“Kip Aan Di Fala” Jeezas Afta Yu Geh Baptaiz

1-2. How yu laif geh beta afta yu geh baptaiz?

WEE soh hapi fi geh baptaiz ahn bee paat a Jehoava famili. Enibadi weh don geh baptaiz agree wid weh Dayvid mi tel Jehoava: “Di persn weh yu pik an invait fi kohn kloas tu yoo fi liv eena yu koatyaad wahn bee hapi.”—Ps. 65:4.

² Hoo Jehoava invait fi goh eena ih koatyaad er fi bee paat a ih famili? Laik weh wi mi laan eena di laas aatikl, yu haftu shoa dat yu waahn ga wahn kloas rilayshanship wid Jehoava, ahn den hihn wahn jraa kloas tu yoo. (Jay. 4:8) Afta yu disaid fi dedikayt yu laif tu Jehoava ahn geh baptaiz, yu ga wahn speshal rilayshanship wid Jehoava. Soh now yu ku bee shoar dat Jehoava wahn “poar owt pahn yu wahn blesin tu nohmoh nohmoh.”—Mal. 3:10; Jer. 17:​7, 8.

3. Weh seeryos rispansabiliti eech Kristyan gat afta dehn dedikayt dehn laif tu Jehoava ahn geh baptaiz? (Ecclesiastes 5:​4, 5)

³ Wen yu geh baptaiz, dat da jos di biginin a yu servis tu Jehoava. Afta yu geh baptaiz, yu need fi du yu bes fi liv op tu da pramis noh mata wat, espeshali wen yu goh chroo wahn tof sichuwayshan er wen yu fays temtayshan. (Reed Ecclesiastes 5:​4, 5.)a Now dat yu da wan a Jeezas falowaz, yu waahn du yu bes fi fala fi hihn egzampl an obay ih komanment dehn. (Mach. 28:​19, 20; 1 Peet. 2:21) Dis aatikl wahn help yu du dat.

“KIP AAN DI FALA” JEEZAS WEN YU FAYS WAHN HAAD SICHUWAYSHAN

4. Weh Jeezas mi meen wen ih seh dat ih falowaz haftu pik op ahn kehr wahn “taacha stayk”? (Look 9:23)

⁴ Afta wahn persn geh baptaiz, dat noh meenz dat ih noh wahn ga nohmoh prablemz. Jeezas mi akchwali seh dat ih disaipl dehn mi wahn haftu pik op dehn “taacha stayk,” ahn dehn mi wahn haftu kehr it aal di taim. (Reed Look 9:23.) Soh yu tink dat meenz dat if wee da wan a Jeezas disaipl wi wahn aalwayz di sofa? Non ataal! Jeezas jos mi-di seh dat lang wid di lata blesinz weh wi wahn injai, wi wahn aalso goh chroo prablemz eena laif. Ahn som a dehndeh prablemz mait mek wi sofa.—2 Tim. 3:12.

5. Weh kaina blesinz Jeezas mi pramis ih falowaz fi di sakrifais weh dehn mek fi put Gaad Kingdom fers?

⁵ Yoo ku chros dat Jehoava si aal weh yu du fi stay laayal tu ahn. (Heeb. 6:10) Ih ku bee dat yu mi fays persikyooshan fahn famili membaz, er yu praabli mi haftu giv op mateeryal tingz fi put Gaad Kingdom fers eena yu laif. (Mach. 6:33) Ahn bikaaz a aala dehndeh sakrifais weh yoo mek, yu praabli don ekspeeryens di blesinz weh Jeezas mi pramis ih disaiplz. Dis da weh ih mi tel dehn: “Enibadi weh lef dehn hows er breda er sista er ma er pa er chiljren er lan bikaaz dehn da mai falowaz ahn fi di sayk a di gud nyooz wahn geh 100 taimz moa now. Dehn wahn geh moa hows, breda, sista, ma, chiljren, ahn lan. Bot saym taim, dehn wahn fays persikyooshan tu. An eena di fyoocha, dehn wahn get evalastin laif.” (Maak 10:​29, 30) Soh wateva blesin yu get faar beta dan eni sakrifais yu eva mek.—Ps. 37:4.

