BUIN LIÑA UBÓU LAU TUROBULI

4 | Meferidira huméi hemenigin

KA UAGU LUNTI LUBÉI HADÜGÜNI?

Gayaraati ladügün wawinwandun lidan ubóu le buinbei lau turobuli lun wasandirun luma lun wuriba lan wasandiragun woungua. Gürigia ha súfurihañabaña saragu, gayaraati hasaminarun maranseragunbei lan le gádanbaliña. Kati hadügübei?

Añahein hádangiñe, himei hamuti masaminarun hamá luagun ámuñegü.
Añahein amu, aba hagumeserun átagua o ayusura düroga.
Añahein giñe fiu asaminarutiña buítimabei lan lun hóunwegun lubaragiñe hasigirun abagarida, ábati hariñagun: “Kaba uagu nasigira awinwanda?”.

Subuditi san hun?

Másiñati madurabei lan fiu lídangiñe hiturobulin saragu dan ani gayaraati laranseragun sódini.
Anhein masansirun le gádanbalün, chóuruti anihein lan somu katei le gayaraabei hadügüni lun hasigirun hubaruaguóun.
Füramasetu Lererun Bungiu lagidarúba lan sun turobuli lun súnwandan.

Ka gayaraabei hadügüni?

Ariñagatu Lererun Bungiu: “Madiherida humá lubeiti luagu haruga, ladüga barǘ lumuti giñe haruga lidiheridüna lúmagua. Buídurügüti lénrengunga le lanügübei kada weyu lúmagua” (Matéu 6:34).

Madiherida humá luagu haruga. Mígira humá lun ladügün lueirin hidiheri luagu le gayaraabei lasuseredun haruga lun metenirun humá lun le lunbei hadügüni uguñe.

Adügarügübei hadiheridun luagu katei wuribati le gayaraabei lasuseredun lun lagibedun katei lun hichügü luma lun heferidiruni hemenigin.

LE GAYARAABEI HADÜGÜNI: Adundehani burí le huuti

LUNLÁ KATEI BUITI HETENIRA

Ariñagatu Lererun Bungiu: “Gürigia ha nidiheribaña, sun weyu houn wuribati; ánhaña ha gúndaabaña, sun weyu houn kei fedu le súnwandanti” (Ariñawagúni 15:15). Anhaün etenira saragu lun hiturobulin, másiñati míchubadün lan fe gárani lan. Anhein hariha katei lidan aban igaburi le buiti, gayaraabei hasubudiruni ida luba lan haransehani.

Mibelá ñunsu harihin o haganbun.
Sagü weyu, danme le lásurun weyu, samina humá luagun biama o ǘrüwa katei le uágubei hasandira eteingiruni.
Adüga humá aban lísüta lau burí katei le lunbei hadügüni kada weyu. Adüga huméi dasi le wéiriti murusun murusun, ítarati, ménrengunbei hun lun harihini hawanserun.

AMURIAHA HUMÁ LUN HÍDERAWAGUN

Ariñagatu Lererun Bungiu: “Gürigia ha aritagubaña hawouguounrügü, […] máhatiña [...] haganbun eweridihani buiti” (Ariñawagúni 18:1). Siñati láfuridun aban gürigia lídangiñe aban huyu lábuguarügü. Mégeiti lun líderawagun.

Amuriaha humá hama hiduheñu o hama humadagu lun híderagunün.
Mabulieida huméi giñe gayara lan híderaguniña. Anhaün adüga katei buiti hawagu amu, ménrenguntimabei hun lun harihini hiturobulin keisi lubudubu.
Anhein féridi humaali lubéi hemenigin ani mabusenrunhadün hasigirun abagarida, heiba lumoun surusia lau lóufudagun. Másiñati anihein lan sandi le lánina lueirin íruni huagu. Buíduhali ligaburi hasandiragun saragu gürigia houngua lárigiñe lagaranihóuniwa houn.a

a Mariñagun tumuti garüdia Agaguduabá! ka lan agaranihani unbei gayara lan lánharun gürigia.

Rutu Lererun Bungiu emenigini inarüniti woun

Ariñagati aban abürühati sálumu lun Bungiu lidan furíei: “Igemeri bererun lun nugudi, larugounga ligía lun némeri” (Sálumu 119:105). Ka mini lubéi le?

Dan le lídanñadiwa lan luburiga guñoun, íderagua lumutiwa aban lanpu lun wasubudiruni halíagiñeba lan wéibuga. Ítarameme, anihein giñe adundehani buiti tidan Lererun Bungiu le íderagubaliwa asubudirei ka lan lunbei wadügüni dan le mosu lan wanúadirun lidan somu sügǘ hénrenguti.

Harugoungadagüda lumuti aban lanpu wémeri lun gayara lan warihini le wagibugiñebei. Ítara liña giñe tarufuduni Lererun Bungiu woun kaba burí lan katei buiti wibiha ámuñegü.

Aban líburu sagüráutu Bíbülia to Lererun Bungiu ani mámarügüñein luagu hagumeseha gürigia tayanuha woun, ayanuhatu giñe woun luagu aban emenigini inarüniti. Óunaba tumuti álügüdahani burí le:

Ida?

Ida liña lagumeserun asufuriruni? Ariñagatu Lererun Bungiu: “Ítara kei lídangiñe lan meha aban wügüri lebelura figóu ubouagun, belú ligía óunweni lídangiñe figóu, ítara liña giñe hóunweguba lubéi sun gürigia lugundun afigouhaaña súngubei” (Rómana 5:12).

Ka uagu?

Ka uagu siñagili lubéi haransehani gürigia waturobulin? Ariñagatu Lererun Bungiu: “Mama […] wügüri laburemebei libagari” (Heremíasi 10:23). Láurügü warihini turobuli burí le ubouagubei, ariha wamuti luagu ítara liña lan.

Kaba?

Kaba ladüga Bungiu lun laransehani sun turobuli burí le? Ariñagatu Lererun Bungiu: “Laragahabei sun háguira; úaalime óunweni ni ayahuni ni íruni ni igarigu” (Arufudúni 21:4).