Ánhawa gaguraasun ani darangila wagía, hérebadiwa

1. Ka luwuyeri álügüdahani gayaraabei hadügüni wapanaagu lidan wadagimanu o leskuelarugu woun?

IDA liña san hasandiragun hungua dan le lálügüdünu aban hupaaná lidan wadagimanu o leskuelarugu luagu hafiñen? Aba san hanufudedun? Saragu wádangiñe ítara liña wasandiragun woungua. Gama lumoun, álügüdahani libe le gayaraati ladügün lun wasubudiruni ka lan hasaminarubei o ka lan hasandirubei gürigia ani ruti giñe chansi woun lun wapurichihan houn. Lau sun lira, anihein dan hadügün álügüdahani woun lun hasigenehan wamá ani moun lumuti hamuga taweiridun wanigi luagu katei le. Másiñati aba lan hafiñerun lun le hariñagubei amu gürigia wawagu (Adü. 28:22). Lanwoun lira, wawinwanduña lidan “lagumuhóun dan”, aban dan le ñein lubéi “magudemehabu” hamá gürigia ani ‘hanarimetiña’ (2 Tim. 3:​1, 3).

2. Ka uagu buidu lubéi lun gaguraasun wamá?

² Másiñati hálügüdagun hungua ida luba lan hárügüdagun hungua ani kipu huguyame darangilaü dan le lasigenehan aban gürigia huma luagu hafiñen. Anihein aban igaburi le lunbei líderagunün: gaguraasuni. Aban gürigia gaguraasunti magañidunti lau lóufudagun ani gayaraati lárügüdagun lungua dan le lañawarihóun lun o dan le ibidiñe lan lun ida luba lan lóunabun (Ari. 16:32). Háfuga gayara lan hasaminarun hénrengubei lan hun hárügüdagun hungua. Gama lumoun ida luba san gayara lan wafurendeirun óusera lau igaburi le? Kaba adundehani gayara líderagunün lun gaguraasun humá dan le busén hamá amu gürigia hasigenehan huma luagu hafiñen? Ánheinti gasaanigu hubéi, ida luba gayara lan híderaguniña hisaanigu lun hayanuhan luagu hafiñen lau darangilaü? Ariha waméi.

IDA LUBA WÁFAAGUN LUN GAGURAASUN WAMÁ

3. Ka uagu wariñaga here hamá gürigia ha gaguraasunbaña? (2 Timotéu 2:​24, 25).

³ Gürigia le gaguraasunbei úati débili lan, lubaragiñe lira héreti. Mégeiti aban gürigia here lan lun lárügüdagun lungua laganagua lénrengunga. Gaguraasuni ligía aban lídangiñe ‘igaburi le líchugubei sífiri’ (Gal. 5:​22, 23). Dimurei güriegu le ásügürawagüdübei kei “gaguraasuni” anihein dan yúsuati lun layanuhóun luagu aban gabayu áraabuna le masuwaali. Samina humá luagu asansiruni le? Lúmagiñe aban lan gabayu áraabuna darí lun aban lan gabayu gumadiwali…, lau sun lira heremémegili. Agia wagía? Ida luba gaguraasun wamá ani here wagía? Siñati wadügüni wagía wábugua, mégeitiwa wamuriahani sífiri sandu luma Bungiu. Arihúaali furangu gayara lan wafurendeirun lun gaguraasun wamá. Kei hénpulu, arufuda hamaali saragu gefentiña luagu Heowá lubuidun igaburi le dan le busén hamá amu gürigia hasigenehan hama, ani adügati katei le lun hayanuhan amu gürigia buidu hawagu gefentiña luagu Heowá (aliiha huméi 2 Timotéu 2:​24, 25). Ka gayaraabei hadügün lun aban humá gürigia gaguraasunti?

