Yu Ku Bee Shoar Dat Jehoava Lov Yoo

1. Wai yu mi chooz fi dedikayt yu laif tu Jehoava? (Koment pahn di picha.)

YOO memba wen yu mi dedikayt yu laif tu Jehoava? Yu mi laan bowt ahn an geh fi lov ahn. Bikaaz yu lov ahn, yu chooz fi serv ahn fi di res a yu laif. Yu mi pramis dat yu wahn put hihn fers eena yu laif ahn dat yu wahn kantinyu lov ahn wid yu hoal haat, soal, main, ahn schrent. (Maak 12:30) Sins da taim, yu lov fi hihn geh schranga. Soh if sohnbadi aks yu, “Yu shoar yoo lov Jehoava?” weh yoo wuda seh? Yu wudn eevn tink twais fi tel dehn, “Ai lov Jehoava moa dan eniting an enibadi els!”

2-3. Weh Jehoava waahn wi bee shoar a, ahn weh wi wahn taak bowt eena dis aatikl? (Jeremiah 31:3)

² Bot sopoaz sohnbadi aks yu, “Yu shoar Jehoava lov yoo?” Weh yu wuda seh? Yu tink yu mait hezitayt fi ansa? Maybi yu noh shoar if yu dizerv Jehoava lov. Wahn sista weh neva rayz eena wahn lovin famili seh: “Ai noa Ai lov Jehoava. Ai shoar a dat. Bot dehn ga taimz wen Ah noh shoar weda er nat Jehoava lov mee.” Bot how Jehoava reeli feel bowt yoo?

³ Jehoava waahn yu bee shoar dat hihn lov yu. (Reed Jeremiah 31:3.) Jehoava mi waahn yu laan bowt ahn an bee ih fren. Yu mi geh sohnting reeli speshal wen yu mi dedikayt yu laif tu Jehoava. Yu mi geh fi hihn laayal lov. Dat meen dat ih lov yu wahn lat ahn dat ih wahn neva lef yu. Soh if yoo da wan a fi hihn peepl, den yu da paat a fi hihn “speshal prapati.” (Mal. 3:17) Di apasl Paal mi soh shoar dat Jehoava lov ahn dat ih seh: “Ai noa eena mi haat dat needa det ner laif ner di aynjel dehn ner di govament dehn ner tingz weh deh ya ner tingz weh wahn kom ner powa ner eniting hai ner eniting loa ner eni ada kriyayshan ku stap Gaad fahn lov wi.” (Roam. 8:​38, 39) Jehoava waahn wi bee az shoar az Paal dat Hihn lov wee tu. Eena dis aatikl, wi wahn taak bowt wai wi need fi bee shoar dat Jehoava lov wi ahn weh ku help wi fi kanvins wiself dat Jehoava reeli lov wi.

WAI YU NEED FI BEE SHOAR DAT JEHOAVA LOV YOO

4. How yu ku fait gens wan a Saytan fayvrit chrik?

⁴ Wen yu shoar dat Jehoava lov yu, yu wahn ku fait gens wan a “di Devl chriks.” (Ifee. 6:11) Saytan waahn yu stap wership Jehoava, ahn hihn wahn du eniting weh ih kud fi mek dat hapm. Wan a fi hihn fayvrit chrik da fi mek yu bileev dat Jehoava noh lov yu. Dat da wahn lai. Saytan da laik wahn laiyan weh luk fi wahn animal weh week soh dat ih ku atak ahn. (1 Peet. 5:​8, 9) Sohntaim yu mait feel week, taiyad, er sad bikaaz a tingz weh hapm tu yu eena di paas, tingz weh yu di goh chroo rait now, er tingz weh yu wori bowt fi di fyoocha. (Prav. 24:10) Enitaim yu feel dehn kaina way, dat da wen Saytan wahn chrai atak yu. Saytan waahn mek yu geh soh week dat yu giv op ahn stap serv Jehoava. Bot yu ku “stan op gens” di Devl ahn fi hihn chriks if yu du aal weh yu kud fi schrentn yu fayt dat Jehoava lov yu.—Jay. 4:7.

