Líderagubadün Heowá agagibudagua luma turobuli le magurabúnti

1. Ka katei lunbei wachoururuni?

WAGIA lubúeingu Heowá subudi wamuti hínsiñe wamá lun ani busén lan lun buidu lan lidin woun (Rom. 8:35-39). Chouru wamuti giñe súnwandan lan buídubei lan lidin woun ánhawa gaganbadi lun adundehani le tídanbei Bíbülia (Isa. 48:17, 18). Ánhawati agagibudagua luma aban turobuli le magurabun wamuti?

2. Ka turobuli másiñati wagagibudaguña lan luma ani ka álügüdahani wadügübei wóuniwagua?

² Sun lubúeingu Heowá gaturobulintiwa. Kei hénpulu, háfuga lariñagun o ladügün somu waduhe aban katei le mínsiñeti woun. Másiñati sandi wamá ani ladügüña lira lun madügün wamá saragu lidan weseriwidun lun Heowá. Gayaraati wásügürüña lan lídangiñe chagaguaü le lanügübei liñawan dan. O wéibaahouña lan ladüga wafiñen. Dan le wásügürün lídangiñe lénrengunga burí libe le, másiñati álügüdagua wamá woungua: “Ka san uagu lasusereda katei le nun? Adügaadina funa san somu katei wuribati? Mini lan san le mama lan labiniruñadina Heowá?”. Sandiguañahaadün san hungua ítara? Anhein sandiguañahaadün lubéi hungua ítara, mábürühala harüna. Susereti katei le houn saragu lubúeingu Heowá ha úaraguabaña (Sal. 22:1, 2; Abak. 1:2, 3).

3. Ka larufudahabei Sálumu 34:19 woun?

³ (Aliiha huméi Sálumu 34:19). Lidan bérusu le iridúati bián katei súdiniti: 1) sügǘ hamá ha richaguabaña o ha harumabaña lídangiñe lénrengunga luma 2) sefu lániña Heowá lídangiñe sun wuribani ligía. Aban lídangiñe katei le ladügübei Heowá lun lesefuruniwa lídangiñe lénrengunga lau líderaguniwa lun warihini ibagari kei lubéi. Inarüni füramase lan Heowá woun ánhawa lan eseriwida lun gúndaabadiwa lan, gama lumoun, úati mini lan le maturobulinbadiwa lan lidan wabagari uguñe weyu (Isa. 66:14). Busenti Bungiu lun wetenirun lun le lunbei lasuseredun ámuñegü, ligía ibagari le labusenrubei woun (2 Ko. 4:16-18). Lubaragiñe lachülürün weyu ligía, íderagua lumutiwa lun wasigirun wabaruaguóun sagü weyu (Aya. 3:22-24).

4. Kaba wakutiha lidan aturiahani le?

⁴ Lidan aturiahani le, wakutihaba fiu hénpulu hani lubúeingu Heowá ha úaraguabaña, dandu ha lánina tidaani Bíbülia kei ha lánina dan le. Kei le laubei warihei, gayaraati liabin turobuli le magurabun wamuti. Lau sun lira, ánhawa afiñera luagu Heowá, lágüdahabadiwa súnwandan (Sal. 55:22). Lau wakutihani kada aban lídangiñe hénpulu burí le, álügüdagua wamá woungua: “Kaba hamuga san nadüga lidan sügǘ ítarati? Ida luba líderagunina hénpulu le lúntima nafiñerun luagu Heowá? Ka gayaraabei nafurendeiruni lídangiñe?”.

