Gebegitiña íbirigu derebuguhaña houn lílana damuriguaü

Másiñati hásügürüña lan lídangiñe ligiaméme turobuli kei íbiri to, ladüga aweiyaduni siñahali hadügün saragu kei meha. Íbini subudi lan hun seriwihadün lan lun Heowá lau úaraguni luagu saragu irumu, háfuga hagoubaguagüdüni le meha hadügübei luagu aban dan lumoun le hadügübei guentó. Ani adügati lira lun lábürühan harüna. Ka gayaraabei líderagunün?

KA LAGURABUBEI HEOWÁ HÚMAGIÑE?

Álügüdagua humá hungua: “Ka lagurabubei Heowá lun nadügüni?”. Ariñagati 2 Lúrudu 6:5: “Hínsiñela Babureme le Bubungiute bun tau sun banigi, tau sun buani luma lau sun bere”. Ruti dimurei burí le darangilaü. Ka uagu?

Arufudati bérusu le aguraba lan Heowá lun heseriwidun lun lau hadügüni sun hiyaraati. Lau gabaroun humani le, líderagubadün lun magoubaguagüdün humá hungua hama amu luma lun magoubaguagüdün humani le meha gayara hubéi adüga luagu aban dan luma le hadügübei guentó.

Samina humá luagu le: dan meha le nibureingidün, ka meha híchugubei lun Heowá? Chóuruti ru humani meha sun le buídutimabei húmagiñe lun, sun meha le hiyaraabei adüga lidan meha dan ligía. Agia guentó? Ka híchugubei lun Heowá? Chóuruti áünhagua lan íchigei le buídutimabei húmagiñegua lun. Mini lan le, sun le hiyaraabei adüga guentó. Kei le aubei harihei, le linarün katei, le híchugubei lun Heowá guentó ligiaméme híchugubei lun lidan meha dan le sügühalibei: le buídutimabei húmagiñegua.

GAYARAAGILI HADÜGÜN SARAGU KATEI LUN HÍDERAGUNIÑA AMU

Samina humá luagu le: lubaragiñe hasaminarun luagu katei le siñá humaalibei adüga, houcha humá hasaminarun luagu saragu katei le gayaraabei hadügüni lun híderaguniña amu. Kei gürigia derebuguhaña, gayaraati hadügün saragu katei le meha hásiñarubei adüga dan meha le nibureingidün. Ariha wamá fiu lídangiñe.

Abahüdaha huméi le winwan humaalibei houn amu. Teni humá lun le hariñagubei gürigia ha lánina tidaani Bíbülia:

Ariñagati urúei Dawidi: “Nibureintina meha, guentó wéiyaadina, ani marihingidina láguruniña Bungiu gürigia ha buídubaña, marihin naña hasaanigu arihadiha” (Sal. 37:25).

Ariñagati Hosué: “Au madiseeli nounwen, gama lumoun lubaragiñe nounwen, busentina lun hasubudiruni tau sun hanigi luma tau sun huani luagu gúnfulihali lan sun katei buiti le buga füramase lubéi Wabureme hun. Meredeti ni ábanrügü lídangiñe le füramase lubéi magunfulirunga” (Hos. 23:14).

Dandu Dawidi kei Hosué subudi hamuti meha le hariñagubei lugundun seriwihaña meha lau úaraguni lun Heowá luagu saragu irumu, arihaña meha saragu katei, ligía gayara lubéi lafiñerúniwa luagu le hariñagubei. Gayaraati lariñawagúniwa ligiaméme huagu lugundun adügati le winwan humaalibei lúntima gebegi lan le hariñagubei.

Anhein barühadün lubéi saragu irumu eseriwida lun Heowá, gayaraati hayanuhan houn amu luagu abiniruni le hibihibei. Haritagua humagili san somu sügǘ le ñein lubéi harihei ida liña lan labiniruniña Heowá lumutuniña? Meredera humá lau, abahüdaha huméi houn amu. Anhein hadüga ítara, gúndaabadün, ani gúndaabaña giñe ha aganbubalün (Rom. 1:​11, 12).

Ábaya igaburi lun híchugun dǘgüdaguaü houn amu lau habasiihan adamuridagua, según le gádanbalün. Ítarati, mámarügübaña íbirigu asagara buiti, huguya giñe sun. Ariñagatu Connie, to buga uáguboun wayanuha: “Íderagua lumutina nabasiihan adamuridagua lun mábürühan lan narüna. Ida lubati nasandiragun nungua híruñu lau saragu ínsiñeni le híchugubei íbirigu nun tidan Luban Wadamuridagun? Hóuchatina narufuduni houn hínsiñe hamá nun lau burí nedewehan lirahüñü katei houn. Áfaaguatina giñe lun nídehan úara hama lidan burí katei le wadügübei lidan weseriwidun lun Bungiu”.

