Stay Pahn “di Way a Hoalinis”

1-2. Weh impoatant disizhan di Jooz weh mi liv da Babilan mi haftu mek? (Ezra 1:2-4)

DI KING mi mek wahn anonksment dat di Jooz weh da-mi priznaz fi bowt 70 yaaz da Babilan kuda mi goh bak hoam da Izrel. (Reed Ezra 1:2-4.) Da onli Jehoava kuda mi free ih peepl fahn Babilan. Wai wi seh dat? Wel, bikaaz di king a Babilan neva yoostu rilees ih priznaz. (Isa. 14:4, 17) Bot wahn nyoo roola mi kanka Babilan, ahn hihn da-mi di wan weh mi tel di Jooz dat dehn kuda mi lef Babilan ahn goh bak hoam da Izrel. Now, eech Joo, espeshali di hed a wahn famili, mi haftu mek wahn disizhan: eeda dehn stay da Babilan er dehn goh bak hoam da Izrel. Da disizhan da neva mi wahn eezi wan. Wai wi seh dat?

² Wahn lata dehn mi oal, soh ih mi wahn haad fi mek dehn mek da lang chrip bak hoam da Izrel. Pahn tap a dat, moas a di Jooz mi baan da Babilan, ahn dehn mi seeʼt az dehn hoam. Fi dehn, Izrel da-mi jos wahn plays wehpaat dehn ansestaz kohn fram. Som a di Jooz mi ga wahn gud laif da Babilan, soh dehn mi wahn fain it haad fi lef dehn nais hows er dehn gud bizniz fi goh liv da wahn plays weh dehn noh noa.

3. Weh blesin Jehoava mi wahn giv di faytful Jooz weh mi gwehn bak da Izrel?

³ Fi di faytful Jooz, di sakrifais weh dehn mi wahn mek fi goh bak hoam mi wahn bee notn kompyaa tu di blesinz weh dehn mi wahn injai. Di graytis blesin mi wahn bee dat dehn kuda wership Jehoava eena di way how hihn waahn. Da Babilan, dehn mi ga moa dan 50 templ weh da-mi fi faals gaadz, bot non weh da-mi fi Jehoava. Di Jooz kudn wership Jehoava laik weh di Laa a Moaziz mi seh, bikaaz dehn neva ga no alta weh dehn kuda mi aafa op dehn sakrifais ahn dehn neva ga nobadi weh kuda mi aafa op dehndeh sakrifais fi dehn. Pahn tap a dat, dehn mi ga lat moa peepl da Babilan weh mi wership faals gaadz dan dehn wan weh mi rispek Jehoava ahn fi hihn standadz. Soh towznz a Jooz weh mi lov Jehoava mi kyaahn wayt fi goh bak hoam, weh dehn kuda mi wership Jehoava di way how hihn waahn.

4. How Jehoava mi pramis fi help di Jooz weh mi gwehn bak da Izrel?

⁴ Di jerni fahn Babilan tu Izrel mi wahn tek bowt foa monts, an ih neva mi wahn bee wahn eezi wan. Jehoava mi pramis dat hihn mi wahn klayr op di way fi di Jooz soh dat notn kuda stap dehn fahn goh bak hoam. Aizaiya mi rait: “Pripyaa di way a Jehoava! Schraytn owt di road weh deh fronta ahn chroo di dezert fi wi Gaad. . . . Schraytn owt di road dehn weh kerv, ahn smood owt di road dehn weh rof.” (Isa. 40:3, 4) Jos imajin wahn haiway weh smood ahn flat weh di goh chroo di dezert. Da wahn blesin fi di peepl weh chravl pahn it! Ih wahn moch eeziya ahn faasa fi mek dehn chravl pahn wahn haiway weh schrayt ahn flat, bikaaz dehn noh haftu klaim op ahn dong eni hil, mongtin, er vali.

