Íderagua wamaña aturiahatiña lun heseriwidun lun Heowá

1, 2. a) Ka uagu añahein lubéi aturiahatiña Bíbülia beluti machouruni houn lun hadügagun houngua gefentiñame luagu Heowá? b) Kaba wariha lidan aturiahani le?

DAN meha le hasaminaruña lubéi anhein hadügaguba lubéi hungua gefentiñame luagu Heowá, beluti meha san machouruni hun? Másiñati aba lan hadiheridun hagañiduba lan hánigu paaná lidan wadagimanu, humadagu o hiduheñu ladüga haturiahañoun lan Bíbülia. O, másiñati samina humá siñabei lan hafalaruni lilurudun Heowá lidan hibagari. Anhein ítara liña lubéi, másiñati gunfuranda humaniña aturiahatiña Bíbülia ha genegebei hénrengu lan houn hadügagun houngua gefentiñame luagu Heowá.

² Subudi lumuti meha Hesusu gayara lan ladügün anufudei burí le lun leredehaniña aturiahatiña lun mawanserun hamá (Mat. 13:​20-22). Manügün lumutiña meha kei gürigia féridihaña, sigimémegili meha íderaguaña. Anhein wafalara lani hénpulu, gayaraati wíderaguniña aturiahatiña 1) lun hasubudiruni ka lan burí katei eredehabaliña luéi hawanserun, 2) lúntima hínsiñe lan Heowá houn, 3) lun hasubudiruni ka lan katei súdinitimabei lun hadügüni luma 4) lun hagagibudagun luma lénrengunga. Ida luba wáyeihani Hesusu lau wayusurunu líburu Winwan humá lau ugundani lun wíderaguniña aturiahatiña lun hadügagun houngua gefentiñame luagu Heowá?

ÍDERAGUA HUMAÑA HA ATURIAHABAÑA HUMA LUN HASUBUDIRUNI KA LAN EREDEHABALIN HAWANSERUN

3. Ka katei eredehabalin Nikodému lun ladügagun lungua lánime Hesusu disipulu?

³ Aban meha alidihati súdiniti Nikodému hadan huríu. Dúnguati meha luma aban katei le meha eredehabalin lun ladügagun lungua lánime Hesusu disipulu. Sísibei hati lárigiñe lagumeseruni Hesusu lani ministeriu, subudi laali meha Nikodému Hesusu lan Mesíasibei (Huan 3:​1, 2). Íbini ítara, himei lumuti meha layanuhan aramudaguarügü luma Hesusu ladüga lanufude “hawéi huríu” (Huan 7:13; 12:42). Másiñati samina lan leferidirubei lan lubara hadan huríu anhein adügagua lungua lánime Hesusu disipulu.a

4. Ida liña meha líderaguni Hesusu Nikodému lun gunfuranda lani ka lan lagurabubei Bungiu lúmagiñe?

⁴ Subudi lumuti meha Nikodému Lilurudun Moisesi buidu, gama lumoun mégeiti meha lun liderawagún lun gunfuranda lani ka lan lagurabubei Heowá lúmagiñe. Ida liña líderaguni Hesusu? Díreiti meha dan lun líderaguni. Aranseñu liña meha Hesusu lun layanuhan luma, íbini guñoun. Lanwoun lira, afuranguagüda lumuti lun buidu ka lan lunbei ladügüni lun aban lan hádangiñe lani disipulugu: mosu meha lasakürihan lídangiñe lifigoun, labadiseirun luma lun larufuduni afiñe lan luagu Liráü Bungiu (Huan 3:​5, 14-21).

