisfai? (1 Tesaloanyanz 5:18)

⁴ Wahn persn weh tankful wahn bee satisfai wid weh dehn gat. (Reed 1 Tesaloanyanz 5:18.) Fi egzampl, if wi tankful dat wi ga di tingz weh wi need, den wi noh wahn tink tu moch bowt di tingz weh wi waahnt bot noh gat. Wen wi tankful tu Jehoava fi di difrent wayz wi di serv ahn, dat wahn help wi fi tink bowt how wi ku du wi bes eena wi asainment now insteda tink bowt how wi ku geh wahn difrent asainment. Jehoava noa ih impoatant fi bee tankful; dat da wai hihn teech wi fi tel ahn tanks wen wi pray! Wen wi tankful, “Gaad wahn giv [wi] wahn kaina pees weh peepl kyaahn andastan.”—Fil. 4:​6, 7.

5. Wai di Izrelait dehn shuda mi bee tankful? (Koment pahn di picha.)

⁵ Noatis weh mi hapm tu di Izrelaits. Lata taim, dehn mi komplayn tu Jehoava bikaaz dehn mi waahn di food weh dehn yoostu eet da Eejip. (Nom. 11:​4-6) Da chroo, laif neva eezi eena di wildanes. Bot weh kuda mi help dehn fi bee satisfai? Dehn shuda mi tink bowt aal weh Jehoava mi du fi dehn. Dat mi wahn help dehn fi bee moa tankful. Dehn shuda mi memba how bad di Ijipshan dehn mi chreet dehn, ahn how Jehoava mi yooz di ten playg fi ponish di Ijipshan dehn ahn sayv di Izrelaits. Wen di Izrelaits mi lef fahn Eejip, “dehn mi en op di tek evriting fahn di Ijipshan dehn,” inkloodin kloaz ahn tingz weh mek owta silva ahn goal. (Eks. 12:​35, 36) Wen Fayro aami mi chays di Izrelaits tu di Red See, Jehoava mi split di see soh dat dehn kuda mi kraas tu di ada said. Ahn wen dehn mi-di chravl chroo di wildanes, Jehoava mi gi dehn mana fi eet. Soh da wai dehn mi komplayn bowt food? Jehoava mi gi dehn plenti fi eet, bot dehn neva tankful fi weh dehn mi gat.

6. Weh ku help wi fi bee tankful?

⁶ Weh ku help yu fi bee tankful? Fers, mek taim fi tink bowt aal di gud tingz weh mek yu hapi. Yu ku eevn rait dong som a di tingz weh yu tankful fa. (Lam. 3:​22, 23) Sekant, mek shoar dat yu seh tanks wen peepl du sohnting fi yu, ahn noh ferget fi tank Jehoava evri day. (Saa. 75:1) Terd, memba dat if yu heng rong peepl weh noh tankful, yu wahn laan fi bee angraytful; bot if yu spen taim wid peepl weh tankful, den yu wahn bee tankful tu. Soh mek shoar yu chooz di rait peepl fi bee frenz wid. (Dyoo. 1:​26-28; 2 Tim. 3:​1, 2, 5) Wen yu waahn moa dan weh yu gat, dat ku mek yu feel diskorij. Bot if yu luk fi wayz fi shoa dat yu tankful, den yu noh wahn feel diskorij.

7. Weh mi help Aci fi bee tankful?

⁷ Tink bowt weh mi hapm tu Aci, weh liv da Indonesia. Shee seh: “Joorin di COVID-19 pandemik, Ah mi staat tu kompyaa mai sichuwayshan wid ada bradaz ahn sistaz wan. Ahn dat mi mek a stap bee satisfai.” (Gal. 6:4) Weh help shee fi chaynj di way ih tink? Shee seh: “Ah staat tink bowt aal di blesinz weh Ah get evri day ahn bowt aal di gud tingz weh Ah get bikaaz Ai da paat a Jehoava aaganaizayshan. Ah mi tank Jehoava fi evriting ih du fi mi, an afta dat Ah mi feel hapi.” Wen yu feel diskorij, chrai du weh Aci du. Dat ku help yu fi bee tankful fi weh yu gat.

BEE HOMBL

8. Weh mi hapm tu Barok?

⁸ Wen Barok mi-di werk fi Jerimaiya az sekiteri ih mi en op eena wahn sichuwayshan weh ih neva satisfai wid weh ih gat. Barok asainment neva eezi. Hihn mi haftu help Jerimaiya waan di Izrelaits bowt weh mi wahn hapm tu dehn bikaaz dehn neva obay Jehoava. Insteda foakos pahn weh Jehoava mi waahn ih du, Barok mi staat foakos moa pahn weh hihn mi waahn du. Jehoava mi yooz Jerimaiya fi tel ahn: “Yu di ekspek big tingz fi yuself. Stap di wayt fi tingz laik dat.” (Jer. 45:​3-5) Da laik if Jehoava mi-di tel ahn fi bee satisfai wid weh ih ga rait now. Barok mi lisn tu Jehoava an ih mi kantinyu bee ih fren.

