Ka wafurendeirubei luagu lebegi esefuruni?

1. Ka buiti wasagarubei dan le waritaguni lounwen Hesusu sagü irumu?

ABAN idewesei le wéiriti lubuidun lebegi esefuruni (2 Ko. 9:15). Seremei líchuguni Hesusu libagari wawagu, gachansin wabéi lun gamadagua wamá luma Heowá luma lun wawinwandun lun súnwandan. Gébunati lun weteingiruni Heowá, ligía íchugubalin idewesei le woun ladüga weiri lan wínsiñe lun (Rom. 5:8). Lun líderaguniwa Hesusu arufuda geteingiradi luagu lebegi esefuruni luma lun mabulieidun wamani, ariñagati woun lunti lan waritaguni lounwen sagü irumu (Luk. 22:​19, 20).

2. Kaba wariha lidan aturiahani le?

² Lidan irumu le, lábürühaba Aritaguagülei weyu samudi 12 lidan gádürü-hati irumu 2025. Chóuruti sun lan wagía waransehaaña lun wachülürün. Buídubei wadüga lun wasagarun dan lidan lidaani Aritaguagülei lun wararamagun asaminaraa luagu sun le ladügübei Heowá luma Lisaani wawagu. Lidan aturiahani le, warihibei ka lan larufudahabei lebegi esefuruni luagu Heowá luma luagu Hesusu woun. Lidan leweñegua aturiahani, wakutihaba giñe ka lan buiti wasagarubei lídangiñe lebegi esefuruni lúmati ida luba lan warufuduni seremei wamani Heowá luagu idewesei le.

KA LARUFUDAHABEI LEBEGI ESEFURUNI WOUN LUAGU HEOWÁ?

3. Ida liña ladüga lounwen ábanrügü wügüri lun lesefuruniña míñunu gürigia lídangiñe figóu? (Ariha huméi giñe dibuhu).

³ Arufudahati lebegi esefuruni woun luagu hínsiñe lan irichaü lun Heowá (2 Lur. 32:4). Ka uagu wariñagei? Kei aba lan maganbadi lan Adán lun Bungiu ábati galagante hamani sun ladügawagun figóu luma óunweni (Rom. 5:12). Óunaha lumuti Heowá Hesusu ubouagun lun lesefuruniwa lídangiñe figóu luma óunweni. Gama lumoun, ida liña ladügün lani ábanrügü wügüri mafigounti sákürifisiu lun gayara lan hesefurun saragu míñunu gürigia? Aba lafuranguagüdüni apostolu Pábulu katei le lidan igaburi le: “Ladüga lubeiti lumaganbadin ábanrügü wügüri [Adán], ñǘbuintiña sun gürigia lun hafigouhaba lan; ítarameme giñe, ladüga laganbadi ábanrügü wügüri [Hesusu], gayaraati hayabin sun gürigia lun richaguabaña lan ligibugiñe Bungiu” (Rom. 5:19; 1 Tim. 2:6). Lidan amu dimurei, ladüga lumaganbadin aban wügüri le mafigounti, aba ládaruniwa lidoun figóu luma óunweni, ligíati mégeiwa lubéi meha aban wügüri le mafigounti le gaganbaditi lun gayaraabei lan lasagaruniwa lídangiñe figóu luma óunweni.

4. Ka uagu mígirun lubéi Heowá lun hawinwandun lun súnwandan ladügawagun Adán ha gaganbadibaña?

⁴ Lunti meha san lounwen Hesusu lun lesefuruniwa? Ka uagu mígirun lubéi Heowá lun hawinwandun lisaanigu Adán ha gaganbadibaña lun súnwandan? Lun Heowá marichaü lira. Laganóun hamuga kamá le mafigounhanti Adán ni murusun ani hayabin hamuga lisaanigu kamá hamuga le úati figóu hadan.

5. Ka uagu chouru wabalin súnwandan ladügübei lan Heowá le buídubei?

⁵ Samina wamá lun hamuga mafayeirun lani Heowá lebegi esefuruni, aba hamuga lígirun lun hawinwandun ladügawagun Adán ha gafigounbaña lun súnwandan. Kaba hamugati asusereda? Lun hamuga lígiruni Heowá katei le ítara, lóuseruña hamuga lau marichaü, másiñati hasaminaruña lan hamuga gürigia luagu anhein ladügübei lubéi ligiaméme lidan amu kesi. Kei hénpulu, gayaraabei hamuga lebelurun machouruni houn gürigia anhein lagunfulirubei lubéi Heowá le burí füramase lubéi. Gama lumoun, moun lumuti ladiheridagüdüniwa katei le, lugundun adüga lumuti Heowá sun katei lau irichaü, íbini mosu lan meha lederegeruni libagari Lisaani le hínsiñebei lun kei sákürifisiu. Ligía chouru wabalin súnwandan lan ladügübei lan Heowá le buídubei.

