Ih Kil Ih Breda

Afta Adam ahn Eev mi lef di gyaadn da Eedn, dehn en op di ga lata chiljren. Dehn fers son, Kayn, da-mi wahn faama weh groa froots ahn vejitablz. Dehn sekant son, Aybl, yoostu ten tu dehn sheep sins hihn da-mi wahn shepad.

Wahn day, Kayn an Aybl mi gi sohn aafrin tu Jehoava. Yoo noa wat da wahn aafrin? Da wahn speshal gif wi gi tu Jehoava. Jehoava mi hapi wid weh Aybl giv ahn, bot ih neva hapi wid weh Kayn giv ahn. Dat mi mek Kayn geh beks bad. Jehoava mi waan Kayn dat if ih stay beks, ih ku en op di du sohnting bad. Bot Kayn neva lisn.

Insteda dat, Kayn mi tel Aybl: ‘Kohn wid mi, lesgoh da di feel.ʼ Wail dehn mi dehdeh bai dehnself, Kayn atak ih breda an ih kil ahn. Weh Jehoava mi du? Jehoava ponish Kayn an ih sen ahn faar fahn ih famili. Kayn kuda neva goh bak hoam.

Weh wi laan fahn dis? If tingz noh goh di way wi waahn, wi ku en op di geh beks. Wat if sohnbadi noatis dat wi need fi kanchroal wi anga an ih waan wi bowt it? Weh wi shuda du? Wi shuda bee kwik fi lisn ahn chrai kaam dong bifoa wi en op di du sohnting bad.

Jehoava wahn neva ferget Aybl, bikaaz hihn mi lov Jehoava an ih mi aalwayz du weh rait. Ahn wen Jehoava mek di ert wahn paradais, ih wahn bring Aybl bak tu laif.