“Láguyuguba bamulen”

1. Ida liña larufuduni aban irahü lafiñen luagu águyuguni?

ANIHEIN aban lanarime sandi luagu aban nibureinti gíriti Matthew ani bíwaali saragu wéiyaasu. Dan meha le sedü lubéi irumu lau, aba lasuseredun aban katei le aweiridagüdübarun anigi. Aban weyu, larihiña meha ligía hama liduheñu aban programa lídangiñe JW Broadcasting^® le áfuachubei sagü hati. Lidan lagumuchagüle programa, aba harihin aban bidéu lánina uremu le ñein lubéi háfuacha fiu íbirigu eresibiraña haduheñu lárigiñe águyuguni.b Dan le lagumuchubei programa, aba layarafadun Matthew houn lagübürigu, aba lárügüdüni háhabu ani aba lariñagun houn: “Mami, papi, ariha humaali ánhana lan ounwe náguyuguba lan? Gayaraabei hagurabahanina. Buídubei lasalirun sun katei”. Gayaraati san hasaminarun luagu ida liña lan hasandiragun agübürigu ha houngua dan le harihinbalin lafiñen hasaani? Inarüniti emenigini lánina águyuguni lun Matthew.

2, 3. Ka uagu buidu lubéi lun wararamagun asaminara luagu emenigini lánina águyuguni?

² Sagü átiri dan, buídubei wadüga ánhawa araramagua asaminara luagun füramasei le lánina águyuguni (Huan 5:28, 29). Ka uagu? Ladüga ibidiñeti woun kaba lan asusereda haruga. Gayaraati ladagarun aban lanarime sandi wawagu o lounwen somu waduhe le hínsiñebei woun sódini (Apur. 9:11; Sant. 4:13, 14). Gayaraabei líderaguniwa emenigini lánina águyuguni lun wawanduni lanarime burí sügǘ le (1 Tesa. 4:13). Chóurugüda tumuti Lererun Bungiu woun subudi lániwa Wáguchi le siélubei buidu ani weiri lan wínsiñe lun (Luk. 12:7). Subudi lumutiwa Heowá buidu buidu, ligía gayaraaya lubéi ladügüniwa kei meha wabéi lau ligiaméme igaburi luma ligiaméme saminaü. Hínsiñetiwa lun saragu darí lun ru lan chansi woun lun wawinwandun lun súnwandan. Íbini lun láguyuguagüdüniwa ánhawa ounwe.

³ Lidan aturiahani le, wakutihaba ka lan uagu gayara lubéi wafiñerun luagu füramasei lánina águyuguni. Lederebudagüdübei giñe wafiñen lau wakutihani abahüdaguni le tídanbei Bíbülia, le ñein lubéi ladarirúa dimurei lánina bérusu le lichügüdinabei aturiahani le: “Láguyuguba bamulen” (Huan 11:23). Lagumuhóun, warihuba ka lan gayaraabei wadügüni lun inarüni lan emenigini lánina águyuguni woun.

KA UAGU GAYARA LUBÉI WAFIÑERUN LUAGU FÜRAMASEI LÁNINA ÁGUYUGUNI?

4. Ka lunbei wachoururuni lun wafiñerun luagu aban füramasei? Ru humá aban hénpulu.

⁴ Lun wafiñerun luagu aban füramasei, mosu wachoururuni le lan adügübalin busén lan lun lagunfuliruni ani gabafu lan lun ladügüni. Samina wamá luagu aban hénpulu. Aba lagadeirunu aban lanarime liñawan dan waban, ábati füramase lan aban wamada woun: “Níderagubadibu lun taranserun buban”. Subudi wamuti linarün lan ani busén lan líderaguniwa. Lanwoun lira, subudi wamuti gayara lan líderaguniwa lugundun gabunaguati ani anuhein burí tulu to lemegeiruboun luma. Adügati lira lun wafiñerun luagu le lariñagubei woun. Ka gayaraabei wariñaguni luagu füramasei lánina águyuguni? Inarüni san busén lan Bungiu lagunfulirun lau füramasei le ani gabafu lan lun ladügüni?

5, 6. Ka uagu chouru wabalin busén lan Heowá láguyuguagüdüniña hilaaña?

