WABAGARI KEISI KRISTIÁNUGU
Akutiha huméi ka lan lisaminanbei Heowá
Kei busén wabéi lun gunda lan Heowá wau, lunti wachoururuni úara lan le wanúadirubei luma le lasaminarubei, íbini dan le úa lan aban lúrudu furanguti le ariñagubalin woun kaba lan wadüga (Ari 27:11). Ida luba wibihini?
Lau waturiahanu Bíbülia sagü weyu. Sagü waliihanu Bíbülia, ítara liña kamá wásügürüña dan luma Heowá. Lau wetenirun lun ida liña lan lóuserun Heowá hama lumutuniña luma wararamagun asaminara dandu luagun hénpulu buiti kei hénpulu wuribati le tídanbei Bíbülia, líderagubadiwa lira asubudirei ligaburi lisaminan Heowá. Ítarati, danme le lunti lan wanúadirun somu katei, líderagubadiwa sífiri sandu lun waritaguni arufudahani luma adundehani le furendei wamaalibei tídangiñe Lererun Bungiu (Hn 14:26).
Lau wáluahan ariñahani. Lubaragiñe wanúadiruni kaba lan wadüga, álügüdagua wamá woungua: “Ka bérusu o abahüdaguni tídangiñeti Bíbülia gayaraabei líderagunina asubudirei ka lan lisaminanbei Heowá luagu katei le?”. Amuriaha humá ídemuei luma Heowá ani yusu humóun agumeiraguagüdüni burí to lídanboun hiñeñe lun hadarirun luma lun hafalaruni adundehani tídangiñeti Bíbülia le úarabei luma le hásügürübei (Sal 25:4).
LÁRIGIÑE HARIHINI BIDÉU LUNTI WAWANDUN LIDAN ÉIBAAGUNI: HECHU WAMÁ ÁLUAHA ARIÑAHANI, ÓUNABA HUMÉI ÁLÜGÜDAHANI BURÍ LE:
Ka burí lénrengunga tawandubei nibureintu to arihúboun lidan bidéu?
Ida luba tíderagunün agumeiraguagüdüni lánina aturiahani lun hagagibudagun luma sügǘ libe burí le?
Ka uagu buidu lubéi wadireirun dan lun waturiahan luma lun wakutihan lubaragiñe wanúadiruni kaba lan wadüga? (Ebü 5:13, 14).