SANG 73
Gi Wi Korij
(Aks 4:29)
1. Az wi preech di Kingdom mesij,
ahn wi witnis bowt yu naym,
dehn ga peepl weh deh gens wi
ahn dehn chrai mek wi luk shaym.
Bot insteda frayd fi dehn,
wi wership yoo ahn wi obay.
Soh wi bayg yoo fi hoali spirit,
ahn wi bayg yu, “Hyaa weh wi pray”:
(KOAROS)
“Gi wi korij mek wi witnis
tu aal peepl pahn di ert.
Gi wi kanfidens ahn korij
mek wi spred yu hoali Werd.
Armagedon soon wahn deh ya,
ahn soh peepl aal need fi hyaa.
Gi wi korij mek wi witnis!”
Dis da wi pryaa.
2. Eevn doa wi mait feel fraitn,
yu rimemba wi da dos.
Soh yu pramis fi sopoat wi,
ahn dis pramis wi ku chros.
Soh wen peepl chretn wi
ahn wen dehn persikyoot wi tu,
den wi ton tu yu, Oa Jehoava,
ahn wi sen dis pryaa op tu yu:
(KOAROS)
“Gi wi korij mek wi witnis
tu aal peepl pahn di ert.
Gi wi kanfidens ahn korij
mek wi spred yu hoali Werd.
Armagedon soon wahn deh ya,
ahn soh peepl aal need fi hyaa.
Gi wi korij mek wi witnis!”
Dis da wi pryaa.
(Ada skripchaz: 1 Tes. 2:2; Hee. 10:35.)