⁵ Busenti san Heowá lun láguyuguagüdüniña hilaaña? Anha, ítara liña. Adügati Bungiu lun habürüdüni saragu wügüriña tidan Bíbülia füramasei le lánina águyuguni (Isa. 26:19; Ose. 13:14; Aruf. 20:11-13). Ani dan le füramase lan Heowá aban katei, gúnfuli lumuti (Hos. 23:14). Lanwoun lira, busenhali Heowá lagiribudagüdüni habagari hilaguaaña houn. Ka uagu wariñagei?

⁶ Samina wamá luagu le lariñagubei Hobu. Chouru lumuti meha anhein lan ounwe, busenbei lan Heowá larihiniya wínwanñu (Hob. 14:14, 15). Ligiaméme lasandirubei Heowá hawagu sun lubúeingu ha hilaguaañabaña. Busenhali lun láguyuguagüdüniña ani lau aban lubuidun átuadi luma lun gunda lan habagari. Ani ka lasandirubei Heowá hawagu sun gürigia ha hilaguaañabaña ani machansintiña meha lun hafurendeiruni inarüni luagu? Busenti giñe Wáguchi Bungiu le hínsiñehabubei lun lagiribudagüdüni habagari houn (Adü. 24:15). Busenti giñe lun gachansin hamá lun hasubudiruni luma lun gamadagua hamá luma luma lun hawinwandun lun súnwandan ubouagu (Huan 3:16). Furanguti busén lan Heowá láguyuguagüdüniña hilaaña.

7, 8. Ka uagu chouru wabalin gabafu lan Heowá lun láguyuguagüdüniña hilaaña?

⁷ Gabafuti san Heowá lun láguyuguagüdüniña hilaaña? Anha, ítara liña. Ladüga “Suntigabafu” ligía (Aruf. 1:8). Gayaraati lagumuchun lau furumiñeguarügü ágani, íbini lau óunweni (1 Ko. 15:26). Lau wasubudiruni katei le, ruti iderebugu luma dǘgüdaguaü woun. Ariha waméi le tásügürübei íbiri Emma Arnold. Gagibuguatu meha tuguya hama tiduheñu luma aban lanarime sügǘ lidan lidaani Libiaman Wuribu Wéiriti. Lun tíchugun dǘgüdaguaü tun tisaani ladüga hóunwegun saragu haduheñu lidan fulasu le ñein lubéi hafosuraña nasi gürigia lun hawadigimaridun, ariñagatu: “Lun hamuga lakipuruniña óunweni gürigia lun súnwandan, gabafutimabei hamuga luéi Bungiu, adián?”. Úati ni kata gabafutimati luéi Heowá. Ligía adügübalin ibagari, ligía gabafu lubéi lun lagiribudagüdüni habagari ha hilaguaañabaña houn.

⁸ Ábaya resun le wámabei lun wasubudiruni gabafu lan Bungiu lun láguyuguagüdüniña hilaaña ladüga mébeha lan lubafu, ligía gayara lubéi laritaguni katei. Ariñagatu Bíbülia wa lan houn sun waruguma lau hiri (Isa. 40:26). Haritagua lumutiña Heowá sun gürigia ha hilaguaañabaña (Hob. 14:13; Luk. 20:37, 38). Gayaraati laritaguni íbini létima ñǘraütimabei hawagu ha lúnbaña háguyugun, kéiburi hani ADN, le meha hagaburibei dan meha le nibagarigiña luma le meha hasaminarubei.

9. Ka uagu afiñe hubéi luagu füramasei lánina águyuguagüdüni?

⁹ Kei le aubei warihei, gayaraati wafiñerun lagunfulirubei lan Heowá füramasei lánina águyuguagüdüni ladüga subudi wamuti busén lan ladügüni ani gabafu lan lun ladügüni. Ábaya resun le wámabei lun wasubudiruni lagunfulirubei lan Heowá füramasei le, ladüga águyuguagüdaali lan fiu gürigia. Lidan tidaani Bíbülia, ruti meha Heowá ubafu houn fiu wügüriña lun háguyuguagüdün hilaaña, Hesukrístu aban hádangiñe wügüriña hagía. Ariha wamá aban lídangiñe abahüdaguni luáguti águyuguagüdüni le ladügübei Hesusu. Dariwati lidan kapítulu 11 le lídanbei lani Huan Ewanhéliu.

