Ah Jos Waahn Ded—Di Baibl Ku Help Mi if Ah Di Tink Bowt Kil Miself?
Di ansa fahn di Baibl
Yes, ih kud! Di Baibl kohn fahn “Gaad, weh komfert enibadi weh feel diskorij.” (2 Korintyanz 7:6) Eevn doa di Baibl da noh wahn buk bowt mental helt, ih stil help lata peepl hoo mi-di tink bowt kil dehnself. Di Baibl ku help yoo tu!
Yu tink enibadi eena di Baibl mi feel laik dehn mi waahn ded?
Wich vers dehn eena di Baibl ku help wahn persn hoo di tink bowt kil ihself?
Weh kaina help Ai ku fain eena di Baibl?
● Tel sombadi how yu feel.
Weh di Baibl seh: “Wahn chroo chroo fren shoa lov aala di taim, ih da wahn brada weh baan fi wen taimz haad.”—Proverbs 17:17.
Weh ih meen: Wi need help ahn sopoat fahn ada peepl wen wi staat tu tink bowt negitiv tingz.
If yu noh tel adaz how yu feel, yu oan negitiv feelinz ku bee tu moch fi bayr. Bot if yu shayr yu feelinz, yu mait staat tu feel beta ahn yu mait staat tu si tingz eena wahn moa pazitiv way.
Chrai dis: Taak tu sombadi tudeh; ih ku bee wahn kloas fren er famili memba.a Wahn neks way how yu ku “taak” bowt yu feelinz da if yu rait dehn dong.
● Geh medikal help.
Weh di Baibl seh: “Peepl weh helti noh goh si wahn dakta, da onli peepl weh sik goh.”—Machyu 9:12.
Weh ih meen: Wi need fi geh medikal help wen wi sik.
If wi feel laik kil wiself, dis da wahn sain dat wi praabli ga sohn kaina mental siknis. Jos laik eni kaina fizikal siknis, dis da noh notn fi mek wi feel shaym bowt. Mental siknis da sohnting weh daktaz ku chreet.
Chrai dis: Chrai geh medikal help az soon az pasabl.
● Memba dat Gaad kay bowt yu.
Weh di Baibl seh: “Faiv sparo sel fi jos too smaal koin, noh chroo? An eevn soh, Gaad noh ferget non a dehn. . . . Soh noh wori bowt notn; unu wert moa dan lata sparo.”—Look 12:6, 7.
Weh ih meen: Yoo preshos tu Gaad.
Yu mait feel laik yu deh bai yuself, bot Gaad si evriting weh yu di goh chroo. Hihn kay bowt yu—eevn if yu feel laik yu noh waahn kantinyu liv. Psalm 51:17 seh: “Oa Gaad, yu noh wahn ton yu bak pahn sombadi weh feel dong er feel laik dehn haat brok.” Gaad waahn yu liv bikaaz hihn lov yu.
Chrai dis: Luk fi di proof eena di Baibl dat Gaad lov yu, ahn stodi it. Fi egzampl, reed chapta 1 ahn chapta 17 a di buk, How fi Stay Eena di Lov a Gaad.
● Pray tu Gaad.
Weh di Baibl seh: “Chroa aala unu woriz ahn kyaa pahn hihn, bikaaz hihn kay bowt unu.”—1 Peeta 5:7.
Weh ih meen: Gaad waahn yu tel ahn how yu reeli feel ahn weh mek yu wori er feel angshos.
Gaad ku gi yu di pees ahn di schrent fi mek yu bayr op chroo yu sichuwayshan. (Filipiyanz 4:6, 7, 13) Hihn help ahn sopoat enibadi hoo pray tu hihn wid wahn sinsyaa haat.—Psalm 55:22.
Chrai dis: Pray tu Gaad tudeh. Yooz ih naym, Jehoava, ahn tel ahn how yu feel. (Psalm 83:18) Aks ahn fi help yu bayr op ahn stay alaiv.
● Spen taim di tink bowt di fyoocha weh di Baibl pramis wi.
Weh di Baibl seh: “Dis hoap da laik wahn anka eena wi laif, ih schrang an ih kyaahn fayl.”—Heebrooz 6:19.
Weh ih meen: Yu feelinz mait goh op ahn dong, bak ahn foat, laik wahn boat owt eena wahn staam, bot di hoap weh di Baibl gi wi ku bee laik wahn anka fi yu.
Da hoap da noh jos sohnting weh wi wish fa, da wahn pramis fahn Gaad dat hihn wahn heel aala wi payn.—Revilayshan 21:4.
Chrai dis: Reed di aatikl weh naym “A Real Hope for a Better Tomorrow“ fi laan moa bowt di hoap weh di Baibl gi wi.
● Du sohnting weh yu laik.
Weh di Baibl seh: “Wahn hapi haat da laik gud medisn fi di badi.”—Proverbs 17:22.
Weh ih meen: Wen wi du tingz weh wi laik, wi feel beta. Da noh jos wi fizikal helt geh beta, wi mental helt geh beta tu.