4. Ka wafurendeirubei lídangiñe lani Isaakü hénpulu?

⁴ Lidan saragu abahüdaguni le tídanbei Bíbülia arufuda tumuti weiri lan lebegi gaguraasuni. Kei hénpulu, dan meha le lawinwandunbei Isaakü Gerarü, aba meha hagumeserun filistéana ha awinwandubaña lidan fulasu ligía agimugarei ani aba hagumeserun adourei sun fusu le meha hachíahabei lubúeingu lúguchi lau múa. Lubaragiñe lageindagun Isaakü hama lun lakipuruni fusu burí ligía, aba lidin Isaakü dise hawéi ani aba lachiahan amu burí fusu (Agu. 26:​12-18). Gama lumoun ábanya hariñagun filistéana hadunari lan giñe duna le lídanbei fulasu le ñeinhin lubéi lidin. Lau sun lira, darangilati Isaakü (Agu. 26:​19-25). Ka íderagubalin Isaakü lun darangilu lan íbini dan le hañawarihan lun saragu? Chóuruti furendei lan saragu lídangiñe hani lagübürigu hénpulu. Óuserati meha Abüraámü: lau aban igaburi darangilati ani Sara anihein meha aban igaburi gálumati tuagu, ani darangilatu meha giñe (1 Fe. 3:​4-6; Agu. 21:​22-34).

5. Ka hénpulu arufudubalin gayara lan harufudahan agübürigu houn hasaanigu lun gebegi lan darangilaü houn?

⁵ Gayaraati giñe harufudahan agübürigu kristiánu houn hasaanigu lun gebegi lan darangilaü houn. Ariha waméi le asuseredubei lun Maxence, aban nibureinti disedübei irumu lau. Gagibuguati meha hama gürigia leskuelarugu luma lidan apurichihani ha wuribati housan. Lau gurasu, íderagua hamuti lagübürigu lun darangilu lan. Ariñagatiña: “Gunfuranda laali wasaani mégeiwatima lan erei lun lárügüdagun aban gürigia lungua sügǘ lau lagañidun o lafayeihan wuribani luagu wuribani”. Ma lubuidun gagaburi laali lan Maxence lubuidun igaburi le!

6. Ida liña líderaguniwa furíei lúntima darangilu wamá?

⁶ Samina humá laganaguañadün lan aban sügǘ hénrenguti. Kei hénpulu, aba lariñagun aban gürigia katei wuribati luagu Heowá o aba lan ladügün bula lau le tarufudahabei Bíbülia. Kaba íderaguawa lidan katei le? Líderagubadiwa wamuriahan luma Heowá lun líchugun sífiri sandu luma lichú aau woun lun wóunabun lau darangilaü. Ani ka gayaraabei wadügün ánhawa íchiga fe gayara lan hamuga buídutima lan wóunabun? Wayanuhaya luma Heowá luma lun wasaminarun ida luba lan buídutima lan wóunabun lidan amu dan. Anhein wadüga ítara, líchugubei Heowá lani sífiri sandu woun lun gayara lan wárügüdagun woungua luma lun warufudun darangilaü.

7. Dan le wagagibudagun luma sügǘ hénrenguti, ida luba gayara lan líderaguniwa wasubudirun fiu bérusu tídangiñeti Bíbülia wachüguagu? (Ariñawagúni 15:​1, 18).

⁷ Líderagubadiwa saragu bérusu tídangiñeti Bíbülia lun wayanuhan lau darangilaü dan le wagagibudagun luma sügǘ hénrenguti. Gayaraati líderaguniwa sífiri sandu lun waritaguni bérusu burí le (Huan 14:26). Kei hénpulu, anihein adundehani tidan líburu Ariñawagúni le lunbei líderaguniwa lun darangilu wamá (aliiha huméi Ariñawagúni 15:​1, 18). Arufudati giñe woun buídubei lan lidin woun ánhawa árügüdagua woungua dan le laganagua sügǘ hénrenguti (Ari. 10:19; 17:27; 21:23; 25:15).

