How fi Pray Soh Dat Yu Ku Jraa Kloasa tu Jehoava

1-2. (a) Weh ku mek yu hoal bak fahn tel Jehoava how yu reeli feel? (b) How wi noa dat Jehoava lisn gud tu wi pryaaz?

YU EVA feel laik wen yu pray yu aalwayz seh di saym ting, er yu noh tel Jehoava how yu reeli feel? Dat ku hapm tu aala wi. Wi soh bizi dat wi mait hori seh wahn kwik lee pryaa, bot wi noh tek taim fi reeli taak tu Jehoava. Er wi mait feel laik wi noh gud inof fi taak tu Jehoava, soh wi noh feel laik wi ku poar owt wi haat tu ahn.

² Di Baibl teech wi dat Jehoava waahn wi bee aanis ahn hombl wen wi pray ahn fi mek wi pray fahn wi haat. Soh wi noh haftu seh fansi pryaaz wid lata big werdz. Jehoava hyaa “weh di hombl wan dehn aks [ahn] fa.” (Saa. 10:17) Hihn lisn gud tu evriting weh wi seh bikaaz ih reeli kay bowt wi.—Saa. 139:​1-3.

3. Weh kweschanz wi wahn ansa eena dis aatikl?

³ Soh wi ku aks wiself: Wai wi noh ga no reezn fi bee frayd fi tel Jehoava how wi reeli feel? How wi ku pray eena wahn way weh mek wi jraa kloasa tu Jehoava? Weh wi ku laan fahn pryaaz weh faytful peepl mi seh eena di Baibl, ahn how dehn ku help wi fi pray fahn wi haat? Ahn weh wi ku du if wi soh worid er schres owt dat wi noh eevn noa how fi tel Jehoava weh wi feel? Mek wi ansa dehndeh kweschanz.

NOH FRAYD FI PRAY TU JEHOAVA

4. Weh ku help wi fi feel komfatabl di pray tu Jehoava? (Saam 119:145)

⁴ Wen wi andastan dat Jehoava da wi fren, dat hihn laayal, ahn dat ih waahn di bes fi wi, den wi wahn feel komfatabl di taak tu ahn, an wi noh wahn frayd fi tel ahn how wi feel. Di man weh rait Saam 119 mi chrai fi si Jehoava da way wen ih pray tu ahn. Hihn mi-di fays difrent prablemz eena ih laif. Peepl mi tel lai bowt ahn. (Saa. 119:​23, 69, 78) Ahn sohntaim, ih mi feel diskorij bikaaz ih mek mistayks. (Saa. 119:5) Stilyet, ih neva frayd fi poar owt ih haat tu Jehoava.—Reed Saam 119:145.

5. Wai wi noh fi mek notn hoal wi bak fahn pray tu Jehoava? Yooz di egzampl eena di paragraaf.

⁵ Jehoava invait peepl weh mek seeryos mistayks fi pray tu ahn. (Aiz. 55:​6, 7) Soh wi shuda neva hoal bak fahn pray tu Jehoava, eevn if wi feel laik wi noh gud inof. Tink bowt it laik dis: Imajin yu chravl da wahn nyoo plays ahn yu geh laas. If yu aks sohnbadi weh liv deh, dehn ku tel yu how fi reech wehpaat yu waahn goh. Soh weh yu wuda du? Yu wuda hezitayt fi aks fi help jos bikaaz yu shaym dat yu geh laas? Noh man! Af koars yu wuda aks fi help. Jos laik dat, eevn if wi noh shoar weh fi du er if wi komit wahn sin, wi ku feel free fi taak tu Jehoava bowt it.—Saa. 119:​25, 176.

TEL JEHOAVA HOW YU REELI FEEL

6-7. Weh ku help wi fi tel Jehoava how wi reeli feel wen wi pray tu ahn? Yooz di egzampl eena di paragraaf. (Koment pahn di futnoat.)

⁶ Wen wi pray ahn tel Jehoava weh wi reeli tink ahn how wi reeli feel, wi wahn jraa kloasa tu ahn. Soh weh ku help wi fi pray eena da way?

