LESN 59
Yoo Ku Bayr Op Wen Peepl Persikyoot Yu
Soona er layta, peepl wahn chrai stap aala wi fahn serv Jehoava. Dehn wahn eevn persikyoot wi er hert wi wen wi noh giv een. Yoo tink dat fi fraitn wi?
1. How wi noa dat peepl wahn persikyoot wi?
Di Baibl tel wi playn-wan dat: “Evribadi weh waahn wership Gaad wid aala dehn haat az wahn disaipl a Krais Jeezas wahn fays persikyooshan.” (2 Timoti 3:12) Dehn mi persikyoot Jeezas bikaaz hihn da neva paat a Saytan werl. Ahn sins wee da noh paat a dis werl needa, den ih noh sopraiz wi wen di govament dehn ahn faals rilijan persikyoot wi.—Jan 15:18, 19.
2. How wi ku pripyaa wiself fi wen peepl persikyoot wi?
Wi need fi mek wi chros eena Jehoava geh schranga fahn now. Weh wahn help wi fi du dat? Evriday wi need fi mek taim fi pray tu Jehoava ahn reed fi hihn werd di Baibl. Ahn wi need fi kip di goh da di meetin dehn. Dehnya tingz da weh wahn help wi fi bayr op ahn noh mek persikyooshan fraitn wi, eevn if ih di kohn fahn wi oan famili. Di apasl Paal mi fays wahn lata persikyooshan, hihn mi seh: “Jehoava da di wan weh help mi, soh Ah noh wahn frayd.”—Heebrooz 13:6.
Wen wi preech aal di taim, dis help wi fi ga moa ahn moa korij tu. Dat da bikaaz wi laan fi chros eena Jehoava, an ih help wi fi noh bee frayd a weh ada peepl mait seh er du. (Proverbs 29:25) If yu werk haad fi preech now, yu di pripyaa yuself fi kantinyu preech eevn if di govament chrai stap wi werk.—1 Tesaloanyanz 2:2.
3. How wi benifit wen wi bayr op anda persikyooshan?
Nobadi laik wen peepl persikyoot dehn, bot wen wi bayr op anda persikyooshan wi fayt geh schranga. Wi geh kloasa tu Jehoava bikaaz wen wi feel laik wi kyaahn goh nohmoh, da den hihn step een fi help wi. (Reed Jaymz 1:2-4.) Jehoava feel hert wen ih si wi di sofa, bot hihn hapi wen ih si dat wi bayr op. Di Baibl seh dat if “unu di bayr op anda difrent kaina sofarin bikaaz unu di du gud tingz, now dat da sohnting weh Gaad pleez wid.” (1 Peeta 2:20) If wi bayr op ahn stay faytful tu Jehoava, hihn wahn gi wi evalastin laif eena paradais wehpaat nobadi wahn stap peepl fahn serv hihn.—Machyu 24:13.
SAACH FI MOA
Laan wai ih pasabl fi stay faytful tu Jehoava wen peepl persikyoot yu ahn si how hihn wahn bles yu wen yu du dat.
4. Yoo ku bayr op wen yu famili chrai stap yu fahn serv Jehoava
Jeezas mi noa dat wi famili mait noh waahn mek wi serv Jehoava. Reed Machyu 10:34-36, ahn den diskos dis kweschan:
Wen sohnbadi disaid fi staat serv Jehoava, weh dehn famili mait seh er du?
Fi si wahn egzampl a dis, play di VEEDYO, ahn den diskos di kweschan.
If sohnbadi eena yu famili er wan a yu fren chrai stap yu fahn serv Jehoava, weh yu wuda du?
Reed Psalm 27:10 ahn Maak 10:29, 30. Afta yu reed eech skripcha, diskos dis kweschan:
How dis pramis ku help yoo if yu famili er frenz chrai stap yu fahn serv Jehoava?
5. Kantinyu fi serv Jehoava eevn wen peepl persikyoot yu
Wi need fi ga korij fi serv Jehoava wen peepl chrai stap wi fahn wership hihn. Play di VEEDYO, ahn den diskos di kweschan.
How dehnya egzampl eena di veedyo gi yu korij?
Reed Aks 5:27-29 ahn Heebrooz 10:24, 25. Afta yu reed eech skripcha, diskos dis kweschan:
Wai ih reeli impoatant fi kantinyu serv Jehoava eevn if di govament tel wi noh fi preech ahn goh da meetin?
6. Jehoava wahn help yu fi bayr op
Jehoava Witnisiz wid difrent ayj ahn bakgrong kantinyu fi bee faytful tu Jehoava eevn wen peepl persikyoot dehn. Fi si weh help dehn, play di VEEDYO. Den diskos di kweschan.
Eena di veedyo, weh mi help dehnya bradaz ahn sistaz fi bayr op?
Reed Roamanz 8:35, 37-39 ahn Filipiyanz 4:13. Afta yu reed eech skripcha, diskos dis kweschan:
How dis skripcha gi yu kanfidens dat yu ku bayr op anda eni chraiyal?
Reed Machyu 5:10-12, ahn den diskos dis kweschan:
Wai yu ku bee hapi eevn wen peepl persikyoot yu?
Milyanz a Jehoava peepl don shoa dat dehn ku bayr op ahn stay faytful tu Jehoava eevn wen peepl chrai stap dehn. Yoo ku du it tu!
WEH YU WUDA SEH IF SOHNBADI TEL YU: “Ai wahn kyaahn bayr op wen dehn persikyoot mi.”
Weh skripchaz ku help gi dehn di kanfidens dehn need?
WEH WI LAAN?
Wen wi kantinyu serv Jehoava eevn wen peepl persikyoot wi, dis mek Jehoava hapi. Wid fi hihn help wi ku bayr op anda eni chraiyal!
Mek Wi Rivyoo:
Wai Kristyanz shuda ekspek dat peepl wahn persikyoot dehn?
How yu ku pripyaa yuself fahn now fi wen yu fays persikyooshan?
Weh ku help yu ga kanfidens dat yu ku stay faytful tu Jehoava eevn wen yu di fays chraiyalz?
FAIN OWT MOA
Si how Jehoava mi help wahn yong brada bayr op, wen dehn mi put ahn da prizn bikaaz ih mi stay nyoochral.
Wahn brada an ih waif mi stay faytful tu Jehoava fi yaaz eevn wen peepl mi di kohn gens dehn, si weh mi help dehn du dat.
Laan how yu ku ga korij wen yu fays persikyooshan.
“Pripyaa Fahn Now fi Wen Persikyooshan Kohn” (Di Wachtowa, Joolai 2019)
How wi fi feel wen wi famili chrai stap wi fahn serv Jehoava? Ahn weh wi ku du fi ga pees wid dehn ahn stil bee faytful tu Jehoava?
“Di Chroot Wahn Bring, ‘Wahn Soad, Noh Peesʼ” (Di Wachtowa, Aktoaba 2017)