Lunti san nígiruni nabugahan?

Barühadiwa saragu irumu abugaha. Hínsiñeti woun wáfuridun le oura wabusenrun tidan wakarün. Lau sun lira, nidiheritiña waduheñu hama wamadagu wau, ani álügüdaguatiña houngua anhein lunti lubéi wasigirun abugaha. Úatiti gunfuranda wamani ka lan uagu hadiherida.

Ligiaméme san asuseredubei hun? Anhein ítara liña lubéi, kaba íderaguaün lun hasubudiruni anhein lunti lubéi hasigirun abugaha?

Anihein ageiraü le ídanbei rua lan lúrudu luáguti mosu lan houdin gürigia ha derebuguhaña lumoun surusia lun lechekürüniña subudiwa láamuga anhein gayaraabei lubéi tichugún aban iseri gárada lánina abugahani houn. Inebeti burí lúrudu le houn kristiánugu ha awinwandubaña lidan burí ageiraü ligía ani gaganbaditiña lun (Rom. 13:1). Meberesenga halía lan hawinwanda, lunti hetenirun lun le gádanbalün lun harihini anhein gayaraaguagidün lubéi hungua lun habugahan lau ichouruni.

ARIHA HUMÉI HUNGUA ANHEIN GAYARAAGILI LUBÉI HABUGAHAN

Ariñagatu Instituto Nacional sobre el Envejecimiento (NIA, según ligaburi lariñawagún lidan inglesi, Meriga) lunti lan hadügüni gürigia derebuguhaña álügüdahani burí le hóuniwagua:

Hénrenguti san nun lun naliihani burí seini le afidihóubei luagu burí üma o lóuguati narihin guñoun?
Gayaraagili san nadigiragun nárigoun lun narihini fánreinti le hénrengubei lun larihín tidan isubusei?
Gayaraagili san nadügüni katei lau lóufudagun kéiburi nadügün lun téibaagun karü o lun tararamun?
Hámaruyati san nabugahan darí lun neberesehani téibaagun to tíbiri karü?
Saragu san wéiyaasu ítagaraü yebe lan nabuguchun o anihein san hiyati odi duneguaü tuagu nugune ladüga nabuguchun luagu somu katei?
Ráramagüda hamaadina san súdaragu ladüga ligaburi nabugahan?
Árihatina san dan le anaha lan abugaha?
Ladügüña san árani le nátahabei lun lásiñarun nabugahan buidu?
Nidiheritiña san niduheñu hama numadagu dan le nuguya lan abugahabei?

Anhein óunaba hubéi anha lun aban o biama lídangiñe álügüdahani le, másiñati mosu lan hadügün fiu asansiruni, kei burí lun mabugahan humá saragu o dántima le búrigaali. Lanwoun lira, akutiha huméi ligaburi habugahan sagü átiri dan. Gayaraati hálügüdün aban hiduhe o somu humada ka lan lasaminarubei luagu ligaburi habugahan o gayaraati giñe hidin tidan aban leskuela lun hafurendeirun abugaha buidu. Lau sun lira, anhein óunaba hubéi anha lun besafu lídangiñe álügüdahani burí le, másiñati buídutimabei lan lun mabugahan humá.a

ADUNDEHANI TÍDANGIÑETI BÍBÜLIA LE GAYARAABEI LÍDERAGUNÜN

Másiñati míchugun wamá fe luagu mabugahanhaadiwa lan buidu kéiñaha wadügüni ani chülüha lan dan lun lásiñarun wabugahan, hénrenguti layanuhóuniwa luagu katei le. Ariha wamá bián adundehani tídangiñeti Bíbülia le gayaraabei líderaguniwa akutihei le gádanbaliwa luma lun wanúadirun buidu.

