Abiniruni le wámabei ladüga wínsiñe lun Heowá

1. Ida luba wagundaaragüdüni Heowá?

SAMINA wamá aba lan wedewehan aban idewesei buiti ani le huuti lun aban gürigia le hínsiñebei woun. Ma híruti hamuga lun areidarügü lani gürigia idewesei ligía, ani aba labulieiduni? Luagu le aban oubaü, ma gúndaabadiwa hamuga lau larufuduni gürigia ligía leteingiradi lau layusuruni idewesei le? Ka larufudahabei hénpulu le woun? Derege lani Heowá libagari Liráü wawagu. Ma lugundan Heowá lau larihiniwa arufudei weteingiradi luagu lebegi esefuruni luma luagu ínsiñeni le larufudubei woun! (Huan 3:16; Rom. 5:​7, 8).

2. Kaba wariha lidan aturiahani le?

² Lau lásügürün dan, gayaraabei wagumeserun eferidirei weteingiradi luagu lebegi esefuruni. Ítara liña hamuga kamá wareiduñein lidan aban fulasu le ñein lubéi marihin wamani ani aba wabulieiduni. Lun masuseredun lan lira woun luma lun meferidirun wamani weteingiradi, lunti wararamagun asaminara gabügürügua luagu le adüga láalibei Heowá luma Hesusu wawagu. Ligía lébunabei aturiahani le. Wayanuhaba luagu ida luba lan lahuudun lebegi esefuruni guentó luma ida luba lan lahuudun woun ámuñegü. Warihibei giñe ida luba lan warufuduni lun Heowá seremei wamani luagu ínsiñeni le larufudubei woun lídantima lidaani Aritaguagülei.

BUITI LE LANÜGÜBEI WOUN GUENTÓ

3. Ka buiti wibihubei uguñe weyu seremei lebegi esefuruni?

³ Uguñe weyu, wasagaruña buiti lídangiñe lani Hesusu sákürifisiu. Kei hénpulu, seremei lebegi esefuruni, feruduna lumuti Heowá wafigoun. Mama dǘgüdawarügüti luagu lun ladügüni, ladügünbalin ladüga busén lan. Ariñagati Dawidi lidan aban uremu, buin lau eteingiruni: “Ladüga, buguya Nabureme, buítibu ani gíchigadi buguya ferudun” (Sal. 86:5; 103:​3, 10-13).

4. Ka un líchigei Heowá lebegi esefuruni? (Lúkasi 5:32; 1 Timotéu 1:15).

⁴ Añahein gürigia saminatiña madüna hamani lun feruduna lániña Heowá. Le linarün katei, ni aban wádangiñe madüna wamuti. Ariñagati apostolu Pábulu luougua: “Madünatina ni lun nanügǘn keisi apostolu”. Lárigiñe ábaya lariñagun: “Ítara nubéi guentó lugundun areidati Bungiu numa” (1 Ko. 15:​9, 10). Dan le wasakürihan lídangiñe figóu le wadügübei, feruduna lumutiwa Heowá. Ka uagu? Mama ladüga gadüna wamani lun feruduna lániwa, ladügünbalin ladüga wínsiñe lun. Ligíati, ánhawa asaminara madüna wamá lun feruduna lániwa Heowá, haritagua waméi mama lan houn gürigia mafigountiña líchigei lebegi esefuruni, ru lumuti houn gürigia gafigountiña ha asakürihabaña lídangiñe figóu (aliiha huméi Lúkasi 5:32; 1 Timotéu 1:15).

5. Ka uagu siñá lubéi lariñagun aban gürigia gadüna lani mosu lan feruduna lani Heowá?

⁵ Meberesenga átirihali lan irumu wau eseriwida lun Heowá, maweiyasun wamá asaminara gadüna wamani lun feruduna lániwa. Inarüni gebegi lan lun sun le adüga wamaalibei luagu (Ebü. 6:10). Gama lumoun, mama líchuguñein Lisaani lun lafayeirúniwa luagu le wadügübei lidan weseriwidun. Ru lumuti keisi aban idewesei. Ánhawa hamuga ariñaga gañei wamaali lan lareini o wagurabaha lóuseruniwa lidan aban igaburi espechaliti, kéigubeirügü wariñaguña lan hamuga memegeirun wamani lounwen Kristu wawagu (ariha huméi giñe Galasiana 2:21).

