Memba fi Pray fi Adaz

1. How wi noa dat wi pryaaz impoatant tu Jehoava?

PRYAA da wahn wandaful gif fahn Jehoava. Tink bowt it. Jehoava asain di aynjelz difrent werk fi du. (Saa. 91:11) Hihn giv Jeezas wahn lata atariti. (Mach. 28:18) Bot Jehoava da di onli wan weh lisn tu eech wan a wi pryaaz. Hihn noh giv dat tu nobadi els. Jehoava da “di wan weh lisn tu pryaaz.”—Saa. 65:2.

2. Weh gud egzampl di apasl Paal set fi wi?

² Eevn doa wi ku pray bowt tingz weh impoatant tu wee, wi fi memba dat wi fi pray fi adaz. Fi egzampl, di apasl Paal mi ga ih oan prablemz fi pray bowt, bot stilyet hihn mi tek di taim fi pray fi adaz. (2 Kor. 11:23; 12:​7, 8) Hihn mi rait tu di Kristyan dehn da Efisos, an ih mi tel dehn: “Ah kantinyu pray fi unu.” (Ifee. 1:16) Paal mi tel Timoti: “Ah tank Gaad, . . . Ah aalwayz memba yu eena mi pryaaz day ahn nait.”—2 Tim. 1:3.

3. Wai wi mait ferget fi pray fi adaz?

³ Sohntaim wi mait ferget fi pray fi adaz. Wai? Wahn sista weh naym Sabrinaa tel wi wahn reezn wai. Shee seh: “Wi ku bee soh bizi dat wi geh dischraktid bai wi oan prablemz ahn soh wi onli pray fi wiself.” If dis hapm tu yoo, dis aatikl wahn ku help yu. Wi wahn diskos (1) wai ih impoatant fi pray fi adaz ahn (2) wi wahn geh sojeshanz bowt how wi ku du it.

WAI PRAY FI ADAZ?

4-5. How wi pryaaz ku help adaz? (Jaymz 5:16)

⁴ Wen wi pray fi adaz, “dat powaful an ih ku reeli help peepl.” (Reed Jaymz 5:16.) Wen wi pray fi sombadi els, dat ku help chaynj weh hapm tu dehn? Yes, ih kud. Jeezas mi noa dat di apasl Peeta mi wahn soon disoan ahn. Hihn mi tel Peeta: “Ai don bayg Gaad eena pryaa fi yu soh dat yu fayt noh geh week.” (Look 22:32) Paal mi aalso noa dat pryaaz ku help chaynj weh hapm tu sombadi. Wen hihn mi deh eena prizn da Roam, hihn mi rait tu Faileeman: “Ah di hoap dat bikaaz a unu pryaaz Ah wahn get bak mi freedom an Ah wahn kohn si unu.” (Fail. 22; luk op di “for I am hoping that through your prayers” noat eena di Study Bible.) Ahn dat da weh hapm. Noh tu lang afta dat, Paal mi kom owta prizn ahn kuda staat preech agen.

⁵ Af koars, dis noh meen dat wee ku foas Jehoava fi du eniting weh wi pray fa. Bot hihn si humoch wi kay bowt weh wi di pray fa, ahn sohntaimz hihn chooz fi du weh wi aks fa. Wee noa dat wi ku pray tu Jehoava bowt eniting ahn lef it op tu hihn ahn chros dat hihn wahn handl it eena di bes way.—Saa. 37:5; luk op 2 Korintyanz 1:11 ahn di noat dehn eena di Study Bible.

6. Wen wi pray fi adaz, how dat ku afek di way wi feel fi dehn? (1 Peeta 3:8)

⁶ Wen wi pray fi adaz, ih help wi fi “shoa kompashan.” (Reed 1 Peeta 3:8.) Wen wi ga kompashan, wi wahn si wen sombadi els di sofa ahn wi wahn feel bad fi dehn, ahn soh wi wahn waahn du sohnting fi help dehn. (Maak 1:​40, 41) Wahn elda weh naym Michael seh: “Wen Ah pray fi adaz ahn weh dehn need, Ah noatis moa weh dehn di deel wid, ahn dis mek Ah lov dehn eevn moa. Ai feel kloasa tu dehn, eevn if dehn noh noatis it.” Wahn elda weh naym Richard tel wi sohnting els weh ku benifit wi. Hihn seh: “Wen wi pray fi sombadi, dis wahn mek wi waahn du sohnting fi help dehn.” Den hihn seh: “Wen wi help sombadi weh wi di pray fa, eena wahn way wi di help fi ansa di pryaa weh wi mi pray fi dehn.”

7. Wen wi di pray fi adaz, how dat wahn help wi fi noh foakos pahn wi oan prablemz? (Filipiyanz 2:​3, 4) (Koment pahn di picha dehn.)

