Danme le hanúadirun hadügün somu katei, chouru huméi gunda lan Heowá lau

1. Ka lunbei wadügüni sun wagía, ani ka uagu anihein lubéi dan hénrenguti lun wadügüni?

SAGÜ WEYU mosu wanúadirun kaba lan wadüga. Anihein dan ménrenguti wasubudiruni le lunbei wadügüni, kei burí kaba lan weiga o kaba lan oura woudin arumuga. Lau sun lira, anihein burí katei hénrengutimati. Kéiburi katei le gánibei luma wátuadi, hama waduheñu, luma wáhuduragun lun Heowá o katei le adügübei lun gunda wamá lidan wabagari. Lau sun lira, busentiwa lun lanügün le wanúadirubei saragu buiti woun luma houn waduheñu, gama lumoun, létima wabusenrubei lun wagundaaragüdüni Heowá (Rom. 12:​1, 2).

2. Ka burí katei gayaraabei líderagunün lun hanúadirun buidu?

² Lidan aturiahani le wakutihaba ǘrüwa katei le gayaraabei líderaguniwa anúadira buidu: 1) wasubudiruni sun ariñahani libügürü le lunbei wanúadiruni, 2) gabaroun wawani ka lan lisaminanbei Heowá luagu katei ligía lúmati 3) wakutihani kátima lan buídutimabei. Warihubei giñe ida luba lan wayusuruni wasubudin luagu le buídubei luma le wuribabei lun buídutima lan le lunbei wanúadiruni (Ari. 2:11).

SUBUDI HUMÉI SUN ARIÑAHANI

3. Afuranguagüda huméi lau aban hénpulu ka lan uagu megei hubéi hasubudiruni sun ariñahani lubaragiñe hanúadirun kaba lan hadüga.

³ Furumiñeti katei le lunbei hadügüni, hasubudiruni sun ariñahani libügürü le lunbei hanúadiruni. Ka uagu súdini lubéi katei le? Samina humá luagu aban gürigia le ñǘdünbei arihei surusia ladüga anihein lan aban sandi wéiriti luagu. Líchuguña hamuga san surusia árani lun masubudirungaléi ka lan luágubei o málügüdüngalei ka lan lasandirubei? Uá, maweiyasunbei adügei lira. Ítarameme, buídutimabei le lunbei hanúadiruni anhaün akutihei sun ariñahani luagu katei le gádanbalün. Ida luba hadügüni?

4. Según Ariñawagúni 18:​13, ida luba gayara lan hachoururuni luagu subudi humaali lan sun ariñahani? (Ariha humóun giñe iyawaü).

⁴ Liibe-agei dan, líderagubadün hadügün álügüdahani lun hasubudiruni ariñahani le hemegeirubei lun hanuádirun buidu. Kéiburi, dan hagunbirahóun lidoun aban isebáhari. Lunti san hidin ítaraguarügü? Lubaragiñe hanúadirun anhein hídiba lubéi o mídinhadün lan, mosu hadügüni álügüdahani burí le: “Halíaba ani ídaame ladügǘwa isebáhari le? Átiribaña gürigia achülürütiña? Kaba etenira lun? Kaba hawuyeri gürigia achülüra? Kaba adügǘwa ñein? Ñeinbei san uniñein?”. Líderagubadün lóunabagüle álügüdahani burí le lun buidu lan le lunbei hanúadiruni (aliiha huméi Ariñawagúni 18:13).

5. Ka lunbei hadügüni dan le subudi humaali sun ariñahani?

⁵ Lau subudi humaali lan sun ariñahani, buídubei lun hararamagun asaminara luagu sun le lunbei ladügǘniwa ñein. Kéiburi, ánhadün íchiga fe hachülürüba lan gürigia ha minebenbei lilurudun Bungiu houn o ñeinbei lan uniñein, gayaraabei san ñeinbei lan chagaguaü lidan isebáhari ligía? (1 Fe. 4:3). Anhein ladügǘba lubéi isebáhari le lidan lóurate adamuridaguni o apurichihani, lunti hanúadiruni anhein hóudiba lubéi o moudibadün lan. Danme le hasubudiruni sun ariñahani luáguti isebáhari le, ménrenguntimabei hun hasubudiruni kaba lan hadüga. Lau sun lira, mámarügübei le hadüga, mosu hadügün amu katei. Subudi humaali kaba lan anüga fulasu; gama lumoun ka lisaminanbei Heowá? (Ari. 2:6).

