1925: san irumu lárigiñe

MAGUNFULIRUNTI LE YEBE HAGURABUBEI

Agurabatiña yebe saragu Aturiahatiña Bíbülia luagu ábanhali lanme paraísu Ubóu lidan irumu 1925. Ka uagu? Murusun dan lárigiñe, ariñagati íbiri Albert Schroeder, aban hádangiñe lílana Musu Úaraguati: “Saminatiwa meha luagu hóudiba lan sun ha anuadirúaaña sielun lun harúeihan ani sun lan binadu lubúeingu Bungiu, kei Abüraámü, Dawidi hama amu, háguyuguba lan lun hagumadihan lidan fánreinti le lánina Larúeihan Bungiu ya ubouagu”. Ligíati, kei magunfulirun lubéi le hagurabubei, aba heferidiruni fiu íbirigu hemenigin (Ari. 13:12).

Lau sun féridi hamuti lan hemenigin, hiibe-agei hádangiñe Aturiahatiña Bíbülia, sigitiña apurichiha lau ubebeni. Ábati gunfuranda hamani murusun murusun luagu ligía lan dasi le súdinitimabei lun hadügüni lun hasubudiragüdüni liri Heowá. Ariha waméi ida liña lan meha hayusurunu radiu lun gayara lan hapurichihan lidan fulasu burí le dísebei.

LAWANSERUN APURICHIHANI TUÉIGIÑE RADIU

Lárigiñe harihini buiti le lanügübei tayusurún Radiu WBBR lidan irumu 1924, aba hábunagun Aturiahatiña Bíbülia ábanya áfisi tun radiu, to héretimaboun ani to dísetimabei taganbún, yarafa lun Chikagu (Illinois), ábati híchugun WORD tuagu. Ariñagati Ralph Leffler, aban inhenieru le subudihabúbei luáguti wadagimanu le: “Añahein meha gürigia aganbahoun radiu áriebu íbini lidan fulasu díseti, lidan lidaani lidiliga”. Kei hénpulu, aganbaha hamuti aban iduheñu furumiñeti burí programa, ha awinwandubaña Pilot Station (Alaska), aban fulasu le 5,000 kilometuru (3,000 maili) lidise. Dan le lásurunbei programa, aba habürühan houn ha nadagimeinbaña tidan radiu lun heteingiruniña luagu programa ligía le íchugubei gurasu houn.

Ariñagatu garüdia La Atalaya to lánina 1 lidan duusu-hati irumu 1925 lidan inglesi: “WORD, aban meha tídangiñe radiu to héretimaboun Meriga. Hanarimeti tere darí lun taganbún dandu luéigiñe louba Atlántiku kei luéigiñe louba Pasifiku, Kuba luma sun nórute libiti Alaska. Saragu gürigia ha meha maganbun hamagili inarüni, lárigiñebei haganbuni lapurichihóun inarüni le tuéigiñe radiu to aba habusenrun hasubudirun lanwoun”.

Lídanmeme dan ligía, háfaaguña meha Aturiahatiña Bíbülia lun hasigirun ayusuroun radiu lun hapurichihani uganu buiti Kanadá. Lidan irumu 1924, aba hábunagun íbirigu aban áfisi tun radiu CHUC uburugu Saskatoon (Saskatchewan). Tugía meha furumiñetu radiu tánina relihión Kanadá. Lidan irumu 1925, mosu meha táguyun radiu to lidoun amu fulasu. Ítara liña lubeiti, aba tasügürǘn túhaburugu Sociedad Watch Tower ani aba tanügǘn tidoun muna Regent, aban meha binadu teaturu Saskatoon ani aba haransehanu muna tuguya kei áfisi tun radiu.

Lau tídehan radiu to, aganba hamuti saragu gürigia uganu buiti luagu furumiñeti wéiyaasu lidan burí lirahüñü aüdü le dísebei luéi Saskatchewan. Kei hénpulu, lidan aban fulasu díseti, abürühatu aban würi gíritu Graham lárigiñe taganbuni uganu tuéigiñe radiu lun tamuriahan agumeiraguagüdüni. Ariñagati íbiri George Naish: “Busentu meha tafurendeiruni inarüni lau lóufudagun ábati wóunahanu sun líburu Estudios de las Escrituras tun”. Murusun dan lárigiñe, gumesetu apurichihei uganu buiti lidan burí fulasu díseti.