9. How 1 Korintyanz 4:​6, 7 help wi fi ga di rait atichood tuwaadz wahn sertn privilij? (Koment pahn di picha dehn.)

⁹ Sohntaim, sohnbadi weh di serv Jehoava fi wahn lang taim mait feel laik ih dizerv wahn sertn asainment. Ih mait feel da way bikaaz ih ga skilz, ih haad werkin, er ih ga wahn lata ekspeeryens. Bot sohnbadi els mait geh di privilij weh ih mi waahn. Weh ku help ahn if ih di feel diskorij? Ih ku tink bowt weh di apasl Paal mi seh da 1 Korintyanz 4:​6, 7. (Reed.) Aal di privilij ahn skilz weh wi get kohn fahn Jehoava. Hihn noh gi wi privilij bikaaz wi moa speshal dan adaz. Ih gi wi dehn bikaaz a ih grayt kainis.—Roam. 12:​3, 6; Ifee. 2:​8, 9.

10. How wi ku laan fi bee hombl?

¹⁰ Jeezas shoa wi how fi bee hombl. Mek wi si weh mi hapm pahn di nait wen Jeezas mi wash ih apasl dehn fut. Di apasl Jan seh: “Jeezas mi noa dat di Faada mi put evriting eena fi hihn han ahn dat hihn mi kohn fahn Gaad ahn gwehn bak wid Gaad.” Stilyet, ih “staat tu wash ih disaipl dehn fut.” (Jan 13:​3-5) Jeezas kuda mi feel laik hihn mi dizerv fi mek ih disaipl dehn wash fi hihn fut insted. An eevn doa hihn da-mi Gaad Son, ih neva tink dat ih mi need fi ga wahn fansi hows, lata moni, er wahn eezi laif. (Look 9:58) Jeezas mi hombl an ih mi satisfai. Hihn mi set wahn gud egzampl fi wi.—Jan 13:15.

11. Weh help Dennis fi bee satisfai?

¹¹ Dennis, wahn brada fahn di Netherlands, seh dat ih chrai haad fi bee hombl, bot ih noh aalwayz eezi. Hihn seh: “Ah noatis dat wen sohnbadi geh wahn asainment weh Ai mi waahn, Ah wuda geh beks bikaaz Ah feel laik Ai shuda mi bee di wan fi geh di asainment. Wen dat hapm, Ah stodi bowt hyoomiliti. Ah sayv sohn skripchaz bowt hyoomiliti eena di JW Library^® ap, soh dat Ah ku reed dehn weneva Ah feel laik dat. Ah aalso dongload sohn taak bowt hyoomiliti pahn mi foan an Ah lisn tu dehn wahn lat.a Ah laan dat evriting Ah du da fi bring prayz tu Jehoava ahn noh tu miself. Da bikaaz a Jehoava kainis hihn gi eech wan a wi sohnting fi du, ahn da hihn mek ih werk owt.” If yu staat feel dat yu noh hapi bikaaz yu noh geh di asainment weh yu mi waahn, werk haad fi bee hombl. Dat wahn help yu fi bee kloasa tu Jehoava, ahn yu wahn feel satisfai wid weh yu gat.—Jay. 4:​6, 8.

TINK BOWT JEHOAVA PRAMIS FI DI FYOOCHA

12. How di hoap fi di fyoocha ku help wi fi bee satisfai? (Aizaiya 65:​21-25)

¹² Wi wahn feel moa satisfai wen wi tink bowt Jehoava pramis fi di fyoocha. Eena di buk a Aizaiya Jehoava tel wi dat ih noa dat laif noh eezi fi wi. Bot ih aalso pramis dat soon ih wahn tek weh aala wi prablemz. (Reed Aizaiya 65:​21-25.) Hihn pramis dat wi wahn ga byootiful hows fi liv eena. Wi wahn injai wi werk ahn ga lata nais ahn helti food fi eet. Wi noh wahn need fi wori bowt eniting bad di hapm tu wee er wi pikni dehn. (Aiz. 32:​17, 18; Ezek. 34:25) Wi ku bee shoar dat aala dehndeh pramis wahn kohn chroo.