GABAROUN HUMÉI LE LASAMINARUBEI HEOWÁ

6. Según Santiagu 1:​5, ka uagu lunti lubéi wamuriaha luma Heowá lun líderaguniwa?

⁶ Amuriaha humá luma Heowá lun líderagunün gunfurandei le lasaminarubei. Anhein hadüga ítara, ábame líchugun lichú aau hun, ladüga mánginti ani ruti lau areini houn súngubei (aliiha huméi Santiagu 1:5). Líderagubadiwa lichú aau lun gunfuranda wamani anhein gunda lubéi Heowá lau le wanúadirubei o magundan lan.

7. Ida luba hasubudiruni ka lan lisaminanbei Heowá luagu le lunbei hanúadiruni? Ru humá aban hénpulu.

⁷ Lárigiñe hafurieidun lun Heowá áluaha ídemuei luma, mosu hetenirun lun óunabagülei le lunbei líchuguni hun. Ru wamá aban hénpulu. Anhein haweiyasuhaña lubéi ani aba heferidirun, másiñati hamuriaha ídemuei luma somu gürigia le awinwandubei lidan fulasu le ñein lubéi heferidira. Lau sun lira, ma heteniruña hamuga lun adundehani le lunbei líchuguni hun, adián? Ítarameme, lárigiñe hamuriaha lichú aau luma Heowá, teni humá lun “óunabagülei” le líchugubei hun, lau hafalaruni adundehani le tídanbei Bíbülia le úarabei luma le gádanbadun. Saminaya humá luagu agunbirahani le heresibirubei lun aban isebáhari, le uágubei wayanuha furumiñe. Lubaragiñe hanúadirun anhein hudiba lubéi, mosu gabaroun humani le tariñagubei Bíbülia luagu isebáhari le ñein lubéi chagaguaü, hawagu hagübüri umadagu lúmati lisudinin lichugúniwa Larúeihan Bungiu lidan furumiñeti lúgaaru, lubaragiñe hugundan guánarügü (Mat. 6:33; Rom. 13:13; 1 Ko. 15:33).

8. Ka gayaraabei hadügüni lun hadariruni ariñahani le hemegeirubei? (Ariha huméi giñe dibuhu).

⁸ Anihein dan mégeibadün lan ídemuei lun hadariruni ariñahani le háluahabei. Gayaraabei hibihin adundehani hámagiñe íbirigu ha derebuguhali hafiñen. Íbini ítara, lunti giñe háluaha ariñahani huguya hungua. Anihein saragu ariñahani tidan burí agumeiraguagüdüni to wayusuruboun lun wíchugun aturiahani, kei burí Adundehani lun taturiahóun Lererun Bungiu tuma líburu Textos bíblicos para la vida cristiana. Haritagua huméi háfaguña lan lun hadügüni le aubei lagundaara Heowá.

9. Ida luba wachoururuni gúndaabei lan Heowá lau le wanúadirubei? (Éfesuna 5:17).

⁹ Ida luba wachoururuni luagu gunda lan Heowá lau le wanúadirubei wadügün? Furumiñe, mosu wasubudiruni Heowá buidu. Ariñagati Ariñawagúni 9:10: “Lasubudirúniwa Bungiu, le Sándutimabei, ligía luálinbei ichügü”. Mini lan, lun lan wibihini gunfurandaü le tímatimaati, mosu wasubudiruni ligaburi Heowá, lisuuni, le hínsiñebei lun luma le iyereegubei lun. Álügüdagua humá hungua: “Según le nasubudirubei luagu Heowá, gúndaabei funa san lau le nanúadirubei?” (aliiha huméi Éfesuna 5:17).

