Anihán lóurate waranserun
1. Ka chansi líchugubei lidaani Aritaguagülei woun, ani kaba wadüga lun wasagarun buiti lídangiñe?
1 Sagü irumu, ruti lidaani Aritaguagülei chansi woun lun walawahani Wabungiute le hínsiñehabubei (Sal. 109:30). Chóuruti warufudubei lan weteingiradi luagu lebegi asalbaruni lau wadügüni sun wayaraati lun waganwoundagüdüni wani ministeriu lidan ǘrüwa-hati. Anihán lidaani wadügüni aransehani lubá dan ligía (Ari. 21:5).
2. Ida liña hóunabun fiú íbirigu dan le híchugunbei fe luagu lagidarúba lan lídangiñe oura le lunbei wadügüni lun weseriwidun keisi prekursoru ídehati lidan gádürü-hati, irumu 2011? Agia huguya, ida liña hasandiragun hungua?
2 Prekursoru ídehati. Lidan irumu le ásügürübei wéiriti wagundan lau wasubudiruni luagu lagidarúba lan lídangiñe oura le lunbei wadügüni lun weseriwidun keisi prekursoru lidan gádürü-hati. Libügürü katei le, abürühati aban nibureinti: “Siñagili neseriwidun keisi prekursoru le adügübei ǘrüwa-wein-diisi oura lugundun magumu nágili naturiahan. Gama lumoun, namuriahaboun gárada lun gayara nagunfulirun lau darandi oura keisi prekursoru ídehati lidan gádürü-hati ani nadügübei sun niyaraati lun nadügün dimí-san oura”. Ariñagatu giñe aban íbiri to nadagimeinboun dan dayarüti: “Darandi oura? Chóuruti gayarabei lan nadügüni!”. Dan le lichugúnbei awisahani, aban íbiri to barüharu lóugiñe gádürü-wein irumu ani seriwiharu meha kei prekursora to adügütu ǘrüwa-wein-diisi oura ariñagatu: “Busengubeiñadina neseriwidunya kei prekursoru! Subuditi lun Heowá ligía lan dan le buídutimabei lidan nibagari”. Lidan hati ligía, ñeinñanu giñe íbirigu ha íbini siñá lan heseriwidun keisi prekursoru, gánwoungüda hamuti heseriwidun.
3. Ka wánibei resun lun weseriwidun kei prekursoru ídehati lidan ǘrüwa, gádürü luma seingü-hati?
3 Buídubei ǘrüwa-hati lun weseriwidun kei prekursoru ídehati, ladüga lichugúayaba chansi woun lun wanúadahan wagunfulirun darandi o dimí-san oura. Ani lúmagiñe samudi 17 lidan ǘrüwa-hati wadügüba aban wadagimanu espechaliti lun wamisurahaniña gürigia lidoun Aritaguagülei luagu lóunwen Hesusu, le lunbei ladügǘn 5 lidan gádürü-hati. Agurabatiwa lárigiñe lanme heseriwidun kei prekursoru ídehati lidan ǘrüwa-hati, lun gibe hamá abusenrutiña hagunfulirun 50 oura lidan gádürü luma seingü-hati.
4. Ka gayarabei wadügüni lun waganwoundagüdüni weseriwidun? Kaba burí resultóu wibiha?
4 Lidan le aban Guñoun lánina Áhuduraguni lidan Familia gayarati hakutihan fiú manera lun haganwoundagüdüni heseriwidun lidan lidaani Aritaguagülei (Ari. 15:22). Amuriaha humá luma Heowá lun labiniruni háfaagun (1 Huan 3:22). Mabulieida huméi giñe dan le lan haganwoundagüdüni heseriwidun, alawahatima humuti Heowá ani gúndaatimabadün (2 Ko. 9:6).