13. Wat da sohn tingz weh wi di goh chroo, ahn how wi hoap fi di fyoocha ku help wi?

¹³ Wai ih impoatant fi tink bowt wi hoap fi di fyoocha? Ih impoatant bikaaz wi di liv eena “di laas dayz” an aala wi ga prablemz weh mek laif haad. (2 Tim. 3:1) Wi ku bayr op bikaaz Jehoava gi wi di schrent, di advais, ahn di help weh wi need. (Saa. 145:14) Pahn tap a dat, di hoap fi di fyoocha help wi wen wi di goh chroo haad taimz. Maybi yu di werk reeli haad soh dat yu famili ku ga food, kloaz, ahn wahn plays fi liv. Yu tink dis meen dat yu wahn aalwayz haftu schrogl fi servaiv? No, non ataal! Jehoava pramis fi gi yu moa dan weh yu need eena Paradais. (Saa. 9:18; 72:​12-14) Maybi yu ga wahn lata pain evri day, yu feel dipres, er yu ga som ada seeryos helt prablem. Yu tink yu wahn sofa fareva wid dehndeh tingz ahn yu wahn neva get beta? Non ataal. Siknis ahn det noh wahn egzis eena Gaad nyoo werl. (Rev. 21:​3, 4) Di hoap fi di fyoocha help wi fi noh feel beks bikaaz a weh di hapm tu wi rait now. Wi ku stil bee hapi ahn ga pees, eevn if peepl chreet wi eena wahn way weh noh fyaa, sohnbadi weh wi lov ded, er eni ada bad ting hapm tu wi. Wai? Bikaaz noh mata how haad laif get eena dis werl, wi noa dat “di chribyulayshan weh wi fays da onli fi wahn shaat taim” ahn dat soon eena di nyoo werl wi noh wahn sofa nohmoh.—2 Kor. 4:​17, 18.

14. How wi ku mek wi fayt eena Jehoava pramis geh schranga?

¹⁴ Wi hoap fi di fyoocha help wi fi bee satisfai, soh weh wahn mek wi bee kanfident dat Jehoava pramis dehn wahn kohn chroo? Jos laik how sohnbadi mait need glaasiz fi si sohnting weh deh faar, wee need fi schrentn wi hoap fi di fyoocha soh dat ih moa reel fi wi. Fi egzampl, wen wi di wori bikaaz wi noh ga inof moni, wi ku imajin weh laif wahn bee laik wen wi noh wahn need moni ahn wen nobadi wahn poa nohmoh. If wi feel diskorij bikaaz wi noh geh wahn asainment weh wi mi waahn, wi ku tink bowt how dehndeh feelinz noh wahn bada wi afta wi perfek an afta wi serv Jehoava fi towznz a yaaz. (1 Tim. 6:19) Wi ga lata woriz rait now weh mek it haad fi tink bowt di pramis dehn fi di fyoocha. Di moa wi tink bowt weh Jehoava pramis fi di fyoocha, di eeziya ih wahn bee fi foakos pahn dat insteda di prablemz weh wi di goh chroo.

15. Weh yu laan fahn Christa ekspeeryens?

¹⁵ Wi ku laan fahn di ekspeeryens a Christa, weh marid tu Dennis, di brada weh wi menshan erliya. Shee seh: “Ah ga wahn siknis weh mek mi mosl week. Ah kyaahn waak, soh Ah yooz wahn weelchyaa, an Ah haftu stay eena bed moas a di taim. Ah deh eena payn evri day. Di dakta tel mi dat tingz noh luk tu gud fi mi fyoocha. Bot az ih seh dat, Ah tink tu miself, ‘Hihn noh si di fyoocha di saym way laik mee.ʼ Ah foakos pahn mi hoap, ahn dat mek Ah feel kaam, ahn sayka dat Ah noh schres tu moch bowt weh Ah di goh chroo rait now. Fi rait now, Ah haftu kantinyu deel wid dis kandishan, bot Ah noa dat eena di nyoo werl Ah wahn ga wahn wandaful laif!”

“DEHN WAN WEH RISPEK AHN WAHN AALWAYZ GA EVRITING WEH DEHN NEED”

16. Wai King Dayvid kuda mi seh dat peepl weh rispek Jehoava “wahn aalwayz ga evriting weh dehn need”?

¹⁶ Eevn if wi satisfai wid weh wi gat, wi wahn stil ga prablemz. Tink bowt King Dayvid. At lees chree a ih pikni mi ded bifoa hihn. Peepl tel lai bowt ahn an seh ih du bad tingz, dehn bichray ahn, an dehn chrai kil ahn. Bot wen Dayvid mi-di goh chroo wahn rof sichuwayshan, hihn mi seh: “Dehn wan weh rispek [Jehoava] wahn aalwayz ga evriting weh dehn need.” (Saa. 34:​9, 10) Hihn kuda mi seh dat bikaaz eevn doa Jehoava noh wahn tek weh aal wi prablemz, Jehoava wahn stil gi wi weh wi need. (Saa. 145:16) Ahn wi ku pen pahn Jehoava fi sopoat wi wen wi di goh chroo prablemz. Wi wahn ku ga pees ahn bee hapi wid weh wi gat.

17. Wai yoo waahn laan fi bee satisfai wid weh yu gat?

¹⁷ Jehoava waahn yu bee satisfai wid weh yu gat. (Saa. 131:​1, 2) Soh du aal weh yu kud fi bee satisfai. If yu werk haad fi bee tankful, fi bee hombl, ahn fi tink bowt weh Jehoava pramis wi fi di fyoocha, yu wahn ku seh: “Ah feel satisfai.”—Saa. 16:​5, 6.