⁷ Tink bowt weh kaina Gaad Jehoava.a Di moa wi tink bowt di wandaful kwalitiz weh Jehoava shoa, di eeziya ih wahn bee fi tel ahn how wi reeli feel. (Saa. 145:​8, 9, 18) Dat da weh mi help wahn sista weh naym Kristine. Fi shee pa da-mi wahn vailent man. Sayka dat, shee mi fain it haad fi bileev dat Jehoava da wahn lovin Pa, an ih mi haad fi shee pray tu ahn. Shee mi feel laik ih noh gud inof ahn dat Jehoava mi wahn abandan ahn bikaaz a di mistayks weh ih mek. Weh mi help ahn? Shee seh: “Ah spen wahn lata taim di tink bowt Jehoava laayal lov, ahn dat mek Ah feel sayf. Now Ah noa dat hihn wahn aalwayz dehdeh fi mi. Eevn if Ah mek mistayk, hihn wahn stil lov mi ahn help mi. Dat mek Ah feel komfatabl di taak tu Jehoava bowt evriting—tingz weh mek Ah feel hapi, ahn tingz weh mek Ah feel sad.”

8-9. How wi benifit wen wi tink bowt weh wi wahn seh bifoa wi pray? Yooz di egzampl eena di paragraaf.

⁸ Tink bowt weh fi seh. Bifoa yu pray, yu ku aks yuself kweschanz laik: ‘Weh kaina prablemz Ah di deel wid rait now? Ah need fi fergiv sohnbadi? Ah di fays wahn nyoo chalenj an Ah need Jehoava help fi deel wid it?ʼ (2 Ki. 19:​15-19) Ahn memba di way how Jeezas mi teech wi fi pray. Wi ku tink bowt weh wi ku seh tu Jehoava bowt ih naym, ih Kingdom, an ih wil.—Mach. 6:​9, 10.

⁹ Wen wahn sista weh naym Aliska mi fain owt dat ih hozban mi ga brayn kyansa an ih mi wahn soon ded, shee mi fain it haad fi pray. Shee seh: “Ah mi kyaahn eevn tink schrayt. Wen Ah mi chrai pray, Ah neva eevn noa weh fi seh.” Weh mi help ahn? Shee seh: “Bifoa Ah pray, Ah tek wahn lee taim fi tink bowt weh Ah ku tel Jehoava. Da way deh, Ah noh wahn onli taak bowt mee ahn mi hozban sichuwayshan. Wen Ah du dat, Ah feel moa kaam an Ah ku pray tu Jehoava bowt ada tingz tu.”

10. Wen wi di pray, wai ih gud fi tek wi taim? (Koment pahn di picha dehn.)

¹⁰ Tek yu taim ahn pray. Wi ku jraa kloasa tu Jehoava eevn wen wi pryaa dehn shaat. Bot wen wi seh wahn langa pryaa, wi wahn praabli tel Jehoava moa bowt weh wi tink ahn how wi feel.b Aliska hozban, Elijah, seh: “Ah chrai pray lata taim fi di day, bot Ah feel eevn kloasa tu Jehoava wen Ah tek di taim fi seh wahn langa pryaa. Jehoava noh di wayt fi mek Ah hori op ahn finish pray, soh Ah ku tek mi taim.” Chrai dis: Fain wahn gud taim wen nobadi wahn intarop yu ahn wahn kwaiyet plays wehpaat notn wahn dischrak yu. Tek wahn lee taim fi seh wahn langa pryaa, maybi eevn owt lowd. Ih wuda gud fi pray da way aafn.

TINK BOWT DI PRYAAZ WEH YU REED EENA DI BAIBL

11. How wi benifit wen wi tink bowt di pryaaz weh wi reed eena di Baibl? (Koment pahn di baks weh naym “Yoo Ku Andastan How Dehn Mi Feel?”)

¹¹ Ih gud fi tek taim fi tink bowt weh faytful peepl eena Baibl taimz mi seh wen dehn pray ahn wen dehn sing prayz tu Jehoava. Yu ku benifit wahn lat fahn dat. Wen yu tink bowt how dehn tel Jehoava weh mi deh pahn dehn main er eena dehn haat, dat ku help yoo fi poar owt yu haat tu Jehoava tu. Ahn yu mait fain tingz weh dehn seh weh yoo ku inklood eena yu pryaaz. Ahn yu mait fain dat sohnbadi eena di Baibl mi pray bowt di saym tingz weh yoo feel an aks fi di saym tingz yoo wuda waahn aks fa.

