Ǘnabugu wamá dan le anihein lan katei le úabei gunfuranda wamani

1. Ka iyaraani líchugubei Heowá woun, ani ka uagu?

ADÜGA lumutiwa Heowá lau iyaraani lun wasaminarun, lun wafurendeirun luma lun gunfuranda wamani ida luba lan wafalaruni le wafurendeirubei. Ka funa san uagu ladügawa ítara? Ladüga busenti lun wasubudiruni “lanichigu lasubudirúniwa Bungiu” luma lun buidu lan le wanúadirubei sun awanha lan eseriwida lun (Ari. 2:​1-5; Rom. 12:1).

2. a) Ka lunbei gunfuranda wamani? (Hobu 37:​23, 24; ariha huméi giñe dibuhu). b) Ka uagu súdini lubéi lun gunfuranda wamani anihein lan katei ibidiñeti woun?

² Adüga lumutiwa Heowá lau iyaraani lun wafurendeirun. Lau sun lira, anihein katei ibidiñeti woun (aliiha huméi Hobu 37:​23, 24). Samina wamá luagu Hobu. Adügati Heowá saragu álügüdahani lun le arufudubalin anihein lan saragu katei le ibidiñeti lun Hobu. Íderagua lumuti álügüdahani burí le Hobu lun lasansiruni ligaburi lisaminan luma lun gunfuranda lani mosu lan ǘnabugu lan (Hob. 42:​3-6). Barüti giñe buiti woun gunfuranda wamani anihein lan katei le ibidiñeti woun. Dan le gabaroun wamani katei le, íderagua lumutiwa lun ǘnabugu wamá luma lun wafiñerun lasubudiragüdübei lan Heowá ariñahani le wemegeirubei woun súnwandan lun buidu lan le lunbei wanúadiruni (Ari. 2:6).

3. Kaba wariha lidan aturiahani le?

³ Lidan aturiahani le wakutihaba fiu katei le ibidiñeti woun luma ka lan uagu anihein lubéi dan barǘ lan katei le turobuli woun. Warihuba giñe ka lan uagu buidu lubéi lun ibidiñe lan ítaga katei woun. Líderagubadiwa aturiahani le lúntima wafiñerun luagu Heowá, “le arufudubalin lichú lau sunsuinagubei”, ani lariñagubei giñe létima wemegeirubei wasubudirun (Hob. 37:16).

IBIDIÑETI WOUN ÍDAAME LAN LAGUMUCHA UBÓU LE

4. Según Matéu 24:​36, ka ibidiñebei woun?

⁴ (Aliiha huméi Matéu 24:36). Ibidiñeti woun ídaame lan lagumucha ubóu le. Dan meha ya lubéi Hesusu ubouagu, ibidiñeti giñe lun kaba lan “weyu” ani kaba lan “oura” lagumucha ubóu le.a Lárigiñe, ariñagati houn lani apostolugu yusu lani Heowá, le Labureme Dan, “lubafu” lun lanúadiruni kaba lan dan lasusereda ítaga katei (Adü. 1:​6, 7). Subudi lumuti Heowá kaba lan dan lagumucha ubóu le ani ibidiñeti woun ida luba lan wasubudiruni.

5. Kei le ibidiñe lan woun kaba lan dan liabin lagumuchagüle ubóu, ka gayaraabei lasuseredun woun?

⁵ Según le lariñagubei Hesusu, ibidiñeti woun átiribei lan dan wagurabaha darí lun lachülürün lagumuchagüle ubóu. Ligíati, másiñati weferidiruni waguraasun o lábürühan warüna dántima le barühadiwa saragu irumu eseriwida lun Heowá. O másiñati hénrengu lan woun wawanduni bula le hadügübei waduheñu o amu gürigia woun ladüga machülügili lan lagumuchagüle ubóu (2 Fe. 3:​3, 4). Gayaraati giñe liabin saminaü le woun: “Anhein hamuga nasubudira kaba lan dan liabin lagumuchagüle ubóu, ménrenguntimabei yebe nun gaguraasun nan luma lun nawanduni bula le adügǘbei nun”.

6. Ka uagu buidu lubéi ibidiñe lan woun kaba lan dan liabin lagumuchagüle ubóu?

⁶ Lau mariñagun lani Heowá woun ídaame lan liabin lagumuchagüle ubóu, líchuguñein chansi woun lun warufuduni luagu weseriwiduña lan lun ladüga hínsiñe lan woun ani afiñe wamá luagu. Busentiwa weseriwidun lun Heowá lun súnwandan mama lubaarügü liabin lagumuchagüle ubóu. Dan le wasaminarun luagu “luéyuri Bungiu”, mabusenrúntiwa wetenirun lun ídaame lan liabin, lubaragiñe lira busentiwa wetenirun lun le lunbei wibihini. Líderagubadiwa wasaminarun luagu le lunbei ladügüni Bungiu lúntima wayarafadun lun luma lun wadügüni sun wayaraati lun wagundaaragüdüni (2 Fe. 3:​11, 12).

