Ka mini lubéi mádaragun wamá woungua lidoun katei le lánina ubóu?

Ariñagati Hesusu houn lani disipulugu: “Mámaadün [...] ubouaguna” (Huan 15:19). Mini lan lira, mádaragun hamá houngua lidoun katei le lánina polítika ni lidoun wuribu. Le linarün katei, anihein dan hénrengu lan lira. Gayaraati hadügün amu bula wau. Ida luba úaragua wamá lun Heowá lau mádaragun wamá woungua lidoun polítika ni lidoun wuribu?

1. Ida liña harihiniña kristiánugu inarünitiña gumadimatiña?

Inebetiña gumadimatiña houn kristiánugu. Ariñagati Hesusu: “Ru humeiti lani urúei lun urúei”. Ani ligía wadügübei, gaganbaditiwa lun lilurudun ageiraü, kéiburi luáguti lafayeirún liseinsuna gumadi (Márükosu 12:17). Arufudahatu Bíbülia labusenrun lan Bungiu añahein lubéi gumadimatiña (Rómana 13:1). Ligía gunfuranda wabalin íñutima lan lubafu Bungiu hawéi. Chouru wamuti layusurubei lan Wabungiute Larúeihan le siélubei lun laransehani haturobulin gürigia.

2. Ka uagu mádaragun wabéi woungua lidoun katei le lánina ubóu?

Ítara kei meha Hesusu, mádaraguntiwa woungua lidoun polítika. Dan meha le harihinbalin gürigia Hesusu adüga aban milaguru, aba habusenrun hadügüni urúeime ya ubouagu, ani mígirun lumutiña (Huan 6:15). Ka uagu? Ligía guánarügü ariñagubei dan lárigiñe: “Mama lánina ubóu le narúeihan” (Huan 18:36). Wagía le lani Hesusu disipulugu, arufudatiwa lidan ámuñegueinarügü igaburi mádaragun wamá woungua lidoun polítika ni lidoun wuribu (aliiha huméi Mikeasi 4:3). Lau sun inebe lan fanidira o katei líbeina lira woun, máhuduraguntiwa lun (1 Huan 5:21). Mídintiwa luéigiñe lóubadina ni aban sétanu lánina polítika ni luéigiñe hóubadina ha achüüragubaña houngua lidan. Ítara liña warufuduni luagu úaragua wamá sunsuinagubei lun Larúeihan Bungiu.

SIGÍ HUMÁ AFURENDEIRA

3. Wagía le kristiánugu inarünitiña, mádaraguntiwa woungua lidoun katei le lánina ubóu

Ru lumuti Hesusu hama lani disipulugu hénpulu woun. Aliiha huméi Rómana 13:1, 5-7 luma 1 Féduru 2:13, 14, ani ariha huméi BIDÉU, ábameti hayanuhan luagu álügüdahani burí le:

BIDÉU: Mádaraguntiña kristiánugu inarünitiña houngua lidoun katei le lánina ubóu (fánreinti 1) (4:28)

• Ka uagu lunti lubéi inebe hamá gumadimatiña woun?

• Ida luba warufuduni gaganbadi wamá houn?

Lidan lidaani wuribu, añahein néchanigu ariñagutiña mádaragun hamá houngua lidoun wuribu, íbini ítara, ru hamuti hídehan houn ha ageindagubaña. Kati mini lubéi mádaragun wamá woungua lidoun polítika ni lidoun wuribu? Aliiha huméi Huan 17:16 ani ariha huméi BIDÉU, ábameti hayanuhan luagu álügüdahani le:

BIDÉU: Mádaraguntiña kristiánugu inarünitiña houngua lidoun katei le lánina ubóu (fánreinti 2) (3:11)

• Ka mini lubéi mádaragun wamá woungua lidoun polítika ni lidoun wuribu?

Anihein dan hamuriahan gumadimatiña wama lun wadügün somu katei le múaranti luma lilurudun Bungiu. Kaba wadüga lidan burí kesi le? Aliiha huméi Adügaü 5:28, 29. Lárigiñe, ariha huméi BIDÉU, ábameti hayanuhan luagu álügüdahani burí le:

BIDÉU: Mádaraguntiña kristiánugu inarünitiña houngua lidoun katei le lánina ubóu (fánreinti 3) (1:18)

• Dan le múaran lan lilurudun wügüri luma lilurudun Bungiu, kaba un gaganbadi wamá?

• Gayaraati san hasaminarun luagun aban sügǘ le ídanbei moun lumuti lan gaganbadi wamá houn gumadimatiña?

4. Mádaragua wamá woungua lidoun polítika ni lidan ligaburi wóuserun ni lidan wasaminan

Aliiha huméi 1 Huan 5:21 ani ariha huméi BIDÉU, ábameti hayanuhan luagu álügüdahani burí le:

BIDÉU: Ka uagu megei habéi kristiánugu inarünitiña ganigi: Lun mádaragun hamá houngua lidoun katei le lánina ubóu (2:49)

• Ka uagu mádaragun lubéi Ayenge lungua lidoun polítika, mabusuragun ligía lun fanidira?

• Afiñetün san buidu lan le lanúadirubei?

Ka amu sügǘ gayaraabei ladügün lun hénrengu lan woun lun mádaragun wamá woungua lidoun polítika ni lidoun wuribu? Ariha huméi BIDÉU, ábameti hayanuhan luagu álügüdahani burí le:

BIDÉU: Arufudahani tídangiñeti Garüdia Awisahatu: Mádaragua wamá woungua lidoun katei lánina ubóu le buinbei lau fánreinguaü (5:16)

• Ida luba mádaragun wamá woungua lidoun katei le lánina ubóu dan le ñein lan huraraü le ñein lubéi háhurera lílana ámuñegueinarügü ageiraü?

• Ida luba mádaragun wamá woungua lidoun katei le lánina ubóu dan le ladügün le hanúadirubei polítiku buiti o wuribati woun?

• Lárigiñe waganbahan ñunsu o wíchugun arigei lun le hariñagubei gürigia, ka gayaraabei ladügün le lun wasandiruni lidan luáguti katei le lánina ubóu?

LE HAFURENDEIRUBEI

Áfaaguatiña kristiánugu lun mádaragun hamá houngua lidoun polítika ani arihúati lira lidan ligaburi hasaminarun, hayanuhan luma hóuserun.

Águyuguagüdüni

• Ida luba wagunfulirun hama gumadimatiña?

• Ka uagu mádaragun wabéi woungua lidoun polítika?

• Ka katei adügübei lun hénrengu lan woun lun mádaragun wamá woungua lidoun katei le lánina ubóu?

FURENDEI HUMÁ LANWOUN

Ka sákürifisiu gayaraabei wadügüni lun mádaragun wamá woungua lidoun katei le lánina ubóu?

Maweiyasunti Heowá acharara woun (3:14)

Ida luba haranserun iduheñu lau dan lubá hagagibudagun luma sügǘ le ídanbei hénrengubei lan houn lun mádaragun hamá houngua lidoun katei le lánina ubóu?

Mádaragua wamá woungua lidoun katei le lánina ubóu dan le haganagua wamá saragu gürigia (4:25)

Ariha hamuti saragu gürigia hageindagun luagu hageira kei aban katei le wéiriti lubuidun. Ítara liña funa san katei le?

“Úati ni kata lásiñarun Bungiu” (5:19)

Ida luba warufuduni mama lan ubouaguna wagía dan le wanúadirun katei le lánina wadagimanu?

“Cada uno llevará su propia carga de responsabilidad” (La Atalaya, to lánina 15 lidan ǘrüwa-hati, irumu 2006)