Sun katei wuribati le lígirubei wuribu
Lídangiñe sun katei le hásügürübei gürigia lidan habagari, wuribu luma anarimeni ligíatima katei le adügübei lun hasufurirun. Dandu súdaragu ha ñǘdünbaña awuribuha kei amu gürigia lidan sun ubóu, súfuri hamaali sun katei wuribati le lígirubei wuribu.
SÚDARAGU
“Súnwandan narihin lasuseredun katei hanarimeti luriban geyegu nau. Arihatina ida liña lan hafarúniwa gürigia hilagubei o ida liña lan habuleseirún darí lun herederun danimañu lun sun habagari. Wínwantina asaminara gayara lan lasuseredun katei wuribati furumiñeguarügü oura” (Gary, Gürán Büretáña).
“Anihein wounu luagu nanagan luma luagu nigibu lárigiñe laduurawagun balu nuagun, ani arihatina ida liña lan háfarawagun saragu gürigia hilagubei, irahüñü hama gürigia derebuguhaña haganagua. Adügati wuribu lun tedererun banigi” (Wilmar, Kolonbia).
“Dan le laduurawagun balu luagun aban gürigia bigibugiñe, siñati basagaruni katei le lídangiñe bichügü, mabulieidun bumuti lagúarahan lau igarigu” (Zafirah, Meriga).
GÜRIGIA HA MÍDINBAÑA AWURIBUHA
“Saminatina yebe siñaali lan nasandirun ugundani lidan nibagari. Hanufudetibu beferidiruni bibagari. Lau sun lira, mámarügüñein ligía wuriba, hanufudetibu giñe beferidiruniña biduheñu hama bumadagu (Oleksandra, Ukrania).
“Mosu meha saragiñe nan lun nidin adüga fila, lun náluahan éigini lúmagiñe ladaünrün biama lubá larugan darí ladaünrün unsu áriebu. Wéiriti meha nanufude ñein nan, subudiga nun gayara lan ladagarun aban balu nuagun lun láfarunina hilagubei” (Daler, Tayikistan).
“Hilaguatiña nagübürigu ladüga wuribu. Aba nerederun nábuguarügü sin ni aban lun lóunigirunina luma lun líchugun gurasu nun” (Marie, Ruanda).
Íbini barǘ lan wuribu saragu katei wuribati, ibihaaña gürigia ha, lun hasandiragun houngua lau darangilaü. Lanwoun lira, chouru hamuti málühali lan wuribu luma anarimeni agumucha. Tafuranguagüdübei Garüdia Awisahatu to úara tuma Bíbülia ida luba lan lagunfulirun katei le.