Adüga wamá lun weiri lan wagundan lidan lidaani Aritaguagülei!
1. Ida luba haganwoundagüdüni hugundan lidan lidaani Aritaguagülei?
1 Hínsiñeti hamuga san hun haganwoundagüdüni hugundan lidan ǘrüwa-hati, gádürü-hati luma seingü-hati? Anhein ítara liña lubéi, hibihibei anhein haganwoundagüda dan le hásügürübei lidan apurichihani, seriwi huguyame kei prekursoru ídehati, anhein gayara lubéi hadügüni. Ka uagu laganwoundagüdübei lubéi katei le hugundan?
2. Ka uagu adüga lubéi waganwoundagüdüni wani ministeriu lun laganwoundun wagundan?
2 Gánwounguagüda huméi hugundan. Adüga lumutiwa Heowá lun gayara lan wasandirun ugundani dan le wáhuduragun lun ladüga subudi wamani megei wamani lídehan (Mat. 5:3). Adüga lumutiwa giñe lun wasandirun ugundani dan le wíchugun houn amu (Adü. 20:35). Adügati wani ministeriu lun wagunfulirun lau bián katei le: wáhuduragun lun Bungiu luma wíderaguniña gürigia. Ligíati éibutima lubéi laganwoundun dan le wásügürübei agunfulira lau wani ministeriu, ábatima lan laganwoundun wagundan. Dan giñe gabügürügua lan wáfuridun apurichiha, ábatima labuidurun ligaburi wadügüni, adügatiti katei le lun chouru lan wasandiragun woungua luma lun maweirindigia lan wadadagarun. Ani gíbetimabei chansi wama lun wapurichihan luma lun wagumeserun aturiahani tídangiñeti Bíbülia hama gürigia. Ruti sun katei le ugundani lidan ministeriu.
3. Ka uagu buídubei lubéi ǘrüwa-hati luma gádürü-hati lun weseriwidun kei prekursorugu ídehatiña?
3 Buídubei ǘrüwa-hati luma gádürü-hati lun weseriwidun keisi prekursorugu ídehatiña lugundun gayarabei desidírü wamá wapurichihan darandi o dimí-san oura lidan kada aban. Tederegehóuba giñe amisuragülei lubá Aritaguagülei, ani ruti wadagimanu le saragu ugundani. Laduraruba wadagimanu le lúmagiñe samudi 22 lidan ǘrüwa-hati darí luéyuri laritawagún lounwen Hesusu leindi 14 lidan gádürü-hati. Buin luba burí damuriguaü hau saragu íbirigu beresegu afanreinhoun amisuragülei lidan sun fulasu le atokarubei houn lidan dan le anuadirúaalibei lun ladügǘn wadagimanu le, ítarati harufudubei “gaganbadi hamá súngubei” lau hawadigimaridun lidan úarani (Sof. 3:9).
4. Ka lunbei hadügüni anhein busén hubéi heseriwidun kei prekursoru ídehati?
4 Aranse humá lúmagiñe guentó. Anhein madügün humagili lubéi, sagá humá dan lun hakutihani ida liña lan hayusuruni hidaani, ariha humaamugei ka lan asansiruni gayarabei hadügüni lun haganwoundagüdüni hani ministeriu aban hati o lóugiñe. Furíei humá lun Heowá (Sant. 1:5). Ayanuha humá luagu katei le hama hiduheñu luma hama íbirigu ha lídanbaña damuriguaü (Ari. 15:22). Háfuga gayarabei hasandiruni ugundani le líchugubei leseriwidúniwa kei prekursoru ídehati íbini sandi humá o awadigimarida humá sun weyu.
5. Kaba lanüga waganwoundagüdüni wani ministeriu lidan lidaani Aritaguagülei?
5 Busenti Heowá lun weiri lan hagundan lubúeingu (Sal. 32:11). Ánhawa áfaagua lun waganwoundagüdüni wani ministeriu lidan lidaani Aritaguagülei, waganwoundagüdübei wagundan, ani le súdinitimabei wagundaaragüdübei Wáguchi le siélubei (Ari. 23:24; 27:11).