How Jehoava Help Wi fi Noh Giv Op

1. Wai ih haad fi stay faytful, bot hoo ku help wi? (1 Peeta 5:10)

AALA wi di deel wid prablemz joorin dehnya laas dayz, ahn soh sohntaim ih mait haad fi stay faytful tu Jehoava. Som a wi mait di sofa bikaaz wi sik fi wahn lang taim. Som a wi mait sad bikaaz sohnbadi weh wi lov ded. Ahn som a wi mait di fays persikyooshan fahn famili er fahn peepl eena di govament. (Mach. 10:​18, 36, 37) Bot yu ku bee shoar dat noh mata weh yoo di goh chroo, Jehoava ku gi yu di schrent weh yu need fi stay faytful dong tu di en a dis sistem.—Reed 1 Peeta 5:10.

2. Weh ku help wi fi stay faytful tu Jehoava?

² Wi need fi stay faytful tu Jehoava ahn bee hapi fi serv ahn eevn wen wi ga prablemz, wen wi fays persikyooshan, er wen wi temtid fi sin. Fi noh giv op, wi need fi bileev dat tingz wahn geh beta. Wi noh ga di schrent fi du dat pahn wi oan; soh wi need fi pen pahn Jehoava, bikaaz hihn ku gi wi “powa weh hyoomanz noh naamali gat.” (2 Kor. 4:7) Eena dis aatikl, wi wahn taak bowt foa tingz weh Jehoava gi wi fi help wi stay faytful tu ahn. Wi wahn aalso si how wi ku yooz dehn soh dat wi noh giv op.

JEHOAVA GI WI PRYAA

3. Weh mek pryaa soh amayzin?

³ Jehoava gi wi wahn amayzin gif weh ku help wi fi noh giv op. Eevn doa wi noh perfek, hihn alow wi fi taak tu ahn, an ih lisn tu wi tu. (Heeb. 4:16) Wi ku pray tu Jehoava enitaim wi waahn taak tu ahn bowt eniting, noh mata wehpaat wi deh er weh langwij wi taak. Jehoava ku hyaa wi eevn if wi kot aaf fahn evribadi els er if wi deh eena prizn. (Joan. 2:​1, 2; Aks 16:​25, 26) If wi soh schres owt dat wi noh eevn noa how fi tel ahn weh wi feel, hihn ku stil andastan wi. (Roam. 8:​26, 27) Pryaa amayzin fi chroo!

4. How wi noa dat wen wi pray an aks Jehoava fi help wi stay faytful, hihn wahn help wi?

⁴ Yu tink wi ku aks Jehoava fi help wi fi noh giv op wen wi fays chraiyalz? Eena di Baibl, Jehoava tel wi dat “noh mata weh wi aks Gaad fa, wans wi aks akaadn tu fi hihn wil, ih hyaa wi.” (1 Jan 5:14) Wat da Jehoava wil fi wee? Jehoava waahn wi kip di serv ahn fareva. Ahn wen wi stay laayal eevn anda tes, Jehoava seh hihn ku ansa bak Saytan di Devl. (Prav 27:11) Ahn di Baibl seh dat Jehoava eega fi “shoa ih schrent tuwaadz di wan dehn weh serv ahn wid dehn hoal haat.” (2 Kran. 16:9) Soh wi ku bee shoar dat Jehoava waahn help wi ahn dat ih ku gi wi di powa fi stay faytful ahn noh giv op.—Aiz. 30:18; 41:10; Look 11:13.

5. How pryaa ku help wi feel kaam? (Aizaiya 26:3)

⁵ Di Baibl seh dat wen wi pray tu Jehoava, hihn ‘wahn gi wi wahn kaina pees weh peepl kyaahn andastan. Eena da way, hihn wahn di protek wi haat ahn main.ʼ (Fil. 4:7) Wi soh tankful fi dat. Peepl weh noh serv Jehoava ga prablemz tu. Dehn mait chrai aal kaina ting fi feel kaam er fi ferget dehn prablemz. Fi egzampl, dehn mait du wahn kaina meditayshan weh mek dehn stap tink bowt evriting, inkloodin dehn prablemz. Bot wen dehn du dat, dehn noh di kanchroal dehn tinkin, ahn dat ku gi di deemonz powa oava dehn. Dat daynjaros bad. (Kompyaa Machyu 12:​43-45.) An eevn if dehn feel wahn lee moa kaam afta dehn du dat, dehn stil noh geh di reel pees weh kohn fahn Jehoava. Fi hihn pees soh moch beta dan weh dehn get. Bot wee chros Jehoava eena evriting, soh wi pray an aks ahn fi pees wen wi need fi feel kaam. Ahn laik weh hihn pramis wi eena di Baibl, hihn wahn gi wi “pees weh wahn laas.” (Reed Aizaiya 26:3.) Wan way how Jehoava gi wi da pees da wen ih help wi fi memba skripchaz weh komfert wi. Dehndeh skripchaz rimain wi humoch Jehoava lov wi ahn humoch ih waahn help wi, ahn soh wi feel kaam.—Saa. 62:​1, 2.