6. Ida liña líderaguniwa lebegi esefuruni lun warihini weiri lan wínsiñe lun Heowá? (1 Huan 4:​9, 10).

⁶ Arufudati lebegi esefuruni richá lan Heowá, lau sun lira, le ínchahabalin, lueirin ínsiñeni le lasandirubei wawagu (Huan 3:16; aliiha huméi 1 Huan 4:​9, 10). Óunaha lumuti Heowá Liráü lun lounwen luagu wafigoun ladüga busén lan lun wawinwandun lun súnwandan, ani lanwoun lira, busenti lun hádangiñe wamá liduheñu. Samina waméi le: dan le lafigouhanbei Adán aba mámaali lan hádangiñe liduheñu Heowá. Ligía sun lubéi wagía bóugudin hawéi liduheñu Heowá wagüriahóua. Gama lumoun, seremei lebegi esefuruni sun gürigia ha afiñerutiña luagu Bungiu ani gaganbadi hagía lun gayaraabei hádangiñe hamá liduheñu Heowá ámuñegü. Íbini guentó gayaraabei feruduna lani Heowá wafigoun ani gayaraati giñe gamadagua wamá luma, luma hama wábirigu. Ma lueirin wínsiñe lun Heowá! (Rom. 5:​10, 11).

7. Ida liña líderaguniwa wasaminarun luagu sun le lasufurirubei Hesusu lun gunfuranda wamani weiri lan wínsiñe lun Heowá?

⁷ Gayaraati gunfuranda wamani buidu weiri lan wínsiñe lun Heowá ánhawa asaminara luagu lueirin ebegi le lafayeirubei lun lesefuruniwa. Ariñagati meha Satanási úabei lan ni aban lubúein Bungiu lun úaragu lan danme le lagagibudagun luma lénrengunga. Lun larufuduni Heowá mítaran lan katei le aba lígirun lun lasufurirun Hesusu lubaragiñe lounwen (Hob. 2:​1-5; 1 Fe. 2:21). Aríagu liña meha Heowá lúmagiñe siélugiñe dan le hadügübei gürigia bula lau Hesusu ani bei haméi súdaragu ani dagua haméi luagu wagabu. Aríagu liña meha giñe lun gáriti le lasandirubei dan le lóunwenbei (Mat. 27:​28-31, 39). Gayaraati hamuga meha ladügün Heowá lun masuseredun lan sun le lun Liráü. Kei hénpulu, gayaraati hamuga meha lesefuruni dan le hariñagubei gürigia: “Sálbaleiti Bungiu guentó anhein inarüni lubéi luagu hínsiñe lan lun” (Mat. 27:​42, 43). Lun hamuga meha lasalbaruni Heowá Hesusu, mafayeirunbei hamuga lebegi esefuruni ani memeniginbaña hamuga gürigia ni murusun. Ligía lígirubei Heowá lun lasufurirun Liráü darí lagumuhóun.

8. Ida liña wasubudiruni sandí lan Heowá íruni luma gáriti dan le larihinbalin Lisaani asufurira? (Ariha huméi giñe dibuhu).

⁸ Inarüni mayusurun lani Heowá óunwenbu lubafu lun masufurirun lan Lisaani, gama lumoun, úati mini lan lira deré tan lanigi Heowá. Adüga lumutiwa Heowá lau iyarani lun wasandirun íruni luma ugundani, keiti lenege guánarügü lan ladügawa, furanguti sandí lani ligiaméme. Ani ariñagatu Bíbülia añahein lan gürigia ha “híruguagüda hamutiha” ani “gáñigüda haméi” (Sal. 78:​40, 41). Samina wamá luagu Abüraámü luma Isaakü le lisaani. Ariñagati meha Heowá lun Abüraámü lun ladagaragüdüni Isaakü le lisaani kei sákürifisiu (Agu. 22:​9-12; Ebü. 11:​17-19). Chóuruti sandí lan Abüraámü íruni luma idiheri sun aniha lan aranseha lun ladagaragüdüni lisaani keisi sákürifisiu. Anti Heowá? Ida liña lasandiragun lungua dan larihinbalin hasufuriragüdüni Lisaani ani áfara haméi? Siñagübeiti ni wasaminaruni lanarime íruni luma gáriti le lasandirubei Heowá. (Ariha huméi lidan jw.org bidéu le gíribei Hénpulu burí lánina afiñeni: Abüraámü [Fánreinti 2]).