⁷ Wen wi pray fi adaz, ih wahn help wi fi noh feel laik wi prablemz moa impoatant dan adaz. (Reed Filipiyanz 2:​3, 4.) Aala wi gat wi oan prablemz bikaaz wi di liv eena wahn werl weh di Devl di kanchroal. (1 Jan 5:19; Rev. 12:12) Wen wi mek it wahn habit fi aalwayz pray fi adaz, wi wahn memba dat wi “bradaz aal rong di werl di sofa di saym kaina tingz” laik wee. (1 Peet. 5:9) Wahn painyaa sista weh naym Katherine mi seh: “Wen Ai pray fi adaz, dat rimain mi dat dehn di fays prablemz tu. Dat help mi fi noh foakos tu moch pahn mi oan prablemz.”

DEHN NEED WI FI PRAY FI DEHN

8. Hoo aal wi ku pray fa?

⁸ Hoo aal wi ku pray fa? Wi ku pray fi wahn groop a peepl. Fi egzampl, wi ku pray fi dehn wan weh ga helt prablemz, fi yong wanz weh geh buli er weh geh temtid fi du rang da skool, er fi dehn wan hoo di sofa bikaaz a oal ayj. Wahn lata wi bradaz ahn sistaz fays persikyooshan fahn dehn famili er di govament. (Mach. 10:​18, 36; Aks 12:5) Som a wi bradaz haftu lef dehn hows bikaaz a waar eena dehn ayrya. Adaz di sofa bikaaz a nachral dizaasta. Wee mait noh noa dehnya bradaz persnali, bot wen wi pray fi dehn, wi di shoa dat wi di obay Jeezas koman fi “lov wan anada.”—Jan 13:34.

9. Wai wi shuda pray fi bradaz weh di tek di leed ahn dehn waif?

⁹ Wi ku aalso pray fi dehn wan weh di tek di leed eena Jehoava aaganaizayshan. Dis inklood bradaz weh serv pahn di Govanin Badi ahn dehn helpaz, bradaz weh serv pahn Branch Komiti, bradaz weh serv az oavaseeyaz da branch aafis, serkit oavaseeyaz, eldaz, ahn ministeeryal servants. Lata dehn ga dehn oan prablemz wail dehn stil werk haad fi help wi. (2 Kor. 12:15) Fi egzampl, wahn serkit oavaseeya weh naym Mark seh: “Wan a mai bigis chalenj da dat Ai liv soh faar fahn mi payrents. Too a dehn deh op eena ayj ahn ga helt prablemz. Eevn doa mai sista an ih hozban di tek kayr a dehn, Ai stil feel bad dat Ai kyaahn dehdeh fi help owt moa.” Wee mait noh noa aal di prablemz weh dehn bradaz di goh chroo, bot wi waahn memba fi pray fi dehn. (1 Tes. 5:​12, 13) Wi ku pray fi dehn waif tu, bikaaz widowt di lovin sopoat a dehn waif, dehn mi wahn kyaahn kantinyu du dehn asainment.

10-11. Wen wi pray fi bradaz ahn sistaz bai groops, Jehoava lisn tu wi pryaaz? Pleez eksplayn yu ansa.

¹⁰ Soh wi pray fi groops a bradaz ahn sistaz. Fi egzampl, wi mait noh ga wahn spesifik persn in main, bot wi mait aks Jehoava fi help dehn wan weh deh eena prizn er fi komfert dehn wan weh di sofa bikaaz sombadi weh dehn lov ded. Wahn elda weh naym Donald seh, “Wi ga wahn lata wi bradaz ahn sistaz weh mait di goh chroo wahn haad taim, soh wi mait jos seh wan pryaa fi evribadi weh di sofa.”

¹¹ Wen wi pray laik dat, Jehoava lisn tu wi pryaa? Af koars! Wee noh noa egzakli weh eech brada er sista di goh chroo. Soh ih okay if wi pray fi bradaz ahn sistaz bai groops. (Jan 17:20; Ifee. 6:18) Wen wi pray laik dat, wi shoa dat wi “ga lov fi wi bradaz weh deh aal oava di werl.”—1 Peet. 2:17.

WEN WI PRAY FI WAHN SPESIFIK PERSN

12. Wen wi pay atenshan, how dat wahn help wi fi bee moa spesifik eena wi pryaaz?

¹² Pay atenshan. Wi pray fi bradaz ahn sistaz bai groop, bot ih gud fi mek wi pray fi sombadi bai naym tu. Yu mait ga sombadi eena yu kangrigayshan weh sik, maybi wahn yong persn eena yu kangrigayshan weh diskorij bikaaz a di presha weh ih di fays da skool, er maybi wahn singl payrent di fain it haad fi disiplin ih pikni “akaadn tu di gaidans weh kohn fahn Jehoava.” (Ifee. 6:4) Wen yu pay atenshan, yu wahn ga moa kompashan fi adaz, ahn dat wahn mek yu waahn pray fi dehn.b—Roam. 12:15.