HÉNPULU BURÍ LE WAFURENDEIRUBEI HÁMAGIÑE HA AWINWANDUBAÑA LIDAN TIDAANI BÍBÜLIA

5. Ka burí turobuli lasagahabei Lawán lun Hakobu? (Ariha huméi dibuhu le luágubei tidáü garüdia).

⁵ Añahein meha lubúeingu Heowá ha awinwandubaña lidan tidaani Bíbülia ha agagibudagubaña luma turobuli le magurabun hamuti. Samina wamá luagun Hakobu. Aba lóunahani lúguchi lun lamarieidun tuma aban hádangiñe lirahüñü Lawán, aban liduhe le áhuduragubei lun Heowá. Ani chóurugüda lumuti meha lun líchuguba lan Heowá saragu abiniruni lun (Agu. 28:1-4). Ligíati, adüga lumuti Hakobu le ariñawagúbei lun: aba laweiyasuhan Kanangiñe dagá le ñein lubéi lawinwanda Lawán, le meha gasaanibei bián würiña, Lía tuma Rakeli. Aba tínsiñedun Rakeli lun Hakobu, to nibureintimagiruboun. Lun lamarieidun tuma, aranseñu liña meha lun lawadigimaridun sedü irumu lun Lawán tuagu (Agu. 29:18). Gama lumoun, masuseredunti katei kei yebe lagurabuni Hakobu. Aba leyeeduni Lawán Hakobu, aba líchugunu Lía to íbugañaü lun lánime weiriou. Aban dimaasu lárigiñe, aba lamarieidagüdüni tuma Rakeli, lau sun lira, mosu meha lawadigimaridun Hakobu sédüya irumu tuagu (Agu. 29:25-27). Ani lóugiñe lira, óusera lumuti giñe Lawán Hakobu lau marichaü lidan katei lánina bísinisi. Adügati Lawán lun lawadigimaridun Hakobu lun saragu luagu 20 irumu! (Agu. 31:41, 42).

6. Ka amu burí turobuli úmabei lagagibudagua Hakobu?

⁶ Mosu meha lagagibudagun Hakobu lun ámuya burí turobuli. Gíbetiña meha lisaanigu ani mama sun dan hanaagun houngua buidu. Chülüti meha dan lun haluguruni Hosé kei idamuni. Luéigiñe aban oubaü, bián hádangiñe lirahüñü Hakobu —Simeón luma Lewí— rútiña busiganu houn haduheñu lau le hadügübei ani dasei haméi liri Heowá. Lanwoun lira, aba tounwen Rakeli, lani weiriou würi to hínsiñetimaboun lun, dan le tágurahani libiaman hasaani. Ani ladüga aban lanarime ümi, mosu meha lidin Hakobu awinwanda Ehiptu dan le derebuguhali (Agu. 34:30; 35:16-19; 37:28; 45:9-11, 28).

7. Ida liña meha larufuduni Heowá lun Hakobu luagu gunda lan lau?

⁷ Lau sun lénrengunga le úmabei lagagibudagua Hakobu, meferidirun lumuti lafiñen luagu Heowá ni luagu le füramase lubéi. Ani furanguti larufuduni Heowá gunda lan lau. Kei hénpulu, íbini yeeda lani Lawán Hakobu saragu wéiyaasu, aba lagamadun saragu umegeguni seremei lídehan Heowá. Ani chóuruti weiri lan leteingiruni Hakobu Bungiu danya le ladunragunbei luma Hosé le lisaani, saragu irumu lárigiñe íbini ru laali lan yebe kei hilaali. Awanda lumuti Hakobu sun lénrengunga le ladüga weiri lan lubuidun lumadagua luma Heowá (Agu. 30:43; 32:9, 10; 46:28-30). Wagía sun, gayaraabei giñe buidu lan lidin woun lidan wagagibudagun luma turobuli le magurabúnti anhein weiri lubéi lubuidun wamadagua luma Heowá.

8. Ka meha labusenrubei urúei Dawidi ladügün?

⁸ Siñati meha ladügüni urúei Dawidi sun le labusenrubei lidan leseriwidun lun Heowá. Kei hénpulu, busenti meha tídangiñe sun lanigi lábunagun aban ténpulu lun Lubungiute. Dan le labahüdahanbalin Dawidi lun profeta Natán le labusenrubei ladügün, aba lóunabuni profeta: “Adügabéi le baritagubei, lugundun anihein Bungiu buma” (1 Kro. 17:1, 2). Gayaraati san wasaminarun luagun lanarime ugundani le meha lasandirubei Dawidi dan laganbunbalin dimurei burí le? Gayaraati aba lan meha lagumeserun adüga aransehani lubá lanarime ábunaguni ligía.

9. Ida liña lóunabun Dawidi dan le lariñawagúnbei lun madügün lubéi lan le labusenrubei ladügün?

⁹ Gama lumoun, málüti aba lagiribudun lani Heowá profeta lau ñunsu wuribati lun urúei Dawidi. Gúñounmeme ligía ariñagati Heowá lun profeta Natán mámaba lan Dawidi ábunaguagüda aban ténpulu lun, ábanba lan hádangiñe lisaanigu ábunaguagüdoun (1 Kro. 17:3, 4, 11, 12). Ka ladügübei Dawidi dan le laganbuni uganu le? Aba lasansiruni le lasaminarubei ladügün. Aba lóundaruni seinsu luma umegeguni le lunbei lemegeiruni Salomón le lisaani lun ladügüni óunwenbu wadagimanu le (1 Kro. 29:1-5).