5. Wai yu need fi feel dat Jehoava lov yu ahn dat yu preshos tu hihn?

⁵ Wen yu shoar dat Jehoava lov yu, yu wahn jraa kloasa tu ahn. Wai wi seh dat? Wee need fi lov adaz ahn feel dat dehn lov wee. Da soh Jehoava mek wi. Wen sohnbadi shoa dat dehn lov yu, dat mek yu waahn lov dehn tu. Soh wen yu feel dat Jehoava lov yu ahn dat wi preshos tu ahn, dat mek yu lov ahn eevn moa. (1 Jan 4:19) Ahn di moa yu lov ahn, di moa hihn wahn lov yoo. In fak, di Baibl tel wi: “Kohn kloas tu Gaad, ahn hihn wahn kohn kloas tu unu.” (Jay. 4:8) Bot how yu ku schrentn yu fayt dat Jehoava lov yoo?

WEH KU HELP YU FI BEE SHOAR DAT JEHOAVA LOV YOO?

6. If yu noh shoar dat Jehoava lov yu, weh yu ku pray fa?

⁶ Kip aan di pray ahn bee spesifik wen yu pray. (Look 18:1; Roam. 12:12) Sohntaim yu mait feel soh bad bowt yuself dat ih haad fi bileev dat Jehoava lov yu. Bot Jehoava grayta dan yu haat. (1 Jan 3:​19, 20) Jehoava noa yu beta dan yu noa yuself, ahn hihn ku si weh yoo kyaahn si bowt yuself. (1 Sam. 16:7; 2 Chron. 6:30) Soh noh hoal bak fahn di “poar owt” yu haat tu Jehoava, an aks ahn fi help yu bee shoar dat hihn lov yu. (Saa. 62:8) Yu mait haftu pray oava ahn oava fi mek Jehoava help yu fi si yuself di way hihn si yu. Afta yu don pray, ih impoatant fi fala di sojeshanz eena di neks fyoo paragraaf.

7-8. How di Saamz kanvins wi dat Jehoava lov wi?

⁷ Chros weh Jehoava seh. Jehoava mi yooz fi hihn hoali spirit fi gaid di man dehn weh mi rait di Baibl. Soh wi ku chros dat weh dehn seh bowt Jehoava da chroo. Dayvid mi diskraib how moch Jehoava kay bowt wi. Hihn mi seh: “Jehoava kloas tu dehn wan weh di sofa eena dehn haat; hihn sayv dehn wan weh diskorij.” (Saa. 34:18) Wen yu reeli sad, yu mait feel laik nobadi andastan how yu feel er dat nobadi ku help yu. Bot Jehoava pramis fi dehdeh fi yu bikaaz ih si dat yu need fi hihn help. Wahn nada taim, Dayvid mi seh: “Pleez kalek op aal mi tyaaz ahn put dehn eena yu leda bag.” (Saa. 56:8) Jehoava si wen yu sad ahn wen yu deh eena payn. Hihn kay bowt yu wahn lat an ih noh laik si wen yu di sofa. Wen sohnbadi di chravl chroo di dezert, evri jrap a waata preshos tu ahn. Saym way soh, fi wee tyaaz preshos tu Jehoava ahn hihn memba di payn wi feel wen wi krai. Saam 139:3 seh: “Yu [Jehoava] noa evriting weh Ah du.” Jehoava si evriting weh yu du, bot ih foakos pahn di gud tingz weh yu du. (Heeb. 6:10) Wai? Bikaaz Jehoava apreeshiayt how haad yu chrai fi pleez ahn.a

⁸ Jehoava put skripchaz laik dehndeh eena di Baibl fi tel wi dat ih kay bowt wi ahn dat ih lov wi wahn lat. Bot memba, Saytan waahn wi bileev dat Jehoava noh lov wi. Soh if yu eva feel laik Jehoava noh lov yu, aks yuself, ‘Hoo Ai wahn bileev—“di faada a di lai dehn” er “di Gaad a chroot”?ʼ—Jan 8:44; Saa. 31:5.