ASANSIRUNI SÚDINITI LUÁGUTI WAFIÑEN

Tídanmeme garüdia to lánina 1 lidan ǘrüwa-hati irumu 1925 lidan inglesi, fuati aban ariñahani le gíribei “Nacimiento de la nación”. Ka uagu súdini lubéi ariñahani ligía? Lüha meha hasubudiruni Aturiahatiña Bíbülia luagu gani lan Satanási aban óundaruni úara hama ha lábugiñebaña lubafu kéiburi sífirigu wuribatiña, relihión to mama inarünitu, polítika, tuma óundaruni le lani bísinisi. Gama lumoun, lau iseri ariñahani le, íderagua hamutiña lílana Musu Úaraguati íbirigu lun gunfuranda hamani luagu gani lan giñe Heowá aban óundaruni, to mítaranboun kei óundaruni to lani Satanási ani múarantu tuma (Mat. 24:45). Afuranguagüdati giñe Musu Úaraguati lidan lan irumu 1914 lagumesera Larúeihan Bungiu sielu ani lidan irumu ligía, aba ñein lan aban wuribu sielu, aba lan lasagarún Satanási hama lumafianu siélugiñe aba hachagarún ubouagun (Aruf. 12:​7-9).

Hénrenguti meha houn fiu Aturiahatiña hánharun lun iseri asansiruni le. Ligía tíchugunbalin garüdiaméme tuguya adundehani le: “Anhein anihein lubéi aban hádangiñe ha aliihabarun garüdia to le múaranti luma le ariñawagúbei ya, amuriahatiwa huma lun gaguraasun humá hemenigi huguyame luagu Aburemei, luma lun harumaméme tan hanigi”.

Afuranguagüda lumuti aban prekursoru Guran Büretáñana gíriti Tom Eyre, ligaburi hóunabun hiibe agei Aturiahatiña Bíbülia dan le haliihanbalin ariñahani le: “Gúndaatiña íbirigu saragu lau iseri lafuranguagüdüniwa Arufudúni kapítulu 12. Dan le gunfuranda wabalin luagu aniheinhali lan Larúeihan Bungiu agumadiha sielu, aba wayanuhan lau ubebeni luagu uganu buiti le houn amu. Le linarün katei, ínchaha lumutiwa iseri ariñahani le lun waganwoundagüdüni wani ministeriu ani íderagua lumutiwa arihei ladundehañanu lan Heowá lubúeingu lun hadügün katei le wéiritimati”.

GUNFURANDAWATI SÚDINI LAN LAPURICHIHÓUN LUAGU HEOWÁ

Uguñe weyu, gunfuranda wamuti wagía gefentiña luagu Heowá dimurei le lídanbei Isaíasi 43:​10, ariñagati murusun lídangiñe: “Huguya nánibei gefentiña, huguya eseriwidubaña nun”. Lau sun lira, lubaragiñe irumu 1925, lóuguati meha layanuhóun luagu bérusu le tidan wani agumeiraguagüdüni. Gama lumoun, lasansiruba meha katei. Lidan irumu ligía, unsuñoun meha tídangiñe garüdia La Atalaya lidan inglesi to ayanuhaboun luagu Isaíasi 43:​10, 12.

Adügatiña gefentiña luagu Heowá aban adamurini Indianápolis (Indiana) lidan lagumuchagüle widü-hati irumu 1925. Tidan programa lánina adamurini imprimirüati dimurei lánina lubuidun achülürüni le lariñagubei íbiri Joseph Rutherford, le ariñagubei: “Wayabiña lidoun adamurini le lun wibihin […] erei lúmagiñe Wabureme luma ubafu lun wagiribudun apurichiha lau iseri erei lun lani wamá Gefentiña”. Widü weyu meha lidura adamurini, ani ínchahouatiña sun ha ñéinbaña lun hapurichihan luagu Heowá sagü ñein lan chansi.

Samudi 29 lidan widü-hati, ruti íbiri Rutherford aban yanu lidan inglesi le gíribei “Chülüha dan lun larufudún ubebeni”, adimurehati íbiri le luagu ka lan uagu súdini lubéi apurichihani. Ariñagati lidan liyanun: “Ariñagati Heowá houn lubúeingu: ‘Huguya nánibei gefentiña, [ . . . ] Au Búngiubei! (Isa. 43:​12, Versión Moderna, 1910). Lárigiñe, aba giñe lariñagun houn: “Iñura huméi seini lun hagúarun houn néchanigu” (Isa. 62:10). Ariñagati giñe: “Úati ni aban gürigia lidan ubóu le, le gayaraati liñurun aban seini le gayara habéi sun gürigia ariha haweidigia lubúeingu Bungiu, ladüga anihein lani sífiri hawagu ligía lánigu lubéi Gefentiña”.