10. Ka uagu súdinitima lubéi adundehani le tídanbei Bíbülia woun sügǘ lau hechu waduheñu o échuni le lídanbei ageiraü?

¹⁰ Lun wagundaaragüdüni Heowá anihein dan mosu lan wadügün katei le aubei magundan hamá waduheñu o wamadagu. Kei hénpulu, másiñati añahein lan agübürigu fosu hamutiña hasaanigu lun hamarieidun luma aban wügüri le gaseinsunti o le gayaraabei lafayeirun tuagu hasaani, íbini mederebugun lan lumadagua wügüri ligía luma Heowá. Gunfurandawati busén hamá tibihini hasaani sun le temegeirubei. Kábati íderaguoun lun tederebudagüdüni tumadagua luma Heowá? Ani ka lasaminarubei Heowá luagu katei le? Darí wamuti óunabagülei lidan Matéu 6:​33, ñein lubéi lariñaga Hesusu houn kristiánugu inarünitiña lun lan hasigirun áluahei Larúeihan Bungiu furumiñe. Íbini inebe hamá wagübürigu woun hama gürigia ha awinwandubaña lidan fulasu le ñein lubéi wawinwanda, létima súdinitimabei woun, wagundaaragüdüni Heowá.

AKUTIHA HUMÉI LE BUÍDUTIMABEI

11. Según Filipuna 1:​9, 10, ka igaburi gayaraabei líderagunün lun hakutihani ka lan buídutimabei hun?

¹¹ Lárigiñe hakutihani adundehani le tídanbei Bíbülia libügürü le lunbei hanúadiruni, lunti hakutihani ka lan buídutimabei hun (aliiha huméi Filipuna 1:​9, 10). Ida luba hadügüni? Yusu huméi gunfurandaü lun hasubudiruni ka lan gayaraabei lasuseredun según le lunbei hanúadiruni. Anihein dan ménrengubei lan woun wasubudiruni kaba lan wadüga, ani anihein dan ua lan furangu lan woun ka lan wadüga. Lidan kesi le, líderagubadün gunfurandaü lun hanúadiruni buidu kaba lan hadüga íbini hénrengu lan le gádanbalün.

12, 13. Ida luba gayara lan líderagunu gunfurandaü lun hanúadirun aban wadagimanu buidu?

¹² Samina humá luagu sügǘ le. Háluahaña wadagimanu lun híchuguni le hemegeirubei hiduheñu houn, ani aban hadarirun bián wadagimanu. Aba hakutihani buidu sun ariñahani libügürü burí wadagimanu le, kéiburi, ka lan luwuyeri wadagimanu, átiribei lan oura hawadigimaridun, anhein dise lubéi o katei líbeina lira. Íbini madüraagun lani ni aban lídangiñe wadagimanu le, lilurudun Bungiu, háfuga himei humá hanúadirun aban lídangiñe, ladüga hínsiñetima lan hun o ladüga fáyeitima lan. Lau sun lira, anihein amu katei le lunbei gabaroun humani lubaragiñe hanúadirun aban lídangiñe.

¹³ Kei hénpulu, ladügüba san aban lídangiñe wadagimanu le lun siñá lan hidin lidan sun adamuridaguni? Gadaanibadün san lun hásügürün dan hama hiduheñu luma lun híderaguniña lidan hamadagua luma Heowá? Líderagubadün lóunabagüle álügüdahani burí le lun hasubudiruni kátima lan súdinitimabei lun híderaguniña hiduheñu íbini lidan hamadagua luma Heowá, sügǘ luéi hetenirun lun hibihin umegeguni. Ítarati, hanúadirubei le aubei lagundaara Heowá ábame labinirunün.

