Le wafurendeirubei lídangiñe lani Hesusu milaguru tuáguti fein

1. Ida liña meha harihinu gürigia fein lidan tidaani Bíbülia?

FEIN meha héigiboun gürigia lidan tidaani Bíbülia (Agu. 14:18; Luk. 4:4). Kei súdini tubéi meha fein lidan dan ligía, ligíati yusua lubéi dimurei fein tidan Bíbülia lun layanuhóun luagu sun luwuyeri éigini (Mat. 6:11). Yúsuti meha giñe Hesusu fein lidan bián lídangiñe milaguru le ladügübei (Mat. 16:​9, 10). Akutiha waméi aban lídangiñe milaguru le lídanbei kapítulu 6 tidan liliburun Huan, ani ariha waméi kaba lan wafurendeira lídangiñe.

2. Ka dan lemegeirúniwa lun héigagüdüniwa saragu milu gürigia?

² Dan le hagiribudunbei apostolugu lárigiñe hapurichihan, aba hádinun tidoun aban ugunei úara luma Hesusu ani aba hánhiñuraguni barana Galiléa, ábati lanügüniña Hesusu lidoun aban fulasu gíriti Betüsáida yarafa lun uburugu lun gayara lan hemeraagun (Mar. 6:​7, 30-32; Luk. 9:10). Gama lumoun, dan le híchugubei gürigia fe luagu anihein lan Hesusu ñein, lau lóufudagun aba houdin saragu milu gürigia arihei. Aba letenirun houn. Lau saragu ínsiñeni aba layanuhan houn luagu Larúeihan Bungiu ani areidaguagüda laaña sánditiña. Kei meha le dárühali lubéi, aba hálügüdagun disipulugu houngua ida luba lan hadüga sun gürigia ha lun hadarirun heigin. Másiñati añahein lan hádangiñe barütiña murusun éigini hámagua, lau sun lira añahein hádangiñe másiñati mosu lan meha houdin agañeiha éigini lidan burí aüdü le yarafabei (Mat. 14:15; Huan 6:​4, 5). Kábati ladüga Hesusu?

ADÜGATI MILAGURU TAU FEIN

3. Ka ladügübei Hesusu dan le larihini le hemegeirubei gürigia? (Ariha huméi giñe dibuhu le luágubei tidáü garüdia).

³ Aba lariñagun Hesusu houn lani apostolugu: “Mídinbaña, ru humá éigini houn” (Mat. 14:16). Genegeti aba lan katei wéiriti lénrengun lira lugundun añahein meha hawara 5,000 wügüriña, lun hamuga abahüdǘniwa würiña hama irahüñü, kéiburiñanu hamuga 15,000 gürigia (Mat. 14:21). Aba lariñagun Andürési: “Anihán aban irahü ya, anuhein seingü fein luma, hama bián úduraü; gama lumoun lóuguabei lira houn saragu gürigia ha” (Huan 6:9). Fein to lúmaboun irahü ligía tuguya fein kamaniboun ani meseerutu, ánhañati úduraü gayaraati salei lan. Kei mibe lubéi éigini ligía lóuguabei hamuga lun héigagüdüniwa gürigia ha ñéinbaña.

4. Ka wafurendeirubei lídangiñe Huan 6:​11-13? (Ariha humóun giñe iyawaü).

⁴ Kei aban lan wügüri areidati Hesusu aba lamuriaha hama gürigia lun hañuurun kei sétanu ligibuagu sagadi (Mar. 6:​39, 40; aliiha huméi Huan 6:​11-13). Ariñagatu Bíbülia aba lan líchugun Hesusu eteingiruni lun Lúguchi tuagu fein luma hawagu úduraü. Lau ladügüni lira, arufuda lumuti lúmagiñe lan Bungiu liabin éigini ligía. Haritaguagüda lumutiwa le, lunti lan wafurieidun lubaragiñe weigin meberesenga anhein wábuguaba lan weiga o úara lan hama amu. Lárigiñe lafurieidun Hesusu aba líchuguni éigini ligía houn lani apostolugu lun hafanreinhani houn gürigia, ani hóutiña sun gürigia hagía darí hakimuledun. Lau sun lira, ígiraguati éigini ani mabusenrunti meha Hesusu lun lachagarún éigini le ígiragubei. Ligía lariñagunbei houn lani disipulugu lun hóundaraguagüdüni éigini ligía háfuga lun líchuguni houn amu. Ítara liña líchugun Hesusu aban hénpulu woun lau layusuruni le lúmabei lau lichú aau. Gayaraati hayusuruni agübürigu sügǘ le lun harufudahan houn hasaanigu lun hafurieidun, lun gíchigadi hamá luma lun mangin hamá.