ABA LOUNWEN ABAN BESI LUMADA HESUSU

10. Ka asuseredubei dan le lapurichihaña lubéi Hesusu lidan aban fulasu le bianbei weyu lidise luéi Betania, ani ka ladügübei? (Huan 11:1-3).

¹⁰ (Aliiha huméi Huan 11:1-3). Añahein meha fiu lumadagu Hesusu ha meha awinwandubaña Betania: Lásaru hama bián lítunu, María tuma Marta (Luk. 10:38-42). Lidan lagumuchagüle irumu 32 lidaaniwagu Hesusu, aba lasandirun Lásaru ani aba hadiheridun lítunu saragu. Aba hóunahan ñunsu lun Hesusu ani loubafuruguñein meha duna Hordán ani bián weyu lidise fulasu ligía tuéi haban (Huan 10:40). Híruti hilá lan Lásaru, másiñati lídounmeme lan weyu le leresibirunbalin Hesusu ñunsu ligía. Lau sun meha subudi lani Hesusu hilá lan lumada, aba lerederun ñein bián weyu lubaragiñe lidin Betania. Ligíati, dan le lachülürünbei Hesusu, barühali meha Lásaru gádürü weyu lúmagiñe lounwen. Busenti meha Hesusu ladügün aban katei le lunbei meha lanügün buiti houn lumadagu luma lun líchugun uéiriguni lun Bungiu (Huan 11:4, 6, 11, 17).

11. Ka arufudahani luáguti umadaguaü gayaraabei wafurendeiruni lídangiñe abahüdaguni le?

¹¹ Ka arufudahani luáguti umadaguaü gayaraabei wafurendeirun lídangiñe abahüdaguni le? Dan le tóunahanbalin María tuma Marta ñunsu lun Hesusu, mama meha hariñaguña lun lun lidin Betania. Óunaharügütiña ariñaga lun sándiñein lan lumada le hínsiñebei lun (Huan 11:3). Dan le lóunwenbei Lásaru, gayaraati hamuga meha láguyuguagüdüni Hesusu dísegiñe. Gama lumoun aba lanúadirun lun lidin Betania lun ñein lan hama lumadagu María tuma Marta. Anihein san aban humada le aranseñu liña lun líderagunün íbini mamuriahan humani luma? Anhein ítara liña lubéi, subudi humuti gayara lan líderagunün “lidan lidaani idiheri” (Ari. 17:17). Ánhawa áyeihei Hesusu, gayaraabei aban wamá umadaü ítarati. Giribu wamá lidoun abahüdaguni ani ariha wamá ka lan asuseredubei lárigiñe.

12. Ka meha füramase lubéi Hesusu tun Marta, ani ka uagu gayara lubéi tafiñerun lagunfulirubei lan? (Huan 11:23-26).

¹² (Aliiha huméi Huan 11:23-26). Dan le tíchugunbei Marta fe anihein lan Hesusu yarafa lun Betania, lau lóufudagun, aba tidin arihei. Tariñaga lun Hesusu: “Lun hamuga yáañadibuti, móunwenti hamuga namulen” (Huan 11:21). Inarüni gayara lan hamuga meha lareidaguagüdüni Hesusu Lásaru, lau sun lira saminati meha Hesusu ladügün aban katei létima aweiridagüdübarun anigi. Aba lariñagun Hesusu tun Marta: “Láguyuguba bamulen”. Lanwoun lira, derebugugüda lumuti Hesusu tafiñen lau dimurei le lariñagubei tun: “Au águyugunibei, au ibagari”. Ítara liña, ru lumuti Bungiu ubafu lun Hesusu lun lagiribudagüdün ibagari. Lidan meha dan ligía, águyuguagüdaali meha Hesusu aban irahü murusun oura lárigiñe tounwen ani águyuguagüda ligía meha aban nibureinti le óunwebei weyuméme ligía (Luk. 7:11-15; 8:49-55). Gama lumoun, gayaraati meha san láguyuguagüdün aban gürigia le barühali gádürü weyu lúmagiñe lounwen ani gumeseeli lúgubu añalada?

“LÁSARU, FURIBA ÑÉINGIÑE!”