14. Ida luba líderaguniwa gunfurandaü luma ínsiñeni lun míchugun wamá lébuna hachugeragun amu?

¹⁴ Ladügüba giñe gunfurandaü lun wasaminarun ida luba lan hasandiragun amu houngua luagu le lunbei wanúadiruni, ítara luba madügün wamá lun hachugeragun amu (Fili. 1:10). Súdiniti katei le dan le wanúadiruni le lunbei wadügüni lidan ligaburi wasansiragun luma waranseragun woungua. Kéiburi, háfuga hínsiñe lan woun waranseragun woungua lidan somu igaburi. Gama lumoun, ánheinti añahein lubéi gürigia asandiragutiña houngua wuriba luagu ligaburi waranseragun woungua dandu lidan damuriguaü kei bóugudi luéi, kaba wadüga? Líderagubadiwa gunfurandaü lun inebe lan le hasaminarubei amu woun. Ani línchahabadiwa ínsiñeni lun wáluahani le “buídubei houn amu”, luma lun masaminarun wamá saragu wawougua (1 Ko. 10:​23, 24, 32; 1 Tim. 2:​9, 10). Ítarati warufudubei lau le wanúadirubei hínsiñe hamá ani inebe hagía amu woun.

15. Ka lunbei hasaminaruni lubaragiñe hanúadirun hadügün aban katei súdiniti?

¹⁵ Anhein lunti lubéi hanúadirun aban katei súdiniti, samina humá luagu le hemegeirubei lun gayara lan hadügüni. Arufudahati Hesusu woun mosu lan wasaminaruni buidu buidu ka lan wemegeirubei (Luk. 14:28). Ligíati, samina wamá átiribei lan dan, seinsu luma áfaaguni le lunbei wemegeiruni lun gayara lan wibihini le anúadira wamaalibei. Anihein dan mosu lan wayanuhan hama waduheñu luagu le wasaminarunbei wadügün lun warihini ka lan hasaminarunbei luagu le wabusenrubei wadügün. Ka uagu hu lubéi aransehani le? Ladüga gayaraati líderagunün arihei mosu lan hadügün somu aransehani lidan le hasaminarunbei o másiñati, anihein lan amu katei buídutimati le gayaraabei hadügüni. Lanwoun lira, ánhadün amuriaha ídemuei hama hiduheñu ani aganba humeime le hariñagunbei hun, busentimabaña hídeha lun buidu lan lasalirun sun katei (Ari. 15:22).

CHÓURU HUMÉI BUIDU LAN LE HANÚADIRUBEI

16. Ka lunbei hadügüni lun buidu lan lidin hun lidan le hanúadirunbei? (Ariha huméi giñe rekuáduru “Ida luba hasubudiruni buidu lan le hanúadirubei?”).

¹⁶ Anhein hafalara sun adundehani le ariha wamaalibei lidan aturiahani le, aranseedün lun hanúadirun aban katei buiti lau lichú aau. Subudi humaali sun ariñahani ani akutiha humaali sun adundehani le tídanbei Bíbülia le lunbei ladügün lun hanúadirun buidu lun hagundaaragüdüni Heowá. Gayaraahali hamuriaha ídemuei luma Heowá lun buidu lan lidin hun.

17. Ka lunbei hadügüni lun hanúadirun buidu?

¹⁷ Gayaraati anúadiraadün lan saragu katei buiti lidan dan le sügühalibei ani buiti lidin hun. Íbini ítara haritagua huméi lun lan hanúadirun buidu moun lumuti lan hafiñerun luagu lichú hau ni luagu hisubudin, le lunbei hadügüni mosu hárügüdün luagu subudi le ñǘbuinbei lúmagiñe Heowá. Ladüga Heowarügüñein gayara líchugun lichú aau, subudi luma gunfurandaü, ‘ítara luba hasubudiruni lanichigu lasubudirúniwa Bungiu’ (Ari. 2:​1-5). Ligíati, gayaraati líderagunün Heowá lun hanúadiruni katei le hínsiñebei lun (Sal. 23:​2, 3).