6. Weh yu ku pray bowt? (Koment pahn di picha.)

⁶ Weh yoo ku du. Wen yu ga wahn prablem, tel Jehoava how yu feel. “Chroa yu woriz pahn Jehoava” an aks ahn fi gi yu pees. (Saa. 55:22) Pray an aks ahn fi di wizdom weh yu need soh dat yu ku noa weh fi du eena yu sichuwayshan. (Prav 2:​10, 11) Ahn wen yu di pray fi dehndeh tingz, noh ferget fi gi tanks tu Jehoava. (Fil. 4:6) Tink bowt how Jehoava help yu fi stay faytful evri day, ahn tel ahn tanks fi di help ahn fi aal di gud tingz weh ih du fi yu. An eevn if yu di sofa chroo wahn chraiyal, noh ferget di lata blesinz weh Jehoava don gi yu aredi.—Saa. 16:​5, 6.

JEHOAVA GI WI DI BAIBL

7. How di Baibl ku help wi fi noh giv op?

⁷ Jehoava gi wi di Baibl fi help wi stay schrang. Di Baibl gat een lata skripcha weh teech wi dat Jehoava wahn help wi. Fi egzampl, Machyu 6:8 seh: “Unu Faada noa weh unu need eevn bifoa unu aks ahn.” Da Jeezas mi seh dat, ahn nobadi noa Jehoava beta dan hihn. Soh wi ku bee shoar dat wen wi di sofa, Jehoava noa weh wi need an ih wahn help wi. Eena di Baibl, Jehoava pramis wi lata taim dat hihn wahn gi wi di schrent weh wi need fi stay faytful tu ahn.—Saa. 94:19.

8. (a) Weh advais di Baibl gi wi, ahn how da advais ku help wi fi stay faytful eevn joorin haad taimz? (b) Weh ku help wi fi memba di Baibl advais wen wi need it?

⁸ Di Baibl gi wi gud advais weh ku help wi fi stay faytful eevn joorin haad taimz. Di Baibl advais gi wi di wizdom weh wi need fi mek gud disizhanz. (Prav 2:​6, 7) Fi egzampl, di Baibl tel wi noh fi wori tu moch bowt weh mait hapm eena di fyoocha. Rada, ih inkorij wi fi pen pahn Jehoava evri day. (Mach. 6:34) If wi reed di Baibl evri day ahn tek taim fi tink gud bowt weh wi reed, ih wahn eeziya fi memba di advais weh di Baibl gi wi wen wi need fi mek wahn disizhan er wen wi need help fi deel wid wi prablemz.

9. Wen wi reed bowt how Jehoava mi help ih peepl eena Baibl taimz, how dat mek wi feel?

⁹ Di peepl weh wi reed bowt eena di Baibl mi ga prablemz tu, ahn dehn mi feel jos laik wee. Bot dehn mi pen pahn Jehoava, ahn hihn mi help dehn. (Heeb. 11:​32-34; Jay. 5:17) Wen wi tink bowt how Jehoava mi help dehn, wi bil op wi chros dat hihn wahn help wee tu. Den Jehoava wahn bee fi wee “schrent ahn wi sayf plays” ahn hihn wahn “deh rait deh fi help wi wen tingz geh haad.” (Saa. 46:1) Ahn wen wi tink bowt how Jehoava peepl eena di paas mi shoa fayt ahn kantinyu serv Jehoava eevn joorin haad taimz, dat wahn inkorij wi fi du di saym laik dehn.—Jay. 5:​10, 11.