9. Weh garantee Jehoava giv peepl weh lov ahn? (Eksodos 20:​5, 6)

⁹ Tink bowt how Jehoava feel bowt peepl weh lov ahn. Noatis weh Jehoava mi tel Moaziz ahn di Izrelait dehn. (Reed Eksodos 20:​5, 6.) Jehoava pramis dat ih wahn kantinyu shoa laayal lov tu peepl weh lov ahn. Dat da wahn garantee dat Jehoava wahn neva rifyooz fi lov sohnbadi weh lov hihn. (Neh. 1:5) Soh if yu eva staat feel laik Jehoava noh lov yu, aks yuself, ‘Ai lov Jehoava?ʼ Tink bowt dis: If yu lov Jehoava ahn yu di chrai yu bes fi pleez ahn, yu ku bee honjrid persent shoar dat Jehoava lov yu wahn lat. (Dan. 9:4; 1 Kor. 8:3) Soh if yu shoar yu lov Jehoava, den yu noh ga no reezn fi dowt dat hihn lov yoo. Yu ku bee shoar dat hihn wahn aalwayz lov yu an ih wahn neva lef yu.

10-11. How Jehoava waahn yoo si di ransom? (Galayshanz 2:20)

¹⁰ Tink bowt di ransom. Jehoava mi sen Jeezas fi pay di ransom fi aala wi. (Jan 3:16) Dat da wahn amayzin gif! Bot yu tink da gif da fi yoo persnali? Yes! Tink bowt di apasl Paal. Hihn mi du wahn lata bad tingz bifoa ih ton wahn Kristyan, an eevn afta ih ton Kristyan ih mi stil need fi fait gens ih oan sinful naycha. (Roam. 7:​24, 25; 1 Tim. 1:​12-14) Eevn wid aala dat, hihn mi stil tink di ransom da wahn gif fahn Jehoava tu hihn persnali. (Reed Galayshanz 2:20.) Memba, da Jehoava mi mek Paal rait dat eena di Baibl. An evriting weh rait dong eena di Baibl dehdeh fi teech wi. (Roam. 15:4) Weh Paal mi rait shoa dat Jehoava waahn yu si di ransom az wahn gif fahn hihn tu yoo persnali. Wen yu laan fi si di ransom da way, yu wahn schrentn yu fayt dat Jehoava lov yoo.

¹¹ Wee apreeshiayt dat Jehoava sen ih Son fi ded fi wi, bot dat da noh di onli reezn wai Jeezas mi kohn pahn ert. Hihn mi aalso kohn fi tel wi di chroot bowt Jehoava. (Jan 18:37) Dat inklood di way Jehoava feel bowt ih chiljren.

HOW JEEZAS HELP YU FI BEE SHOAR DAT JEHOAVA LOV YU

12. Wai yu ku chros weh Jeezas seh bowt Jehoava?

¹² Wen Jeezas mi deh pahn ert, hihn mi tel peepl weh kaina persn Jehoava. (Look 10:22) Jeezas mi spen wahn lang taim wid Jehoava bifoa ih kohn da ert, soh wi ku chros dat evriting weh hihn seh bowt Jehoava da chroo. (Kol. 1:15) Jeezas noa how moch Jehoava lov hihn. An ih si how moch Jehoava lov di faytful aynjelz an ih faytful son ahn daata dehn pahn ert. How Jeezas ku help yoo fi bee shoar dat Jehoava lov yu?

13. How Jeezas waahn wi feel bowt Jehoava?

¹³ Jeezas waahn wi noa how Jehoava reeli feel bowt wi. Eena di Gaspl dehn, Jeezas mi kaal Jehoava “Faada” oava 160 taimz. Ahn wen hihn mi-di taak tu fi hihn falowaz, hihn mi tel dehn dat Jehoava da fi dehn Faada. (Mach. 5:16; 6:26) Di noat pahn Machyu 5:16 eena di Study Bible seh: “Bifoa Jeezas mi kohn pahn ert, Jehoava faytful servants yoostu kaal ahn ‘Almaiti,ʼ ‘di Moas Hai,ʼ ‘Grayt Gaad,ʼ an ada impoatant taitl laik dehndeh. Bot Jeezas yoostu kaal Jehoava ‘Faada,ʼ ahn dat shoa wi dat Jehoava waahn wi feel kloas tu hihn, jos laik how wahn pikni feel kloas tu ih pa.” Jeezas waahn wi feel di saym way hihn feel bowt Jehoava, laik hihn da wi lovin Pa weh lov ih pikni dehn wahn lat. Mek wi taak bowt too moa egzampl a wen Jeezas kaal Jehoava “Faada.”

