Bián iseri lílana Musu Úaraguati

WEYU 5 LIDAN DIISI-HATI, IRUMU 2024, aba lichugún aban ñunsu espechaliti lidan adamuridaguni irumu-auti: aba liridún Jody Jedele luma Jacob Rumph lun hádangiñe hamá lílana Musu Úaraguati. Biángubei hagía barühaña saragu irumu eseriwida lun Heowá lau úaraguni.

Misuri (Meriga) lagüriahóua íbiri Jedele. Lagübürigu arufudahabalin inarüni lun, ani lidan aban fulasu le ñein lubéi lougua hamá meha gefentiña luagu Heowá laweirida. Ítara liña lasubudiruniña saragu íbirigu ha aweiyasuhabaña lídangiñe ámuñegueinarügü fulasu Meriga lun houdin ídeha lidan apurichihani lidan fulasu ligía. Hingí lumutu lanigi dan le larihinbalin ínsiñeni luma úarani le hádanbei lumutuniña Heowá. Ligía aba lubéi labadiseirun weyu 15 lidan diisi-hati irumu 1983, ani hínsiñeti apurichihani lun saragu. Ligíati, dan le lagumuchunbei laturiahan aba lagumeserun eseriwida kei prekursoru lidan nefu-hati, irumu 1989.

Dan meha le ñǘbürigiña ligía tuma litu, héchutiña meha hagübürigu ñüdün abisidahóun Beteli hau. Adügati hanaahaniña hagübürigu abisidahóun Beteli lun busén hamá heseriwidun ñein. Ani dan lárigiñe, aba hagumeserun biángubei hagía eseriwida ñein Betelirugu. Lidan nefu-hati irumu 1990, aba lagumeserun íbiri Jedele eseriwida tidan Beteli to Wallkillboun. Furumiñe, seriwiti lidan Departamentu lani Arumadahani ani lárigiñe seriwiti lidan Departamentu le Arihibei lau Lagaranihóun houn Íbirigu.

Anihein meha fiu damuriguaü chumagü yarafa ñein, ani haganwounduña meha lílana damuriguaü ligía, ani mégeiwatiña meha wügüriña lun heseriwidun ñein. Aba láguyun íbiri Jedele lidoun aban lídangiñe damuriguaü ligía aba lagumeserun afurendeira chumagü. Murusun dan lárigiñe, aba lasubudirun aban prekursora to gíriboun Dámaris lídanmeme sirkuitu le ñein lubéi. Lau lásügürün dan aba hamarieidun, ani aba tagumeserun eseriwida Betelirugu úara luma.

Lidan irumu 2005, aba háfuridun Betelirugugiñe lun hóunigiruniña hagübürigu. Lidan dan ligía seriwitiña kei prekursorugu ani arufudahati meha giñe saragu wéiyaasu tidan Leskuela houn Prekursorugu. Seriwiti giñe kei aban hádangiñe lílana Sétanu le Arihibei lau luáguti Agaranihani tidan Háspitali luma lidan Sétanu le hani Wéiyaaña ha arihibaña lau Tábunawagun Luban Hadamuridagun Gefentiña luagu Heowá lidan fulasu le ñein lubéi leredera.

Lidan irumu 2013, aba lagunbirahóun lunya leseriwidun tidan Beteli lun lawadigimaridun lidan tábunawagun Beteli to Warwickboun. Lúmagiñe dan ligía, seriwihali Patterson luma Wallkill. Nadagimeinhaali giñe lidan Departamentu lánina Adibuhani luma Tábunawagun muna luma lidan Departamentu le Áluahabei Ariñahani tidan Háspitali. Lidan ǘrüwa-hati irumu 2023, aba liridún lun aban lan hádangiñe Ídehati lidan Sétanu le Arihibei lau Eseriwiduni. Dan le layanuhan íbiri Jedele luagu dasi le resibi láalibei, ariñagati: “Anihein burí dan aba lan ladiheridun gürigia dan le leresibirun aban iseri dasi. Ñein lunti lan laritaguni gürigia, le lan súdinitimabei, lafiñerun luagu Heowá, lugundun ligía adügübei lun lasuseredun ítaga katei”.

Ánheinti íbiri Rumph, Kalifórnia (Meriga) lagüriahóua. Dan meha le ñǘgili mapurichihánharu meha lúguchu ani madamuridagun tuguya. Lau sun lira, áfaaguatu meha lun tarufudahani inarüni le tídanbei Bíbülia lun. Sagü meha giñe irumu lidin abisidahóun lagütü, aban íbiri úaraguatu lun Heowá, ani íderagua tumuti lun línsiñedun inarüni lun. Ligíati, dan meha le tareisi lubéi irumu lau aba lamuriahan lun lichugún aturiahani tídangiñeti Bíbülia lun. Nibureinhaali meha dan le labadiseirunbei weyu 27 lidan nefu-hati, irumu 1992. Lanwoun lira, aba tagumeserun lúguchu adamuridagua luma apurichiha ani sun liduheñu aba hagumeserun awansera ani badisei hagía.

Dan meha le nibureingili íbiri Rumph, ariha lumuti gunda hamá prekursorugu saragu. Ligía dan lubéi lagumuchubei laturiahan, aba lagumeserun eseriwida kei prekursoru lidan nefu-hati, irumu 1995. Lidan irumu 2000, aba láguyun Ekuadóru, lidoun fulasu le ñein lubéi hemegeirúa apurichihatiña. Ñein lasubudiroun aban prekursora kanadáana gíritu Inga, lau lásügürün dan aba hamarieidun. Lárigiñe hamarieidun aba heseriwidun lidan aban liraüraü damuriguaü lidan aban aüdü Ekuadóru. Uguñe weyu, ábanhali damuriguaü wéiriti ani derebuguti liraüraü damuriguaü ligía.

Dan lárigiñe, aba hiridúniwa lun heseriwidun kei prekursorugu espechalitiña, ani lárigiñe seriwitiña kei óunigirutiña sirkuitu. Lidan irumu 2011, aba hagunbirahóun tidoun Leskuela Galaadü külase 132. Ani lárigiñe heresibihan aba hounahóun lidoun ámuñegueinarügü fulasu ubouagu, seriwitiña kei betelitagu, kei misionérugu, luma kei óunigirutiña sirkuitu. Arufudahati giñe íbiri Rumph tidan Leskuela houn Apurichihatiña Larúeihan Bungiu.

Ladüga ladagarun sandi le gíribei COVID-19, aba hagiribudun Merigoun. Aba hagunbirahóun lun heseriwidun tidan Beteli Wallkill, to ñein lubéi larufudahóua lun íbiri Rumph lidan Departamentu lánina Eseriwiduni. Lárigiñe, aba hóunahani ligía tabu lani weiriou lun heseriwidun tidan sukursáli to Ekuadóruboun, ani seriwiti lidan Sétanu le Arihibei tau Sukursáli. Lidan irumu 2023, aba lounahóun Warwick, ani lidan eneru, irumu 2024 aba liridún kei Ídehati lidan Sétanu le Arihibei lau Eseriwiduni. Dan le layanuhan íbiri Rumph luagu fulasu le ñein lubéi seriwihali lan lun Heowá, ariñagati: “Mama fulasu le ñein lubéi weseriwida lun Heowá súdinibei, le súdinibei, hama lan wábirigu weseriwida”.

Wéiriti lebegi dasi le hadügübei íbirigu ha woun, ani hínsiñetiña woun saragu (Fili. 2:29).