7. Ka katei wasubudirubei?

⁷ Buídubei wadüga ánhawa etenira lun le wasubudirubei. Kati wasubudirubei? Lúmagiñe lan irumu 1914 wawinwanduña lan lidan lagumuhóun dan. Rúhali Heowá profesía tidan Bíbülia le arufudubalin inarüni lan katei le ani ariñaga lumuti giñe ida luba lan buga ibagari lidan dan le. Ligía wasubudirunbalin “yarafaali [lan] lanarime luéyuri Wabureme” (Sof. 1:14). Subudi wamuti giñe busén lan Heowá wapurichihani “uganu buiti le luáguti larúeihan Bungiu” houn sun gürigia ha wayara (Mat. 24:14). Ani wapurichihañein uganu le lidan lóugiñe 240 ageiraü, luma lidan lóugiñe 1,000 iñeñein. Ma memegeiruntiwa wasubudiruni “weyu luma oura” le lunbei liabin lagumuchagüle ubóu lun wídehan lau ubebeni lidan dasi le súdinitimabei?

IBIDIÑETI WOUN KA LAN GAYARAABEI LADÜGÜNI HEOWÁ LUN LÍDERAGUNIWA

8. Dan le tariñaguni Bíbülia dimurei “le ladügübei Bungiu”, ka mini lubéi? (Apurichihati 11:5).

⁸ Mama súnwandan wasubudiruni “le ladügübei Bungiu” (aliiha huméi Apurichihati 11:5). Dan le tariñaguni Bíbülia dimurei “le ladügübei Bungiu” layanuhaña luagu sun katei le ladügübei —o le lígirubei— Bungiu lun lasuseredun lun lagunfulirun lugundan. Siñati wasubudiruni ka lan uagu lígira lun lasuseredun ítaga katei ni kaba lan ladüga lun líderaguniwa (Sal. 37:5). Agoubaguagüda tumuti Bíbülia ibidiñe lan woun le ladügübei Bungiu luma ibidiñe lan woun ida liña lan laweiridun irahü turageirugu lúguchu, ni ha aturiahabalin siensia ibidiñeti houn sunsuinagubei ida liña lan laweiridun irahü turageirugu lúguchu. Ítarameme, ibidiñeti giñe woun sunsuinagubei ida liña lan ladügüni Heowá katei.

9. Kei ibidiñe lan woun kaba lan ladüga Heowá lun líderaguniwa, ka saminaü gayaraabei liabin wachügüwagun?

⁹ Dan le ibidiñe lan woun kaba lan ladüga Heowá lun líderaguniwa, gayaraati ladügün katei le lun ibidiñe lan woun kaba lan wadüga. Kéiburi, wáguyun lidoun aban fulasu le ñein lubéi hemegeirúa apurichihatiña o lun wadügün aransehani lun mibe lan wamegegun gayara láamuga waganwoundagüdüni weseriwidun lun Heowá. Luéigiñe le aban oubaü, gayaraati wálügüdagun woungua anhein gunda lubéi Heowá wau dan le masuseredun lan katei kei le aubei wagurabei. Gayaraati mibihin wamani le wabusenrubei wadügün lidan weseriwidun lun Heowá, o wáfaaguña lan lun wapurichihan saragu, lau sun lira, úatiña busentiña haturiahanu Bíbülia. O wídehaña lidan somu dasi lánina ábunaguni tidan lóundarun Heowá ani aba wagagibudagun luma lénrengunga. Gayaraati ladügün katei le lun wasaminarun míderagun lániwa Heowá o magundan lan wau.

10. Kei ibidiñe lan woun kaba lan ladüga Heowá, ka igaburi gayaraabei gagaburi wamani?

¹⁰ Íderagua lumutiwa ibidiñe lan woun kaba lan ladüga Heowá lun ǘnabugu wamá luma lun gunfuranda wamani súnwandan lan subuditima lan lun Heowá ka lan buídubei woun (Isa. 55:​8, 9). Wafurendeiruba giñe afiñera sunsuinagubei luagu súnwandan lan buídutimabei lan lidin woun ánhawa abalacha luagu. Anhein buidu lubéi lidin woun lidan apurichihani o lidan somu dasi tani lóundarun Heowá, súnwandan wíchugubei lan uéiriguni lun (Sal. 127:1; 1 Ko. 3:7). Ánheinti masuseredun katei kei le aubei wagurabei, darangilubadiwa lau wasubudiruni ariha lani Heowá sun katei ani lúhaburuguñein lan (Isa. 26:12). Adüga wamuti le wayaraati ani le líbiri aba wígiruni lúhaburugun Heowá. Íbini madügün lan milaguru uguñe weyu lun larufuduni woun kaba lan wadüga, kei meha ladügüni lidan dan ligira, chouru wamuti líchugubei lan adundehani le wemegeirubei woun (Adü. 16:​6-10).