5. Ka gayaraabei wadügüni lun wíderaguniña aturiahatiña arihei ka lan eredehabaliña luéi heseriwidun lun Heowá?

⁵ Gayaraati subudi tan Bíbülia buidu lun aban aturiahati. Lau sun lira, mégeiti lun liderawagúniwa lun lasubudiruni ka lan eredehabalin lun leseriwidun lun Heowá. Másiñati weiri lan lawadigimaridun, o maha hamá liduheñu lun ladügagun lungua gefentime luagu Heowá. Huguya le íchugubei aturiahani, ida luba háyeihani Hesusu? Lau hadireirun dan lun hetenirun lun aturiahati. Kei hénpulu, gayaraati hagunbirahani lun houdin ata furesigu o houdin asariñaha úara. Gayaraati ladügün katei le lun ménrengun lan hayanuhan luagu ka lan adügübei lun hénrengu lan lawanserun. Ítara, gayaraabei híderaguni lun lasubudiruni ka lan asansiruni lunbei ladügüni. Lunti haritaguagüdüni lébuna lan ladügüni asansiruni burí le lun larufuduni hínsiñe lan Heowá lun, mama lun lagundaaraguagüdüni le íchugubei aturiahani lun.

6. Ka gayaraabei hadügüni lun híderaguniña aturiahatiña lun hibihini erei le hemegeirubei lun híchuguni le hafurendeirubei lidan habagari? (1 Korintuna 16:13).

⁶ Lun hibihini aturiahatiña erei le hemegeirubei lun hawinwanduni le hafurendeirubei, mégeitiña hachoururuni líderagubaña lan Heowá agunfulirei lugumadin (aliiha huméi 1 Korintuna 16:13). Ida luba híderaguniña? Samina humá dan meha le abasiihagidün leskuela. Ka meha máisturu hínsiñetimabei hun? Chóuruti le lan gaguraasunbei, le íderagubadün lun hafiñerun huougua. Áfaagua humá lun ítara humá. Mámarügü lan le labusenrubei Bungiu lun hadügün harufudaha houn aturiahatiña. Chóurugüda huméi houn líderagubaña lan Heowá lun hadügüni asansiruni le hemegeirubei lidan habagari. Ka amu katei gayaraabei hadügüni lun híderaguniña aturiahatiña?

ÍDERAGUA HUMAÑA HA ATURIAHABAÑA HUMA LÚNTIMA LÍNSIÑEDUN HEOWÁ HOUN

7. Ida liña líderaguniña Hesusu gürigia ha aganbubalin lúntima hínsiñe lan Heowá houn?

⁷ Subudi lumuti meha Hesusu anhein lan hínsiñetima Bungiu houn lani disipulugu ménrenguntimabei lan houn hawinwanduni le hafurendeirubei. Ligía súnwandan lubéi larufudaha katei le gayaraabei línchahaniña lúntima línsiñedun Heowá houn. Ligía lagoubaguagüdünbalin Lúguchi luma aban wügüri le íchugubei katei buiti houn lisaanigu (Mat. 7:​9-11). Añahein meha hádangiñe gürigia ha aganbubalin Hesusu, másiñati marufudun lan meha háguchi ínsiñehabuni houn. Samina humá ida liña lan meha hasandiragun gürigia ha houngua dan le layanuhanbei Hesusu houn luagu hénpulu le lani úguchili le gudemehabubei, le eresibirubalin lisaani lau ugundani lárigiñe lasakürihan ani aba lagiribudun múnadoun. Adügati abahüdaguni le lun gunfuranda hamani hínsiñe hamá sun gürigia lun Heowá (Luk. 15:​20-24).

8. Ida luba híderaguniña aturiahatiña Bíbülia lúntima línsiñedun Heowá houn?

⁸ Gayaraati giñe híderaguniña ha aturiahabaña huma lúntima hínsiñe lan Heowá houn anhaün ayanuha luagu burí lubuidun igaburi le luágubei Heowá. Ságüme haturiahan, arufuda huméi ka lan lánibei le hafurendeirubei luma línsiñehabu Heowá. Danme le haturiaha luagu lebegi esefuruni, íderagua humaña arihei aban lan idewesei lúmagiñeti Bungiu houn (Rom. 5:8; 1 Huan 4:10). Anhein gunfuranda hamá aturiahatiña weiri lan hínsiñe lun Bungiu, laganwounduba ínsiñeni le hasandirubei luagu (Gal. 2:20).