10. How yu ku mek di bes yoos a di Baibl?

¹⁰ Weh yoo ku du. Reed di Baibl evri day, ahn kip wahn lis a skripchaz weh ku help yu. Lata peepl laik reed di dayli teks da maanin soh dat dehn ga sohnting gud fi tink bowt fi di res a di day. Dat da weh mi help wahn sista weh naym Mariea wen ih mi-di tek kayr a ih ma ahn pa afta dehn fain owt dat dehn mi ga kyansa. Weh mi help shee fi noh giv op wen ih payrents mi deh pahn daiyin? Shee seh: “Evri maanin Ah wuda reed mi dayli teks ahn tink bowt weh Ah laan fan it. Dat mi help mi fi tink moa bowt Jehoava ahn bowt di wandaful tingz weh hihn teech wi eena di Baibl insteda foakos pahn mi oan prablemz.”—Saa. 61:2.

JEHOAVA GI WI BRADAZ AHN SISTAZ

11. How wi feel wen wi tink bowt how wi bradaz ahn sistaz noh giv op wen dehn goh chroo chraiyalz?

¹¹ Jehoava gi wi wi bradaz ahn sistaz fi help wi fi noh giv op. Wen wi goh chroo tof sichuwayshanz, wi noa dat wi “bradaz aal rong di werl di sofa di saym kaina tingz,” ahn soh wi noh feel laik wi deh pahn wi oan. (1 Peet. 5:9) Wi ku bee shoar dat noh mata weh wi goh chroo, ada bradaz ahn sistaz gaahn chroo sohnting simila, ahn dehn neva giv op. Dat meenz wee ku stay faytful tu!—Aks 14:22.

12. How wi bradaz ahn sistaz ku help wi, ahn weh wee ku du fi dehn? (2 Korintyanz 1:​3, 4)

¹² Wi bradaz ahn sistaz ku seh er du tingz fi inkorij wi ahn help wi fi noh giv op. Bak eena di day, sohn bradaz ahn sistaz mi du dat fi di apasl Paal. Eena ih leta dehn, ih mi menshan hoo mi help ahn wen ih mi deh anda hows ares, an ih mi tank dehn fi weh dehn du far ahn. Dehndeh bradaz ahn sistaz mi inkorij Paal, komfert ahn, an du ada tingz fi help ahn owt. (Fil. 2:​25, 29, 30; Kol. 4:​10, 11) Wi mait ekspeeryens sohnting simila eena fi wee taim. Wen wee need help fi stay faytful ahn noh giv op, wi bradaz ahn sistaz aalwayz dehdeh fi wi. Ahn wen dehn need help, wee aalwayz dehdeh fi dehn tu.—Reed 2 Korintyanz 1:​3, 4.

13. Weh mi help Sista Maya?

¹³ Wahn sista fahn Russia weh naym Maya seh dat ih bradaz ahn sistaz mi reeli inkorij ahn wahn lat wen ih gaahn chroo wahn haad taim. Polees mi rayd fi shee hows eena 2020, dehn ares ahn bikaaz ih mi-di preech, ahn shee mi haftu gaahn da koat fi difen ihself. Shee seh: “Joorin da taim, Ah mi feel taiyad ahn sad, an Ah mi-di wori wahn lat. Bot mi bradaz ahn sistaz mi kaal mi ahn rait tu mi fi tel mi humoch dehn lov mi. Ah mi aalwayz noa dat mi bradaz ahn sistaz lov mi ahn dat dehn da mi famili, bot now dehn proov it tu mi.”

14. Weh wi ku du fi benifit fahn di help weh wi bradaz ahn sistaz gi wi? (Koment pahn di picha.)

¹⁴ Weh yoo ku du. Wen yu di goh chroo sohnting haad, ih impoatant fi mek yu taak tu yu bradaz ahn sistaz ahn spen taim wid dehn. Noh hoal bak fahn aks di eldaz fi help. Dehn ku bee laik “wahn shelta fahn di haad breez” ahn laik “wahn plays fi shelta fahn di raynstaam.” (Aiz. 32:2) Memba dat yu bradaz ahn sistaz di goh chroo rof sichuwayshanz eena laif tu. Soh wen yu du sohnting kain fi sohnbadi weh need it, yu wahn feel hapi ahn dat wahn help yu fi noh giv op.—Aks 20:35.