LÍDERAGUBADIWA GUNFUNRANDAÜ LUN DARANGILU WAMÁ

8. Ka buídubei lun gabaroun wamani dan le layanuhóun wuriba luagu wafiñen?

⁸ Gayaraati giñe líderaguniwa gunfurandaü (Ari. 19:11). Gürigia le gufunrandabei ragüguati lungua dan le layanuhan somu gürigia wuriba luagu lafiñen. Liibe-agei dan, dan le hadügün gürigia álügüdahani woun mariñagun hamuti ka lan lébunabei hadügünbalin álügüdahani burí le woun. Ligíati, lubaragiñe wóunabun, buiti lun waritaguni ibidiñe lan woun ka lan uagu layanuha gürigia ligía luagu ítaga katei (Ari. 16:23).

9. Ida liña larufudun Hedeón gunfurandaü luma darangilaü?

⁹ Samina wamá luagun Hedeón. Luagu aban dan, aba hagañidun wügüriña lani Éfürain türibu ladüga magunbirahan lániña Hedeón lun hidin awuribuha hama háganiñu ísüraelina. Ka funati lébunabei hagañidunbei saragu hama? Ladüga funa san hasandiragun houngua mabahüdün hamá? Meberesenga ka lan lébunabei hagañidun, gunfuranda lumutiña Hedeón ani inebeti le hasandirubei lun, ani óunaba lumutiña lau darangilaü. Ka libihubei? Ariñagatu Bíbülia dan le lan lóuserubaliña Hedeón lau aban lubuidun igaburi “aba lásügürün hagañi” (Ali. 8:​1-3).

10. Ka gayaraabei líderaguniwa lun buidu lan wóunabun dan le wálügüdün luagu wafiñen? (1 Féduru 3:15).

¹⁰ Másiñati lálügüdüniwa aban wapaaná lánina wadagimanu o wapaaná leskuelarugu ka lan uagu gaganbadi wabéi lun adundehani le tíchugubei Bíbülia luagu laruman ibagari. Inarüni busén wamá wayanuhan luéigiñe wafiñen, gama lumoun mosu, inebe lan le hasaminarubei amu woun (aliiha huméi 1 Féduru 3:15). Aban katei le gayaraabei líderaguniwa warihini álügüdahani le hadügübei gürigia kei aban chansi lun wasubudiruni ka lan hadiheribei, sügǘ lau warihini kamá hamuga busenrügütiña hasigenehan wama. Meberesenga ka lan uagu hadügei álügüdahani le woun, buiti lun wóunabun lau darangilaü luma lau ínsiñehabuni. Gayaraati ladügǘn óunabagülei le wíchugubei lun hasaminarun luagu álügüdahani le hadügübei. Le wabusenrubei lun wayanuhan súnwandan lau ínsiñehabuni, íbini dan le hayanuhan woun lau irofuni o hadügün bula wau (Rom. 12:17).

11, 12. Ka lunbei gabaroun wamani furumiñe lubaragiñe wóunabun aban álügüdahani? Ru huma aban hénpulu luagu ida luba lan ladügün katei le lun wayanuhan lau darangilaü. (Ariha humoun giñe iyawaü).

¹¹ Samina wamá aba lan lálügüdüniwa aban wapaaná lidan wadagimanu ka lan uagu mefeduhan wabalin lagunfulirun gürigia irumu. Kaba uagu gayara lan wasaminarun lubaragiñe wóunabuni? Saminati funa san mígirun wamá lun wásügürüni buidu? O nidiheriti funa san luagu gayaraabei lan wagadeiruni lubuidun hásügürüni kei paanagu lidan wadagimanu? Gayaraati wariñagun lun seremei wamani saragu luagu berese lan hawagu lupaanágu ani gayaraati wachoururuni lun busén wamá giñe lun buidu lan hásügürüni wapanaagu. Másiñati gayaraabei lan ladügün katei le lun darangilu lan luma lun líchugun chansi woun lun wayanuhan luma luagu le tafuranguagüdübei Bíbülia luagu lefeduhóun lagunfulirún irumu.