6. Ka meha uagu láfaagua Pábulu lidan leseriwidun lun Heowá?

⁶ Subudi lumuti meha Pábulu meberesenga lan átirihali lan lawadigimaridun luagu lufulesein Heowá, siñati meha feruduna lani Heowá ítaraguarügü. Ka san uagu láfaagua Pábulu saragu lidan leseriwidun lun Heowá? Busenti meha leteingiruni Bungiu luagu areini le líchugubei lun (Efe. 3:7). Ítarameme, busentiwa wasigirun eseriwida lun Heowá lau ubebeni, mama ladüga busén wamá wagañeiruni lugudemehabu, wadügünbalin ladüga busén wamá warufuduni weteingiradi lun luagu lugudemehabu.

7. Ka amu igaburi le ídanbei gayara lan wasagarun buiti guentó lídangiñe lebegi esefuruni? (Rómana 5:1; Santiagu 2:23).

⁷ Amu buiti le wámabei guentó seremei lan lebegi esefuruni, gayara lan gamadagua wamá buidu luma Heowá.a Kei le aubei warihei lidan aturiahani le lubaragiñebei le, dan le wágurahoun, mamadaguatiwa meha luma Bungiu. Gama lumoun ladüga lebegi esefuruni, gayaraahali ‘darangilu wamá luma Bungiu’ luma lun wayarafadun lun (aliiha huméi Rómana 5:1; Santiagu 2:23).

8. Ka uagu lunti lubéi seremei wamani Heowá luagu chansi le líchugubei woun lun wafurieidun lun?

⁸ Wafurieidun lun Heowá ligíatima aban katei súdiniti le gayaraabei wadügüni seremei lubuidun wamadagua luma. Mámarügüñein furíei le wadügübei dan le wadamuridagun laganba Heowá, aganba lumuti giñe le burí wadügübei wábugua. Inarüni adüga lan furíei lun gálumañu wamá, ani ruti giñe darangilaü, gama lumoun, mama ligía súdinibei, le súdinitimabei íderagua lániwa lun wederebudagüdüni wamadagua luma Bungiu (Sal. 65:2; Sant. 4:8; 1 Huan 5:14). Dan meha le ya lubéi Hesusu Ubouagu, gabügürüguati meha lafurieidun lugundun subudi lumuti meha luagu aganba lani Heowá, ani furíei ligía ladügüba meha lun here lan lumadagua luma (Luk. 5:16). Wéiriti weteingiruni Heowá luagu sákürifisiu le ladügübei Hesusu, lugundun gayaraati gamadagua wamá luma Heowá luma lun wafurieidun lun.

BUITI LE LUNBEI LANÜGÜNI WOUN ÁMUÑEGÜ

9. Ida luba hasagarun lubúeingu Heowá ha úaraguabaña buiti lídangiñe lebegi esefuruni ámuñegü?

⁹ Ida luba hasagarun lubúeingu Bungiu ha úaraguabaña buiti lídangiñe lebegi esefuruni ámuñegü? Líchugubei Heowá ibagari magumuchaditi houn. Saminatiña saragu gürigia siñabei lan lawinwandúniwa lun súnwandan, lugundun barühaña gürigia saragu milu irumu óunwegua. Gama lumoun, adüga lumutiña Heowá gürigia lun hawinwandun lun súnwandan. Íbini hénrengu lan houn gürigia hafiñerun gayara lan lasuseredun le, gayaraati wachoururuni lasusereduba lan, lugundun fáyeiti Heowá aban ebegi wéiriti lau lederegeruni libagari Lisaani lun gayara lan wawinwandun lun súnwandan (Rom. 8:32).