JEHOAVA GI WI HOAP

15. How hoap fi di fyoocha mi help Jeezas, ahn how wi hoap fi di fyoocha help wee? (Heebrooz 12:2)

¹⁵ Jehoava gi wi hoap fi di fyoocha. (Roam. 15:13) Wi noa da hoap wahn definaytli kohn chroo, soh dat help wi fi stay faytful ahn noh giv op. Wen Jeezas mi-di goh chroo di wers day a ih laif, hihn neva giv op, bikaaz ih mi-di luk faawod tu weh Jehoava mi pramis ahn. (Reed Heebrooz 12:2.) Jeezas mi-di luk faawod tu di gud tingz weh mi wahn hapm if ih mi stay faytful. Ih mi wahn proov dat evriting weh Saytan seh bowt Jehoava da loan lai. Ih mi wahn shoa evribadi dat Jehoava dizerv aal prayz an aana. Ih mi wahn ku goh bak da hevn fi deh wid ih Pa agen. Ahn laytaraan, ih mi wahn bee King a Gaad Kingdom ahn rool wid ih anointid bradaz. Wee tu ku stay faytful noh mata weh wi mait fays eena Saytan sistem, bikaaz wi ga di hoap fi liv eena Paradais eena di fyoocha.

16. How hoap mi help Sista Alla, ahn weh wi laan fahn weh shee seh?

¹⁶ Wi hoap fi di fyoocha mi help wahn sista fahn Russia weh naym Alla wen shee mi-di goh chroo wahn rof taim. Dehn mi ares fi shee hozban ahn kehr ahn da jayl til taim fi mek ih goh da koat. Wen dat hapm, Alla seh: “Ah aalwayz tink bowt wi hoap fi di fyoocha ahn pray tu Jehoava bowt it. Dat help mi fi noh feel tu diskorij. Ah noa dat afta dehnya haad taimz paas, tingz wahn geh beta. Jehoava wahn win gens ih enimi dehn, an ih wahn gi wi weh wi hoap fa.”

17. How wi ku shoa Jehoava how tankful wi feel fi di hoap weh ih gi wi? (Koment pahn di picha.)

¹⁷ Weh yoo ku du. Tek taim fi tink bowt di wandaful fyoocha weh Jehoava pramis wi. Imajin how laif wahn stan eena di nyoo werl wid aal yu frenz ahn famili ahn how hapi evribadi wahn bee. Den if yu kompyaa da hoap tu di tingz weh wi di sofa rait now, yu wahn feel laik weh wi di goh chroo rait now “da onli fi wahn shaat taim.” (2 Kor. 4:17) Du wateva yu kud fi tel ada peepl bowt yu hoap fi di fyoocha. Tink bowt how bad tingz stan fi peepl weh noh serv Jehoava. Dehn ga prablemz tu, bot dehn noh noa bowt di amayzin fyoocha weh Jehoava pramis wi. Yu mait onli haftu tel dehn lee bit bowt Paradais fi mek dehn waahn noa moa bowt weh Jehoava pramis fi di fyoocha.

18. Wai wi ku chros Jehoava pramis?

¹⁸ Afta Joab mi stay faytful chroo lata chraiyalz, ih mi tel Jehoava: “Now Ah noa dat yoo ku du eniting ahn dat wen yu mek op yu main fi du sohnting, notn ku stap yu.” (Joab 42:2) Joab mi laan dat notn kyaahn stap Jehoava fahn du weh hihn pramis fi du. Wen wi memba dat Jehoava wahn kip ih pramis ahn geh rid a aala wi prablemz, dat wahn gi wi di schrent fi stay faytful. Fi egzampl, imajin wahn laydi weh sik fi wahn lang taim. Ih gaahn da lata dakta ahn non a dehn mi kyaahn help ahn. Dat lef shee di feel diskorij. Bot den ih fain wahn gud dakta weh tel ahn egzakli weh mek ahn sik ahn how ih wahn kyoar ahn. Az di dakta tel ahn dat, ih feel beta, eevn doa ih noh geh kyoar yet. Shee feel hapi bikaaz ih ga hoap, an ih wilin fi wayt eevn if di chreetment tek lang. Wee da laik dat. Wi ku kip di serv Jehoava dong tu di en a dis sistem widowt giv op, bikaaz wi noa dat weh hihn pramis wi wahn kohn chroo.

19. Weh ku help wi stay faytful?

¹⁹ Wi si how Jehoava gi wi pryaa, di Baibl, wi bradaz ahn sistaz, ahn wi hoap fi di fyoocha. Dehndeh tingz help wi fi stay faytful eevn wen dat noh eezi. Soh if wi mek gud yoos a dehn, noh mata weh hapm tu wi eena Saytan sistem, Jehoava wahn help wi fi stay schrang ahn noh giv op antil di day wen dis sistem geh dischrai ahn wi noh haftu sofa nohmoh.—Fil. 4:13.