¹² Gayaraati wadügüni ligiaméme dan le hadügün álügüdahani le barüti sigenei. Kei hénpulu, másiñati lariñagun aban wapaaná leskuelarugu luagu mosu lan hamuga hasansiruni gefentiña luagu Heowá le hasaminarubei hawagu magüsi. Lariñagubei san ítara, ladüga funa san ibidiñe lan lun ka lan lébunabei hafiñen gefentiña luagu Heowá? Anihein funa aban lumada o aban liduhe le magüsi? Ladüga funa san lasaminarun iyereegu hamá magüsi woun? Fagua mosu lan wachoururagüdüni lun berese wamá hau sun gürigia ani inebe lan haricha gürigia woun lun hanúadiruni le habusenrubei hadügün (1 Fe. 2:17).b Háfuga ítara líchuguba chansi woun lun wafuranguagüdüni lun ka lan uagu buidu lubéi wafalaruni adundehani le tídanbei Bíbülia.

13. Ida luba gayara lan líderawagun aban gürigia le ariñagubei libidiounigan lan aau lafiñerúniwa luagu Bungiu?

¹³ Dan le magundan lan aban gürigia lau wafiñen aba lariñaguni le lasaminarubei, moun lumuti wóufudahan asaminara luagu subudi wamani kátima lan lasaminarubei gürigia ligía (Titu 3:2). Samina ban aba lan lariñagun aban bupaaná tidan leskuela bun libidiounigan lan aau lafiñerún luagu Bungiu. Basaminaruña hamuga san afiñerügü liña lan luagu saliguarügü lan sun katei ítaraguarügü ani subudi lan luáguti tema le lun saragu? Le linarün katei gayaraati lariñagarügüñein lan katei le laganbubei. Ligíati, lubaragiñe basigenehan luma luagu saliguarügü lan sun katei, le buídutimabei bariñagun somu katei lun le adügüti lun lasaminarun. Másiñati gayara lan bóunahan aban enlace lun lídangiñe jw.org lau ariñahani o bidéu luáguti adügǘwarügü lan sun katei le geyegubei wau. Gayaraabei lárigiñe lan larihini ariñahani burí le, busenbei lan larihin ámuya ariñahani wama. Ayanuha humá luma lau inebesei háfuga lasansiruni ligaburi lisaminan.

14. Ida liña layusuruni Niall jw.org lun líderagun aban lupaaná le wuribabei lasaminarun hawagu gefentiña luagu Heowá?

¹⁴ Yusu lumuti aban nibureinti gíriti Niall jw.org lun líderagun aban gürigia le asaminarubei wuriba wawagu wagía gefentiña luagu Heowá. Ariñagati Niall: “Súnwandan meha lariñagun aban nupaaná leskuelarugu nun mafiñen nan tuagu siensia, tuagu lan aban líburu lánina úraga nafiñera”. Kei meha le mígirun lubéi lupaaná Niall lafunranguagüdüni lafiñen lun, ábaha lariñagun Niall lun, lun larihini ariñahani le lídanbei jw.org lidan fánreinti “La Biblia y la ciencia”. Murusun dan lárigiñe aba líchugun Niall fe luagu aliiha laali lan lupaaná ariñahani ligía ani ménrenguntimahali lun layanuhan luma luagu lagumeseha ibagari. Wagía sun gayaraati giñe buidu lan lidin woun ánhawa wadüga ítara.

ASAYA HUMÁ HAMA HIDUHEÑU

15. Ka gayaraabei hadügüni agübürigu lun híderaguniña hasaanigu lun hóunabun lau darangilaü?

¹⁵ Gayaraati harufudahan agübürigu houn hasaanigu lun hóunabun lau darangilaü dan le anihein lan somu gürigia le busenti lasigenehan luagu hafiñen (Sant. 3:13). Le hadügübei fiu agübürigu aba hasayahan lidan háhuduragun keisi iduheñu. Akutihatiña tema luagu le gayaraabei halügüdǘn hasaanigu leskuelarugu ani aba hasayahan ida luba lan hóunabun. Lanwoun lira, arufudahatiña houn hasaanigu lun hayanuhan lau darangilaü luma lau aban lubuidun igaburi lun busén hamá gürigia haganbuniña. (Ariha huméi rekuáduru le gíribei “Gayaraati líderaguniña asayahani tílana huban”).