5. Wat da-mi di naym a di simbolik haiway bitween Babilan ahn Izrel?

⁵ Tudeh, wi ga wahn lata haiway weh wi noa bai dehn naym er dehn nomba. Di simbolik haiway weh Aizaiya mi rait bowt aalso ga wahn naym. Ih seh: “Wahn haiway wahn dehdeh, yes, ih wahn naym di Way a Hoalinis. Nobadi kyaahn chravl pan it if dehn laif noh kleen.” (Isa. 35:8) Weh dis pramis mi meen fi di Izrelaits bak den? Ahn weh ih meen fi wee tudeh?

“DI WAY A HOALINIS” —WEH IH MI MEEN EENA DI PAAS AHN WEH IH MEEN FI WEE TUDEH?

6. Wai dehn seh dat dis haiway hoali?

⁶ “Di Way a Hoalinis” da wahn byootiful naym fi wahn haiway! Wai dehn seh dat di road hoali? Da bikaaz no Joo weh wership aidol, weh praktis imoraliti, er eni ada seeryos sin kuda mi goh bak da Izrel. Di Jooz weh mi-di goh bak da Izrel mi wahn bee “wahn hoali peepl” fi dehn Gaad. (Deut. 7:6) Bot dehn wan weh lef Babilan mi wahn stil haftu mek chaynjiz eena dehn laif fi pleez Jehoava.

7. Weh chaynjiz som a di Jooz dehn mi haftu mek? Yooz di egzampl eena di paragraaf.

⁷ Laik weh wi mi seh erliya, moas a di Jooz dehn mi baan da Babilan, ahn lata dehn mi don geh yoostu di way di Babiloanyan dehn tink ahn bihayv. Sohn yaaz afta di fers Jooz dehn mi gaahn bak da Izrel, Ezra mi geh fi fain owt dat som a dehn mi marid laydi fahn di ada nayshanz. (Ex. 34:15, 16; Ezra 9:1, 2) Ahn laytaraan, Govna Nehimaiya mi shak fi fain owt dat di pikni dehn weh mi baan da Izrel kudn eevn taak di Jooish langwij. (Deut. 6:6, 7; Neh. 13:23, 24) How dehndeh lee pikni kuda laan fi lov ahn wership Jehoava if dehn kudn eevn andastan Heebroo, weh da-mi di mayn langwij weh di Baibl mi rait eena? (Ezra 10:3, 44) Dehndeh Jooz mi haftu mek sohn big chaynjiz. Bot ih mi wahn bee moch eeziya fi mek dehn mek dehndeh chaynjiz da Izrel, wehpaat Jehoava mi-di bring bak chroo wership lee bit bai lee bit.—Neh. 8:8, 9.

8. Weh di stoari bowt di Jooz ga fi du wid wee tudeh? (Koment pahn di picha pahn di kova.)

⁸ Som a wi mait tink ‘di stoari bowt di Jooz veri inchrestin, bot weh dat ga fi du wid wee tudeh?ʼ Eena wahn way, jos laik dehn, wee di chravl pahn da simbolik road, “di Way a Hoalinis.” Weda wi hoap da fi liv da hevn er fi liv pahn ert, aala wi need fi stay pahn “di Way a Hoalinis.” Ih wahn help wi fi wership Jehoava now an eena di fyoocha wen wi ku injai aala di Kingdom blesinz.b (Jan 10:16) Sins 1919 C.E., milyanz a peepl don lef Babilan di Grayt, weh stan fi aala faals rilijan, ahn dehn staat chravl pahn dis simbolik road. Yoo da praabli wan a dehn. Peepl mi staat chravl pahn dis road bowt 100 yaaz agoa, bot lang bifoa dat adaz mi-di werk haad fi get dis road redi.

HOW DEHN MI PRIPYAA DI ROAD?

