Kipu waméi “ligemeri Ha” durungu

1. Ka tariñagubei Bíbülia luagu ínsiñeni inarüniti?

ANIHÁN dimurei le tariñagubei Bíbülia luagu ínsiñeni inarüniti: “Ítara liña lisü ínsiñeni kei watu gemeti, ligemeri Ha”. “Ni lidunari sun barana, lásiñarubei ínsiñeni éñegucha; ni duna éibaaguati lásiñarubei giñe éñegucha” (Ure. 8:6, TNM, 7).b Ma lubuidun burí dimurei! Arufudati dimurei burí le ínsiñeni lan le hasandirubei maríeitiña hámagua, gayaraati here lan ani gayaraati ladurarun lun sun habagari.

2. Ka lunbei hadügüni maríeitiña lun méñeguchun lan ínsiñeni le hasandirubei hámagua?

² Mosu háfagun maríeitiña lidan sun habagari lun magumuchagun lan ínsiñeni le hasandirubei hámagua. Samina wamá luagu watu gemeti. Lun méñeguchun lan watu le, mosu wíchugun lubúa. Anhein madügün gürigia ni kata, léñeguchuba. Ligiaméme asuseredubei lau ínsiñeni le hádanbei maríeitiña: ánhaña meteni lun, léñeguchuba. Gama lumoun, anihein dan gayara lan ladügün lénrengunga lánina maseinsuni, luriban átuadi luma hagüriahóun irahüñü, lun lagumeserun ínsiñeni le abulubuda. Anhein maríei hubéi, ka gayaraabei hadügüni lun hakipuruni “ligemeri Ha” durungu? Lidan aturiahani le, warihuba ǘrüwa katei le gayaraabei líderagunün lun derebugu lan hibagari keisi maríeitiña luma lun gunda humá.c

SIGÍ HUMÁ EDEREBUDAGÜDEI HUMADAGUA LUMA HEOWÁ

3. Ka uagu megei habéi maríeitiña lun gamadagua hamá luma Heowá lun méñeguchun lan ínsiñeni le hasandirubei? (Apurichihati 4:12; ariha humóun giñe iyawaü).

³ Lun hakipuruni maríeitiña “ligemeri Ha” durungu, mosu háfaagun lun hadügün aban lubuidun umadaguaü luma Heowá. Ka uagu wariñagei le? Ladüga anhein gebegi lubéi hamadagua luma Heowá houn, aranseñu haba lun hasigiruni ladundehan lau sun hagundan. Ítarati, gayaraabei hagagibudagun luma furumiñeguarügü turobuli le gayaraabei ladügün lun ladiliruni ínsiñeni le hasandirubei hámagua (aliiha huméi Apurichihati 4:12). Lanwoun lira, ha lumadagubaña Heowá, áfaaguatiña lun ítara hamá kei ligía ani áyeiha hamuti lubuidun ligaburi. Kei hénpulu, buiti hagaburi, gaguraasuntiña, ani feruduna hagía (Efe. 4:32-5:1). Ida luba ua lan ínsiñeni hadan maríeitiña ha arufudubaña aban ibagari ítarati? Ariñagatu aban íbiri gíritu Lena, to barüharuboun lóugiñe 25 irumu maríeiñu: “Ménrengunti larufudún ínsiñeni luma inebesei lun aban gürigia le gamadaguabei lungua luma Heowá!”.

4. Ka uagu lanúadirei Heowá Hosé tuma María lun hagíaba lan lagübürigu Mesíasi?

⁴ Ariha wamá aban sügǘ tídangiñeti Bíbülia. Hádangiñe sun ladügawagun Dawidi, aba lanúadiruni Heowá Hosé tuma María lun hagíaba lan lagübürigu Mesíasi. Ka san uagu lanúadiraña? Ladüga lumadagu lan biángubei hagía, ani subudi lumuti meha híchugubei lan hamadagua luma lidan furumiñeti lúgaaru lidan habagari súnwandan. Ka gayaraabei hafurendeiruni maríeitiña lúmagiñe Hosé tuma María?