13. Según Huan 11:32-35, ida liña lasandiragun Hesusu lungua dan le larihinu María hama amu ayahuaha? (Ariha huméi dibuhu).

¹³ (Aliiha huméi Huan 11:32-35). Dirá waméi lidan wasaminan le asuseredubei. Aba tayarafadun María, to aban litu Lásaru lun Hesusu, ani aba tariñaguni ligiaméme dimurei le tariñagubei Marta: “Nabureme, lun hamuga yáañadibu, móunwenti hamuga” nati. Dandu tuguya kei ha híbiri wéiriti igarigu le hawagubei. Lau larihini Hesusu hayahuña lan, aba lírudagun saragu. Gudemehabu le lasandirubei hawagu lumadagu ligía adügübei lun layahun. Gunfuranda lumuti igarigu le lanügübei lounwen aban iduhei ani busenti lagumuchun lau íruni le adügübei lun hasufurirun saragu.

14. Ka wafurendeirubei luagu Heowá lídangiñe igaburi le larufudubei Hesusu dan le larihinbarun María ayahuaha?

¹⁴ Igaburi le larufudubei Hesusu dan le larihinbarun María ayahuaha arufudahati woun aban lan Bungiu gudemehabuti Heowá. Ka uagu gayara lubéi wariñaguni le? Ladüga, ítara kei warihini lidan aturiahani le lubaragiñebei le, arufuda lumuti Hesusu buidu buidu ligaburi lisaminan Lúguchi luma le lasandirubei (Huan 12:45). Ligíati, dan le waliihan ayahuaha lan Hesusu dan le larihini hagarigu lumadagu, subudi wamuti ítara liña lan giñe ligaburi lasandiragun Heowá lungua dan le larihiniwa ayahuaha ladüga wagarigu (Sal. 56:8). Lau wasubudiruni katei le, ma adügati lúntima wabusenrun wayarafadun lun Wáguchi le hínsiñehabubei?

15. Según Huan 11:41-44, ka asuseredubei lubadu lumúaha Lásaru? (Ariha huméi dibuhu).

¹⁵ (Aliiha huméi Huan 11:41-44). Aba lachülürün Hesusu lidoun fulasu le ñein lubéi labunúa Lásaru ani aba lamuriahan lun lagidarún dübü le adouragubei lau umúahaü ligía. Ábati tariñagun Marta lun Hesusu háfuga lan híngihali lan lúgubu tamulen. Lariñaga Hesusu tun: “Ma san ariñagatina bun luagu ánhabu lan afiñe nuagu, barihubei lan luéirigun Bungiu?” (Huan 11:39, 40). Ábati larihin Hesusu sielun ani ábati ladügün aban furíei hagibugiñe sun ha ñéinbaña. Busenti meha líchuguni sun uéiriguni lun Heowá luagu le lunbei lasuseredun. Ábati lagúaragun: “Lásaru, furiba ñéingiñe!”. Ani aba láfuridun Lásaru lídangiñe umúahaü. Sun liña meha ladügün Hesusu aban katei weyu ligía le siñá habéi amu adüga (Huan 11:17).

16. Ida liña líderaguniwa abahüdaguni le lídanbei kapítulu 11 le tídanbei liliburun Huan lúntima wafiñerun luagu emenigini lánina águyuguni?

¹⁶ Íderagua lumutiwa abahüdaguni le lídanbei kapítulu 11 le tídanbei liliburun Huan lúntima wafiñerun luagu emenigini lánina águyuguni. Haritagua waméi le füramase lubéi Hesusu tun Marta: “Láguyuguba bamulen” (Huan 11:23). Ítara kei Lúguchi, busenti Hesusu lagunfuliruni füramase le ani gayaraati lagunfuliruni. Arufudati layahun Hesusu busén lan tídangiñe sun lanigi lagidaruni óunweni luma íruni. Lau láguyuguagüdüni Hesusu Lásaru, arufuda lumuti gabafu lan lun lagiribudagüdüni habagari hilaaña houn. Samina wamá giñe luagu le lariñagubei Hesusu tun Marta: “Ma san ariñagatina bun luagu ánhabu lan afiñe nuagu, barihubei lan luéirigun Bungiu?” (Huan 11:40). Gébunati wafiñerun lagunfulirubei lan Bungiu le füramase lubéi, láguyuguagüdübaña lan hilaaña. Gama lumoun, ka lunbei wadügüni lúntima inarüni lan emenigini le woun?