9. Ka íderagubalin Michael adüga asansiruni lidan libagari?

⁹ Ariha waméi lani Michael hénpulu, le awinwandubei Indonésia. Lau sun lúmagiñe lan liñüraü lafurendeirei inarüni, mabadiseirunti. Dan meha 18 lubéi irumu lau, aba lidin awadigimarida lidan amu ageiraü. Dan lárigiñe, aba lagiribudun Indonésioun. Aba lamarieidun, ani gasaani ligía aban würi irahü. Lau sun lira, sigimémegili awadigimarida lidan amu ageiraü, dise hawéi liduheñu. Lau léibuguniwagu dan, aba tagumeserun lani weiriou tuma lisaani aturiahoun Bíbülia, ani aba hagumeserun adüga asansiruni. Dan le tóunwenbei lúguchu Michael, aba lagiribudun hábiñoun lun lóunigiruni lúguchi ani aba lánharun laturiahanu Bíbülia. Dan le lachülürünbei lidoun arufudahani 27, le tídanbei líburu Winwan humá lau ugundani, le lafurendeirubei lidan fánreinti “Sigí humá afurendeira”, chülüti tidoun lanigi. Aba layahun dan le lasaminarunbei weiri lan ligari lun Heowá larihini Liráü asufurira. Lueirin eteingiruni le lasandirubei luagu le ladügübei Heowá lun lesefuruniwa ligía adügübei lun lasansiruni libagari luma lun labadiseirun.

ÍDERAGUA HUMAÑA ATURIAHATIÑA LUN HASUBUDIRUNI KA LAN KATEI SÚDINITIMABEI LUN HADÜGÜNI

10. Ida liña líderaguniña Hesusu furumiñetiña lani disipulugu lun hasubudiruni ka lan katei súdinitimabei houn? (Lúkasi 5:​5-11; ariha huméi giñe dibuhu).

¹⁰ Fureseti meha hasubudiruni furumiñetiña lani Hesusu disipulugu ligía lan meha Mesíasi le füramasewabei. Lau sun lira, mégeitiña meha ídemuei lun gunfuranda hamani mosu lan híchuguni apurichihani lidan furumiñeti lúgaaru. Barühali meha Féduru luma Andürési saragu dan afalarei Hesusu dan le lagunbirahanbaliña lun hígiruni sun katei lun heseriwidun úara luma lidan dan dayarüti (Mat. 4:​18, 19). Anihein meha aban bísinisi le lánina óuchahani hama, úara luma Santiagu luma Huan (Mar. 1:​16-20). Dan le meha lagunbirahanbaliña Hesusu Féduru luma Andürési, aba hígirunu hasenin lau lóufudagun. Másiñati adüga hamá aransehani lun habihini haduheñu sun le hemegeirubei sun añaha lan apurichiha luma Hesusu. Ka íderagubaliña lun hasubudiruni ka lan katei súdinitimabei houn? Abahüdaguati Lúkasi aba lan ladügün Hesusu aban milaguru le íderagubaliña afiñera líchugubei lan Heowá sun le hemegeirubei houn (aliiha huméi Lúkasi 5:​5-11).

11. Ka gayaraabei wadügüni lun wederebudagüdüni hafiñen ha aturiahabarun Bíbülia wama?

¹¹ Lau sun siñá lan wadügün milaguru kei Hesusu, gayaraati wariñagun houn aturiahatiña anhein lan híchiga Heowá lidan furumiñeti lúgaaru líderagubaña lan súnwandan. Kei hénpulu, gayaraati wafuranguagüdüni houn ida liña lan líderaguniwa Heowá dan le wagumeserunbei adamuridagua. Másiñati mosu lan meha wayanuhan luma wayubudiri lun wariñaguni lun siñabei lan wáfuridun darü lidan luéyuri wadamuridagun. Afuranguagüda huméi houn aturiahatiña dan lan le wadügüni asansiruni burí le, aba warihini ida liña lan líderaguniwa Bungiu ani aba lederebugudun wafiñen.