10. Ida liña labiniruni Heowá Dawidi?

¹⁰ Lárigiñe lariñawagún lun Dawidi mámaba lan ligía ábunaguoun ténpulu, aba ladügün Heowá aban daradu luma: aba füramase lan lun ábanba lan hádangiñe ladügawagun arúeiha lun súnwandan (2 Sam. 7:16). Lídanme iseri Ubóu, lídanme arúeihani le lánina Milu Irumu le lani Kristu, wéiribei lugundan Dawidi danme le lasubudiruni ligía lan aban hádangiñe ladügawagun urúei. Arufudati abahüdaguni le woun, íbini lan lásiñarun wadügüni sun le wabusenrubei lidan weseriwidun lun Heowá, gayaraati líchugun abiniruni le magurabun wabéi woun.

11. Ka abiniruni heresibirubei kristiánugu lánina furumiñeti sígulu íbini machülü lan Larúeihan Bungiu lidan dan le hagurabubei? (Adügaü 6:7).

¹¹ Gagibuguatiña fiu kristiánugu lánina furumiñeti sígulu luma lénrengunga le magurabun hamuti. Kei hénpulu, hagurabahañein meha lachülürün Larúeihan Bungiu, gama lumoun ibidiñeti meha houn ídaba lan lachülüra (Adü. 1:6, 7). Ligíati, ka hadügübei? Aba hapurichihan lau ubebeni. Lau harihin luagu lapurichihóuña lan uganu buiti lidan amu burí fulasu, aba híchugun fe luagu labiniruñein lan Heowá dasi le hadügübei (aliiha huméi Adügaü 6:7).

12. Ka hadügübei kristiánugu lánina furumiñeti sígulu lidan lidaani ilamaü?

¹² Lidan furumiñeti sígulu, aba meha liabin aban óunwenbu ilamaü “lidan sun ubóu” (Adü. 11:28). Kei aubei warihei, sügütiña meha giñe kristiánugu lídangiñe lénrengunga ligía. Chóuruti nidiheri hamá meha agübürigu luagu ida luba lan hanuriahaniña tílana haban. Ánhañati nibureintiña ha asaminarubaña haganwoundagüdüni hani ministeriu, másiñati meha álügüdagua hamá houngua anhein lunti lubéi hígiruni lubá amu dan. Lidan furumiñeguarügü kesi, aba meha hánharun kristiánugu ha lun le gádanbaliña. Aba hadügüni sun hayaraati lidan apurichihani ani aba hafanreinhani hámati hama íbirigu ha Hudeabaña lau sun hagundan (Adü. 11:29, 30).

13. Ka meha abiniruni heresibirubei kristiánugu lidan lidaani ilamaü?

¹³ Ka abiniruni habihubei kristiánugu hagía lidan dan hénrenguti ligía? Ha eresibirubaña ídemuei lidan dan ligía ariha hamuti houngua lóunigiruñanu lan meha Heowá (Mat. 6:31-33). Ani chóuruti aba lan hasandiragun houngua lidan aban hama hábirigu ha íchugubalin ídemuei le hemegeirubei houn. Luéigiñe le aban oubaü, ha ídehabaña lau budagia o ha ídehabaña lau wadagimanu lánina híderawagun amu gúndaati hasandiragun houngua (Adü. 20:35). Biní lumutiña Heowá súngubei ladüga aba lan hánharun lun le gádanbaliña.

14. Ka asuseredubei lun Berünawé luma lun apostolu Pábulu, ani ida liña lidin houn? (Adügaü 14:21, 22).

¹⁴ Éibaahouatiña meha kristiánugu ha lánina furumiñeti sígulu saragu wéiyaasu, anihein dan, dan le magurabahan hamani. Ariha waméi le asuseredubei lun Berünawé luma lun apostolu Pábulu dan le hapurichihanbei uburugu Lístüra. Furumiñe, buiti yebe heresibiruniña gürigia ani aganba hamutiña. Ani murusun dan lárigiñe, aba hadügün fiu áganiñu lun hagarabaagun gürigia hagía luagun Pábulu ani aba hachamuragun fiu hádangiñe dübü luagun darí hasaminarun luagu hilá lan (Adü. 14:19). Gama lumoun, aba lidin Berünawé luma Pábulu lidoun amu fulasu ani aba hasigirun apurichiha. Ida liña lidin houn? Aba hadügün saragu disipulugu ñein ani aba hederebudagüdüni hafiñen hábirigu dandu lau dimurei kei lau hani hénpulu (aliiha huméi Adügaü 14:21, 22). Dandu Berünawé kei Pábulu, mábürühanti harüna íbini héibaahoun, ani barüti katei le buiti houn saragu gürigia. Ítarameme, anhein mábürühan warüna ani aba wasigirun adügei dasi le líchugubei Heowá woun, weresibiruba saragu abiniruni.