ADÜGA WAMÁ LÚNTIMA INARÜNI LAN ÁGUYUGUNI WOUN

17. Ka lunbei wadügüni danme le waliihan luagu burí águyuguni le uágubei tayanuha Bíbülia?

¹⁷ Aliiha wamá luagu burí águyuguni le lídanbei dan le sügühalibei ani ráramagua wamá asaminara luagu. Tidan Bíbülia daritiwa widü abahüdaguni hawagu gürigia ha águyugubaña lun hawinwandun ya ubouagu.c Gayaraati san wáfaagun lun waturiahani buidu buidu kada aban lídangiñe abahüdaguni le? Sunme awanhán lan adügei, da waméi wachügüwagun layanuhaña lan abahüdaguni le hawagu gürigia ha awinwandubaña lidan dan ligía: wügüriña, würiña hama irahüñü. Áluaha wamá kaba lan wafurendeira lídangiñe ani samina wamá luagu kada hénpulu le arufudubei busén lan Heowá ani gayara lan lagiribudagüdüni habagari hilaaña houn. Ani ráramagua wamá asaminara, luagu águyuguni létima súdinitimabei, láguyugun Hesusu. Ariha hamuti saragu san gürigia Hesusu lárigiñe láguyugun, ani águyuguni le ligía lébunabei wafiñen (1 Ko. 15:3-6, 20-22).

18. Ida luba wasagarun buiti lídangiñe uremu le ayanuhabei luagu águyuguni? (Ariha huméi giñe abürüdǘni).

¹⁸ Sagá wamá buiti lídangiñe “uremu” le ayanuhabei luagu águyuguni (Efe. 5:19).d Adügati uremu burí le lun lederebugudun wafiñen luagu águyuguni, ani adügati lúntima warihini inarüni lan. Ligíati buiti lun waganbahani, lun weremuhani luma lun wayanuhan luagu le larufudahabei liletüran woun lidan áhuduraguni hadan iduheñu. Áfaagua wamá lun lerederun uremu burí le wachüguagu luma tidan wanigi. Dánmeti le wásügürün lídangiñe somu sügǘ le ídanbei gayara lan weferidiruni wabagari, o danme lan le weferidirun aban hádangiñe waduheñu, líderagubadiwa lani Heowá sífiri sandu lun waritaguni uremu burí le. Líchuguba katei le dǘgüdaguaü luma iderebugu woun.

19. Ida luba wayusuruni wasaminan lun waríagun woungua danme le lasuseredun águyuguni? (Ariha huméi rekuáduru “Kaba hamuga álügüdahani hadüga houn ha lúnbaña háguyugun?”).

¹⁹ Yusu waméi wasaminan. Rúhali Heowá iyaraani woun lun waríagun woungua lídanme iseri Ubóu. Ariñagatu aban íbiri: “Sügütina saragu dan asaminara lídanñadina lan iseri Ubóu darí lun laganóun lan nun kamá nirimichuñein líhemen burí fuluri le lídanbei paraísu”. Samina wamá danme wasubudiruniña lubúeingu Heowá úaraguatiña ha meha awinwandubaña lidan tidaani Bíbülia. Ka hádangiñe habusenrunbei hasubudirun? Kaba hamuga álügüdahani hadüga lun? Samina wamá danme le wadunragun hama waduheñu ha hilaguaañabaña. Samina humá luagu furumiñeti dimurei le lunbei hariñaguni houn, óuburuni héreti le lunbei híchuguni houn luma lanarime ugundani le lunbei hasandiruni danme le harihiniña ábaya wéiyaasu.

20. Ka lunbei wasigirun adügei?

²⁰ Wéiriti weteingiruni Heowá luagu füramasei lánina águyuguni. Chouru wamuti lagunfulirubei lan ladüga busén lan ladügüni ani gayara lumuti agunfulira. Ítara liña kamá hamuga lariñaguña lun kada aban wádangiñe: “Hásaaruba biduheñu”. Sigí wamá lubeiti ederebudagüdei wafiñen luagu füramasei lánina águyuguni. Ánhawa adügei, yarafatimabadiwa lun Heowá, le íchugubalin lubuidun emenigini le woun.