Mama lidan óunweni lagumucha sun katei!

Betania aban meha aüdü 3 kilometuru (2 maili) lidise luéi Herusalén (Huan 11:18). Ñein lasusereda aban katei híruti fiú dimaasu lubaragiñe lounwen Hesusu. Aba lasandirun Lásaru, le lumada Hesusu, ani aba lounwen.

Dan le laganbunbalin Hesusu ñunsu ligía, aba lariñagun houn lani disipulugu luagu larumuguña lan Lásaru ani léibuga lan agagudahei (Huan 11:11). Kei larihin ua lan gunfuranda hamani, aba lariñagun houn furangu: “Hilá Lásaru” (Huan 11:14).

Gádürü weyu lárigiñe ábunahani, aba lachülürün Hesusu Betania ani aba láluahanu Marta, to litu hilaali, lun líchugun gurasu tun. Aba tariñagun Marta lun Hesusu: “Lun hamuga yáañadibuti, móunwenti hamuga namulen” (Huan 11:17, 21). Ábati lariñagun Hesusu tun: “Au águyugunibei, au ibagari. Le afiñeti nuagu, íbini lounwen, labagaridayaba” (Huan 11:25).

Lun larufuduni luagu mama lan füramaseñein aban katei le siñati lasuseredun, aba layarafadun Hesusu lun umúahaü, aba lagúaragun: “Lásaru, furiba ñéingiñe!” (Huan 11:43). Ábati láfuridun Lásaru lídangiñe umúahaü, aba taweiridun hanigi gürigia.

Furumiñe, saragüdaali meha Hesusu kéiburi bián gürigia. Liráü Hairu aban hádangiñe. Ani lidan ókaasion ligía ariñagati giñe tarumuguña lan irahü tuguya (Lúkasi 8:52).

Súdiniti lidan lan biángubei kesi ariñagati Hesusu larumuguña lan hilaali, gama lumoun, súdiniti ligaburi konpararü lani. Ka uagu? Lugundun dan le harumugun gürigia ibidiñeti houn ka lan asuseredubei geyegu hau, ítara haña giñe hilaaña, aba hemeraagun luéi igarigu luma asufuriruni (Apurichihati 9:5; ariha huméi rekuáduru “Ítara liña óunweni kei aban idabagu huliliti”). Gunfuranda hamuti meha furumiñetiña lani Hesusu disipulugu buidu ka lan gádanbaliña hilaaña. “Ariha hamuti meha óunweni kéirügü aban idabagu huliliti, ani umúahaü, ariha hamuti kei aban fulasu lun emeraaguni [...] houn ha óunwegubaña lidan úaraguni”, según Encyclopedia of Religion and Ethics.a

Ruti dǘgüdaguaü woun wasubudiruni masufurirun hamá hilaaña, harumugarügüña lan lidan hamúaha. Dan le wasubudiruni le, úaali ni kata aramudaguati lidan luáguti óunweni ani mama mosu wanufudedun luéi.

“ANHEIN OUNWE GÜRIGIA, LABAGARIDAYABA SAN?”

Íbini sun lan wagía hínsiñeti woun lun warumugun buidu, ka busenbei larumugun lun súnwandan? Anihein san emenigini houn hilaaña ha arumugubaña lidan umúahaü lunya hawinwandun kei meha Lásaru tuma lisaani Hairu?

Adüga lumuti meha Hobu álügüdahani le dan le lasandiragunbei lungua luagu lounwen lan: “Anhein ounwe gürigia, labagaridayaba san?” (Hobu 14:14).

Lárigiñe meha ladügüni Hobu álügüdahani le lun Suntigabafu, Hobu guánarügü óunabubalin álügüdahani le ladügübei: “Bagúaruba nun, ani nóunabubadibu; busenbadibu barihini le badügübei” (Hobu 14:15, Nueva Versión Internacional). Chouru lumuti meha wügüri úaraguati le luagu busén lan Heowá láguyuguagüdüni lidoun ibagari. Leyeedaguña funa san lungua? Uá.

Águyuguni le meha ladügübei Hesusu arufuda lumuti furangu luagu rúhali lan Bungiu ubafu lun luagu óunweni. Le linarün katei, ariñagatu Bíbülia anihein lan “ligelein óunweni” lúhaburugu Hesusu (Arufudúni 1:18). Ítara kei meha lásaaragüdüni Hesusu Lásaru, gabafuti giñe lun lásaaragüdüniña hilaaña ámuñegü.

Ayanuhatu Bíbülia saragu wéiyaasu luagu füramasei lánina águyuguni. Kei hénpulu, ariñagati aban ánheli lau ichouruni lun profeta Danieli: “Emeraaguabá, ladüga lídanme lagumuhóun dan, básaaruba lun bibihini bafayeiruaha” (Danieli 12:13). Ariñagati meha Hesusu houn saduséugu, lábutigu relihión ha mafiñenbaña luagu águyuguni: “Bulíeiguatün ladüga libidiñe tuáguti Lererun Bungiu hun, ni luáguti lubafu Bungiu” (Matéu 22:23, 29). Ani ariñagati apostolu Pábulu: “Anihein giñe emenigini le hawagubei luagu Bungiu nuagu, luagu lásaaragüdübaña lan hilaaña, dandu ha buídubaña [o richatiña] kei ha wuribabaña [o marichatiña]” (Adügaü 24:15).

ÍDABA SAN HASAARA HILAAÑA?

Ídaba san hásaara gürigia ha richaguabaña hama marichatiña lídangiñe óunweni? Kei lariñagun ánheli lun Danieli, lasusereduba “lídanme lagumuhóun dan”. Afiñetu meha Marta luagu láguyuguba lan Lásaru, le tamulen, lídangiñe óunweni “lídanme lagumuhóun weyu” (Huan 11:24).

Úaraguagüda tumuti Bíbülia “lagumuhóun weyu” luma larúeihan Hesusu. Abürühati Pábulu: “Ladüga larúeihaba Kristu darime líchuguniña [Bungiu] láganiñu lábugiñoun lugudi; óunweni, ligíaba lagumuhóun ágani agünrinchawaguti (1 Korintuna 15:25, 26). Anihán aban resun súdiniti lun wamuriahan luma Bungiu lun liabin Larúeihan luma lun ladügǘn lugundan ubouagu.b

Ítara kei meha lasubudiruni Hobu, busenti Bungiu láguyuguagüdüniña hilaaña. Danme le lachülürün weyu ligía, ábame úaali lan óunweni, ani málügüdahandigiañame gürigia: “Lidan san óunweni lagumucha sun katei?”.