HÉNPULU BURÍ LE WAFURENDEIRUBEI HÁMAGIÑE HA AWINWANDUBAÑA UGUÑE WEYU

15. Ka hafurendeirubei lídangiñe lani íbiri Alexander Macmillan hénpulu?

¹⁵ Lidan meha burí irumu le lubaragiñebei irumu 1914, agurabatiña meha lubúeingu Heowá lasuseredun katei hanarimeburiti. Íbiri Alexander Macmillan aban hádangiñe. Ítara kei hiibe-agei íbirigu lidan dan ligía, saminati yebe leresibiraali lan afayeiruahaü lun lawinwandun sielu. Ariñagati lidan aban yanu le líchugubei lidan nefu-hati, irumu 1914: “Másiñati anihán lan lagumuhóun yanu hounti sun gürigia le lunbei níchuguni”. Gama lumoun, mítaranti. Dan lárigiñe, aba labürühan: “Añahein wádangiñe, másiñati yebe samina wamá furesebei lan woudin sielun”. Ani ariñagayati: “Le lunbei wadügüni, wasigirun beresegu lidan weseriwidun lun Wabureme”. Ani ligía ladügübei. Apurichihati meha lau ubebeni ani ruti dǘgüdaguaü houn saragu íbirigu ha adaürǘbaña ladüga hafiñen ani súnwandan meha lidin adamuridagua íbini dan le derebuguhali. Yusu lumuti meha lidaani buidu sun aniha lan agurabahei lafayeiruaha. Ida liña lidin lun lau ladügüni katei le? Abürüha lumuti dimurei le lidan irumu 1966, fiu dan lubaragiñe lounwen: “Derebugumémegili nafiñen uguñe weyu kei súnwandan”. Chóuruti ígira lan aban buiti hénpulu woun súngubei, wóuntima, wagía le barühalibei saragu dan awanda lidan lagübüri Ubóu le, sügǘ luéi dan le wagurabubei (Ebü. 13:7).

16. Ka turobuli le magurabúnti úmabei lagagibudagua íbiri Jennings úara tuma lani weiriou? (Santiagu 4:14).

¹⁶ Gagibuguatiña saragu lubúeingu Heowá luma luriban átuadi ani le magurabun hamuti yebe. Kei hénpulu, afuranguagüdati íbiri Herbert Jennings lidan abahüdaguni luáguti libagari gunda lan meha ligía tuma lani weiriou dan le heseriwidunbei Gana kei misionerugu.b Murusun dan lárigiñe, aba ladarirún aban sandi lábulugu. Ariñagati íbiri Jennings luagu le gádanbalin ítara liña lan kei dimurei le wadarirubei lidan Santiagu 4:14 (aliiha huméi). Abürühati: “Aba wagagibudagun luma turobuli le ani aba wayouragun houn íbirigu hama wamadagu ha Gánabaña, ábati wagiribudun Kanadáoun [lun lagaranihóun nun]”. Íderagua lumuti Heowá íbiri Jennings tau sun lani weiriou lun hasigirun eseriwida lun lau úaraguni íbini lidan lénrengunga le gádanbalin.

17. Ida liña líderaguniña amu íbirigu lani íbiri Jennings hénpulu?

¹⁷ Dimurei burí le lariñagubei íbiri Jennings tídangiñe sun lanigi le wadarirubei lidan abahüdaguni luáguti libagari, chülüti tidoun hanigi amu. Abürühatu aban íbiri: “Úagili aban ariñahani le ánhingichubarun nanigi ítara kei le […]. Lau narihini mosu lan meha lígiruni íbiri Jennings leseriwidun lun lóunigiruni látuadi, adügati lun nagagibudagun lau lubudubu luma le gádanbalina”. Abürühati ábaya íbiri: “Barühadina meha lóugiñe diisi irumu eseriwida kei wéiyaali lidan afiñeni dan le mosu lubéi meha nígiruni neseriwidun ladüga nasandirun luéigiñe nichügü. Aba nasandiragun nungua kei móuniti darí lun nasandirun íruni dan le naliihani abahüdaguni luáguti habagari íbirigu […]. Gama lumoun, adügati lawandun íbiri Jennings lun lederebugudun nafiñen”. Haritaguagüda lumutiwa le gayara lan wíchugun dǘgüdaguaü houn amu dan le wawanduni turobuli magurabúnti le wásügürübei. Ligíati, íbini mama lan wabagariduñein ibagari kei le aubei yebe wabusenrei, gayaraati wíchugun aban hénpulu lánina afiñeni luma awanduni houn amu (1 Fe. 5:9).