13. How wi ku pray fi sombadi weh wi neva meet bifoa?

¹³ Pray fi adaz bai dehn naym. Wi ku du dis eevn if wi neva meet di persn. Fi egzampl, wi ku pray fi wi bradaz ahn sistaz weh liv da Crimea, Eritrea, Russia, Singapore, an ada playsiz. Yu ku fain di naym a dehn wan weh deh da prizn pahn jw.org.c Wahn serkit oavaseeya weh naym Brian seh: “Ai wuda rait dong di naym a wahn brada er sista weh deh da prizn an Ah wuda seh it owt lowd. Dat help mi fi memba di persn ahn fi pray fi ahn.”

14-15. How wi ku bee spesifik eena wi pryaaz?

¹⁴ Bee spesifik eena yu pryaaz. Michael, weh wi mi menshan erliya, mi seh: “Wen Ai reed bowt di bradaz ahn sistaz weh deh da prizn, Ai chrai tink bowt how Ai wuda feel if da mee mi deh eena da sichuwayshan. Ai noa Ai wuda di wori bowt mi waif an Ah wuda waahn mek shoar ih ga weh ih need. Soh dat mek Ah noa sohnting spesifik weh Ah ku pray bowt fi marid bradaz weh deh da prizn.”—Heeb. 13:3.

¹⁵ Wen wi chrai tink bowt weh wi bradaz ahn sistaz da prizn mosi goh chroo evri day, dat wahn help wi fi fain ada tingz fi pray bowt. Fi egzampl, wi ku pray fi mek di peepl weh ga atariti alow wi bradaz fi wership Jehoava ahn fi mek di prizn gyaad dehn bee kain. (1 Tim. 2:​1, 2) Wi ku pray dat fi dehn egzampl ku inkorij di loakal kangrigayshan er dat peepl eena di werl ku si how di brada er sista bihayv ahn dat wahn mek dehn waahn lisn tu di gud nyooz. (1 Peet. 2:12) Af koars, wee ku du di saym fi bradaz ahn sistaz weh di fays ada chraiyalz. Wen wi pay atenshan, pray fi adaz bai dehn naym, ahn bee spesifik eena wi pryaaz, wi wahn shoa dat wi “lov fi wan anada” di “groa moa ahn moa.”—1 Tes. 3:12.

VYOO PRYAA EENA DI RAIT WAY

16. Weh ku help wi vyoo pryaa eena di rait way? (Machyu 6:8)

¹⁶ Soh wen wi pray fi sombadi, wi mait help chaynj weh hapm fi dehn. Bot wi need fi vyoo pryaa eena di rait way. Wi need fi memba dat wen wi di pray, wi noh di tel Jehoava sohnting weh hihn noh noa ahn wi noh need fi tel ahn how fi handl wahn sichuwayshan. Jehoava don noa weh wi need bifoa wee eevn noa. (Reed Machyu 6:8.) Soh wai wi shuda pray fi adaz? Wi don diskos gud reezn aredi, bot wen wi pray fi adaz, wi shoa dat wi kay bowt dehn ahn dat wi lov dehn. Ahn Jehoava hapi wen wi shoa lov fi wan anada.

17-18. How Jehoava feel wen wi pray fi wan anada? Yooz di egzampl eena di paragraaf.

¹⁷ Eevn if ih luk laik wi pryaaz noh chaynj di sichuwayshan, wi stil di shoa humoch wi lov wi bradaz ahn sistaz. Ahn Jehoava si dat tu. Imajin wahn famili weh ga too lee pikni. Wan a dehn reeli sik ahn di neks wan beg dehn pa fi pleez help di wan weh sik fi geh beta. Di pa don di handl di sichuwayshan aredi. Hihn lov ih pikni ahn waahn tek kyaa a ahn. Bot hihn hapi dat ih pikni dehn kay bowt wan anada tu.

¹⁸ Da di saym way how Jehoava waahn wi kay bowt wan anada ahn pray fi wan anada. Wen wi du dis, wi di shoa dat wee noh onli di tink bowt wiself. Wi shoa humoch wi lov wi bradaz ahn sistaz, ahn Jehoava laik wen wi du dat. (2 Tes. 1:3; Heeb. 6:10) Aalso, wi mi diskos dat somtaimz wen wi pray wi ku help chaynj tingz weh hapm fi dehn. Soh mek wi aalwayz memba fi pray fi wan anada.