5. Ida luba gayara lan háyeihani wügüriña maríeitiña Hosé?

⁵ Súnwandan meha lafalaruni Hosé ladundehan Heowá ani adügati le lun aban lan wügüri buiti. Ǘrüwañein wéiyaasu líchugun Bungiu adundehani lun, lun lóunigiruniña liduheñu. Ani adüga lumuti lau lóufudagun íbini hénrengu lan (Mat. 1:20, 24; 2:13-15, 19-21). Seremei gaganbadi lan Hosé lun Heowá, ligía gayara lubéi meha lóunigirunu María. Chóuruti adüga lan katei le lun hínsiñetima lan tun María luma lun inebetima lan tun. Huguya wügüriña maríeitiña, gayaraati háyeihani Hosé lau háluahan adundehani tídangiñeti Bíbülia le lunbei líderagunün óunigiraña hiduheñu.d Dan le hafalaruni adundehani le, íbini mosu lan hadügün asansiruni lidan hibagari, arufudatün hínsiñe tan hani weiriou hun. Ani ladügüba katei le lúntima derebugu lan hibagari keisi maríeitiña. Ariñagatu aban íbiri to awinwanduboun Banuatu, to barüharuboun lóugiñe 20 irumu maríeiñu: “Dan le narihini nani weiriei áluahei ladundehan Heowá ani falá lumuti, ábatima inebe lan nun. Chóuruti nasandiragun nungua ani afiñetina luagu le lanúadirubei ladügün”.

6. Ka gayaraabei hafurendeiruni würiña maríeitiña túmagiñe María?

⁶ Gamadaguatu meha María luma Heowá. Mama Hosé ínchahabarun lun gamadagua tan luma Heowá luma lun tafiñerun luagu. Subudi tumutu meha Lererun Bungiu buidu buidu (Luk. 1:46). Lanwoun lira, díreitu meha dan lun tararamagun asaminara luagu le taliihabei (Luk. 2:19, 51). Kei buidu lubéi meha tumadagua María luma Heowá, adügati le lun aban tan weiriou buitu. Saragu würiña kristiánugu uguñe weyu, áfaaguatiña lun háyeihanu María. Ariha waméi tikesin Emiko. Ariñagatu: “Dan meha le mamarieidungidina, nuguya meha adügübalin sun le lunbei nadügüni lidan numadagua luma Heowá. Lárigiñe namarieidun, nánihali meha weiriei afurieida wawagu biángubei ani ligíaali etenirubei lun wamadagua luma Heowá. Aba níchugun fe luáguhali lan meha le ladügübei nani weiriei dipeni lan nafiñen. Subudi numuti meha mosu lan náfaagun nuougua. Nuguya lunbei nederebudagüdüni numadagua luma Heowá. Ligíati nadireirunbei dan lun gayara lan nafurieidun lun Heowá, naliihanu Lererun luma lun nararamagun asaminara luagu le naliihabei” (Gal. 6:5). Würiña maríeitiña, anhaün asigira áfaagua lun habuiduragüdüni humadagua luma Heowá, hínsiñetimabadün houn hánigu weiriei ani hariñaguba hun buidu lan hadüga (Ari. 31:30).

7. Ka gayaraabei hafurendeiruni maríeitiña lúmagiñe Hosé tuma María?

⁷ Nadagimeinti giñe Hosé tuma María úara lun hederebudagüdüni hamadagua luma Heowá. Subudi hamuti meha súdini lan háhuduragun lun Heowá kei iduheñu (Luk. 2:22-24, 41; 4:16). Chóuruti anihein lan dan meha hénrengu lan katei le houn, dántima le aganwoundeina hamá hasaanigu. Lau sun lira, buiti lidin houn. Ma lubuidun hénpulu houn maríeitiña uguñe weyu! Anhein gasaanigu hubéi, gayaraati giñe hénrengu lan hun haranserun lubá hudin adamuridagua luma lun hasagarun dan lun haturiahan luma lun hafurieidun úara o lun háhuduragun kei iduheñu. Gayaraati giñe hénrengu lan houn aban feru maríeitiña hasagarun dan lun haturiahan luma lun hafurieidun úara íbini biánguarügüñanu lan. Haritagua huméi ánhadün lan áhuduragua lun Heowá úara, hederebudagüdübei lan humadagua luma ani yarafatimabei hasandiragun hungua keisi maríeitiña. Ligíati, ru huméi háhuduragun lun Heowá lidan furumiñeti lúgaaru.