Lárigiñe líchuguni íbiri Rutherford liyanun, aba laliihan aban dugumedu to gíriboun “Uganu lánina emenigini”. Ánhatiña sun ha ñéinbaña lidan adamurini lun le tariñagubei dugumedu tuguya luagu Larúeihanrügübei lan Bungiu anüga emenigini le inarüniti le gayaraabei lanügün “darangilaü, lubuidun átuadi, ibagari, esefuruni luma ugundani lun súnwandan”. Dan lárigiñe, sügügüdawatu dugumedu tuguya lidoun saragu amu iñeñein ani imprimíruatu giñe lun gayara lan tayusurún lidan apurichihani. Afanreinhóuatu kei burí 40 míñunu.

Lau sun manügün hamani Aturiahatiña Bíbülia iri gefentiña luagu Heowá lidan dan ligía, gumeseeña meha gunfurandei súdini lan lun hayanuhan luagu Heowá.

LETENIRÚN LUN HAGIRIBUDUN BISIDAÑA GÜRIGIA

Eibu haganwoundun Aturiahatiña Bíbülia lidan sun ubóu, aba tínchahaniña lóundarun Heowá íbirigu lun mámarügü lan lun hederegehan agumeiraguagüdüni hetenira, lun lan giñe hetenirun lun hagiribudun bisidaña gürigia ha busenbaña hasigirun afurendeira luagu uganu buiti. Lárigiñebei tafanreinhóun tratadu “Uganu lánina emenigini” lidan inglesi, ru tumuti Bulletina adundehani le: “Adüga humá aransehani lun hagiribudun abisidahaña gürigia ha únbaña hígiroun tratadu”.

Ariñagatu Bulletin to lánina eneru irumu 1925 luagu le lariñagubei aban Aturiahati Bíbülia le awinwandubei uburugu Plano (Texas): “Dan le gabügürügua lan wagiribudun apurichiha, wéiritu wanigi lau warihini buídutima lan hóunabun gürigia sügǘ lau dan le wapurichihan lidan iseri burí fulasu. Anihein aban aüdü le seingühalibei wéiyaasu wapurichihan ñein lidan lagumuhóun diisi irumu le sügühalibei. […] Málügili lúmagiñe tidinya ibiri Hendrix tuma núguchu apurichiha ñein ani ígiratiña saragu líburu kei masuseredunñahagili lan”.

Ariñagati meha aban prekursoru Panamáana: “Dan le napurichihanbei houn gürigia luagu furumiñeti wéiyaasu, máhatiña meha haganbunina, danti le nagiribudun luagu libiaman o lǘrüwan wéiyaasu, óunabatiña lau aban lubuidun igaburi. Lidan irumu le, nayusuruñein liibe-agei lídangiñe nidaani lun nagiribudun abisidahaña gürigia, ani buiti lidin nun hama fiu hádangiñe”.

WARIHIN WABARUAGUÓUN

Tidan gárada to irumu-autu to lóunahaboun íbiri Rutherford houn prekursorugu lidan irumu 1925, ayanuhati luagu dasi le adügǘbei lidan irumu ligía, ani ayanuhati giñe luagu dasi le lunbei ladügǘniwa leweñegua irumu. Ariñagati tidan gárada tuguya: “Lidan irumu le ásügürübei, resibihadün aban lubuidun chansi lun híchugun gurasu houn saragu gürigia ha hírubaña. Barühali dasi le ugundani tun hanigi. […] Leweñeguame irumu gachansinbadün lunya harufuduni gefén humá luagu Bungiu luma luagu larúeihan, ítara harufudubei luagu lubúeingu humá ha tímatimaatiña, lun harihini sun gürigia. […] Ligíati, sigí wamá iñurei wamalali úara lun walawahani Wabungiute luma Warúeite”.

Lagumuchunbei irumu 1925, adügatiña íbirigu aransehani lun haweiridagüdünu Beteli to Brooklynboun (Newayóru, Meriga). Lídanti irumu 1926, ligía hagumeseruni íbirigu wadagimanu lánina ábunaguni le wéiritimabei lidan meha dan ligía.