5. Ka hadügübei gürigia dan le harihini milaguru le ladügübei Hesusu weyu burí ligía ani ka ladügübei Hesusu?

⁵ Wéiritu meha hanigi gürigia lau ligaburi larufudahan Hesusu luma lau milaguru le ladügübei. Subuditi meha houn gürigia ariñaga lan Moisesi líchuguba lan Bungiu aban profeta espechaliti, ligíati másiñati álügüdagua hamá houngua anhein Hesusu lubéi profeta ligía (2 Lur. 18:​15-18). Anhein ítara liña lubéi, gayaraati samina hamá ábanbei lan urúei Hesusu le buiti ani le gabafuti lun léigagüdüniña sun lílana Ísüraeli. Ligía busén habéi “hanügüni lau erei lun hadügüni urúeime” (Huan 6:​14, 15). Lun hamuga lígiraguagüdün Hesusu lungua lun hadügüni urúeime, ládaraguña hamuga lungua lidoun polítika. Kati ladügübei Hesusu? Ariñagatu Bíbülia, “aba lidin lábugua luagun wübü”. Íbini hadügüdarun luagu, mádaragunti lungua lidoun polítika. Aban buiti hénpulu lira woun!

6. Ida luba wáyeihani Hesusu? (Ariha huméi giñe dibuhu).

⁶ Inarüni mamuriahanbaña lan gürigia wama lun wagibedaguagüdün fein lau aban milaguru ni lun wareidaguagüdün sanditiña. Ani madügünbaña giñe lun urúei wamá o gumadimatiña wamá. Gama lumoun, gayaraati hálugun hafosuruniwa lun wádaragun woungua lidoun katei lánina polítika, o lun wabuduhan luagu somu polítiku o lun wíchuguni wídehan lun somu gürigia le uágubei hafiñera laransehabei lan katei. Furanguti larufuduni Hesusu mádaragun lan lungua lidoun polítika. Ligía lariñagunbei: “Mama yaana narúeihan” (Huan 17:14; 18:36). Wagía kristiánugu buiti lun wáyeihani ligaburi lisaminan luma ligaburi ladügüni Hesusu katei. Luéigiñeñadiwa Larúeihan Bungiu, ayanuhatiwa luagu ani furíeitiwa lun liabin (Mat. 6:10). Ariha wamá kaba lan wafurendeira lídangiñe milaguru le ladügübei Hesusu dan le lagibedaguagüdübarun fein hama úduraü.

LE MINI LUBÉI MILAGURU LE LADÜGÜBEI HESUSU TAU FEIN

7. Ka amu milaguru ladügübei Hesusu, ani ka hadügübei apostolugu? (Huan 6:​16-20).

⁷ Lárigiñebei léigagüdüniña Hesusu saragu gürigia, aba lariñagun houn lani apostolugu lun hagiribudun Kafarünaumu tidan aban guríara, ánheinti ligía aba lidin dise luagu aban wübü lun madügün hamani gürigia urúeime (aliiha huméi Huan 6:​16-20). Lidan luéiyasun ligía, aba ladagarun aban lanarime liñawan dan luma lérouga. Ábati lidin Hesusu hawagun lani disipulugu éibugeina ligibuagun duna ani dan le lachülürün le ñeinhin habéi aba lariñagun lun apostolu Féduru lun léibugun ligibuagun duna (Mat. 14:​22-31). Dan le lamudeirunbei Hesusu tidoun ugunei aba lagalumarun garabali. Lau tueirin anigi aba hariñagun disipulugu lun: “Inarüni luagu Liráü ban Bungiu” (Mat. 14:33).a Mariñagun hamuti disipulugu dimurei le lun Hesusu dan le léigagüdünbei saragu gürigia, ariñaga hamuti lárigiñebei harihini éibuga ligibuagun duna. Ariñagati Márükosu lueirin lan anigi le hawagubei lani Hesusu apostolugu “ladüga úagili lan gunfuranda hamani milaguru le ladügübei tau fein, luagu gabafu lan lun sun katei; deregiru hanigi” (Mar. 6:​50-52). Kei le aubei warihei, úagili meha gunfuranda hamani apostolugu rúhali lan Heowá ubafu lun Hesusu lun ladügün milaguru. Fiu minutu lárigiñe, aba layanuhan Hesusu luagu milaguru le ladügübei tau fein, ani ítara larufudahan ábanya katei súdiniti woun.

8, 9. Ka uagu hóudinbei gürigia áluahei Hesusu? (Huan 6:​26, 27).