6. Wai yu need fi kantinyu fait rang dizaiyaz afta yu geh baptaiz?

⁶ Afta yu geh baptaiz, yu wahn stil need fi fait gens rang dizaiyaz weh yu “sinful badi waahn.” (1 Jan 2:16) Ahn dat naamal, bikaaz yu stil noh perfek. Yu mait feel laik how di apasl Paal mi feel wen ih seh: “Eena mi haat Ah hapi wid di Laa weh kohn fahn Gaad. Bot Ah si wahn nada laa eena mi badi weh di fait gens di laa a mi main. Sayka dat, Ai da wahn prizna tu di laa a sin weh deh eena mi badi.” (Roam. 7:​22, 23) Yu mait feel diskorij bikaaz yu haftu fait gens rang dizaiyaz. Bot if yu tink bowt di pramis weh yu mek tu Jehoava wen yu dedikayt yu laif tu ahn, ih wahn help yu fi stay faytful noh mata weh kaina temtayshan kom op. How yu dedikayshan ku help yu wen yu fays temtayshan?

7. How yu dedikayshan tu Jehoava ku help yu stay faytful tu ahn?

⁷ Wen yu dedikayt yu laif tu Jehoava, yu disoan yuself. Dis meenz dat yu wahn seh no tu eni rang dizaiya er goal weh noh pleez Jehoava. (Mach. 16:24) Soh wen yu fays sertn tes, yu noh wahn haftu di wanda weh yu wahn du. Yu mayn goal now da fi pleez Jehoava, ahn yu don mek op yu main fi stay laayal tu ahn noh mata wat. Yu wahn bee laik Joab, hoo mi seh: “Ah wahn stay faytful tu Gaad til Ah ded!” (Joab 27:5) Dis da-mi fi hihn goal ahn notn mi wahn chaynj fi hihn main, eevn doa ih mi-di goh chroo som a di haadis chraiyalz eena ih laif.

8. How yu pramis weh yu mek tu Jehoava wahn help yu fi noh giv een wen yu fays temtayshan?

⁸ Wen yu tink bowt how yu mi pramis fi stay faytful tu Jehoava, yu wahn geh di schrent fi noh giv een tu eni temtayshan. Fi egzampl, yoo wuda flert wid sohnbadi weh marid? Aaf koars nat! Wen yu mi dedikayt yu laif tu Jehoava, yu mi pramis Jehoava dat yu wuda neva du sohnting laik dat. If yu noh alow rang dizaiyaz fi groa eena yu haat, den yu noh wahn haftu fait fi geh rid a dehn laytaraan. Yu wahn “stay faar” fahn “di road weh wahn wikid persn waak pan.”—Prov. 4:​14, 15.

9. How yu dedikayshan tu Jehoava wahn help yu fi put spirichwal tingz fers eena yu laif?

⁹ Tink bowt dis ada sichuwayshan. Wat if sohnbadi aafa yu wahn jab weh wahn mek yu kyaahn goh da aala di meetin dehn? Bifoa dehn eevn aafa yu da jab, yu don seh no bikaaz a yu dedikayshan tu Jehoava. Yu noh wahn geh temtid fi aksep di jab ahn stil chrai fain wahn way fi put Jehoava fers, bikaaz yu noa ih noh wahn werk. Jeezas mi mek op ih main fi aalwayz stay faytful tu Jehoava. Soh if yu kapi fi hihn egzampl, yu wahn seh no rait away tu eniting weh noh pleez Jehoava.—Mach. 4:10; Jan 8:29.

10. How Jehoava wahn help yu fi “kip aan di fala” Jeezas afta yu geh baptaiz?

¹⁰ Temtayshan ahn chraiyalz gi yu wahn chaans fi shoa dat yu reeli waahn “kip aan di fala” Jeezas. Ahn yu ku chros dat Jehoava wahn help yu, bikaaz di Baibl seh: “Eni temtayshan weh unu goh chroo da di saym laik weh evribadi els goh chroo. Bot Gaad faytful, ahn hihn noh wahn mek di temtayshan geh soh bad dat unu kyaahn bayr it. Bot wen di temtayshan kohn, hihn wahn mek wahn way owt soh dat unu ku bayr it.”—1 Kor. 10:13.