12. a) Ka uagu buidu lubéi wagunbirahaniña ámuñegueinarügü íbirigu lun hidin íchiga aturiahani wama? b) Ka amu katei gayaraabei wadügüni hama aturiahatiña lun wíderaguniña íchigei Heowá lidan furumiñeti lúgaaru? Ru humá aban hénpulu.

¹² Buídubei giñe lidin houn aturiahatiña Bíbülia ánhaña aganba luagu le hadügübei amu íbirigu lun híchuguni heseriwidun lun Heowá lidan furumiñeti lúgaaru. Gayaraati san hagunbirahaniña ámuñegueinarügü íbirigu lun hidin íchiga aturiahani huma? Amuriaha humá hama lun habahüdahani ida liña lan hasubudiruni inarüni ani ka lan katei hadügübei lun híchuguni heseriwidun lun Heowá lidan furumiñeti lúgaaru. Buídubei giñe lun hadireirun dan hama aturiahatiña lun harihini burí bidéu le lídanbei fánreinti “Sigí humá afurendeira” o “Áfaagua humá”, le tídanbei líburu Winwan humá lau ugundani. Kéiburi, danme le haturiahani arufudahani 37, ayanuha humá luagu bidéu le gíribei Líchugubei Heowá wemegeirun woun. Ani afuranguagüda huméi houn líderagubaña lan Heowá anhein híchiga heseriwidun lun lidan furumiñeti lúgaaru.

ÍDERAGUA WAMAÑA ATURIAHATIÑA AGAGIBUDAGUA LUMA LÉNRENGUNGA

13. Ida liña laranseruniña Hesusu lani disipulugu lun hagagibudagun luma éibaahouni?

¹³ Saraguñein wéiyaasu lariñagun Hesusu houn lani disipulugu hagagibudaguba lan luma éibaahouni, íbini hámagiñe haduheñu (Mat. 5:11; 10:​22, 36). Murusun dan lubaragiñe lounwen, ariñagati giñe houn íbini lan habagari lídanbei lan denchaü (Mat. 24:9; Huan 15:20; 16:2). Ani lun gayaraabei lan hasigirun apurichiha, aba líchugun adundehani houn lun hóuserun lau duari luma lau lichú aau luma lun masigenehan hamá hama ha éibaahabaliña.

14. Ida luba wíderaguniña aturiahatiña lun hagagibudagun luma lidere dan le ichugúbei houn? (2 Timotéu 3:12).

¹⁴ Ítara kei Hesusu, gayaraati giñe wafuranguagüdüni houn aturiahatiña ka lan gayaraabei hariñaguni houn hapanaagu lidan wadagimanu, hamadagu o haduheñu ladüga haturiahañoun lan Bíbülia (aliiha huméi 2 Timotéu 3:12). Gayaraabei hadügün hádangiñe hapanaagu lidan wadagimanu bula hau ladüga asansiruni le hadügübei lidan habagari. Ñéinbaña amu, íbini haduheñu, másiñati hayanuhaba lan wuriba hawagu ladüga le hafurendeirubei tídangiñe Bíbülia. Buídubei lun hayanuhan hama aturiahatiña lau lóufudagun luagu gayaraabei lan lichugúniwa lidere dan houn ladüga haturiahañoun lan Bíbülia. Ítara, danme le lasuseredun, subudi hamaalime kaba lan hadüga o kaba lan hariñaga.