10. Ka emenigini hawagubei kristiánugu anuadirúaaña hama lubúeingu Heowá ha hádangiñebaña amu mudún?

¹⁰ Íbini ámuñegüba lan weresibirei ibagari magumuchaditi, busenti Heowá lun wasaminarun luagu, lúmagiñe guentó. Memeniha hanigi kristiánugu anuadirúaaña hawinwandun sielu luma lun harúeihan ligibuagu Ubóu le úara luma Kristu (Aruf. 20:6). Ánhañati amu mudún hemenigitiña hawinwandun ya Ubouagu lidan Paraísu le ñeinba lubéi úaali lanme asufuriruni ni gáriti (Aruf. 21:​3, 4). Hemenigitün san lun hawinwandun lun súnwandan ya Ubouagu? Mama aban emenigini lóuguati lebegi. Lugundun adügǘwatiña gürigia lun hawinwandun lun súnwandan ya Ubouagu. Ani ladügüba katei le lun gunda wamá sunsuinagubei.

11, 12. Ka lídangiñe abiniruni le lunbei libihín lidan Paraísu wayumahabei? (Ariha huméi giñe dibuhu).

¹¹ Samina humá ida luba lan hibagari lidan Paraísu. Úaalime sandi ni óunweni, madiheridunhadiwame luagu burí katei líbeina le (Isa. 25:8; 33:24). Líchugubei Heowá sun le habusenrubei hun. Ka habusenrubei hafurendeirun? Hínsiñeti hamuga san hun hafurendeirun adibuha, eremuha, ábunagua muna, o hábunagun sun tuwuyeri nadü? Lídanme Paraísu, mégeiwabaña gürigia lun hadibuhan, lun hábunagun muna, lun hábunagun éigini, mégeiwabaña ábougutiña, ábunagutiña fuluri, hama gürigia burí ha lúnbaña hadügün ámuñegueinarügü tulu lun gayaraabei lan laransehóun saragu katei lídanme Paraísu (Isa. 35:1; 65:21). Danme le hawinwandun lun sun dan, gadaanihadünme lun hadügüni sun burí katei le!

¹² Maame wagundan weresibiruniña sun ha lúnbaña háguyugun! (Adü. 24:15). Maame lubuidun wasigirun afurendeira luagu Heowá luma luagu sun le adüga láalibei (Sal. 104:24; Isa. 11:9). Gama lumoun, le buídutimabei lídangiñe sun katei le, gayaraabei lan wáhuduragun lun Heowá masandirunga duru luagu adügaadiwa lan somu katei wuribati. Hasansirubei hamuga san abiniruni le lunbei hibihini ámuñegü luágurügü katei le líchugubei ubóu le, le nege genegebei buidu lan? (Ebü. 11:25). Buídutimabei ibagari ámuñegü sügǘ lau furumiñeguarügü katei le gayaraabei wibihini lidan ubóu le guentó. Haritagua waméi mámaali lanme aban füramasei Paraísu, lugundun awanhame ñein. Sun le lagunfuliruba ladüga hínsiñe wamá lun Heowá saragu darí lun lederegeruni Lisaani lun lounwen luagu wafigoun.

ARUFUDA WAMÉI LUN HEOWÁ SEREMEI WAMANI LUAGU LÍNSIÑEHABU

13. Ida luba warufuduni seremei wamani Heowá luagu línsiñehabu? (2 Korintuna 6:1).

¹³ Ida luba warufuduni lun Heowá seremei wamani luagu lebegi esefuruni? Wadügübei lau warufuduni wadügüni lan lugundan ligía lan katei súdinitimabei woun lidan wabagari (Mat. 6:33). Le linarün katei, “hilati Kristu wawagu sun wagía, lun sun lan ha gabagaribaña, mámaali láamuga houn guánarügü habagarida, lun habagaridun lun le óunwebei hawagu, sará ligía lídangiñe óunweni” (2 Ko. 5:15). Mabusenrúntiwa weferidiruni lufulesein Bungiu lárigiñe sun le adüga láalibei wawagu (aliiha huméi 2 Korintuna 6:1).

14. Ida luba warufuduni afiñe wamá luagu adundehani le líchugubei Heowá woun?

¹⁴ Amu igaburi lun seremei wamani Heowá luagu línsiñehabu lau warufuduni wafiñen luagu luma wafalaruni ladundehan. Ida lubati wadügüni? Dan le wanúadiruni le lunbei wadügüni lidan wabagari, kei burí kaba lan waturiaha o ka lan wadagimanu lunbei wánharun lun, lunti gabaroun wamani lisaminan Heowá libügürü katei le (1 Ko. 10:31; 2 Ko. 5:7). Dan le warufuduni wafiñen lau le wadügübei, susereti aban katei le buiti: aba lederebugudun wafiñen luma wamadagua luma Heowá. Aba giñe lederebugudun wemenigin (Rom. 5:​3-5; Sant. 2:​21, 22).