9. Ka larufudahabei Rómana 8:​32, 38, 39 hun luagu línsiñehabu Heowá huagu luma hawagu lubúeingu?

⁹ Arufudati lebegi esefuruni ua lan ni aban hínsiñehabuti woun saragu luéidigia Heowá, ni besi wamada ni waduheñu ha yarafatimahaña woun (aliiha huméi Rómana 8:​32, 38, 39). Le linarün katei, hínsiñetiwa lun Heowá saragu, sügǘ lau wínsiñegua woungua. Samina huméi le: Busentün san hawinwandun lun súnwandan? Busentimati Heowá lun hawinwandun lun súnwandan. Busentün lun lagidarúniwa figóu huéi? Busentimati Heowá lun lagidaruni. Lérügüñein lamuriaha wama lun wánharun lun idewesei le ledewehabei woun luma lun gaganbadi wamá lun, ani afiñe wagíame luagu. Le lúgubu arufuda lan lebegi esefuruni hínsiñe wamá lun Heowá saragu. Lídanme iseri ubóu wafurendeiruba saragu luagu línsiñehabu Heowá (Apur. 3:11).

KA LARUFUDAHABEI LEBEGI ESEFURUNI WOUN LUAGU HESUSU?

10. a) Kátima meha nidiherigüdübalin Hesusu lubaragiñe lounwen? b) Ida liña meha larumadahani Hesusu liri Heowá? (Ariha huméi rekuáduru “Ídehati lúaragun Hesusu lun larumadahani liri Lúguchi”).

¹⁰ Nidiheriti meha Hesusu luagu le hasaminarubei gürigia luagu Lúguchi (Huan 14:31). Nidiheriti meha saragu luagu le lunbei hasaminaruni gürigia luagu, ladüga meha lafarúa lan kamá hamuga salufuriti luma giñe hariñagun luagu arufuda lan minebenehabuni lun Heowá le Lúguchi. Ligía lariñagunbei: “Bungiu Baba, gayara bumuti sun katei; sefubána luéi uniñein gífiti le” (Mat. 26:39). Keiti le úaragua lubéi Hesusu darí lounwen, gayaraati meha larufuduni luagu iyeeni lan sun le lariñagubei Mafia luagu Heowá.

11. Ida liña larufuduni Hesusu weiri lan hínsiñe gürigia lun? (Huan 13:1).

¹¹ Arufudati giñe lebegi esefuruni woun nidiheri lan Hesusu saragu hawagu gürigia, hawagutima lani disipulugu (Ari. 8:31; aliiha huméi Huan 13:1). Sun meha ya lubéi Hesusu Ubouagu, subudi lumuti meha lásügürüba lan lídangiñe saragu lénrengunga, súfuri ligíame aban óunweni le gáriti. Lau sun lira, marihin lumuti lani ministeriu kéirügü aban buligasion le lunbei lagunfuliruni, lubaragiñe lira, gúnfuliti lau sun lidasin lánina apurichihani, larufudahan luma líderaguniña gürigia tau sun lanigi. Weyu le lóunwenbei, sagati dan lun lachibuni hagudi lani apostolugu, arufudahati ani ru ligía gurasu houn (Huan 13:​12-15). Ani dan le dáwaguañu lubéi luagu wagabu, ruti emenigini lun gürigia salufuriti le lóubagiñebei, ani ariñaga ligía lun Huan lun lóunigirunu María to lúguchu (Luk. 23:​42, 43; Huan 19:​26, 27). Sun dan le laubei Hesusu ya Ubouagu, arufuda lumuti weiri lan hínsiñe gürigia lun ani ru lumuti libagari hawagu.

12. Ka ladügübei Hesusu wawagu uguñe weyu?

¹² Dan le lóunwenbei Kristu, aba lagumuchaguagüdüni lubafu figóu lun sun dan ani anihamémegua adüga katei wawagu (Rom. 6:10). Ka katei ladügübei Hesusu wawagu? Lawadigimariduña saragu lun wibihiba lan katei buiti seremei lebegi esefuruni. Samina wamá luagu sun le ladügübei keisi Urúei, kei Fádiri Íñutimati luma kei lichügüdina damuriguaü (1 Ko. 15:25; Efe. 5:23; Ebü. 2:17). Rúaali dasi lun lun lóundaraguniña kristiánugu anuadirúaaña hama saragu gürigia, aban dasi le lunbei lagunfuliruni sunsuinagubei lubaragiñeme lagumuchun óunwenbu asufuriruni (Mat. 25:32; Mar. 13:27).b Yusu lumuti giñe Hesusu Musu Úaraguati lun líchuguni le wemegeirubei woun lun wasigirun eseriwida lun Heowá lau úaraguni lidan lagumuhóun dan le (Mat. 24:45). Ani lasigiramémeba íderaguawa lídanme Larúeihan le lánina Milu Irumu. Kei warihini, dan le lederegerunbalin Heowá libagari Liráü, mámarügü deregerügü lumuti lun líchuguni libagari, derege lumuti giñe lun ladügün saragu katei luagu wafulesein.