8. Ka gayaraabei hadügüni maríeitiña ha gaturobulinbaña lun hasagarun buiti lídangiñe háhuduragun keisi iduheñu?

⁸ Ka gayaraabei hadügüni anhein gaturobulin hubéi lidan hibagari keisi maríeitiña? Háfuga mabusenrunbadün hadügüni áhuduraguni keisi iduheñu. Anhein ligía lubéi asuseredubei hun, ka uagu magumeserun hubéi akutiha somu ariñahani chátiti le hínsiñeti hun ani le uágubei habusenra hayanuhan? Gayaraati ladügün katei le lun hederebudagüdüni hibagari keisi maríeitiña luma lun habusenrun háhuduragun lun Heowá úara.

SÜGǗ HUMÁ DAN ÚARA

9. Ka uagu lunti lubéi hásügürün maríeitiña dan úara?

⁹ Lunti hásügürün maríeitiña dan úara lun madilirun lan ínsiñeni le hasandirubei hámagua. Líderagubaña hásügürün dan úara lun hetenirun lun le lasaminarubei luma le lasandirubei kada aban hádangiñe (Agu. 2:24). Teni wamá lun le asuseredubei tun Lilia luma lun Ruslán fiu dan lárigiñe hamarieidun, kéiburi lóugiñe 15 irumu guentó. Ariñagatu: “Aba wíchugun fe siñabei lan wásügürün saragu dan úara kei yebe wasaminaruni. Bereseguheitiwa meha lidan wawadigimari luma lidan wafisiute múnada…, ani fiu dan lárigiñe, aba gasaanigu wamá. Aba gunfuranda wamani ánhawa lan madireirun dan lun wásügürüni úara, wadisedaguba lan wawariuagua”.

10. Ida luba hafalaruni maríeitiña le lariñagubei Éfesuna 5:15, 16?

¹⁰ Lun hásügürün maríeitiña dan úara, háfuga mosu lan hadügün aransehani buiti luma lun háluahan chansi lun hadügüni (aliiha huméi Éfesuna 5:15, 16). Ariñagati aban íbiri le awinwandubei Niheria, le gíribei Uzondu: “Dan le naransehani ida luba lan nayusuruni nidaani, bürǘ numuti dan le lunbei násügürüni tuma nani weiriou. Lugundun sagüráuti dan le násügürübei tuma” (Fili. 1:10). Ariha waméi tani Anastasia hénpulu, lani aban óunigiruti sirkuitu weiriou, ha awinwandubaña Moludáwia. Ariñaga tumuti ida liña lan tayusuruni tidaani buidu: “Adüga numuti le nemegeirubei nadügün dan le aniha lan nani weiriei beresegu etenira lun le lunbei ladügüni. Ítara, gayaraabei wásügürün dan úara dan le wagumuchuni waberesegun”. Ánheinti beresegu habéi maríeitiña ani madaanitiña lun hásügürün dan úara?

11. Ka meha dasi ladügübei Akila tuma Pürisika úara?

¹¹ Gayaraati hafurendeirun maríeitiña saragu lúmagiñe Akila tuma Pürisika, aban feru maríeitiña hínsiñewatiña ha meha awinwandubaña lidan furumiñeti sígulu (Rom. 16:3, 4). Íbini mayanuhan tan Bíbülia saragu hawagu maríeitiña ha, ariñagatu nadagimein hamá meha úara, apurichiha hagía úara ani íderagua hagía amu gürigia úara (Adü. 18:2, 3, 24-26). Ani dan tayanuhan Bíbülia luagu Akila tuma Pürisika, súnwandan úarañanu lan.

12. Ka gayaraabei hadügüni maríeitiña lun hásügürün dan úara? (Ariha humóun giñe iyawaü).

¹² Ida luba gayara lan háyeihani maríeitiña Akila tuma Pürisika? Samina humá luagu dasi le lunbei hadügüni kada aban hídangiñe. Gayaraati funa san hetenirun lun lídangiñe dasi le úara lubaragiñe hadügüni hábugua? Kei hénpulu, apurichihati meha Akila tuma Pürisika úara. Héchutün san adügei ligiaméme? Nadagimeinti meha giñe Akila tuma Pürisika úara. Lidan hikesin háfuga ámuñegueinarügü lan le ídanti huádigimarida biángubei huguya. Gama lumoun, gayaraati san hadügün fisiu múnada úara? (Apur. 4:9). Ánhadün íderagua húmagua, buídubei hasandiragun hungua ani gachansinbadün lun hayanuhan. Barühali Robert tuma Linda lóugiñe 50 irumu maríeiñu. Ariñagati: “Le linarün katei lóuguati wadaani lun wásügürün dan úara. Lau sun lira, dan le nachibaguñein lan asiedu ani anuhán nani weiriou amabeidagüdei o dan le narumadahaña lan lau burí fuluri, aba tiabin íderaguana ani aba nasandirun saragu ugundani. Wadügün katei úara, adügati lun lidan wamá aban, ani aba aganwoundeina lan ínsiñeni le wasandirubei wámagua”.