11. Ka burí katei súdiniti wasubudirubei?

¹¹ Líderagubadiwa waritaguni katei le wasubudirubei. Kati katei wasubudirubei? Subudi wamuti súnwandan lan hínsiñehabu lan Heowá, richá lan ani chu lan lau, gebegi lan le wadügübei lun saragu luma le wadügübei hawagu wábirigu, ani súnwandan líchuguba lan afayeiruahaü houn ha úaraguabaña lun (Ebü. 11:6).

IBIDIÑETI WOUN KABA LAN ASUSEREDA HARUGA

12. Según Santiagu 4:​13, 14, ka ibidiñebei woun?

¹² (Aliiha huméi Santiagu 4:​13, 14). Ibidiñeti woun kaba lan asusereda lidan wabagari haruga. Aban inarüni le siñati lasigenerúniwa lira. Lugundun “chülüti dan luma sügǘ le magurabunti houn sun gürigia” (Apur. 9:​11, TNM). Ligíati siñá lubéi wasubudiruni anhein lagunfuliruba lubéi le wabusenrubei wadügün o anhein wínwangidiwa lubeime lun wadügüni.

13. Ida liña wasandiragun woungua lau ibidiñe lan woun kaba lan asusereda haruga?

¹³ Gayaraati hénrengubei lan woun lun wawandun lugundun ibidiñe lan woun kaba lan asusereda ámuñegü. Másiñati wadiheridun luagu katei le gayaraabei lasuseredun ani gayaraabei ladügün katei le lun weferidiruni wagundan. Háfuga somu lamiselu o somu sügǘ le magurabunti le gayaraabei ladügün lun wabuinchun lau igarigu luma idiheri. O anhein magunfulirun le wagurabubei gayaraabei ladügün lun weferidiruni waguraasun luma lun lábürühan warüna (Ari. 13:12).

14. Kátima wemegeirubei lúntima gunda wamá? (Ariha humóun giñe iyawaü).

¹⁴ Dan le wawanduni lénrengunga le ídangiñebei wásügüra, warufuduñein meberesenga lan le ñǘbuinti weseriwiduba lan lun Wáguchi Bungiu le siélubei ladüga línsiñe woun, mama ladüga busén wamá wibihin somu katei lúmagiñe. Daritiwa abahüdaguni tidan Bíbülia le arufudubalin moun lumuti lan wagurabun lesefurubadiwa lan Heowá lídangiñe sun turobuli ni lun wasaminarun bürǘ lani wasinun. Subudi lumuti Heowá gayara lan gunda wamá íbini ibidiñe lan woun kaba lan asusereda woun ámuñegü. Gayaraabei gunda wamá ánhawa afalarei ladundehan ani gaganbadi wagía lun (Her. 10:23). Dan le wáluahani ladundehan Heowá lun wadügüni le wanúadirubei wadügün, ítara liña kamá le wariñaguña: “Anhein busén Bungiu, wabagariduba, ábame wadügüni le o lira” (Sant. 4:15).

15. Ka wasubudirubei luagu ámuñegü?

¹⁵ Íbini ibidiñe lan woun kaba lan asusereda haruga, subudi wamuti füramase lan Heowá ibagari magumuchaditi woun, sielu lan yebe o ya lan ubouagu. Subudi wamuti luagu siñá lan leyeehan ani úati ni aban lun ladügün lun magunfulirun lubéi lan le füramase lubéi (Titu 1:2). Ligíarügüñein gayara lariñaguni dimurei le: “Ariñaga numuti le lunbei lasuseredun lúmagiñe furumiñeti dan; ariñaga numuti le anitebei saragu dan lubaragiñe”. Gúnfulihali sun le ariñaga láalibei ani lagunfuliramemeba (Isa. 46:10). Chouru wamuti úa lan ni kata lun ladügün lun mínsiñe wamá lun Heowá (Rom. 8:​35-39). Líchuguba lichú aau woun, gurasu luma erei le wemegeirubei lun gayaraabei lan wawanduni furumiñeguarügü katei le lunbei liabin. Chouru wamuti líderagubadiwa lan Heowá ani biní láwame (Her. 17:​7, 8).