16, 17. Ida luba gayara lan líderaguniña nibureintiña hasayahan hama hagübürigu?

¹⁶ Líderagubaña asayahani hama iduheñu nibureintiña lun hayanuhan lau ichouruni luagu hafiñen, líderagubaña giñe nibureintiña lun hachoururuni hagía guánarügü le hafiñerubei luma lun hafuranguagüdüni lébuna hafiñen houn amu. Lidan ariñahani le gíribei “Nibureintiña” lidan jw.org, anihein giñe fánreinti le gíribei “Ponlo por escrito” ñein, le aranserúbei lun lederebudagüdüni hafiñen nibureintiña luma lun líderaguniña lun hafuranguagüdüni hafiñen lau hererun guánarügü. Anhein wakutiha hama waduheñu ariñahani burí le luma fánreinti le gíribei “Hálügüdahan nibureintiña”, wafurendeiruba súngubei ayanuha luagu wafiñen lau darangilaü luma lau aban lubuidun igaburi.

¹⁷ Ariñagati aban nibureinti gíriti Matthew íderagua lani saragu asayahani le hadügübei keisi iduheñu. Lidan áhuduraguni keisi iduheñu akutihati hama lagübürigu luagu tema le uágubei gayara lan lálügüdawagun leskuelarugu. Afuranguagüdati: “Saminatiwa luagu burí álügüdahani le gayaraabei hadügüni nun ani aba wasayahan luagu ida luba lan nóunabuni lau gabaroun nani le aturiaha wamaalibei. Dan le gunfuranda nani buidu le nafiñerubei, chóuruti nasandiragun nungua ani ménrenguntimati nun lun darangilu nan hama amu”.

18. Según Kolosana 4:6 kábatima un wetenira?

¹⁸ Ñeinbei dan úabei lan buídurügü lan wachoururuni wafiñen lun gayara lan hánharun ha híbiri gürigia lun wafiñen. Gama lumoun, lídehaba wóunigiruni le wariñagubei luma lun wariñaguni lau darangilaü (aliiha huméi Kolosana 4:6). Wayanuhan luagu wafiñen lun somu gürigia ítara liña kamá hamuga wáchürüüña aban bali lun. Gayaraati hámaru lan wáchürüüni, o wáchürüüni lau sun were. Dan le hámaru lan wáchürüüni houn, menrengutimabei lun le aban gürigia lárügüdüni luma lun lasigirun áhurera. Ítarameme, ánhawa ayanuha lau darangilaü ani góunigi wameime le wariñagubei, ladügüba katei le lúntima busén hamá gürigia hasigirun aganbawa luma lun madüraagun hamani yanu. Le linarün katei, anhein busén lubéi somu gürigia lasigenehan wama o ladügün bula wau, mama mosu wasigirun ayanuha luma (Ari. 26:4). Gama lumoun, hiibe-agei gürigia mítarantiña, saragu hádangiñe háfuga haganbubadiwa lan.

19. Kaba ínchahawa lun darangilu wamá dan le wayanuhan luagu wafiñen?

¹⁹ Kei le aubei warihei, buídubei lidin woun ánhawa áfaagua lun darangilu wamá. Amuriaha humá luma Heowá lun líchugun erei hun lun darangilu humá dan le busén hamá amu hayanuhan luagu tema hénrenguti o dan le hayanuhan wuriba wawagu. Mabulieida huméi anhein lan haganba le hasaminarubei amu lau darangilaü lídehaba lun ua lan sigenei ni igañi. Ani gayaraati ladügün aban óunabagülei lau inebesei luma lau darangilaü lun lasansirun le hasaminarubei amu wawagu luma luagu le tarufudahabei Bíbülia. Ligíati, “rúrügü humá inebesei […] aranseñu humá súnwandan lun hóunabuniña ha álügüdütün ka lan lébunabei hemenigin” (1 Fe. 3:15). Darangilu humá ani derebugu huguyame!