13. Ka lunbei hadügüni maríeitiña anhein busén habéi lun lidan hamá aban?

¹³ Mabulieida huméi mama lan ligiaméme úara humá kei lun lidan humá aban o yarafagua humá. Ariñagatu aban íbiri maríeitu to awinwanduboun Bürasíli: “Kei weiri lan waberesegun, ménrengunti wasaminarun lídanñadiwa lan aban o wásügürüña lan dan úara ladügarügü wawinwanduña lan úara tidan ábanmeme muna. Gama lumoun, rúhadina fe mítaran lan. Ua lan buídurügü lan lidan wamá aban, mosu wadügün amu katei. Ábaya katei le lunbei nadügüni, mosu lan netenirun lun le lemegeirubei nani weiriei”. Ariha huméi san lun le ladügübei Bruno tuma Tays to lani weiriou lun hetenirun lun le hemegeirubei. Ariñagati: “Lun buidu lan dan le wásügürübei úara, aba wareiduni wagagamurun”.

14. Ka gayaraabei hadügüni maríeitiña dan le mínsiñe lan houn hásügürün dan úara?

¹⁴ Ánheinti mínsiñe lubéi hun hásügürün dan úara? Háfuga mínsiñeti ligiaméme katei hun ani anihein dan, aba hagañidun húmagua. Anhein ligía lubéi asuseredubei hun, ka gayaraabei hadügüni? Samina humá luagu watu gemeti le buga uágubei wayanuha. Dan le lagumeserun watu le adurangua murusunrügüñein ligemeri. Lun ladurangun luma lun hara lan buidu, mosu lichugún lubúa murusun murusun darí lun ladurangun buidu buidu. Ítarameme, houcha humá hásügürün murusun dan sagü weyu úara. Áluga humá hadügün somu katei le hínsiñebei hun hadügün ani le lunbei manügün lan turobuli hun (Sant. 3:18). Ánhadün agumesera adüga katei úara murusun murusun, gayaraabei haduranguagüdüni ligemeri ínsiñeni le hasandirubei húmagua.

ÓUSERAGUA HUMÁ HÚMAGUA LAU INEBESEI

15. Ka uagu súdini lubéi inebesei lidan habagari maríeitiña?

¹⁵ Súdiniti inebesei lidan habagari maríeitiña. Ítara liña kei garabali le akipurubalin watu durungu. Anhein máfuahan garabali, aba léñeguchun watu furese. Ítarameme, ánhaña marufudun maríeitiña inebesei hóuniwagua, ábame adilireina lan ínsiñeni le hasandirubei hámagua murusun murusun. Ánhaña óuseragua maríeitiña houngua lau inebesei, madilibei ínsiñeni le hasandirubei hámagua. Lau sun lira, gabaroun huméi huguya, wügüriña o würiña, mama lan hasaminarun arufuda humá inebesei súdinibei, le súdinitimabei lun hasandiruni hánigu paaná inebewa hamá. Barüharu Penny lóugiñe 25 irumu maríeiñu luma Aret. Ariñagatu: “Kei le inebegua wabéi wagía biángubei wámagua, sandiwati ínsiñeni ligía wábiñe. Furanguti wariñaguni le wasaminarubei luma le wasandirubei, manufudeuga, ladüga gebegi lan le lariñagubei kada aban wádangiñe woun”. Kati gayaraabei hadügüni maríeitiña lun hasandirun inebegua hamá hámagua? Ariha waméi ka lan meha ladügübei Abüraámü tuma Sara.