Gabaroun waméi luagu gébeha lan le wayaraabei adüga (Ari. 11:2). Sun wagía, eibu aweiyadeina wamá, eferidireina wañalin warihin, waganbun, were, ani hénrengu ligía wánhingichun lau lóufudagun. Ligía añahein lubéi gürigia derebuguhaña ígira hamaali ítaga huraraü dan le híchugun fe gayara lan habuleseirun lau lumenrengun. Ligiaméme asuseredubei lau abugahani. Lau lásügürün dan, másiñati aba lan wíchugun fe mabugahanhaadiwa lan kéiñaha wadügüni, ábagubeiti mabugahanhaadiwa lan lun wabuidun guánarügü (Ari. 22:3). Ánheinti ariñaga aban gürigia woun luagu nidiheri lan wau, buídutimabei warufudun ǘnabuguni lau wadügün gasu lau le lariñagubei gürigia ligía woun (ariha huméi giñe 2 Samueli 21:15-17).

Madan lawa lounwen ni aban gürigia (2 Lur. 22:8). Gayaraati wadügün saragu damichi ánhawa mabugahan lau duari. Gürigia le abugahabei dan le siñaali labugahan, gayaraati ladügün damichi lúniwagua luma houn amu gürigia. Ánheinti adüga lun ñein lan somu danaguaü, gayaraati láfaragun lungua o láfarun amu gürigia.

Anhaün anúadira lun mabugahangubéi humá, masaminara humá minebenhadün lanme houn amu gürigia. Wéiriti hínsiñe lun Heowá ladüga lubuidun burí higaburi kéiburi hasubudiruni gébeha lan le hiyaraabei adüga, ǘnabugu humá ani berese humá lau habagari amu. Füramaseti Heowá líderagubadün lan, ru ligíame dǘgüdaguaü hun (Isa. 46:4). Maweiyasunti Heowá ígiraün. Gayaraati hafurieidun lun chóuruñu luagu líchugubei lan lichú aau luma subudi le hemegeirubei hun lun gayaraabei lan hanúadiruni le buídutimabei.

Ka gayaraabei hadügüni ha híbiri?

Buídutimabei lun iduheñu lan ayanuha luma abugahati le aweiyadeinabei. Lau sun lira, anihein dan lumadagu lan gürigia aganbubalin le hariñagubei amu luagu ligaburi labugahan. Anhein ítara liña lubéi, gabaroun waméi le hariñagubei amu. Másiñati gayara lan woudin úara luma abugahati le derebuguhalibei, ánhawati ariha luagu mégeiwa lan layanuhóuniwa luma abugahati ligía luagu ligaburi labugahan, adüga waméi. Danme wadügüni, rugua wamá woungua lidoun lilugaarun. Furangu wamá luma ani óusera waméi lau inebesei. Mariñaga wamá lun siñaali lan labugahan ladüga wéiyaali lan, íderagua waméi lun gunfuranda lani eferidireina liñalin lan iyaraani lun labugahan. Lubaragiñe wayusurun dimurei kei burí “machourunhali ligaburi babugahan”, gayaraati wariñagun lun “mabusenruntina lasuseredun ni kata wuribati bun” o “nidiheritina bau”. Haritaguagüda waméi lun luagu subudi wamani inebe lan lilurudun Heowá luáguti lounigirúniwa ibagari lun, ani chouru wamani busén lan gaganbadi lan lun burí lúrudu ligía.

Sun wagía, mosu wíchaagun woungua lidoun halugaarun ha lúntibei hígiruni habugahan. Másiñati genege lan houn mosu lan dipeni hamá hawagu amu. Ka gayaraabei wadügüni lun wíderaguniña? Wetenirun lun le hemegeirubei, ábameti wíderaguniña (Ari. 17:17). Magurabaha wamá lun hariñagun woun lun wanügüniña lidoun ítaga fulasu, másiñati ladügün lira lun hasandirun aban hamá ihürügu. Lubaragiñe lira, adüga wamá aransehani lun ñein hamá somu gürigia lun waturunuha lun gayara lan hanügün íbirigu ha lidoun adamuridaguni, lidoun apurichihani, agañeiha o dan le hemegeirun houdin lun surusia. Buídubei wadüga ánhawa ariñaga houn wadügüñein lan lau sun wagundan ani busén wamá wásügürün dan hama (Rom. 1:11, 12).

a Anhein busén hubéi lanwoun ariñahani, aliiha huméi “¿Corre usted un gran riesgo de sufrir accidentes de tránsito?” le tídanbei garüdia ¡Despertad! to lánina 22 lidan widü-hati, irumu 2002.