9. Akaadn tu Isaiah 57:14, weh Jehoava mi du fi klayr op “di Way a Hoalinis”?

⁹ Jehoava mi mek shoar dat notn stap di Jooz fahn goh bak da Izrel. (Reed Isaiah 57:14.)c Soh how bowt wee tudeh? Weh aal Jehoava du fi klayr op “di Way a Hoalinis”? Bifoa 1919, fi honjridz a yaaz, Jehoava mi yooz sohn man weh mi faytful tu ahn fi help klayr op di way soh dat adaz kuda mi get owt a Babilan di Grayt. (Kompyaa Isaiah 40:3.) Dehn man mi ga lata impoatant werk fi du fi pripyaa di road soh dat peepl weh lov Jehoava kuda mi lef faals rilijan ahn staat wership Jehoava eena di way hihn waahn lang wid fi hihn peepl. Weh aal dehn mi need fi du fi klayr op “di way”? Noatis som a di tingz weh dehn mi du.

10-11. How di printin ahn di chranslayshan werk mi help peepl fi geh fi noa weh di Baibl teech? (Koment pahn di picha.)

¹⁰ Di printin werk. Rong di yaa 1450, dehn mi yoostu kapi di Baibl bai han. Dis werk mi tek wahn lang taim. Ih mi haad fi geh wahn kapi a di Baibl, an ih mi reeli ekspensiv. Bot, wen dehn staat tu mek printin masheen, ih mi eeziya fi mek moa kapiz a di Baibl ahn fi giv it owt tu peepl.

¹¹ Di chranslayshan werk. Fi honjridz a yaaz, moas Baibl mi onli avaylabl eena Latin, an onli di wel-ejukaytid peepl kuda mi andastan da langwij. Az ih mi geh moa kaman fi print bai masheen, di man dehn weh mi faytful tu Gaad mi werk eevn haada fi chranslayt di Baibl eena ada langwij weh peepl mi taak. Now, dehn wan weh mi reed di Baibl kuda mi si di difrens bitween weh di Baibl reeli teech, ahn weh dehn cherch mi-di teech.

12-13. Giv wahn egzampl a how som weh mi tek dehn stodi a di Baibl seeryos mi staat tu ekspoaz sohn faals teechinz fahn di cherch dehn.

¹² Baibl stodi toolz. Peepl weh mi tek dehn stodi a di Baibl seeryos mi laan wahn lat, bot dehn neva kip weh dehn laan tu dehnself. Dehn mi shayr it wid adaz. Sayka dis, di cherch dehn mi geh beks. Fi egzampl, fahn rong di yaa 1835, sohn man weh mi faytful tu Gaad mi giv owt sohn chrak weh mi staat tu ekspoaz di faals teechinz a di cherch dehn.

¹³ Rong di yaa 1835, Henry Grew, wahn man weh mi faytful tu Gaad, mi rait wahn chrak ahn yooz di skripchaz fi proov dat weh di cherch dehn mi teech bowt di kandishan a di ded mi difrent fahn weh di Baibl mi teech. Hihn mi yooz di Baibl fi shoa dat wahn persn kyaahn kip aan di liv ahn neva ded, anles Gaad giv ahn da gif. Soh non a wi mi baan wid da gif laik weh di cherch dehn mi-di teech. Too yaaz layta, eena 1837, wahn preecha weh naym George Storrs mi fain wahn kapi a da chrak wen hihn mi-di chravl pahn wahn chrayn. Ih reed di chrak an ih mi kanvins dat hihn mi fain wahn impoatant Baibl chroot. Hihn mi shayr di tingz weh ih mi laan, an eena 1842 ih mi giv sohn taak wid di teem, “Di Wikid—Dehn Kip Aan Di Liv Eevn Afta Dehn Ded?” Di tingz weh George Storrs mi rait mi reeli toch wahn yong man weh naym Charles Taze Russell.

14. How Brada Russell an ih frenz mi benifit fahn di werk weh adaz mi du eena di paas fi klayr op di way? (Koment pahn di picha.)