18. Ka wafurendeirubei lídangiñe hénpulu le tíchugubei aban íbiri niheriana to hilaali tani weiriei? (Ariha humóun iyawaü to ayanuhaboun luagu sügǘ le).

¹⁸ Sügühaña saragu lubúeingu Heowá lídangiñe sandi galugurahati COVID-19. Kei hénpulu, anuhein meha aban íbiri Niheria hilaali tani weiriei lóuguati meha éigini tuma ani lougua ligía tiseinsun. Aban weyu binaafin, dan le ábanrügaali kopu ri tuma, aba tálügüdünu isaani túguchu kaba lan heiga lárigiñe. Aba tariñagun íbiri to tun tisaani lau sun lan úaali lan ni seinsu ni éigini hama, mosu lan háyeihanu würi to meha sarepütana. Tábouguaali lan lagumuhóun heigin ani hafiñeruba lan luagu Heowá sunsuinagubei (1 Uru. 17:8-16). Masaminarungiru yebe luagu kaba lan tábougua amidirugu ligía, ligía hachülürün íbirigu íchiga lubuña éigini tun. Barütiña saragu lubuña ábouguni tun lun lóugiñe bián dimaasu! Ñein tíchiga íbiri to fe aganbaguliña lan Heowá lun le tariñagubei tun tiráü. Chóuruti ánhawa lan afiñera luagu Heowá, gayaraabei lan ladügün turobuli le magurabun wamuti lúntima wayarafadun lun (1 Fe. 5:6, 7).

19. Ka uma lagagibudagua íbiri Alexéi Yershov?

¹⁹ Lidan lagumuhóun burí irumu, gagibuguaaña saragu íbirigu luma sügǘ le másiñati magurabun hamani: kei burí éibaahouni. Ariha waméi likesin aban íbiri rúsiana, le gíribei Alexéi Yershov. Dan le meha labadiseirunbei lidan irumu 1994, mananihantiña meha gumadimatiña ha lídanbaña fulasu le ñein lubéi houn gefentiña luagu Heowá. Gama lumoun, lau lásügürün dan, aba lasansirun katei Rusia. Lidan irumu 2020, aba hebelurun fiu gumadimatiña lúbiñoun íbiri Yershov lau héregu, ani aba hasagarahanu luban, barǘ haméi saragu lídangiñe lílagu. Fiu hati lárigiñe, aba híchugun gumadimatiña lidurun. Lanwoun lira, gürawáruati sun lagararaagun ani le gürawárübalin, aban meha wügüri le barühalibei lóugiñe aban irumu afamura busén lan lasubudirun luagu le tariñagubei Bíbülia. Ma lanarime agarabaaguni!

20. Ka ladügübei íbiri Yershov lúntima derebugu lan lumadagua luma Heowá?

²⁰ Sagaali san íbiri Yershov somu katei buiti lídangiñe luriban sügǘ le? Anha. Derebugutimahali lumadagua luma Heowá guentó. Ariñagati: “Gabügürüguaali nafurieidun úara tuma nani weiriou. Subudi numuti siñabei lan hamuga nawanduni sügǘ burí le lun hamuga míderagun lánina Heowá”. Ariñagayati giñe: “Íderagua lumutina giñe naturiahanu Bíbülia lun mábürühan lan narüna. Ráramaguatina giñe asaminara luagu burí hénpulu le híchugubei lubúeingu Heowá ha lánina binadu dan ha meha úaraguabaña. Anihein saragu abahüdaguni tidan Bíbülia le arufudubalin súdini lan wakipurun darangilaü luma lun wafiñerun luagu Heowá”.

21. Ka wafurendeirubei lidan aturiahani le?

²¹ Ka wafurendeirubei lidan aturiahani le? Íbini lan ibidiñe lan woun kaba lan asuseredubei woun lidan Ubóu le, ánhawa afiñera luagu Heowá súnwandan, aranseñu luba lun líderaguniwa. Kei lariñaguni bérusu le lébunabei aturiahani le, “sügütiña ha harumabaña lídangiñe saragu wuribani, gama lumoun sefu lumutiña Aburemei lídangiñe súngubei” (Sal. 34:19). Ligíati, metenira wamá lun lénrengunga le wásügürübei, teni wamá lun lubafu Heowá le gayaraabei lágüdahaniwa. Ítara luba gayara lan wariñaguni dimurei le lariñagubei apostolu Pábulu: “Sun katei gayara numuti lidan Kristu le íchugubei erei nun” (Fili. 4:13).