15. Ka gayaraabei wadügüni lun wíderaguniña aturiahatiña ánhaña magundan haduheñu lau haturiahanu Bíbülia?

¹⁵ Ánhaña magundan haduheñu aturiahatiña, ka lunbei wadügüni? Lunti wínchahaniña aturiahatiña lun hasaminarun ka lan uagu magundan habéi haduheñu. Másiñati funa san afiñe hamá luagu iyeeni lan le harufudahabei gefentiña luagu Heowá? O samina hamá gürigia lan wuribatiña gefentiña luagu Heowá? Susereti meha giñe aban katei ítarati lun Hesusu. Íbini hádangiñe liduheñu saminatiña meha lǘlühali lan lau (Mar. 3:21; Huan 7:5). Súdiniti lun gaguraasun hamá aturiahatiña luma lun hayanuhan lau inebesei houn sun gürigia, íbini houn haduheñu.

16. Ka gayaraabei wadügüni lun wíderaguniña aturiahatiña lun hayanuhan luagu hafiñen lau inebesei?

¹⁶ Ka gayaraabei hadügüni aturiahatiña anhein busén lubéi somu haduhe lafurendeirun luagu le tarufudahabei Bíbülia? Buídubei lun mafuranguagüdün hamani sun katei lidan aban lun haduhe, ladüga gayaraabei ladügün lira lun mabusenrunhali lanme laganbun tuagu Bíbülia. Ínchaha humaña aturiahatiña lun mibe lan hayanuhan ani ménrengun ligíame. Ítarati, busenbaña haduheñu hasigirun ayanuha tuagu Bíbülia lidan amu dan (Kol. 4:6). Gayaraati giñe hayanuhan aturiahatiña hama haduheñu luagu wani páhina lidan Internet jw.org. Ítarati, gayaraabei hebelurun le oura habusenrun lun háluahan lanwoun ariñahani hawagu gefentiña luagu Heowá.

17. Ida luba híderaguniña aturiahatiña aransera óunabagülei lun álügüdahani le hadügübei gürigia hawagu gefentiña luagu Heowá? (Ariha humóun giñe iyawaü).

¹⁷ Gayaraati hayusuruni fánreinti le lídanbei jw.org, le gíribei “Álügüdahani le gabügürüguati ladügǘn hawagu gefentiña luagu Heowá” lun harufudahan houn aturiahatiña aransera óunabagülei le ménrengunti lun álügüdahani burí le gayaraabei hadügüni haduheñu o hánigu paaná houn (2 Tim. 2:​24, 25). Haritagua huméi anihein lan aban rekuáduru le gíribei “Le hariñagubei fiu gürigia” lidan lagumuchagüle kada arufudahani le tídanbei líburu Winwan humá lau ugundani. Ínchaha humaña aturiahatiña lun hasayahani ida luba lan hafuranguagüdüni hafiñen. Anhein mégeiwa, manufudeda humá lun híchugun adundehani houn lun habuiduragüdüni ligaburi hafuranguagüdüni hafiñen. Líderagubaña asayahani le lun hayanuhan luagu hafiñen lau ichouruni.

18. Ka gayaraabei hadügüni lun hínchahaniña aturiahatiña lun hagumeserun apurichiha? (Matéu 10:27).

¹⁸ Ariñagati Hesusu houn lani disipulugu lun lan hapurichihani uganu buiti houn sun gürigia (aliiha huméi Matéu 10:27). Dan le gumesegiñe hamá aturiahatiña apurichiha, furesetimabei harihini ida liña lan líderaguniña Heowá, ábatimaame hafiñerun luagu. Ka gayaraabei hadügüni lun hínchahaniña aturiahatiña lun hapurichihan? Anhein anihein lubéi aransehani lun apurichihani espechaliti, buídubei lun hayanuhan hama luagu le gayaraabei hadügüni lun aban hamá apurichihati. Afuranguagüda huméi houn ménrenguntimabei lan houn hagumeserun apurichiha lidan aban apurichihani espechaliti. Gayaraabei giñe líderaguniña hagumeserun íchiga yanu lidan adamuridaguni le labadinaguabei dimaasu. Ítara luba afurendeireina hamá ayanuha luagu hafiñen lau ichouruni.