SIÑATI GUNFURANDA WAMANI SUNSUINAGUBEI SUN LE LASUBUDIRUBEI HEOWÁ WAWAGU

16. Ka lasubudirubei Heowá wawagu, ani ida liña laweiridagüdünu katei le wanigi? (Sálumu 139:​1-6).

¹⁶ (Aliiha huméi Sálumu 139:​1-6). Subuditi luáguti kada gürigia lun Heowá, Bungiu le Adügübaliwa. Subudi lumuti ida liña lan wasandiragun woungua luma wasaminan. Subudi lumuti le wariñagubei, le wabusenrubei wariñagun, le wadügübei lúmati ka lan uagu wadüga ítaga katei. Ariñagati urúei Dawidi súnwandan lan aranseñu liña lan Heowá lun líderaguniwa. Ma wéiritu wanigi lau wasubudiruni berese lan wau ani hínsiñe wagía lun Bungiu le Adügübalin sielu luma Ubóu, Bungiu Suntigabafu! Ariñagati Dawidi: “Díseti lueirin lichú bau nuéi; wéiriti liñun, darí lun siñá nani gunfuranda!” (Sal. 139:6).

17. Ka uagu anihein lubéi dan hénrengu lan woun lun wafiñerun subudi lániwa Heowá buidu buidu?

¹⁷ Másiñati hénrengu lan woun warihini Heowá kei aban úguchili hínsiñehabuti ani le beresebei wau tadüga binadu relihión to meha ñein wabéi, ladüga ligaburi wagüriarúniwa o ladüga binadu wechun. Háfuga wasaminarun mabusenrun láadiwa lan Heowá o díseeli lan wawéi ladüga meha charati le wadügübei luagu aban dan. Íbini meha urúei Dawidi sandiguati meha lungua ítara (Sal. 38:​18, 21). O háfuga láfaaguña lan somu gürigia tídangiñe sun lanigi lun lasansiruni ligaburi lawinwandun lun gayaraabei lan ladügüni katei kei le aubei labusenrei Bungiu, másiñati lálügüdagun lungua: “Ánheinti gunfuranda lubalina Bungiu, kati uagu lamuriaha lun nígirun aban igaburi le hénrengubei nun lun nígiruni?”.

18. Ka uagu buidu lubéi lun wafiñerun subudi lániwa Heowá buidu buidu sügǘ luéi wasubudiragun woungua? (Ariha humóun iyawaü luma dibuhu).

¹⁸ Gayaraati wafurendeirun afiñera subudi lániwa Heowá buidu buidu sügǘ lau wasubudiragun woungua ani ariha lumuti igaburi buiti le wawagubei íbini marihin wamani. Ariha lumuti Heowá wachara, gama lumoun, gunfuranda lumuti giñe ka lan uagu wasandiragua woungua ítara ani óusera wagía lidan ítaga igaburi, ani hínsiñetiwa lun (Rom. 7:15). Dan le gunfuranda wamani subudi lan lun Heowá gayara lan wabuiduragüdüni wagaburi darí lun gagaburi wamani igaburi le aubei lagundaara, ru lumuti katei le erei le wemegeirubei woun lun wasigirun eseriwida lun Heowá lau úaraguni luma lau ugundani.

19. Ka wasubudirubei luagu Heowá?

¹⁹ Subudi wamuti ínsiñeni lan Heowá ani chouru wamuti lira (1 Huan 4:8). Subudi wamuti arufuda lani lilurudun le richabei hínsiñe wamá lun saragu ani súnwandan lan busén lani le buídutimabei woun. Subudi wamuti giñe busén lan lun wawinwandun lun súnwandan, ligía líchugunbalin lebegi esefuruni woun. Seremei idewesei le, chouru wabalin gayaraabei lan wagundaaragüdüni Heowá íbini chará wamá (Rom. 7:​24, 25). Ani subudi wamuti “wéiritimati [lan] Bungiu sügǘ tau wanigi, lugundun subudi lan sun katei lun” (1 Huan 3:​19, 20). Subudi lumutiwa Heowá buidu buidu ani subudi lumuti giñe gayara lan wadügüni lugundan.

20. Kaba íderaguawa lun madiheridun wamá saragu?

²⁰ Kei le aubei warihei, ru lumuti Heowá sun ariñahani le wemegeirubei wasubudirun. Líderagubadiwa wánharun lun adundehani le lau ǘnabuguni lun madiheridun wamá saragu luagu katei le ibidiñebei woun. Lubaragiñe lira, weteniruba lun katei le súdinitimabei. Ítara luba warufuduni afiñe wamá sunsuinagubei luagu Heowá, aban Bungiu le chubei au (Hob. 36:4). Íbini anihein lan saragu katei ibidiñeti woun, gúndaatiwa wasubudiruni lachülürüba lan dan lun merede lan wafurendeirun luagu Wabungiute lun sun dan (Apur. 3:11).