¹⁴ Eena di paas, Jehoava mi yooz sohn faytful man fi klayr op di way fi mek adaz geh fi noa Baibl chroots. How Brada Russell an ih frenz mi benifit fahn di werk weh dehndeh faytful man mi du eena di paas? Sayka di werk weh dehndeh faytful man mi du, Brada Russell an ih frenz kuda mi yooz difrent Baibl dikshineri, Baibl chranslayshan, ahn Baibl refrens fi help dehn stodi di Baibl. Dehn mi aalso benifit wahn lat fahn di risaach weh Henry Grew, George Storrs, an adaz mi du. Brada Russell an ih frenz mi tek paat eena di werk fi klayr op di way fi mek adaz noa Baibl chroot tu. Dehn staat tu projoos wahn lata buk ahn chrak weh mi taak bowt difrent Baibl tapik.

15. Weh da sohn impoatant tingz weh mi hapm eena 1919?

¹⁵ Eena 1919, Jehoava mi set ih peepl free fahn Babilan di Grayt. Da saym yaa Jeezas mi apoint di “faytful ahn waiz slayv.” Dis mi hapm jos in taim fi mek dehn welkom sinsyaa peepl weh mi-di staat dehn jerni pahn “di Way a Hoalinis.” (Mach. 24:45-47) Tanks tu di faytful wanz weh mi werk pahn dis road eena di paas, dehn wan weh mi jos di staat dis jerni kuda get fi laan moa bowt Jehoava ahn fi hihn perpos. (Prov. 4:18) Dehn kuda mi aalso staat tu liv dehn laif akaadn tu Jehoava standadz. Jehoava neva ekspek ih peepl fi mek aala dehndeh chaynjiz wan lik. Insteda dat, Jehoava help ih peepl fi mek chaynjiz lee bit bai lee bit. (Si di baks “Jehoava Help Ih Peepl fi Mek Chaynjiz Lee Bit Bai Lee Bit.”) Jos imajin how hapi aala wi wahn bee wen wi wahn ku pleez Gaad eena evriting weh wi du!—Kol. 1:10.

PEEPL KU STIL CHRAVL PAHN “DI WAY A HOALINIS”

16. Sins 1919, how dehn mi kip “di Way a Hoalinis” eena gud kandishan? (Isaiah 48:17; 60:17)

¹⁶ Fi mek wahn road stay eena gud kandishan, dehn need fi kip di werk pan it. Sins 1919, dehn kip di werk pahn “di Way a Hoalinis” soh dat dehn ku help moa peepl fi lef Babilan di Grayt. Da sayhn yaa, di faytful ahn waiz slayv neva ways no taim bot gaahn schrayt tu werk. Eena 1921, dehn mi aybl fi poblish wahn buk fi help nyoo wanz fi laan Baibl chroot. Da buk mi naym The Harp of God, ahn dehn mi print aalmoas siks milyan kapiz a it eena 36 difrent langwij. Wahn lata peepl mi laan di chroot sayka da buk. Tudeh, wi ga wahn nyoo buk weh help wi kandok Baibl stodiz, weh naym Injai Laif Fareva! Aal chroo di laas dayz, Jehoava di yooz ih aaganaizayshan fi mek shoar wi aalwayz ga spirichwal food fi help wi stay pahn “di Way a Hoalinis.”—Reed Isaiah 48:17; 60:17.d

17-18. Wehpaat “di Way a Hoalinis” wahn kehr wi?

¹⁷ Wi mait seh dat weneva wahn persn aksep wahn Baibl stodi, ih geh di apachooniti fi waak pahn “di Way a Hoalinis.” Som chravl pahn da road jos fi wahn lee wail ahn den dehn lef di road. Adaz mek op dehn main fi stay pan it til dehn reech wehpaat dehn di goh. Soh, da wehpaat dehn di goh?

¹⁸ Fi dehn wan weh ga di hoap fi liv da hevn, “di Way a Hoalinis” wahn leed tu “di paradais a Gaad” weh deh eena hevn. (Rev. 2:7) Fi dehn wan weh ga di hoap fi liv pahn di ert, da haiway wahn leed tu di en a di Towzn-Yaa Rool wen evribadi wahn bee perfek. If yoo di chravl pahn da haiway, noh luk bak. Ahn stay pan da road til yu reech di nyoo werl! Wi waahn wish aala unu wahn sayf chrip!