SIGÍ HUMÁ AFURENDEIRA KATEI ISERI

13. Ida luba líderaguniwa wararamagun asaminara lun wasigirun afurendeira amu burí katei luagu ínsiñeni le lasandirubei dandu Bungiu kei Hesukrístu wawagu?

¹³ Gayaraati wasigirun afurendeira luagu línsiñehabu Heowá luma Hesusu ánhawa araramagua asaminara luagu le adüga hamaalibei wawagu. Gayaraabei waliihan aban o lóugiñe aban Ewanhéliu lidan lidaani Aritaguagülei lidan irumu le. Áfaagua humá lun maliihan humá saragu kapítulu, lubaragiñe lira, áluaha humá lébuna lúntima línsiñedun Heowá hun luma Hesukrístu. Mabulieida huméi le: áfaagua humá habahüdahani houn amu le furendei humaalibei.

14. Según Sálumu 119:​97, ka lunbei wadügüni lun wasigirun afurendeira luagu lebegi esefuruni luma luagu burí amu arufudahani le tídanbei Bíbülia? (Ariha humóun giñe iyawaü).

¹⁴ Anhein barühadün lubéi saragu irumu lidan inarüni, másiñati hálügüdagun houngua anhein gayara lubéi hafurendeirun iseri katei lídangiñe le subudi humaalibei, kei burí liricha Bungiu, línsiñehabu luma lebegi esefuruni. Le linarün katei, magumuti lafurendeirun gürigia luagu burí tema le. Ka gayaraabei líderagunün lun hasigirun afurendeira? Aliiha huméi ani aturiaha huméi lubuidun burí ariñahani le tídanbei wani agumeiraguagüdüni. Anhaün adarira aban bérusu tídangiñeti Bíbülia le úabei gunfuranda humani, áluaha humá ariñahani. Ani dan le aünha lan adügei huberesegun ráramagua humá asaminara luagu le furendei humaalibei luagu Heowá, luagu Lisaani luma luagu ínsiñeni le hasandirubei wawagu (aliiha huméi Sálumu 119:97).

15. Ka uagu lunti lubéi wasigirun aríaahei lubuidun burí ariñahani le tídanbei Bíbülia?

¹⁵ Mábürühala harüna anhaün asandira mafurendeirun humá katei iseriti dan haturiahanu Bíbülia. Ítara liña taturiahóun Bíbülia kei haríaahan golu. Añahein gürigia, sügütiña saragu dan aríaaha golu. Gaguraasuntiña ani mábürühanti harüna, ladüga subudi hamuti íbini lan murusun life golu, gebegiti. Lubuidun ariñahani le wadarirubei tidan Bíbülia, gebegitimati sügǘ lau golu (Sal. 119:127; Ari. 8:10). Ligíati, gaguraasun humá mígira huméi haliihanu luma haturiahanu Bíbülia (Sal. 1:2).

16. Ida luba wáyeihani Heowá luma Hesusu?

¹⁶ Sun aünha lan aturiaha, aríaaha humá igaburi lun hawinwanduni sun le furendei humaalibei. Kei hénpulu, gayaraati háyeihani liricha Heowá lau úa lan himei humá aban gürigia luéi aban. Gayaraati giñe wáyeihani ínsiñeni le lasandirubei Hesusu luagu Lúguchi luma hawagu gürigia lau wadügüni le lagurabubei Bungiu wámagiñe luma lau wíderaguniña amu, íbini megei lan katei le áfaaguni. Áyeiha waméi giñe Hesusu lau wapurichihan houn amu lun gachansin hamá lun hibihin buiti lídangiñe lebegi esefuruni.

17. Kaba wariha lidan leweñegua aturiahani?

¹⁷ Eibu gunfuranda wamani ani gebegi ligía lebegi esefuruni woun, hínsiñetimabei Heowá luma Lisaani woun. Ábameti hínsiñetima wamá houn (Huan. 14:21; Sant. 4:8). Ligíati, yusu waméi sun ariñahani le líchugubei Heowá woun buidu buidu lun wasigirun afurendeira luagu lebegi esefuruni. Lidan leweñegua aturiahani, warihibei ka lan buiti lanügübei lebegi esefuruni woun ani ka lan gayaraabei wadügüni lun weteingiruni Heowá luagu ínsiñeni le larufudubei woun lau líchuguni lebegi esefuruni.