⁸ Éigini meha súdinitimabei houn gürigia ha léigagüdübaña Hesusu. Laruganbei, dan le háluahanbalin Hesusu hama lani apostolugu madari hamutiña, ligía lubeiti hádinagunbei gürigia ha tidoun ugunei to ñǘbuinboun Tiweriasigiñe, ábati houdin Kafarünaumu lun háluahani Hesusu ñein (Huan 6:​22-24). Háluahanbalin san Hesusu lun san haganbun luagu Larúeihan Bungiu? Mama lun lira háluahei! Háluahanbalin lun líchugun éigini houn. Ida liña wasubudiruni?

⁹ Ariha waméi le asuseredubei dan le hadarirunbalin gürigia hagía Hesusu yarafa lun Kafarünaumu. Aba lariñaguni Hesusu houn furangu, lébubei lan háluahani lun líchugun éigini houn. Ladüga hou hamá “darí lun hakimuledun” lídangiñe “éigini le gagumuchaditi”. Ábati línchahaniña lun háluahani “éigini le lánina ibagari magumuchaditi” (aliiha huméi Huan 6:​26, 27). Ariñagati giñe houn Lúguchiba lan le siélubei íchigei éigini ligía houn. Dan le haganbunbalin gürigia anihein lan éigini le íchuguti ibagari magumuchaditi, másiñati aba lan taweiridun hanigi. Kati luwuyeri éigini ligía, ani ida luba libihín?

10. Ka lunbei meha hadügüni huríu hagía lun gayara lan hibihin ibagari magumuchaditi?

¹⁰ Genegeti hasaminaruña lan meha huríu hagía mosu lan gaganbadi hamá lun somu lúrudu lun gayara lan heresibiruni éigini ligía. Másiñati hasaminaruña lan luagu Lilurudun Moisesi. Ábati lariñagun Hesusu houn: “Le labusenrubei Bungiu, lun hafiñerun nuagu, au le lóunahabei” (Huan 6:​28, 29). Lun gayara lan libihín “ibagari magumuchaditi”, súdiniti lun lafiñerúniwa luagu wügüri le lóunahabei Bungiu. Le linarün katei, ayanuhaali meha Hesusu luagu katei le (Huan 3:​16-18, 36). Fiu dan lárigiñe, ábaya layanuhan luagu le lunbei ladügǘn lun gayara lan libihín ibagari magumuchaditi (Huan 17:3).

11. Ida liña harufuduni huríu luágurügüñein lan éigini hasaminara? (Sálumu 78:​24, 25).

¹¹ Mafiñentiña meha huríu hagía lunti lan hafiñerun luagu Hesusu. Ligía hálügüdünbalin: “Kábagia seini gayara barufudun woun lun wafiñerun buagu?” (Huan 6:30). Ábati hariñagun lun Hesusu lidan lan meha lidaani Moisesi hou hamá meha hagüchagu maná to ítaraboun kei fein (Neem. 9:15; aliiha huméi Sálumu 78:​24, 25). Furanguti larihíniwa añahagua lan meha asaminara luagu éigini. Mamuriahangubeitiña luma Hesusu lun lafuranguagüdüni houn ka lan mini tubéi “fein siélugiñetu to tímatimaatu”, to ítaraboun kei maná to íchuguboun ibagari (Huan 6:32). Wéiriti hetenirun lun habuinchagüdüni haragei darí lun meberesen hamá lau inarüni lúmagiñeti Bungiu le lálugubei Hesusu larufudahan houn. Ka gayaraabei wafurendeirun lídangiñe sügǘ le?

LÉTIMA SÚDINITIMABEI WOUN

12. Ida liña larufuduni Hesusu kátima lan súdinitimabei?

¹² Anihán aban lídangiñe katei súdiniti le wafurendeirubei lidan kapítulu 6 le tídanbei liliburun Huan: le súdinitimabei wamadagua luma Bungiu. Arufuda laali meha Hesusu katei le dan le lóuchagunbalin Mafia, aba lariñagun: “Mámarügübei tau fein habagarida gürigia; habagariduba giñe lau sun dimurei le lariñagubei Bungiu” (Mat. 4:​3, 4). Lidan yanu le líchugubei luagu wübü, ariñagati súdini lan lumadagua gürigia luma Bungiu (Mat. 5:3). Álügüdagua wamá woungua: “Arufudati san ligaburi nanügüni nibagari súdinitima lan le nayumahabei sügǘ lau numadagua luma Bungiu?”.

13. a) Ka uagu mariban lubéi lun weigin? b) Ka eweridihani lunbei gabaroun wamani? (1 Korintuna 10:​6, 7, 11).