HOW WI KU KIP AAN DI FALA JEEZAS?

11. Wat da wan a di bes way how yu ku kantinyu fala Jeezas? (Koment pahn di picha.)

¹¹ Jeezas mi aalwayz eega fi preech, an ih mi pray wahn lat soh dat ih ku stay kloas tu Jehoava. (Look 6:12) Wan a di bes wayz how yu ku kantinyu fala Jeezas da if yu ga wahn gud spirichwal skejul weh wahn help yu geh kloasa tu Jehoava. Di Baibl seh: “Eena eni kays, wateva proagres wi don mek, mek wi kantinyu eena di saym way a laif.” (Fil. 3:16) Jehoava servants eega fi du moa far ahn. Fi egzampl, evri now an agen yu hyaa bowt bradaz ahn sistaz weh du moa fi serv Jehoava. Maybi dehn gaahn da di Skool fi Kingdom Ivanjelaizaz er gaahn serv da wahn nada konchri weh need help. If yoo ku du sohnting laik dat, den goh deh schrang. (Aks 16:9) Bot if yu kyaahn du eniting laik dat rait now, den noh feel laik yu noh impoatant tu Jehoava. Di impoatant ting fi du da stay faytful tu di en. (Mach. 10:22) Noh ferget dat Jehoava apreeshiayt wen yu du di bes weh yoo kud; hihn noh ekspek moa dan weh wi ku giv. Az lang az yu du yu bes, yu wahn kantinyu fala Jeezas.—Ps. 26:1.

12-13. Weh yu ku du if yu noh az hapi az yu yoostu bee di du spirichwal tingz? (1 Korintyanz 9:​16, 17) (Koment pahn di baks weh naym “Stay Eena di Rays fi Laif.”)

¹² Wat if yu feel laik yu di seh di saym ting oava ahn oava wen yu pray er dat yu noh di injai yu minischri ahn yu Baibl reedin laik yu yoostu? If yu staat feel laik dis afta yu geh baptaiz, pleez noh tink dat yu noh ga Jehoava hoali spirit. Bikaaz wi noh perfek, wi feelinz chaynj aal di taim. If yu feel laik yu noh az hapi az yu yoostu bee di serv Jehoava, den wahn gud aidyaa da fi stodi di apasl Paal egzampl. Eevn doa hihn mi chrai ih bes fi fala Jeezas egzampl, sohntaim hihn neva feel fi du weh ih mi sopoas tu du. (Reed 1 Korintyanz 9:​16, 17.) Hihn mi seh: “Eevn if Ah noh waahn du it, Gaad stil chros mi fi du dis werk.” Soh Paal mi mek op ih main fi du di asainment weh Jeezas mi giv ahn, eevn wen ih neva waahn du it.

¹³ Noh alow di way yu feel fi kanchroal weh yu du. Mek op yu main fi aalwayz du weh rait eevn if yu noh waahn du it. Az taim paas, yu feelinz wahn chaynj an ih wahn bee eeziya fi du weh rait. Memba dat wahn gud spirichwal skejul wahn reeli help yu fi kantinyu fala Jeezas. Ahn yu egzampl wahn help yu bradaz ahn sistaz fi du di saym ting.—1 Tes. 5:11.