ARUFUDA WAMÉI HOUN ATURIAHATIÑA AFIÑE WAMÁ HAWAGU

19. Ida liña larufuduni Hesusu houn lani disipulugu afiñe lan hawagu, ani ka gayaraabei wadügün lun wáyeihani?

¹⁹ Lubaragiñe lidin Hesusu sielun, ariñagati houn lani disipulugu hóundaraguayaba lan luma. Lidan dan ligía, úati meha gunfuranda hamani layanuhaña lan Hesusu hóudiba lan sielun. Lubaragiñe letenirun lun machouruni le hawagubei, ábarüga letenirun lun úaraguni le harufudubei (Huan 14:​1-5, 8). Subudi lumuti meha Hesusu megei hamá dan lun gunfuranda hamani ítaga katei, kéiburi aransehani le adügǘbei lun hawinwandun sielu (Huan 16:12). Gayaraati giñe warufuduni houn aturiahatiña afiñe wamá hawagu luma luagu subudi wamani busén hamá heseriwidun lun Heowá.

20. Ida liña tarufuduni aban íbiri to awinwanduboun Malaui tun gürigia to unboun tíchiga aturiahani afiñe tan tuagu?

²⁰ Súdiniti wafiñerun hawagu aturiahatiña súnwandan luma luagu busén hamá hadügüni katei lau lubuidun. Kei le asuseredubei tun aban íbiri to awinwanduboun Malaui to gíriboun Chifundo. Aba tagumeserun aturiaha tuma Alinafe, aban nibureintu katolika. Dan le haturiahanbalin arufudahani 14 le tídanbei líburu Winwan humá lau ugundani, aba tálügüdünu Chifundo aturiahatu ka lan tisaminanbei luagu hayusurún guáriua lidan láhudurawagun lun Bungiu. Aba tagañidun Alinafe, ani aba tariñagun: “Gayaraati nayusurun guáriua ánhana busén!”. Aba tariñagun Chifundo túnguarügü másiñati lan masigiharu lan Alinafe aturiaha. Lau sun lira, mábürühanti tarüna aba tasigirun íchiga aturiahani tun Alinafe lau emenigini lau lan lásügürün dan gunfuranda tubéi lan moun lumuti lan láhudurawagun houn guáriua. Fiu hati lárigiñe, aba tadügüni Chifundo álügüdahani le áfuachubei lidan arufudahani 34 tun Alinafe: “Ida liña líderagunün haturiahanu Bíbülia luma hasubudirunitima Heowá, Bungiu le inarünibei?”. Abahüdaguatu Chifundo: “Ariñagatu Alinafe saragu katei buiti, kéiburi, luagu madügün hamá gefentiña luagu Heowá ni kata le uágubei tariñaga Bíbülia wuriba lan”. Murusun dan lárigiñe, aba mayusuharu lan Alinafe guáriua, ani aba gayaraahali lan tabadiseirun.

21. Ka gayaraabei wadügüni lun wíderaguniña aturiahatiña lun heseriwidun lun Heowá?

²¹ Íbini subudi wamani Bungiu lan “aweiridagüdübarun nadü”, gayaraati giñe wídehan lau wíderaguniña aturiahatiña lun heseriwidun lun Heowá (1 Ko. 3:7). Úati buídurügü lan warufudahani houn le labusenrubei Heowá lun hadügüni; íderagua wamutiña giñe lúntima hínsiñe lan houn. Lanwoun lira, ínchaha wamutiña lun harufuduni ínsiñeni ligía lau híchuguni heseriwidun lun Heowá lidan furumiñeti lúgaaru ani arufudahatiwa giñe houn lun hafiñerun luagu danme le hagagibudagun luma lénrengunga. Dan le warufuduni houn aturiahatiña afiñe wamá hawagu, wíderaguñanu lun hachoururuni gayara lan giñe heseriwidun lun Heowá lau úaraguni.