15. Ida luba warufudun geteingiradi luagu lebegi esefuruni luma luagu línsiñehabu Heowá lidan lidaani Aritaguagülei?

¹⁵ Ábaya igaburi lun warufuduni seremei wamani Heowá luagu lebegi esefuruni luma luagu línsiñehabu lau wadügüni sun wayaraati lidan lidaani Aritaguagülei. Lau wagunbirahaniña amu luma lun wachülürün lidoun Aritaguagülei (1 Tim. 2:4). Danme le wagunbirahaniña amu, afuranguagüda waméi houn kaba lan adügǘwa lidan adamuridaguni espechaliti le. Gayaraati warufuduni bidéu le lídanbei jw.org houn, le gíribei: Ka uagu lounwe Hesusu? lúmati Haritagua waméi lounwen Hesusu. Hadügübei wéiyaaña lidan afiñeni sun hayaraati lun hagunbirahaniña sun ha madamuridagunhaña ani mapurichihan hagía. Wéiribei ugundani le dandu sielu kei ubouagu anhein agiribuda aban hádangiñe lubúeingu Heowá ha tidoun lóundarun (Luk. 15:​4-7). Lidan Aritaguagülei adüga waméi sun wayaraati lun wabusuragun houn sun wíbirigu dandu houn ha iserigiñabaña luma giñe houn ha lüha madamuridagun hamá wama. Adüga waméi sun wayaraati lun buidu lan hasandiragun súngubei houngua! (Rom. 12:13).

16. Ka uagu lunti lubéi waganwoundagüdüni weseriwidun lun Heowá lidan lidaani Aritaguagülei?

¹⁶ Gayaraati san waganwoundagüdüni weseriwidun lun Heowá lidan lidaani Aritaguagülei? Ligía aban lídangiñe lubuidun igaburi lun warufuduni weteingiradi luagu sun le adüga láalibei Heowá luma Hesusu wawagu. Éibutima wapurichihan, éibume warihini líderaguniwa Heowá, ábameti léredun wafiñen luagu (1 Ko. 3:9). Lanwoun lira, mabulieida waméi waliihani fánreinti le tídanbei Bíbülia lubá Aritaguagülei le áfuachubei tidan garüdia Taturiahóun Lererun Bungiu sagü weyu lúmati le áfuachubei lidan ubanaü le tani garüdia Le lunbei ladügǘniwa lidan adamuridaguni. Gayaraati wayusuruni bérusu burí le tídangiñeti Bíbülia lun waturiahan wábuguarügü.

17. Ka adügübei lun gunda lan Heowá wau? (Ariha huméi rekuáduru “Ligaburi seremei wamani Heowá luagu línsiñehabu”).

¹⁷ Ánheinti siñá lubéi hafalaruni sun adundehani le ichugúbei lidan aturiahani le? Madiherida humá. Haritagua huméi magoubaguagüdün lani Heowá le hadügübei luma le hadügübei amu. Ariha lumuti le tídanbei hanigi ani gúndaati lugundun subudi lumuti seremei humani tídangiñe sun hanigi luagu lubuidun idewesei lánina esefuruni (1 Sam. 16:7; Mar. 12:​41-44).

18. Ka uagu weiri lubéi seremei wamani Heowá luma Hesusu?

¹⁸ Seremei lebegi esefuruni gayara lubéi feruduna lani Heowá wafigoun, gamadagua wamá luma, luma lun hemenigi wamá lun wawinwandun lun súnwandan. Arufuda waméi súnwandan seremei wamani Heowá luagu línsiñehabu, le ínchahabalin lun líchuguni sun abiniruni le woun (1 Huan 4:19). Arufuda waméi giñe seremei wamani Hesusu ladüga wínsiñe lun darí lun líchuguni libagari wawagu (Huan 15:13).