12. Weh kweschanz wi ku aks wiself wen wi di reed wahn pryaa eena di Baibl?

¹² Wen yu reed wahn pryaa eena di Baibl, aks yuself: ‘Da hoo seh dis pryaa? How ih laif mi stan? Wai ih mi pray laik dis? Ai ku andastan how ih mi feel? Weh Ah ku laan fahn dis pryaa?ʼ Yu mait need fi du moa risaach fi ansa dehndeh kweschan, bot yu wahn benifit fahn dat. Mek wi luk pahn foa egzampl.

13. Weh Hana egzampl teech wi bowt pryaa? (1 Samwel 1:​10, 11) (Koment pahn di picha.)

¹³ Reed 1 Samwel 1:​10, 11. Wen Hana mi seh dis pryaa, shee mi ga too big prablem. Shee kudn ga no pikni, an ih hozban ada waif mi mek fi shee laif mizarabl. (1 Sam. 1:​4-7) If yoo di goh chroo wahn prablem weh jos kyaahn don, how Hana pryaa ku help yu? Shee mi feel beta afta ih pray fi wahn gud wail ahn poar owt ih haat tu Jehoava. (1 Sam. 1:​12, 18) Wee tu wahn feel beta wen wi “chroa [wi] woriz pahn Jehoava” ahn tel ahn how wi feel bowt aal weh wi di goh chroo.—Saa. 55:22.

14. (a) Wat els wi laan fahn Hana egzampl? (b) Wen wi reed di Baibl ahn tink bowt weh wi reed, how dat ku help wi fain moa tingz wi ku pray bowt? (Koment pahn di futnoat.)

¹⁴ Wahn fyoo yaaz afta Samwel baan, Hana kehr ahn da Hai Prees Eelai. (1 Sam. 1:​24-28) Hana mi pray tu Jehoava fahn ih haat ahn tel Ahn dat shee mi tankful bikaaz ih si how Jehoava tek kayr a Ih laayal servants.c (1 Sam. 2:​1, 8, 9) Shee mi stil ga prablemz, bot insteda foakos pahn di prablemz, shee mi tink moa bowt how Jehoava mi bles ahn. Weh wi laan fahn dat? Ih wahn bee eeziya fi deel wid di prablemz weh kom op eena wi laif if wi foakos pahn how Jehoava don di help wi aal di wail.

15. Weh wi ku laan fahn Jerimaiya pryaa? (Jeremiah 12:1)

¹⁵ Reed Jeremiah 12:1.d Jerimaiya mi diskorij bikaaz ih mi si peepl weh du bad tingz mi ga wahn eezi laif. Ih mi aalso feel diskorij bikaaz ada Izrelaits mi-di mak ahn. (Jer. 20:​7, 8) Wi ku andastan how hihn mi feel, bikaaz wee di si di saym tingz tudeh. Lata peepl mak wi, ahn peepl weh du bad tingz di praspa. Jerimaiya mi komplayn tu Jehoava bowt dehnya tingz, bot ih neva kweschan Jehoava jostis. Ahn wen Jerimaiya mi si how Jehoava karek Ih peepl, ih mi praabli chros Jehoava eevn moa dan bifoa. (Jer. 32:19) Wee ku taak tu Jehoava laik dat tu, ahn tel ahn humoch wi sofa wen peepl chreet wi bad. Ahn wi ku aalso tel ahn dat wi chros dat hihn wahn deel wid di prablemz wen di rait taim kohn.

16. Weh wi ku laan fahn wahn Leevait man sang? (Saam 42:​1-4) (Koment pahn di picha dehn.)

¹⁶ Reed Saam 42:​1-4. Di Leevait man weh mi rait dis saam mi sad bikaaz ih mi kyaahn wership Jehoava da di templ lang wid ada Izrelaits. Wi mait ku andastan how hihn mi feel if wi kyaahn lef wi hows, maybi bikaaz a wi helt, er if wi deh da prizn bikaaz wi wership Jehoava. Sohntaim wi mait feel gud, ahn den ada taimz wi feel diskorij. Bot noh mata how wi feel, ih gud fi taak tu Jehoava bowt it. Dat ku help wi fi andastan wi oan feelinz beta ahn fi memba di moa impoatant tingz. Fi egzampl, di Leevait man mi riyalaiz dat ih mi wahn ku prayz Jehoava eena ada wayz. (Saa. 42:5) Ih mi aalso tink bowt how Jehoava mi-di tek kayr a ahn. (Saa. 42:8) Wen wi poar owt wi haat tu Jehoava, dat wahn help wi fi andastan how wi feel, fi bee kaam agen, ahn fi bee schrang inof fi noh giv op.