14. How Jeezas mi shoa dat eech wan a wi preshos tu Jehoava? (Machyu 10:​29-31) (Koment pahn di picha.)

¹⁴ Tink bowt weh Jeezas mi seh da Machyu 10:​29-31. (Reed.) Wahn sparo da wahn smaal lee berd weh wahn neva lov er wership Jehoava. Stilyet, Jehoava noa wehpaat eech wan a dehn deh an if dehn jrap da grong. How yu tink Jehoava mosi feel bowt peepl weh wership ahn bikaaz dehn lov ahn? Eena vers 30, Jeezas mi seh dat Jehoava “eevn noa di nomba a hyaa weh deh pahn unu hed.” Di noat pahn da vers eena di Study Bible seh: “Jehoava noa di leelis a deetaylz bowt wi. Dat meen dat wi ku bee shoar dat hihn kay bowt wi wahn lat.” Ih klyaa fi si dat Jeezas waahn wi bee shoar dat Jehoava lov eech wan a wi ahn dat wi preshos tu hihn.

15. Wen yu tink bowt weh Jeezas seh da Jan 6:​44, weh yu andastan bowt yu hevnli Faada?

¹⁵ Mek wi luk pahn wahn neks egzampl wen Jeezas mi kaal Jehoava “Faada.” (Reed Jan 6:44.) Jehoava mi waahn yu laan bowt ahn an bee ih fren. Hihn mi feel da way bikaaz hihn si dat yu ga di rait haat kandishan. (Aks 13:48) Di noat pahn Jan 6:44 eena di Study Bible seh dat wen Jeezas seh weh deh eena da vers, ih kuda mi-di rifaa tu weh Jehoava seh da Jerimaiya 31:3: “Ah jraa yu tu mi wid laayal lov [er, Ah kantinyu shoa laayal lov tu yu].” (Jer. 31:3; ftn.; kompyaa Hosea 11:4.) Tink bowt weh dat meenz fi yoo. Yu lovin Faada kip di si di gud eena yu eevn if yu kyaahn seeʼt fi yuself.

16. (a) Weh Jeezas teech wi, ahn wai ku bileev weh ih seh? (b) How yu ku bee shoar dat Jehoava da di Pa weh yoo need? (Koment pahn di baks weh naym “Di Pa Weh Aala Wi Need.”)

¹⁶ Jeezas teech wi dat Jehoava da noh jos fi hihn Pa, da fi wee Pa tu. Jeezas waahn yu bee shoar dat Jehoava lov yu ahn kay wahn lat bowt yu. Soh if yu eva feel dat Jehoava noh lov yu, memba weh Jeezas seh. Yu ku bileev aal weh hihn seh, bikaaz ih aalwayz tel di chroot ahn nobadi noa ih Pa beta dan hihn.—1 Peet. 2:22.

KANTINYU FI SCHRENTN YU FAYT DAT JEHOAVA LOV YU

17. Wai yu need fi kip di schrentn yu fayt dat Jehoava lov yu?

¹⁷ Yu need fi kip di schrentn yu fayt dat Jehoava lov yu. Saytan waahn yu giv op ahn stap serv Jehoava, an ih wahn yooz aal kaina chriks fi chrai kanvins yu dat Jehoava noh lov yu. If yu bileev ahn, yu wahn geh week ahn yu mait giv op fi chroo. Soh noh bileev Saytan!—Joab 27:5.

18. How yu ku schrentn yu fayt dat Jehoava lov yu?

¹⁸ Eena dis aatikl, wi laan dat yu ku bee shoar dat Jehoava lov yu. Yu ku pray tu ahn an aks ahn help yu fi si yuself di way hihn si yu. Tink bowt weh di Baibl seh bowt humoch Jehoava lov yoo. Tink bowt how hihn wahn aalwayz lov yoo az lang az yoo lov hihn. Neva ferget dat Jehoava sen ih Son fi ded fi yoo. Chros Jeezas wen ih seh dat Jehoava da fi yoo Pa. Den if sohnbadi aks yu, “Yu shoar Jehoava lov yoo?” yu wahn ku tel dehn, “Yes, hihn lov mi! An Ah du aal Ah kud fi shoa ahn humoch Ah lov ahn evri day!”