GEBEGITI HESERIWIDUN LUN HEOWÁ LAU ÚARAGUNI

Ayanuhatu Bíbülia hawagu saragu gürigia ha únbaña larufuda Heowá ínsiñeni íbini siñá lan meha hadügün saragu lidan heseriwidun lun ladüga le gádanbaliña. Aban hádangiñe Simeón, aban ísüraelina derebuguhali dan meha le lagüriahóunbei Hesusu. Sagü meha lidin ténpulurugu, másiñati ariha lan meha wügüriña etenira lun dasi súdiniti. Kati gayaraabei lasaminaruni Simeón? Háfuga saminati kei derebuguhali lan mebegihali lan lun Heowá. Lau sun lira, mítaranti. Ariha lumuti Heowá kei “aban wügüri richati ani gudemehabuti, wéiriti lederegeragun lungua lun Bungiu” ábati labiniruni Heowá lau lígirun lun larihini Hesusu dan meha le figigili. Yusu lumuti giñe Heowá Simeón lun lariñagun aban profesía luagu Hesusu lan Mesíasibei (Luk. 2:​25-35). Arufudati sügǘ le woun meteni lan Heowá lun le gádanbalin Simeón luma le lásiñarubei adüga, le unbei letenira, lun lanarime afiñeni le luágubei. Ligíati, anihein lubéi meha ‘sífiri sandu luma Simeón’.

Gayaraati hachoururuni gebegi lan lun Heowá úaraguni le harufudubei lidan heseriwidun lun íbini gébeha lan le hiyaraabei adüga. Gúndaati Bungiu lau áfaaguni le hadügübei kada aban hádangiñe lubúeingu, ‘resibi lumuti le híchugubei mamuriahanga le úati hama’ (2 Ko. 8:12).

Lau le hichügüwagu, teni humá lun katei le gayara hubéi adüga. Kei hénpulu, samina humá luagu ámuñegueinarügü luwuyeri apurichihani le ñein lubéi gayara lan hídehan, íbini luagu murusun dan. Gayaraati giñe híchugun gurasu houn íbirigu lau hagúarun houn luéigiñe gágamuru o habürühan tirahüñü gárada houn. Gayaraati ladügün katei ñǘbüriti le hadügübei hawagu íbirigu lun habihin dǘgüdaguaü luma gurasu, dántima le harihini hámagiñe lan gürigia ha derebuguhaña liabin, ha seriwihañabaña lun Heowá luagu saragu dan.

Íbini anhein siñá lubéi hadügün saragu katei, gayaraagili hadügün saragu lidan heseriwidun lun Heowá. Kei hénpulu, lidan rekuáduru le gíribei “Anihein meha aban ibagari lidan huraraü”, hadariruba aban sügǘ tuáguti aban íbiri derebuguharu to awinwanduboun Áfürika oriental.

Haritagua huméi afiñeni lan luma úaraguni le arufuda humaalibei lidan burí irumu le sügühalibei gayaraati líchugun dǘgüdaguaü houn amu. Huguya aban hénpulu buiti le lánina awanduni. Gabaroun huméi dimurei le lídanbei Ebüréu 6:10 le ariñagubei: “Lugundun richaguati Bungiu, ani mabulieidun lubéi le adüga humaalibei, luma ínsiñehabuni le arufuda humaalibei lun lau híderaguniña hiduheñu luagu afiñeni, katei le áünhaguabei adüga”.

KÍPUGUA HUMÁ HUNGUA BERESEGUÑU LAU HÍDERAGUN AMU

Ariñagati ariñahani hawagu saragu gürigia derebuguhaña ha akipuragubaña houngua bereseguñu etenira houn amu buidu lan hátuadi, úa lan bulíei bulíei hamá ani migifeti lan habagari.

Inarüni madügünbei lan wadügün katei hawagu amu lun lagidarun sun sandi le lanügübei aweiyaduni. Larúeihanrügübei Bungiu agidarei sun le, lagidarubei figóu létima adügübei lun waweiyadun ani hilagua wagía (Rom. 5:12).

Íbini ítara, sun le hadügübei lidan heseriwidun lun Heowá kéiburi híderagun amu asubudirei, derebugugüda lumuti hafiñen, ani gayaraati giñe lídehan lun buidu lan hátuadi. Íbirigu derebuguhaña hínsiñewatiña, mabulieida huméi gebegi lan sun áfaaguni le hadügübei lun Heowá luma houn lílana damuriguaü.