Ruti larufudahan Bungiu emenigini woun
Füramasehaali Bungiu woun anite lan lubuidun burí asansiruni lubá ámuñegü. Chülüdügame dan lun lagumuchun lau asufuriruni ani adüga ligíame lun hawinwanduni gürigia habagari lau ugundani le gumuti (Sálumu 37:11). Ka uagu gayara lubéi wafiñerun luagu füramasei le? Ladüga “Mítaranti Bungiu kei ha góunwedadibaña: Meyeehan liña masansiragun laritagun” (1 Lúrudu 23:19). Ariha wamá fiu lídangiñe burí katei le lunbei ladügüni Bungiu Le adügübaliwa.
Lagumuchuba Bungiu hau gürigia wuribatiña
“Anhein weiri habéi wuribatiña kei híduru, awanse hagía, lúnrügü hagünrinchawaguniwa lun sun dan lasusereda” (SÁLUMU 92:7).
Kei warihini lidan fánreinti le lubaragiñebei le, gádeitimahaali ubóu le eibu lásügürün dan. Moun lumuti taweiridun wanigi luagu le, ladüga ariñaga tumuti Lererun Bungiu lidan 2 Timotéu 3:1-5 hanarimebei lan hariban gürigia lidoun “lagumuhóun dan”. Ka lagumuhóun dan? Aban ubóu le buinbei hau gürigia ha minebenti Bungiu houn. Yarafa madise, lagumuchuba Bungiu hau ha mabusenrunbaña hasansiruni luriban housan luma hechun. Lídanme dan ligía, gürigiarügaañame ha gaganbaditiña lun Bungiu eredera ubouagu. Kei lariñaguni Sálumu 37:29: “Galagante habéi gürigia buítiña múa, haganóuba giñe lidan súnwandan”.
Lagumuchuba Bungiu lau Satanási
“Bungiu le íchugubalin darangilaü, lagañeiragüdübadün luagu Mafia, furese” (RÓMANA 16:20).
Danme úaali Satanási, máfianu hama sun gürigia ha salufuribaña, chülüdügame darangilaü ubouagun. Füramaseti Le adügübaliwa woun: “Haganóuba súngubei manufudeuga” (Mikeasi 4:4).
Lagumuchuba Bungiu lau burí sandi luma óunweni
“Aganawati Bungiu hadan gürigia guentó [...]. Laragahabei sun háguira, úaalime óunweni, ni ayahuni ni íruni ni igarigu” (ARUFUDÚNI 21:3, 4).
Laransehabei Bungiu sun damichi le adüga láalibei Satanási, Adán, Ewa luma le lanügübei wafigoun guánarügü. Ligíati, úaalime asufuriruni, ni sandi, lanwoun lira, “úaalime óunweni”. Gürigia ha hínsiñehabubaña lun Bungiu le Adügübaliwa ani gaganbadi hagía lun hawinwanduba lun súnwandan. Halíabati?
Ladügübei Bungiu le Adügübaliwa sun Ubóu ábame paraísu
“Gundaalá fulasu mageirawati, múa mábeiti; buinla lau ugundani, legeleweha” (ISAÍASI 35:1).
Danme lagumuchun Bungiu lau wuribani, ábanbei paraísu Ubóu. Ñeinbei lubuidun burí párüke luma fuluri-agei lidan sun fulasu ani líchugubei múa lin, ñeinbei saragu alubahani (Sálumu 72:16). Dandu barana, lagunu-agei luma duna-agei harumabei ani buinñu luba lau ibagari. Gayaraati giñe mayusurundigia wamaali lanme dimurei lawiyedún ubóu. Hábunaguba gürigia haban ábame haganóun tidan. Úabei ni aban gudemeti, ásügürüti ilamaü o awinwanduti ǘmadarugu (Isaíasi 65:21, 22).
Lagiribudagüdübei Bungiu habagari ha hilaguaañabaña
“Lásaaragüdübaña [Bungiu] hilaaña” (ADÜGAÜ 24:15).
Hínsiñeti hamuga san hun lunya harihiniña hiduheñu hama humadagu ha hilaguaañabaña? Lásaaragüdübaña Bungiu Suntigabafu lidan aban paraísu ya ubouagu. Dirá huméi lidan hisaminan ugundani le lunbei hasandiruni danme haríagun hungua, ani subudigua huguyame hungua! Arufudatu Lererun Bungiu saragüdawa hamá irahüñü hama wéinamuhaña lídangiñe óunweni ani lárigiñe aba hóundaragun hama haduheñu. Saragüdati giñe Hesusu fiu gürigia lídangiñe óunweni ani ñéinñanu saragu gürigia ha arihubalin le asuseredubei (Lúkasi 8:49-56; Huan 11:11-14, 38-44).