Chrai dis: Du sohnting weh yoo injai fi du. Fi egzampl, lisn tu pazitiv myoozik, reed sohnting weh inkorij yu, er spen taim di du sohnting weh inchres yu. Yu wahn feel eevn moa hapi if yu du tingz fi help ada peepl, eevn if da jos sohnting smaal.—Aks 20:35.
● Tek kayr a yu fizikal helt.
Weh di Baibl seh: “Ih impoatant fi eksasaiz.”—1 Timoti 4:8.
Weh ih meen: Wi benifit wen wi eksasaiz, geh inof sleep, an eet helti food.
Chrai dis: Goh tek wahn waak, eevn if da jos fi 15 minits.
● Memba dat ih pasabl fi mek yu feelinz an ada tingz eena laif chaynj.
Weh di Baibl seh: “Unu noh noa weh wahn hapm eena unu laif tumaaro.”—Jaymz 4:14.
Weh ih meen: Wahn reeli bad prablem—eevn wan weh yu feel laik da tu moch fi mek yu handl—mait onli laas fi wahn lee wail.
Noh mata how daak tingz mait feel tudeh, dehn ku geh braita bai tumaaro. Soh luk fi wayz fi deel wid weh yu di goh chroo. (2 Korintyanz 4:8) How yu feel rait now ku chaynj, bot if yu kil yuself, yu wahn kyaahn chaynj dat.
Chrai dis: Reed bowt peepl eena di Baibl hoo mi feel diskorij ahn waahn ded, ahn si how dehn laif mi chaynj fi di beta eena di langa ron. Sohntaim ih mi hapm eena wayz weh dehn neva ekspek. Mek wi luk pahn sohn egzampl.
Yu tink enibadi eena di Baibl mi feel laik dehn mi waahn ded?
Yes. Di Baibl tel wi bowt peepl weh mi baysikali seh, “Ah waahn ded.” Gaad neva skoal dehn, insted, ih mi help dehn. Ahn hihn ku du di saym fi yoo.
Ilaija
● Hoo da Ilaija? Ilaija da-mi wahn brayv prafit. Bot sohntaim hihn mi feel diskorij tu. Jaymz 5:17 seh: “Ilaija da-mi wahn man wid feelinz jos laik wee.”
● Wai hihn mi waahn ded? At wan point eena ih laif, Ilaija mi feel frayd, laik ih mi deh bai ihself, ahn dat ih neva wert notn. Soh ih bayg Gaad: “Jehoava, pleez kil mi.”—1 Kings 19:4.
● Weh mi help ahn? Ilaija mi poar owt ih feelinz tu Gaad. How Gaad mi help ahn? Hihn mi shoa Ilaija dat ih kay bowt ahn, an ih shoa ahn how powaful ih powaful. Pahn tap a dat, ih mi tel Ilaija dat ih noh need fi wori, an ih giv Ilaija wahn fren fi help ahn owt.
▸ Reed bowt Ilaija: 1 Kings 19:2-18.
Joab
● Hoo da Joab? Joab da-mi wahn rich man hoo mi faytful tu Gaad ahn wership ahn di rait way.
● Wai hihn mi waahn ded? Sodn-wan, evriting eena Joab laif gaahn rang. Ih mi looz aala ih richiz. Aala ih chiljren dehn mi ded eena wahn dizaasta. Den hihn geh sik wid wahn paynful dizeez. Pahn tap a dat, ih oan fren dehn akyooz ahn an seh dat Gaad mi-di ponish ahn fi ih wikidnis. Joab seh: “Ah hayt mi laif; Ah noh eevn waahn kantinyu liv.”—Job 7:16.
● Weh mi help ahn? Joab mi pray tu Gaad ahn taak tu adaz. (Job 10:1-3) Ilaihyu, wan a ih fren, mi shoa ahn kompashan, lisn tu ahn, an help ahn geh di rait vyoo a ih sichuwayshan. An moas af aal, Joab mi lisn tu Gaad an aksep ih help.
▸ Reed bowt Joab: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Moaziz
● Hoo da Moaziz? Moaziz da-mi di leeda a Izrel ahn wahn faytful prafit.
● Wai hihn mi waahn ded? Moaziz mi ga lat fi du, ahn di peepl weh ih mi-di leed yoostu taak bad bowt ahn. Sohntaim ih mi jos feel tu taiyad fi kantinyu. Soh ih krai owt tu Gaad: “Pleez kil mi rait now.”—Numbers 11:11, 15.
● Weh mi help ahn? Moaziz mi tel Gaad how ih feel, soh Gaad mi help Moaziz. Ih mi giv ahn sohn sojeshan fi mek ih werk lee eeziya, an ih mi help ahn fi mek ih ga les schres.
▸ Reed bowt Moaziz: Numbers 11:4-6, 10-17.
a If di feelin fi kil yuself reeli schrang ahn non a yu fren er famili memba deh rong, kaal wahn loakal nomba weh da fi help peepl weh waahn kil dehnself, er kaal wahn imerjensi nomba.