16. Ka gayaraabei hafurendeiruni wügüriña maríeitiña lúmagiñe Abüraámü? (1 Féduru 3:7; ariha humóun giñe iyawaü).

¹⁶ Óusera lumutu meha Abüraámü Sara lau inebesei. Aganba lumuti le tabusenrubei tariñagun ani gabaroun lumuti le tasandirubei. Luagu aban dan, dan le nidiheri tubéi Sara saragu, aba tariñaguni lun Abüraámü wuriba lan tasandiragun tungua ani aba tíchuguni duru luagun, ariñaga tuguya ladüga lan. Lau sun lira, magañidunti tuma ani móuserun lumutu giñe wuriba. Subudi lumutu buidu, ani subudi lumuti inebe lan tun kei ichügüdinaü le líchugubei Heowá tun, ani súnwandan meha túaradun luma lidan le lanúadirubei ladügün. Le ladügübei, aba laganbuni le lunbei tariñaguni ani hóuchati laranseruni turobuli ligía (Agu. 16:5, 6). Ka wafurendeirubei lídangiñe sügǘ le? Furendeitiwa wügüriña lan maríeitiña ichügüdinaübaña hábiñe ani hagía lúnbaña hanúadiruni kaba lan hadüga (1 Ko. 11:3). Gama lumoun, kei hínsiñe tubéi hani weiriou houn, gabaroun hamuti le tasandirubei, dántima le ladügüba lan le hanúadirubei hadügün buiti o wuribati tun (1 Ko. 13:4, 5). Gayaraati giñe ñeinbei lan dan gibe lan katei lun tichügü hani weiriou ani mégeiboun tariñaguni le tasandirubei lun tawaragun. Óusera humutu san lau inebesei luma gudemehabu lau hararamagun aganbei le lunbei tariñaguni? (Aliiha huméi 1 Féduru 3:7). Barüharu Angela luma Dimitri kéiburi 30 irumu maríeiñu. Ariñaga tumuti ka lan ladügübei tani weiriei lun tasandirun inebewa tan: “Aganba lumutina Dimitri súnwandan dan le wuriba lan nuéyuri o dan le busenrügü nan nayanuhan. Gaguraasunti nubá, íbini dan le nayanuhan lau irofuni o dan le hiru nan”.

17. Ka gayaraabei hafurendeiruni würiña maríeitiña túmagiñe Sara? (1 Féduru 3:5, 6).

¹⁷ Arufuda tumuti meha Sara inebe lan Abüraámü tun lau tíderaguni lidan le lanúadirubei ladügün (Agu. 12:5). Luagu aban dan, aba leresibiruniña Abüraámü fiu wügüriña ha achülürübaña lúbiñoun mawisahanga. Ábati lamuriahan tuma Sara lun tadügün saragu fein íbini bereseguñoun lan adüga amu katei (Agu. 18:6). Furesegueina, aba tadügüni Sara le lamuriahabei Abüraámü tuma lun tadügüni. Würiña maríeitiña, gayaraati giñe ítara humá kei Sara lau húaradun luma hani weiriei lidan le lanúadirubei ladügün. Anhein hadüga ítara, derebugubei hibagari keisi maríeitiña (aliiha huméi 1 Féduru 3:5, 6). Dimitri, le uágubei wayanuha lidan párafu le lubaragiñebei le, ariñaga lumuti ka lan tadügübei lani weiriou lun tadügün lun lasandirun inebewa lan: “Subudi numuti túaraduba lan nani weiriou numa dan le nanúadirun nadügün somu katei, íbini dan le múaran lan le nasaminarubei luma le tasaminarubei. Ani dan le masali lan katei kei le aubei nagurabei, mayanuhantu wuriba nuagu. Ma lanarime neteingiruni lubuidun tigaburi Angela!”. Ma giñe ménrengun lan lasandirúniwa ínsiñeni tuagu aban gürigia to inebehabutu ítara!

18. Kaba habiha maríeitiña ánhaña áfaagua lun madilirun lan ínsiñeni le hasandirubei?

¹⁸ Busenti Satanási lun léñeguchun ínsiñeni le hasandirubei kristiánugu maríeitiña. Subudi lumuti ánhaña lan mínsiñegua maríeitiña hámagua, gayaraabei lan giñe hadisedun luéi Heowá. Gama lumoun, úati ni kata le gayaraabei lagumuchun lau ínsiñeni inarüniti! Ligíati, lunti ítara lan ínsiñeni le hasandirubei kei ínsiñeni le iridúbei tidan líburu to gíriboun Uremu. Ru huméi Heowá lidan furumiñeti lúgaaru lidan hibagari keisi maríeitiña, ani sügǘ humá dan úara, arufuda huguyame inebesei húmagua lau hetenirun lun le hasandirubei luma le hemegeirubei. Anhein hadüga ítara, líchuguba hibagari keisi maríeitiña uéiriguni lun Heowá —le úmagiñebei liabin ínsiñeni inarüniti—, ani ítara luba ínsiñeni le hasandirubei kei watu gemeti le unbei téniwa lan: durungu luba lun súnwandan.