¹³ Maribanti wafurieidun lun Bungiu luagu katei le wemegeirubei luma lun wagundaarun lau (Luk. 11:3). Ariñagatu Bíbülia barǘ lan ugundani lun gürigia leigin latun luma lun lagundaarun lau, lugundun “lúmagiñeti lan Bungiu lira” (Apur. 2:24; 8:15; Sant. 1:17). Moun lumuti wanügüni laluahóun umegeguni kei aban katei súdiniti. Ligía labürühanbei Pábulu houn kristiánugu luagu le hadügübei ísüraelina yarafa lun wübü Sinaí, aba leweridiruniña lun mayumahan hamá “katei wuribati” kei meha le hadügüni ísüraelina (aliiha huméi 1 Korintuna 10:​6, 7, 11). Adügati Heowá milaguru lau líchugun éigini houn, lau sun lira, ladüga luéinamun hagu barǘ hamuti katei le líchugubei Heowá houn kei katei wuribati (1 Lur. 11:​4-6, 31-34). Arufuda hamuti igaburi le lau háhuduragun tun liyawa bágasu lautu golu, lau heigin hatun luma lau hefeduhan, mineben lan lilurudun Heowá houn (Afu. 32:​4-6). Ayanuhati Pábulu luagu sügǘ le houn kristiánugu ha awinwandubaña lubaragiñe lagünrinchawagun Herusalén tuma litenpulun, luagu le lunbei meha lasuseredun lidan irumu 70 lidan wadaani. Wawinwanduña giñe lidan aban ubóu le yarafaalibei lun lagünrinchawagun, ligíati, buídubei lun gaganbadi wamá lun eweridihani le líchugubei Pábulu.

14. Ka tariñagubei Bíbülia luagu éigini lídanme iseri ubóu?

¹⁴ Dan le larufudahanbei Hesusu lun wamuriahan luma Bungiu lun líchugunu “weigan fein to lánina sagü weyu woun”, ayanuhati giñe luagu danme le ladügǘniwa lugundan “ya ubouagu kei ladügǘniwa sielu” (Mat. 6:​9-11). Ida luba ubóu lídanme dan ligía? Ariñagatu Bíbülia danme lan le ladügǘniwa lugundan Bungiu ya ubouagu ñeinbei lan éigini semeeti. Füramaseti Heowá lidan Isaíasi 25:​6-8 lidan lanme Larúeihan ñeinbei lan saragu éigini semeeti. Ariñagati lidan Sálumu 72:16: “Ñeinlá saragu türigu fulasurugu, gibelá türigu lábulugu burí wübü!”. Memeniha san hanigi lun hayusurunu burí türigu burí tuguya lun hásürahanu fein to hínsiñetimaboun hun o hadügün amu burí tuwuyeri fein? Aríaguaadün san hungua lidan hisaminan átüha tídangiñe beibei to lunboun hábunagunu? (Isa. 65:​21, 22). Lanwoun lira, mámarügüñadün huguya eresibirei lubuidun abiniruni burí le.

15. Ka lunbei hafurendeiruni ha lúnbaña háguyugun? (Huan 6:35).

¹⁵ (Aliiha huméi Huan 6:35). Samina wamá hawagu gürigia ha éigibaña tídangiñe fein luma hádangiñe úduraü ha lagibedaguagüdübaña Hesusu lau aban milaguru. Danme le háguyugun gürigia ha, másiñati wasubudirun fiu hádangiñe. Gayaraati háguyuguba lan íbini marufudun hamá meha afiñe hamá luagu Hesusu (Huan 5:​28, 29). Mósume hafurendeiruni le mini lubéi dimurei le lariñagubei Hesusu dan meha le lariñagubei: “Au fein to íchuguboun ibagari. Le ñǘbuinti numoun, malamadügüyaalime”. Mósume hafiñerun luagu adagaragüdüni le ladügübei Hesusu, mini lan le, hafiñerun derege lani libagari hawagu. Lídanme dan ligía ñeinboun aban programa lánina arufudahani lun larufudahóun houn sun ha lúnbaña háguyugun luma houn furumiñeguarügü irahüñü ha lúnbaña hagüriahóun lídanme iseri ubóu. Maame wagundan danme le warufudahan houn águyugutiña! Wéiribei ugundani le lunbei wasandiruni sügǘ lau dan le weigin. Leme súdinitimabei wamadagua luma Bungiu.

16. Kaba wariha lidan leweñegua aturiahani?

¹⁶ Darí ya ábanrügügili fánreinti le lídanbei kapítulu 6 le lídanbei ewanhéliu lani Huan wakutihan. Gama lumoun, aniheingua saragu amu katei lun layanuhani Hesusu luagu “ibagari magumuchaditi”. Wéiriti meha lisudinin katei le houn huríu ani súdiniti giñe woun. Wasigiruba akutiha lidan leweñegua aturiahani luagu kapítulu 6 le lídanbei ewanhéliu lani Huan.