“KIP DI CHEK UNUSELF . . . KIP DI PROOV TU UNUSELF”

14. Weh yu shuda du evri now an agen, ahn wai? (2 Korintyanz 13:5)

¹⁴ Sohnting els weh yu ku du afta yu geh baptaiz da fi chek yuself gud evri now an agen. (Reed 2 Korintyanz 13:5.) Tek wahn gud luk pahn yuself fi mek shoar dat yu pray evri day, reed yu Baibl, kip op wid yu persnal stodi, goh da meetin, ahn goh preech. Aalwayz luk fi wayz how yu ku injai dehndeh tingz ahn benifit fahn dehn eevn moa. Aks yuself kweschanz laik dehnya: ‘Ai noa how fi eksplayn baysik Baibl teechinz gud? Weh Ai ku du fi injai di minischri moa? Mai pryaaz spesifik ahn shoa dat Ai pen pahn Jehoava? Ai goh da meetin regyula? Weh Ai ku du soh dat Ah ku koment ahn pay moa atenshan da meetin?ʼ

15-16. Weh yu laan fahn Robert ekspeeryens?

¹⁵ Wen wi chek wiself, ih impoatant fi bee aanis bowt wi weeknis dehn. Mek wi si how Brada Robert egzampl ku help wi si wai dis impoatant. Hihn seh: “Wen Ai mi 20 yaaz oal, Ah mi-di werk paat taim. Wan day afta werk, mi koa-werka invait mi fi goh da ih hows. Shee seh dat ih mi wahn bee jos mee ahn shee ahn dat wi mi wahn ‘injai wiself.ʼ At fers, Ah mi kom op wid sohn laym ekskyoos, bot aftawodz Ah mi schrayt op wid ahn, an tel ahn no. Ah mi aalso eksplayn wai Ah seh no.” Gud ting Robert neva giv een tu di temtayshan, noh chroo? Bot laytaraan wen hihn mi luk bak, ih riyalaiz dat ih kuda mi du beta dan dat. Hihn seh: “Ah neva seh no rait away laik Joazef. Wen Potifa waif mi aks Joazef fi sleep wid ahn, hihn neva tink twais bifoa ih ansa. (Jen. 39:​7-9) In fak, Ah mi sopraiz fi si how haad ih mi haad fi rijek fi shee aafa. Dis mi help mi fi si dat Ah mi reeli need fi schrentn mai rilayshanship wid Jehoava.”

¹⁶ Eevn wen yu handl wahn sichuwayshan gud ahn noh giv een tu temtayshan, ih gud fi chek yuself laik Robert an aks yuself: ‘How lang ih mi tek fi mek Ai seh no?ʼ If yu fain owt dat yu ga sohnting fi werk pan, noh beet op yuself bowt it. Insted, bee glad dat yu fain owt wat da yu weeknis, taak tu Jehoava bowt it, ahn du tingz weh wahn help yu mek op yu main fi kantinyu obay Jehoava standadz.—Ps. 139:​23, 24.

17. How fi wee disizhanz ku afek Jehoava naym?

¹⁷ Robert tel wi moa bowt weh mi hapm tu ahn. Hihn seh: “Afta Ah rijek mi koa-werka aafa, shee mi tel mi dat Ah paas di tes. Ah aks ahn weh ih meen. Shee tel mi dat ih ga wahn fren weh yoostu bee wahn Witnis. Da fren tel ahn dat evri yong Witnis liv wahn dobl laif, ahn dehn noh tink twais fi du sohnting bad az lang az nobadi noa bowt it. Soh ih tel ih fren dat ih mi wahn tes mi owt. Wen shee tel mi wat da-mi fi shee plan, Ah mi soh hapi dat Ah neva bring shaym pahn Jehoava naym.”

18. Weh yoo mek op yu main fi du afta yu geh baptaiz? (Koment pahn di baks weh naym “Yu Wahn Injai Dehnya Aatikl.”)

¹⁸ Wen yu dedikayt yu laif tu Jehoava, yu shoa dat yu reeli waahn bring prayz tu fi hihn hoali naym. Jehoava noatis evri chraiyal weh yu fays an evri temtayshan weh yu rijek. Yu ku bee shoar dat hihn wahn bles yu fi di sakrifais weh yu mek fi stay faytful tu hihn. Ahn yu ku bee kanfident dat hihn wahn gi yu schrent chroo ih hoali spirit fi kantinyu du weh rait. (Look 11:​11-13) Jehoava wahn help yu fi kantinyu fala Jeezas egzampl afta yu geh baptaiz.