17. (a) Weh wi ku laan fahn Joana pryaa? (Joana 2:​1, 2) (b) Wai ih gud fi memba skripchaz fahn di buk a Saamz wen wi di goh chroo haad taimz? (Koment pahn di futnoat.)

¹⁷ Reed Joana 2:​1, 2. Joana mi seh da pryaa wen ih mi eena wahn big fish beli. Eevn doa Joana mi disobay Jehoava, ih mi shoar dat Jehoava mi wahn hyaa ih pryaa. Wen Joana mi pray, ih mi seh lata tingz weh yu ku fain eena di buk a Saamz.e Hihn mosi mi noa Saamz gud. Wen hihn mi memba dehndeh skripchaz ahn tek taim fi tink bowt dehn, dat mi help ahn fi bee moa shoar dat Jehoava mi wahn help ahn. Dat ku help wee tu. If wi chrai laan sohn skripchaz bai haat, den wi mait memba dehn wen wi di pray joorin haad taimz, ahn dehn wahn gi wi komfert.

KIP DI PRAY FI JRAA KLOASA TU JEHOAVA

18-19. If sohntaim wi noh noa how fi tel Jehoava weh wi feel, how Roamanz 8:​26, 27 ku help wi? Yooz di egzampl eena di paragraaf.

¹⁸ Reed Roamanz 8:​26, 27. Sohntaim, wi mait feel soh worid er schres owt dat wi noh eevn noa how fi tel Jehoava how wi feel. Bot di hoali spirit ku help wi. Di Baibl seh dat wen wi eena wahn sichuwayshan laik dat, di hoali spirit ku bayg Gaad fi help wi. Bot weh dat reeli meen? Jehoava mi yooz ih hoali spirit fi mek di Baibl raitaz rait dong lata pryaaz eena di Baibl. Wen wi kyaahn tel Jehoava how wi feel, Jehoava mait tek sohn tingz weh dehndeh pryaaz seh laik if da wee seh dehn, an ih mait ansa dehn fi wi.

¹⁹ Dat mi help wahn sista fahn Russia weh naym Yelena. Shee mi geh arestid bikaaz ih mi-di pray ahn reed di Baibl. Yelena mi soh schres owt dat ih mi fain it haad fi pray. Shee seh: “Den Ah memba dat wen Ah di goh chroo sohnting weh da tu moch fi mek Ah handl an Ah noh eevn noa weh fi pray fa, Jehoava wahn tek pryaaz weh ih servants seh eena di paas . . . az if da mee seh dehn. . . . Dis mi gi mi komfert wen Ah mi-di goh chroo wahn reeli rof taim eena mi laif.”

20. Weh ku help wi fi pray wen wi deh anda schres?

²⁰ Wen wi deh anda schres, wi mait staat pray bot den sohnting dischrak wi ahn wi fain it haad fi foakos pahn wi pryaa. If dat eva kech yu, chrai dehnya sojeshan: Lisn tu aadyo rikaadn fahn di buk a Saamz er reed it owt lowd tu yuself bifoa yu pray. Er yu ku chrai rait dong how yu feel, laik weh King David mi du. (Saa. 18, 34, 142; hedin.) Af koars, wi noh ga no roolz pahn how fi pripyaa wiself fi pray. (Saa. 141:2) Yu ku du wateva werk bes fi yoo.

21. Wai wi ku pray wid wi hoal haat?

²¹ Ih soh komfertin fi noa dat Jehoava andastan how wi feel eevn bifoa wi seh eniting. (Saa. 139:4) Stilyet, hihn hapi fi hyaa wen wi tel ahn how wi feel ahn humoch wi chros ahn. Soh noh hezitayt fi pray tu Jehoava. Yu ku yooz pryaaz weh yu reed eena di Baibl fi help yu fain weh fi seh. Yu ku pray wid yu hoal haat. Tel Jehoava weh mek yu hapi ahn weh mek yu sad. Jehoava da yu Pa, an ih da yu Fren. Hihn wahn aalwayz dehdeh fi yu!